Lipoti a Ē Faalauiloa le Malo

Ua Tauia se Sailiga mo le Atua Moni

I LE senituri lona sefulu T.L.M., na matuā faatumulia ai i tapuaiga sese le malo fuifuilua o Iuta. Ae i le lotolotoi o lea ifogā tupua tele, na soifua ai se tagata sa saʻo lona loto i le Atua. O lona igoa o Iosefatu. Na faapea upu a le perofeta o Ieu e faatatau ia te ia: “Ua maua mea lelei o ia te oe, ina ua e . . . saunia lou loto e sailiili i le Atua [moni].” (2 Nofoaiga a Tupu 19:3) E faapena foi i aso nei, i nei “aso faigata,” e faitau miliona tagata ua ‘saunia o latou loto’ e saili mo le Atua moni o Ieova. (2 Timoteo 3:1-5) Ua faamautuina lea manatu e le mea na tupu i Togo i Aferika i Sisifo o loo taʻua i lalo.

Na auai Casimir i se aʻoga Katoliko ma faia lona uluai Komunio i le iva o ona tausaga. Ae ina ua 14 ona tausaga, sa lē toe alu Casimir i le lotu. Na faapogaia ai i lea mea lona fefe tele ona na faapea a ia o lona misia o le Misasa e iu ai i lona alu atu a lē i le afi i hele, e mautinoa o pulekatolio.

I le aʻoga, na aufaatasi atu ai Casimir i se vaega o ni talavou na feiloai e faatasi i le vaiaso e suesueina le Tusi Paia. Na amata ai foi e ia lava ona faitauina le Tusi Paia. I se tasi la taimi na faitau ai Casimir i le tusi o Faaaliga e uiga i se manu feai matautia o loo alu aʻe nai le sami. (Faaaliga 13:1, 2) Ina ua ia fesili atu i le taʻitaʻi o le vaega suesue o le Tusi Paia e uiga i ai, na taʻu atu ia te ia faapea o le manu feai e moni ma o le a sau moni lava mai le sami. Na faapopoleina ai Casimir i lenei faamalamalamaga ona e lē mamao mai le Vasa Atalani le mea e nofo ai. Na manatu ai o ia faapea o ia lea o le a iai ia i latou o le a faatamaia muamua lava e le manu feai.

Na amata loa ona teu e Casimir ana tupe ina ia mafai ai ona sola atu i le toafa i luga i le itu i mātū ia alofia ai le manu feai. Na ia taʻuina i sana uo i lana vasega ana fuafuaga ua fai. O lana uo la o se tasi o Molimau a Ieova, na faamautinoa atu ia te ia e leai sea manu moni faaletino o le a sau mai le sami. E lei umi mulimuli ane, ae valaauliaina loa Casimir i sauniga i le Maota o le Malo. Na fiafia tele o ia i sauniga ma amata loa ona ia auai atu i ai e lē aunoa. Na ia taliaina foi se suesuega faale-Tusi Paia i le aiga.

A o agaigai i luma Casimir i lana suesuega, ae amata loa teteega mai lona aiga. Na faatino e lona aiga ia tapuaiga i tuaa ma ʻaiina aano o manu e lē faaaluina le toto na totoe mai faigā taulaga. Ina ua teena ma le faaaloalo e Casimir le ʻaiina o aano o manu, na faamataʻuina o ia ma fai atu i ai e alu i fafo ma le fale. Sa na ona fifilemu o Casimir, ona lē faaauauina lea o faamataʻuga. Peitai, mo le tolu masina, sa na o le pau lava ia o aano o manu e laulauina i meaʻai a le aiga. Sa iai la se faafitauli ia Casimir i le tau leai o ni ana mea e ʻai, peitai sa onosai pea o ia i lea mea ma isi faigata.

Na faaauau ona faia e Casimir se agaigai i luma faaleagaga ma oo atu ai i le tuuina atu ma le papatisoga. Mulimuli ane, sa tofia ai o ia o se auauna o le faiva ma auai i le vasega lona fa o le Aʻoga mo Toleniga i le Faiva, i Togo. I le taimi nei, o loo olioli ai o ia i le faia o galuega tauofo i le lālā.

Ioe, maeu le moni o upu a le tupu o Tavita i le tele o mea e tutupu: “Afai e te saili atu ia [Ieova], ona e maua ai lea o ia.”—1 Nofoaiga a Tupu 28:9.

[Ata i le itulau 8]

O Casimir (itu taumatau) o loo olioli i galuega tauofo i le lālā