O le ā e Manaomia mo se Faaipoipoga Taulau Manuia?

Po o le a e manao ea e te oso i totonu o se vaitafe ae e te lei aʻoaʻoina muamua le aau? O se gaoioiga valea faapena, e ono afaina ai oe—pe oo lava ina oti ai. O lea la, seʻi mafaufau i le toatele o tagata ua nanati atu e faaipoipo ae e itiiti lava se iloa e uiga i le auala e faatinoina ai tiute tauave o aafia ai.

NA FETALAI Iesu e faapea: “O ai foi so outou ua fia fai se ʻolo, e le muai nofo i lalo e faitau tupe e totogi aʻi, po ua lava ana mea e faauma ai?” (Luka 14:28) O le mea moni e faatatau i le fausiaina o se olo, e faapena foi ona moni i le atiina ae o se faaipoipoga. O i latou o ē mananao e faaipoipo, e tatau ona fuafua ma le faaeteete mea e manaomia e le faaipoipoga ina ia faamautinoa ai e mafai ona latou ausia mea e manaomia.

O se Vaaiga i le Faaipoipoga

O le iai o se paaga o lē o le a lua saosaolaumea i taimi e olioli ai o le olaga ma faanoanoaga, o le mea moni o se faamanuiaga. O le faaipoipoga e mafai ona faaleleia ai se faalogona gaogao ua māfua ona o le lagona tuua toatasi po o le loto mafatia. E mafai foi e le faaipoipoga ona faamalieina lo tatou naunau mo le alofa lea na fananau mai ma i tatou, le manaomia o se paaga, ma o tatou manaoga totino. Ona o ni mafuaaga talafeagai, na fetalai ai le Atua ina ua uma ona faia o Atamu: “E le lelei ina toatasi o le tagata; ou te faia sona fesoasoani e tatau ma ia.”—Kenese 2:18; 24:67; 1 Korinito 7:9.

Ioe, o le faaipoipo e mafai ona foia ai nisi faafitauli. Ae o le a faaofi atu ai foi ma nisi faafitauli fou. Aisea? Auā o le faaipoipoga o le tuufaatasia lea o ni uiga eseese faaletagata se lua atonu o le a taumafai e faafetaui atu le tasi i le isi, ae matuā lē mafai lava ona tutusa. O lea, e oo lava i ulugalii e fetaui lelei o la uiga, o le a feteenai i nisi taimi. Na tusi mai le aposetolo Kerisiano o Paulo e faapea, o i latou e faaipoipo o le a oo i “puapuaga i le tino”—pe e pei ona taʻua ai e le New English Bible e faapea, “o tiga ma mafatiaga o lenei olaga i le tino.”—1 Korinito 7:28.

Pe sa lē mautonu ea Paulo i lenei mea? E leai! Sa na ona ia uunaia i latou o ē o mafaufau e faaipoipo ina ia manatunatu i tulaga moni o le a iai. O le lagona naunau e tosina atu i se tasi tagata, e lē o le fua saʻo lena e iloa ai le ituaiga o olaga faaipoipo o le a iai i masina ma tausaga o loo fotuai mai pe a mavae le aso o le faaipoipoga. E tofu lava faaipoipoga ma luʻi ma faafitauli iloga e tulai mai. O le fesili e lē faatatau i le po o le a tulai mai faafitauli, ae o le auala e faafesagaia ai pe a tulai mai.

O faafitauli, ua maua ai e le tane ma le avā le avanoa e faaalia ai le moni aʻiaʻi o le alofa o le tasi mo le isi. Mo se faataitaiga: O se vaa laʻu pasese e ono foliga matuā matagofie mai a o taatia e lē o faaaogaina, o loo nonoa i se pou. Ae peitai, e iloa lona aogā moni pe a tuu i le sami—ae maise lava i le taimi e fetaiai ai ma le fafati mai o galu malolosi i le taimi o se afā. E faapena foi le malosi o noataga o se faaipoipoga ona lē na ona faaalia mai i taimi toafilemu o le alofa fetosinaai. I nisi taimi, e faamaonia le moni o le alofa lea i lalo o tulaga faigata ia o le a mafai ai e se ulugalii ona tumau i afā o mea faigata.

Ina ia faia faapea, e manaomia ai e se ulugalii faaipoipo le faia o ni tautinoga, auā na fuafuaina e le Atua le tamaloa e “faatasi ma lana avā” ma “avea ai . . . i laua ma tino e tasi.”  (Kenese 2:24) O le manatu i le faia o ni tautinoga, ua fefefe ai le toatele o tagata i aso nei. Ae peitai, o se mea talafeagai e faapea, o ni tagata se toalua o ē e alofa moni le tasi i le isi o le a mananao e faia se tautinoga aloaia ina ia nonofo faatasi. O le tautinoga e ogatasi ma le tulaga mamalu o le faaipoipoga. Ua saunia ai se faavae mo le maufaatuatuaina e faapea, e tusa lava po o le ā se mea e ono tupu mai, o le a felagolagomai le tane ma le avā. * Afai e te lei nofo sauni mo sea tautinoga, e te lei nofo sauni foi la mo se faaipoipoga. (Faatusatusa i le Failauga 5:4, 5.) E oo lava ia i latou ua uma ona faaipoipo, e ono manaomia ona toe faamalosia le talisapaia o le matuā tāua o le faia o se tautinoga, ina ia mafai ona faatumauina ai se faaipoipoga.

Se Vaaiga ia te Oe Lava

E lē taumatea e mafai ona e tusia se lisi o uiga e te manao ia iai i se paaga. Ae peitai, e matuā sili atu ona faigata lou vaavaai ifo ia te oe lava ma iloa ai le auala e mafai ona e saosaolaumea ai i se faaipoipoga. E tāua tele lou iloiloina o oe lava i le taimi a o lei faia ma pe a uma ona faia tautoga o le faaipoipoga. Mo se faaaoaoga, fesili ifo ia te oe lava i fesili nei.

• Po ua ou lotomalie e uai atu loʻu loto i laʻu paaga mo le olaga atoa?—Mataio 19:6.

I aso o le perofeta o le Tusi Paia o Malaki, e toatele tane na tuua a latou paaga, atonu ina ia toe faaipoipo atu i ni fafine laiti. Na fetalai ai Ieova e faapea, ua tumu lana fata faitaulaga i loimata o avā ua tuulafoaiina, ma na ia tausalaina ia tane o ē sa “faaʻoleʻole” i a latou paaga.—Malaki 2:13-16.

• Afai ou te mafaufau e faaipoipo, po ua ou pasia ea tausaga talavou o le taimi lea e malolosi ai faalogona tau feusuaiga ma mafai ona faaseseina ai se filifiliga saʻo?—1 Korinito 7:36.

Fai mai Niki o lē sa 22 ona tausaga i le taimi na faaipoipo ai: “E matuā lamatia lava le faaipoipo a o laitiiti.” Ua ia lapatai mai e faapea: “O ou faalogona, sini, ma mea e te fiafia i ai, o le a fesuisuiai pea mai le taimi a o e latalata atu i le luasefulu o ou tausaga seia oo atu i le 25 ma faasolo atu ai i le 30. O le mea moni, o le nofo sauni mo se faaipoipoga e lē na o le matua e fua i ai. Ae peitai, o le faaipoipo o se tasi ae lei pasia le tulaga talavou o le taimi o le tauosoosoga o faalogona faaleituaiga ma o loo sili ona malolosi, e mafai ona  faaseseina ai mafaufauga o se tasi ma faatauasoina ai i faafitauli e ono oo mai i le lumanai.

• O ā ni uiga o loo ia te au o le a fesoasoani ina ia ou saosaolaumea ai i laʻu faaipoipoga ina ia taulau manuia?—Kalatia 5:22, 23.

Na tusi atu le aposetolo o Paulo i Kerisiano i Kolose: “Ia oofu outou i le alofa mutimuti vale, ma le agalelei, ma le loto maulalo, ma le agamalu, ma le onosai.” (Kolose 3:12) Ua talafeagai lelei lava le fautuaga lenei mo i latou o loo mafaufau e faaipoipo faapea foi ma i latou ua uma ona faaipoipo.

• Po o ia te au le taʻumatuaina o loo manaomia e lagolagosua ai i se paaga i le taimi o faigata?—Kalatia 6:2.

Ua faapea mai se tasi fomaʻi: “Pe a tutupu mai faafitauli, o le faanaunauga lava, o le tuuaia lea o le paaga. O ai e tuuaia e lē o le mea lena e sili ona tāua. Na i lo o lea, o le auala e mafai ona felagolagomai uma ai le tane ma le avā i le faaleleia o le faiā faalefaaipoipoga.” Ua tatau lelei upu a le tupu poto o Solomona i ulugalii faaipoipo. Na ia tusia e faapea: “E sili ona lelei o le toalua i le toatasi; . . . . Auā afai e paū le tasi e faatuina o ia i luga e lē la te toalua. Ae faapefea i le ua toatasi pe a paū, pe a leai sē la te toalua e faatu ia te ia i luga?”—Failauga 4:9, 10.

• Pe masani ona ou fiafia ma vaavaai atu mo ni mea lelei, pe tele ina ou mata faanoanoa ma faalemautinoa?—Faataoto 15:15.

O se tagata e iai mafaufauga lē mautinoa, e manatu lava ia e leaga aso uma. O le faaipoipoga la e lē mafai ona suia faafuasei ai lenei uiga! O se tagata nofo toatasi—se alii po o se tamatai—o lē e matuā faitio pe e lē mautonu, o le a oo foi ina avea o se tagata faaipoipo e faapena ona faitio ma lē mautonu. O se uiga lē lelei faapena e mafai ona oo ai le faaipoipoga i se tulaga matuā mafatia.—Faatusatusa i le Faataoto 21:9.

• Pe ou te toafilemu pe a oo mai ni omiga, pe ou te lolo atu i le faia o ni faaupuga lē pulea o le ita?—Kalatia 5:19, 20.

Ua poloaiina Kerisiano ina ia “faagesegese ona ita.” (Iakopo 1:19) A o lei faaipoipo ma i le taimi o le faaipoipoga, e tatau i se tane po o se fafine ona atiina ae le tomai e ola ai e tusa ma lenei fautuaga: “A outou ita, aua le agasala ai; aua neʻi goto le la o ita pea outou.”—Efeso 4:26.

Se Vaaiga i Lē o le a Avea ma Au Paaga

Ua faapea mai se faataoto i le Tusi Paia: “O le ua mafaufau, ua faautauta o ia i lona ala.” (Faataoto 14:15) O le mea moni lava lenei pe a oo ina filifilia se paaga faaipoipo. O le filifilia o se paaga faaipoipo, o se tasi lea o filifiliga aupito sili ona tāua o le a faia e se tane po o se fafine. Ae peitai, ua matauina e faapea, o le toatele o tagata, ua faaaluina le tele o le taimi e filifili ai po o lē fea taavale e faatau po o lē fea aʻoga e alu i ai na i lo o le filifilia po o lē fea tagata e faaipoipo atu i ai.

I le faapotopotoga Kerisiano, o i latou ua tuuina atu i ai tiute tauave, e “muamua ona tofotofoina po ua agavaa.” (1 Timoteo 3:10, NW) Afai o e mafaufau e faaipoipo, e te manao la ia faamautinoa po ua “agavaa” lea tagata. Mo se faaaoaoga, ia manatunatu i fesili ia o loo mulimuli mai. E ui o loo aumaia mai manatu o se fafine, ae o le tele o mataupu silisili e faatatau foi i se tamaloa. Ma e oo lava ia i latou o ē ua faaipoipo, e mafai ona maua aogā mai le iloiloina o nei manatu.

• O le ā le ituaiga o talaaga e iai o ia?—Filipi 2:19-22.

 Ua faamatalaina i le Faataoto 31:23 se tane o lē e ‘iloga i faitotoa, pe a saofai o ia faatasi ma toeaina o le nuu.’ O toeaina o le nuu sa saofafai i faitotoa o le aai e faia le faamasinoga. O lea, e mautinoa lava, sa ia te ia se tulaga e maufaatuatuaina e tagata lautele. O le auala o loo manatu ai isi i se taulealea, ua faailoa mai ai se mea e uiga i lona talaaga. Afai e tatau, ia iloilo foi le auala o loo manatu ai ia te ia isi o i lalo o lana pulega. E mafai ona faaalia ai i lenei mea le auala o le a e manatu ai, o oe o le paaga ia te ia i se taimi.—Faatusatusa i le 1 Samuelu 25:3, 23-25.

• O ā ituaiga o amioga e ia te ia?

O le poto mai le Atua “e muamua ona mamā.” (Iakopo 3:17) Pe e sili atu ona naunau lau paaga lea o le a e faaipoipo atu i ai i le faamalieina o ona lava tuinanauga tau i feusuaiga na i lo o lona naunau i lona tulaga ma lou tulaga i luma o le Atua? Afai e na te lē o faia se taumafaiga ina ia ola e tusa ma tapulaa tau amio mamā a le Atua i le taimi nei, o le ā la se faavae o iai e talitonuina ai o le a ia faia faapea pe a uma le faaipoipoga?—Kenese 39:7-12.

• E faapefea ona ia faia aʻu?—Efeso 5:28, 29.

Ua faailoa mai e le tusi o le Tusi Paia o Faataoto e uiga i se tane o lē e “faatuatua” i lana avā. E lē gata i lea, ‘e vivii atu o ia ia te ia [avā].’ (Faataoto 31:11, 28) E lē fuā valea o ia, e magafagafa foi o ia e tusa ma mea na te faatalitalia. Na tusia e Iakopo e faapea, o le poto mai luga e “filemu, e agamalu, . . . e tumu i le alofa ma fua lelei.’—Iakopo 3:17.

• E faapefea ona ia feutagai ma tagata o lona lava aiga?—Esoto 20:12.

O le faaaloalo i mātua e lē na o se mea e manaomia ona faia e tamaiti. Ua faapea mai le Tusi Paia: “Ia e faalogo i lou tamā, o le na fanaua oe; aua foi e te ʻinoʻino i lou tinā pe a loomatua o ia.” (Faataoto 23:22) E manaia lava le mea na tusi mai ai Dr. W. Hugh Missildine e faapea: “O le tele o tulaga faigata ma feeseeseaiga i faaipoipoga, e mafai lava ona alofia—pe e muai  iloaina le ono tupu mai—pe afai e feasiasiai le tama ma le teine lea o le a faaipoipo i o la aiga i nisi taimi paganoa, ma matauina le faiā i le va o lana uo o le a ia faaipoipo atu i ai ma ona mātua. O le auala e manatu ai o ia i ona mātua, o le a avea o se taaʻiga i le auala e vaai ai i lana paaga. E tatau i se tasi ona fesili ifo: ‘Pe ou te manao e faia aʻu e pei ona ia faia ai ona mātua?’ Ma o le auala o loo faia ai o ia e ona mātua o le a avea o se faailoga lelei o le auala o le a ia tausia ai o ia ma le auala o le a ia faatalitalia e te faia ai o ia—pe a uma se malologa puupuu o le tuufaatasiga ina ua mavae le faaipoipoga.”

• Pe e itaitagofie o ia pe e tautala i upu leaga?

Ua fautua mai le Tusi Paia e faapea: “Ia teʻa ma outou upu faafiufiu uma lava, ma le lotoa, ma le ita, ma le leo tele, ma le upu leaga.” (Efeso 4:31) Na lapatai atu Paulo ia Timoteo e uiga i nisi Kerisiano o ē ‘ua mamaʻi o latou mafaufau ona o le suesue ma le finau i upu’ ma i latou o ē loto atu i le “matauʻa, ma le misa, ma upu faaleaga, ma masalosaloga leaga, o finauvalega o tagata loto leaga.”—1 Timoteo 6:4, 5.

E faaopoopo i ai, na tusi mai Paulo e faapea, o lē ua agavaa mo ni faaeaga faapitoa i le faapotopotoga, e lē tatau ona “fasi tagata”—e tusa ai ma le uluai upu Eleni, “e lē tuuina atu ni tā.” (1 Timoteo 3:3, faamatalaga i le pito i lalo o le NW) E lē mafai ona avea o ia o sē e fasia tagata i le tino pe fasi i latou i upu. O se tagata e oo ina sauā i le taimi e ita ai, e lē tatau ona avea o se paaga faaipoipo.

• O ā ona sini?

O nisi e tuliloa oa ma selesele mai ai iuga lē maalofia. (1 Timoteo 6:9, 10) O isi e faatafetafea solo ai lava i le olaga e aunoa ma ni sini e ausia. (Faataoto 6:6-11) Ae peitai, o se tagata amioatua, o le a faaalia lea lava faanaunauga e pei ona sa faia e Iosua, o lē na faapea mai: “O aʻu nei ma loʻu aiga, matou te auauna ia Ieova.”—Iosua 24:15.

Taui ma Tiute Tauave

O le faaipoipoga o se faatulagaga tauatua. Na faatulagaina ma faavaeina e Ieova le Atua. (Kenese 2:22-24) Na ia fuafuaina le faatulagaga faalefaaipoipoga ina ia ati ae ai se noataga tumau i le va o se tamaloa ma se fafine ina ia mafai ai e i laua ona fesoasoani le tasi i le isi. Pe a faatatauina mataupu silisili o le Tusi Paia, ona mafai ai lea e se tane ma se avā ona faatalitalia se olaga fiafia.—Failauga 9:7-9.

E ui i lea, e tatau ona iloa, ua tatou ola i “aso faigata.” Na valoia e le Tusi Paia e faapea, i lenei vaitaimi, o le a avea tagata ma “e alolofa i latou ia i latou, o e mananao i tupe, o e loto vii, o e faamaualuga, . . . o e amio leaga, o e le lotoaiga, o e le ma faaleleia, . . . o e faalata, o e soona fai, o e ua faafefeteina.” (2 Timoteo 3:1-4) O nei uiga, e mafai ona matuā aafia ai le faaipoipoga a se tasi. I lea, o i latou o ē o loo manatunatu e faaipoipo, e tatau ona manatunatu lelei i le iuga o le faaipoipoga. Ma o i latou ua uma nei ona faaipoipo e tatau ona faaauau ona galulue i le faaleleia o a latou fesootaiga e ala i le aʻoaʻoina ma faatatauina taiala tauatua na o loo maua i le Tusi Paia.

Ioe, o i latou o mafaufau e faaipoipo, o le a sili ona lelei mo i latou ona vaavaai mamao i tala atu o le aso o le faaipoipoga. Ma e tatau i tagata uma ona manatunatu e lē na o le gaoioiga o le faaipoipoga ae i le olaga faaipoipo foi. Ia vaavaai atu ia Ieova mo taiala ina ia lua mafaufau ai i mea moni na i lo le na o le alofa fetosinaai. O le faia faapea, o le a sili atu ai ona lua olioli i se faaipoipoga e taulau manuia.

[Faaopoopoga i lalo]

[Pusa i le itulau 5]

“O se Faamatalaga Aupito Sili o le Alofa ua Faapea Ona Ou Faitau i Ai”

Ua tusia faapea e Dr. Kevin Leman: “E faapefea ona e iloa po ua e alofa moni i se tasi? E iai se tusi mai anamua o loo iai se faamatalaga o le alofa. O lea tusi ua toetoe lava luaafe tausaga lona leva, ae o loo avea pea o se faamatalaga aupito sili o le alofa ua faapea ona ou faitau i ai.”

Sa faasino atu e Dr. Leman i upu a le aposetolo Kerisiano o Paulo o loo maua i le Tusi Paia i le 1 Korinito 13:4-8:

“E onosai le alofa, e agamalu, e le losilosi le alofa, e le mitamita vale le alofa, e le faafefeteina, e le amio matagā, e le sailia e ia ana lava mea, e le faaitaitagofie, e le faitau leaga ua tuuina mai e nisi, e le fiafia i le amio leaga, a e fiafia i le faamaoni. O le alofa e lavātia mea uma, e leai se mea e gata mai ai lona faatuatua, ma lona faamoemoe ma lona onosai. E le uma le alofa.”

[Pusa i le itulau 8]

E Mafai Ona Taufaasese Faalogona Ootia

E mautinoa sa iloa lelei e le teine Sulami o taimi o le Tusi Paia le taufaasese o le malosi o faalogona alofa fetosinaai. Ina ua faatauanau e le tupu taʻutaʻua o Solomona, na ia taʻu atu i ana uo teine ina ia “aua neʻi fafagu pe faagaeeina le alofa i totonu ia te aʻu seia faitalia lava ia.” (Pese a Solomona 2:7, NW) Sa lei manao lenei teine talavou atamai e uunaia o ia e ana uo ina ia pulea o ia e ona faalogona ootia. O se faiga atamai foi lenei mo i latou o mafaufau e faaipoipo i aso nei. Ia matuā taofiofi mamau ou faalogona. Afai e te faaipoipo, e tatau ona faia ona ua e alofa moni i se tagata, ae lē na o le manatu e faaipoipo.

[Ata i le itulau 6]

E oo lava ia i latou ua leva ona faaipoipo e mafai ona faamalosia noataga o a latou faaipoipoga

[Ata i le itulau 7]

E faapefea ona ia feutagai ma ona mātua?