‘Ia E Tuu i Lou Loto’ le Malumalu o le Atua!

“Le atalii e o le tagata, . . . ia e tuu foi i lou loto o mea uma ou te faaali atu ai ia te oe . . . ia e taʻu atu i le aiga o Isaraelu o mea uma e te iloa.”—ESEKIELU 40:4.

1. O le ā le tulaga na oo i ai le nuu filifilia o le Atua i le 593 T.L.M.?

O LE tausaga e 593 T.L.M., o le 14 ai lea o tausaga o le tafeaga a Isaraelu. I tagata Iutaia sa nonofo i Papelonia i lea taimi, atonu ua latou matuā mamao ese lava mai lo latou nuu sa faapelepele i ai. O le taimi mulimuli na vāai ai le toatele o i latou i Ierusalema, sa lilofia i le afi, ua malepe i lalo lona pa malosi, ua faaleagaina ona fale mananaia. O le malumalu o Ieova—lea sa fai ma mea e sili ona matagofie i le aai, sa fai ma ogatotonu o le tapuaiga moni i le lalolagi uma—ua matuā nutililii lava. Nei la o loo iai pea se vaega tele o tausaga o le tafeaga a Isaraelu. E tusa ma le 56 tausaga ona faatoʻā oo mai lea o le laveaiina na folafola mai.—Ieremia 29:10.

2. Aisea na faanoanoa ai Esekielu pe a mafaufau atu i le malumalu o le Atua i Ierusalema?

² E lē taumatea sa faanoanoa le perofeta faamaoni o Esekielu i le mafaufau atu i le malumalu o le Atua lea ua faatafunaina, e faitau selau maila [kilomita] le mamao ese atu, ua avea ma laufanua tuufua e tataa ai manu. (Ieremia 9:11) O lona lava tamā, o Posai, sa auauna ai o se ositaulaga iina. (Esekielu 1:3) Semanū foi e maua e Esekielu lena lava faaeaga, peitai na ave faatagataotauaina o ia faatasi ma tagata maualuluga o Ierusalema i le 617 T.L.M., a o talavou lava. Nei la ua tusa ma le 50 tausaga o lona soifua, atonu sa iloa e Esekielu o le a lē toe vaai lava o ia ia Ierusalema, o le a lē toe iai foi sona sao i le toe atiina ae o le malumalu. Seʻi manatu la, i le matuā uigā ia Esekielu o lona mauaina o se faaaliga o se malumalu matagofie!

3. (a) O le ā le fuafuaga o le faaaliga o le malumalu lea na vaaia e Esekielu? (e) O ā vaega autū e fa o le faaaliga?

³ O lenei faaaliga faaumiumi, o loo faatumuina  ai mataupu e iva o le tusi a Esekielu, sa avatu ai i tagata Iutaia na faaaunuua se folafolaga e faamalosia ai lo latou faatuatua. O le a toe faafoisia le tapuaiga mamā! I senituri mulimuli ane, e oo mai foi i o tatou aso, ua avea pea lenei faaaliga ma puna o faalaeiauga i ē alolofa ia Ieova. I le ā le auala? Seʻi o tatou iloiloina po o le ā sa uiga i ai le faaaliga faavaloaga a Esekielu mo tagata Isaraelu na faaaunuua. E fa vaega autū o loo aofia ai: le malumalu, le faiva faaositaulaga, le alii sili, ma le laueleele.

Ua Toe Faafoisia le Malumalu

4. O fea na avatu i ai Esekielu i le amataga lava o lana faaaliga, o le ā na ia vaaia ai iina, ma o ai na aveina atu o ia mo se asiasiga?

⁴ Muamua, na aveina Esekielu i se “mauga maualuga lava.” I luga o le mauga i le itu i toga o loo tu ai se malumalu matuā telē lava, e pei o se aai e siomia i se pa. O se agelu o lona “tino mai ua pei o le tino o le ʻapa memea” ua ia aveina atu le perofeta i se asiasiga maeʻaeʻa o le maota. (Esekielu 40:2, 3) A o faagasolo le faaaliga, ua matauina e Esekielu le agelu a o ia fuaina ma le faaeteete puipui [faitotoa] e tolu e tutusa lelei o latou fua ma o latou potu, o le lotoā aupito i tua, o le lotoā tuloto, o potu e taumamafa ai, o le fata faitaulaga, ma le vaega i totonu o le malumalu lea e iai lona Mea Paia ma le Mea e Sili ona Paia.

5. (a) O le ā le faamautinoaga ua avatu e Ieova ia Esekielu? (e) O ā “tino oti o [o] latou tupu” sa tatau ona aveese mai le malumalu, ma aisea sa tāua ai lenei mea?

⁵ Ona faailoa mai lea e Ieova ia lava i le faaaliga. Ua ia ulufale i le malumalu ma faamautinoa ia Esekielu o le a Ia afio ai iina. Peitai e manaomia e Ieova se faamamāina o Lona maota, i le fetalai mai: “O lenei, ia latou lafoai a latou faitaaga, ma tino oti o [o] latou tupu, ia mamao ia te au, ona ou nofo ai lea faatasi ma i latou e faavavau.” (Esekielu 43:2-4, 7, 9) O nei “tino oti o [o] latou tupu” e mautinoa sa faasino atu i tupua. Sa faaleagaina e tupu fouvale ma tagata sa iai i Ierusalema le malumalu o le Atua i tupua, ma o le iuga, na avea na tupua ma tupu. (Faatusatusa i le Amosa 5:26.) Na i lo le avea o nei faatusa o ni atua po o ni tupu e iai ni ola, ua na o ni mea e mamate ma e lē mamā i fofoga o Ieova. E ao ona aveesea.—Levitiko 26:30; Ieremia 16:18.

6. O le ā sa faaatagia mai e le fuaina o le malumalu?

⁶ O le ā le manatu autū o lenei vaega o le faaaliga? Sa faamautinoa atu ai i ē na faatagataotauaina le toe faafoisia atoatoa o le tapuaiga mamā i le malumalu o le Atua. E lē gata i lea, o le fuaina o le malumalu sa avatu ai se faamaoniga tauatua e faapea e matuā mautinoa lava le faataunuuina o le faaaliga. (Faatusatusa i le Ieremia 31:39, 40; Sakaria 2:2-8.) O ifoga tupua uma lava o le a tafiesea. O le a toe faamanuia mai Ieova i lona maota.

Le Faiva Faaositaulaga ma le Alii Sili

7. O ā faamatalaga ua tuuina mai e faatatau i le au sa Levī ma ositaulaga?

⁷ Sa manaomia foi ona faamamāina le faiva faaositaulaga, po o le toe faaleleia. Sa tatau ona matuā aoaia mamafa le au sā Levī ona o le lolo atu i ifoga tupua, ae sa tatau ona faamālō ma tauia atalii ositaulaga o Satoka ona o lo latou tumau i le mamā. * Ae ui i lea, o le a maua uma pea e vaega e lua tofiga tau le auaunaga i le maota toe faafoisia o le Atua—e mautinoa, e faalagolago i le faamaoni o le tagata lava ia. E lē gata i lea, na folafola mai e Ieova faapea: “Latou te aʻoaʻo foi i loʻu nuu ia masino mea paia ma mea e le paia, ina ia latou iloa le mea e le mamā ma le mea e mamā.” (Esekielu 44:10-16, 23) O lea la sa tatau ona toe faafoisia le faiva faaositaulaga, ma o le a tauia le tumau ma le faamaoni o ositaulaga.

8. (a) O ai alii sili o Isaraelu anamua? (e) I ā auala sa maelega ai le alii sili o le faaaliga a Esekielu i le tapuaiga mamā?

⁸ O loo faailoa mai foi e le faaaliga se tasi e taʻua o le alii sili. Talu mai lava aso o Mose, sa iai i le nuu alii sili. O le upu Eperu mo le alii sili, o le na·siʼʹ, e mafai ona faatatau atu i le ulu o se aiga tau tama tane o se auaiga, se ituaiga, po o se atunuu foi. I le faaaliga na vaaia e Esekielu, o pule o Isaraelu i lo latou tulaga o se vasega, ua aoaia mamafa ona o lo latou faatiga i tagata ma  sa uunaia i latou ina ia lē faailoga tagata ma ia faamasinotonu. E ui e lē o ia o se tasi o le vasega o ositaulaga, ae sa maelega le alii sili i galuega iloga i le tapuaiga mamā. E ulufale mai o ia ma toe ulufafo atu i le lotoā faatasi ma ituaiga e lē o ni ositaulaga, e nofo i le faapaologa o le Faitotoa i Sasaʻe, ma saunia nisi o taulaga mo tagata ina ia ofo atu. (Esekielu 44:2, 3; 45:8-12, 17) Ua faamautinoa atu la e le faaaliga i tagata o Esekielu e faapea, o le a faamanuiaina le nuu toe faafoisia i le iai o ni taʻitaʻi e fai ma faataitaiga lelei, o tane o le a lagolagoina le faiva faaositaulaga i le faamaopoopoina o tagata o le Atua ma avea ma faataitaiga lelei i mea faaleagaga.

Le Laueleele

9. (a) O le a faapefea ona vaevaeina le laueleele, ae o ai o le a lē maua ai sona tofi? (e) O le ā le taulaga o le tofi paia, ma o le ā sa iai?

⁹ Mulimuli lava, o loo aofia i le faaaliga a Esekielu se vaaiga lautele i le laueleele o Isaraelu. O le a vaevaeina ia tofu ituaiga ma lo latou tofi. E iai foi le tofi o le alii sili. Peitai, o le a leai se tofi o ositaulaga, auā na fetalai mai Ieova, “O aʻu o lo latou tofi.” (Esekielu 44:10, 28; Numera 18:20) Sa faaalia i le faaaliga e faapea o le vaega o le laueleele e tofia atu i le alii sili o le a iai i itu e lua o se vaipanoa faapitoa e taʻua o le taulaga o le tofi paia. O se fanua faatafafā e vaevaeina i ni vaega se tolu—o le pito i luga e mo sā Levī ua salamō, o le ogatotonu e mo ositaulaga, ma le pito i lalo e mo le aai ma ona laufanua fuatele mai. O le malumalu o Ieova e i le vaega o le fanua ua tuu atu mo ositaulaga, i le ogatotonu o le faatafafā ua taʻua o le taulaga o le tofi e gatasitasi ona itu e fa.—Esekielu 45:1-7.

10. O le ā le uigā o le valoaga o le vaevaeina o le laueleele i tagata Iutaia ia sa faaaunuua?

¹⁰ Maeu le faalaeiau o lenei mea ia i latou uma sa faaaunuua! Sa faamautinoa atu i aiga taitasi le iai o so latou tofi i le laueleele. (Faatusatusa i le Mika 4:4.) O le a tuu ai le tapuaiga mamā i se nofoaga faaeaina, le nofoaga tutotonu iina. Ma seʻi mātau, i le faaaliga na iloa e Esekielu, o le alii sili i le pei o ositaulaga, o le a nofo i fanua na foai atu e tagata. (Esekielu 45:16) O lea la, i le laueleele toe faafoisia, e foai atu tagata i le galuega a i latou o ē o le a tofia e Ieova e taimua, e lagolago atu e ala i le felagolagomai ma a latou taitaiga. O lona uiga, o lenei nuu ua fai ma ata o le faamaopoopo, le felagolagomai, ma le saogalemu.

11, 12. (a) Ua faapefea ona faalaeiau Ieova i ona tagata e ala i se valoaga faapea o le a ia faamanuiaina lo latou laueleele toe faafoisia? (e) O le ā na faaāta mai e laau i autafa o le vaitafe?

¹¹ Po o le a faamanuia ea e Ieova lo latou laueleele? Ua tali mai le valoaga i lenei fesili i se ata faamafanafanaloto. O loo tafe se vai mai le malumalu, ma faasolo ina lautele ua oo ina avea o se tafega ua tatafe tele atu i le Sami Mate. O iina ua toe faaolaina ai vai sa leai ni mea e ola ai, ma ua toe matuā manuia foi faiga faiva o loo faia e latalata ane i ona matafaga. O autafa o le vaitafe o loo ola ai le tele o laau e fua i le tausaga atoa, ua maua ai meaʻai ma vailaau e faamālōlō ai.—Esekielu 47:1-12.

¹² Ia i latou sa faaaunuua, o lenei folafolaga sa toe faamamafa ma faamautinoa atu ai isi valoaga muamua e faatatau i le faafoisia lea latou te matuā faanaunau i ai. Ua sili atu i le faatasi ona faamatala e perofeta na faagaeeina a Ieova, Isaraelu ua toe faafoisia ma aināina, i se tulaga faaparataiso. O nuu sa lafulafuā ua toe aināina, ua avea pea ma matua faavaloaga. (Isaia 35:1, 6, 7; 51:3; Esekielu 36:35; 37:1-14) Sa mafai la e tagata ona faatalitalia faapea, o faamanuiaga foaiola a Ieova o le a tafe mai e pei o se vai mai le malumalu lea ua toe faafoisia. O le iuga, o le nuu sa oti faaleagaga o le a toe faaolaina. O le a faamanuiaina tagata toe faafoisia i ni tane iloga i le faaleagaga—o tane e amiotonu ma mautū e pei o laau o loo ola i autafa o le vaitafe lea na iloa i le faaaliga, o tane o le a taimua i le toe faatoʻaina o le laueleele ua faatafunaina. Sa tusi foi Isaia e faatatau i “laau [“tetele,” NW] o le amiotonu” o ē o le a toe “atiina ae . . . mea na faatafunaina mai le vavau.”—Isaia 61:3, 4.

O Afea e Faataunuu ai le Faaaliga?

13. (a) I le ā le uiga na faamanuia ai e Ieova ona tagata toe faafoisia i “laau tetele o le amiotonu”? (e) Na faapefea ona faataunuuina le valoaga e faatatau i le Sami Mate?

¹³ Pe sa lē taulau ea le faamoemoe o tagata faaaunuua na toe foi? E matuā leai lava! Sa toe  foi atu se vaega totoe i lo latou nuu pele i le 537 T.L.M. A o faagasolo le taimi, sa toe fausia ai nofoaga ua leva ona tuufua, i le taitaiga a nei “laau [tetele] o le amiotonu”—e pei o le tusiupu o Esera, o perofeta o Hakai ma Sakaria, ma le ositaulaga sili o Iosua. O alii sili, e pei o Neemia ma Serupapelu, sa la pulea i le saʻo ma le tonu le nuu. Sa toe faafoisia le malumalu o Ieova, ma o ana sauniuniga mo le ola—o faamanuiaga o le ola e tusa o lana feagaiga—sa toe tafe atu foi. (Teuteronome 30:19; Isaia 48:17-20) O se tasi o faamanuiaga o le poto. Sa toe amata tiute a le faiva faaositaulaga, ma sa aʻoaʻoina e ositaulaga tagata i le Tulafono. (Malaki 2:7) O le iuga, sa toe malolosi faaleagaga tagata ma toe avea ai ma auauna e fua tele mai a Ieova, e pei ona faaāta mai i le Sami Mate lea sa toe ola ma lauolaola ai faiga faiva.

14. Aisea sa tatau ai ona iai se faataunuuga o le valoaga a Esekielu e sili atu na i lo le mea na tupu ina ua mavae le toe foi mai o tagata Iutaia mai le faaaunuua i Papelonia?

¹⁴ Pe na pau ea ia o mea sa faataunuuina ai le faaaliga a Esekielu? E leai; o loo faailoa mai se isi mea e sili atu. Seʻi manatu: O le malumalu lea sa vaaia e Esekielu i le faaaliga sa lē mafai ona fausia lona fausaga e pei ona faamatala mai. O le mea moni, sa matuā uigā i tagata Iutaia lena faaaliga ma na oo lava ina latou faatatauina faaletino nisi auiliiliga o le faaaliga. * Peitai, e matuā telē lava le malumalu na vaaia i le faaaliga, e lē ofi foi i le Mauga o Moria, le nofoaga lea sa iai le malumalu muamua. E lē gata i lena, o le malumalu sa iloa e Esekielu e lei tu i le aai, ae sa tu mamao i se isi fanua e ese atu, peitai o le malumalu lona lua sa fausia i le mea lea sa iai le malumalu muamua—i totonu o le aai o Ierusalema. (Esera 1:1, 2) E lē gata i lena, e lei iai lava se vaitafe moni na tafe mai le malumalu i Ierusalema. O lea la sa na o sina faataunuuga laitiiti o le valoaga a Esekielu sa vāai i ai Isaraelu anamua. Ua iloa mai ai i lenei mea e ao ona iai se faataunuuga tele faaleagaga o lenei faaaliga.

15. (a) O anafea na amata ai ona faagaoioia le malumalu faaleagaga o Ieova? (e) O le ā e faaalia ai sa lei faataunuuina le faaaliga a Esekielu i le taimi o le soifuaga o Keriso i le lalolagi?

¹⁵ Ma le manino lava, e ao ona tatou vaai atu mo le faataunuuga autū o le faaaliga a Esekielu i le malumalu sili faaleagaga o Ieova, lea o loo tele ina faamatalaina i le tusi o Eperu e le aposetolo o Paulo. Na amata ona faagaoioia lena malumalu ina ua faauuina Iesu Keriso e fai ma ona Ositaulaga Sili i le 29 T.A. Ae pe na faataunuuina ai ea le faaaliga a Esekielu i aso o Iesu? E mautinoa e leai. Sa faataunuuina e Iesu, i le avea ma Ositaulaga Sili, le tāua faavaloaga o le Aso o le Togisala e ala i lona papatisoga, lona maliu faataulaga, ma lona ulu atu i le Mea e Sili ona Paia, o le lagi lea. (Eperu 9:24) Ae, o le mea e ao ona manatua, e lē o taʻua faatasi lava i le faaaliga a Esekielu le ositaulaga sili po o le Aso o le Togisala. E foliga mai la, sa lei faasino atu lenei faaaliga i le uluai senituri T.A. O lē fea la le taimi o loo faatatau atu i ai?

16. O le faatulagaga i le faaaliga a Esekielu ua faamanatu mai ai ia i tatou le ā le isi valoaga, ma ua fesoasoani faapefea lenei mea ia i tatou ina ia iloa ai le taimi o le faataunuuga autū o le faaaliga a Esekielu?

¹⁶ Mo se tali, seʻi o tatou toe foi i le faaaliga lava ia. Na tusi mai Esekielu: “O faaaliga mai le Atua na ia aveina ai aʻu i le nuu o Isaraelu, ma tuuina ai aʻu i luga o le mauga maualuga lava, o i ai i le itu i toga se fale e peiseai se aai.” (Esekielu 40:2) O le faatulagaga o lenei faaaliga, le “mauga maualuga lava,” ua faamanatu mai ai ia i tatou le Mika 4:1: “O aso e gata ai e oo ina faatumauina ai le mauga o i ai le fale o Ieova i tumutumu o mauga, e faamaualugaina foi ia sili i mauga iti, ona gasolo ane lea o nuu i ai.” O afea e faataunuuina ai lenei valoaga? Ua faaalia i le Mika 4:5 e faapea e faataunuu lenei mea a o tapuai pea atunuu i atua sese. O le mea moni, ua faataunuuina i o tatou lava taimi, i “aso e gata ai,” ua uma ona siitia le tapuaiga mamā, ua faafoisia i lona tulaga talafeagai i soifuaga o auauna a le Atua.

17. Ua faapefea i le valoaga i le Malaki 3:1-5 ona fesoasoani ia i tatou ina ia iloa tonu po o anafea na faamamāina ai le malumalu i le faaaliga a Esekielu?

 ¹⁷ O le ā ua mafai ai lenei toe faafoisiaga? Manatua i le vaega e sili ona tāua o le faaaliga a Esekielu, o loo afio mai ai Ieova i le malumalu ma maumauai ina ia faamamā lona maota mai ifoga tupua. O anafea na faamamā ai le malumalu faaleagaga o le Atua? I le Malaki 3:1-5, o loo valoia ai e Ieova le taimi o le a ia ‘afio mai ai i Lona malumalu,’ e ō mai faatasi ma lana ‘avefeau o le feagaiga,’ o Iesu Keriso. O le ā le fuafuaga? “O ia e tusa ma le afi a lē tunu auro; e tusa foi ma le moli a lē tāofu.” Na amata lenei faamamāina i le vaitaimi o le Taua Muamua a le Lalolagi. O le ā le iuga? Ua afio nei Ieova i lona maota ma faamanuia le laueleele faaleagaga o ona tagata talu mai le 1919 ma faasolo mai ai. (Isaia 66:8) Tatou te ono faaiua la e faapea, o le malumalu i le valoaga a Esekielu ua iai sona faataunuuga tāua i aso e gata ai.

18. O afea o le a tupu ai le faataunuuga faaiu o le faaaliga o le malumalu?

¹⁸ E pei lava o isi valoaga i le toe faafoisiaina mai, ua faapena foi ona iai se isi faataunuuga o le faaaliga a Esekielu, le faataunuuga mulimuli, i le Parataiso. Ua na o lea le taimi o le a maua ai e tagata loto saʻo aogā atoatoa o le faatulagaga o le malumalu o le Atua. Ona faatino mai loa lea e Keriso aogā o lana taulaga togiola, faatasi ai ma lana au ositaulaga faalelagi o le 144,000. O tagata usiusitai uma o le pulega a Keriso o le a siitia i le lelei atoatoa. (Faaaliga 20:5, 6) Peitai, e lē o le Parataiso le taimi autū o le faataunuuga o le faaaliga a Esekielu. Aisea ua lē o lea ai?

O Loo Taulai Mai le Faaaliga i o Tatou Lava Aso

19, 20. Aisea e ao ai ona tupu le faataunuuga autū o le faaaliga i aso nei ae lē i le Parataiso?

¹⁹ Sa vaaia e Esekielu se malumalu e manaomia ona faamamāina mai ifoga tupua ma le faitaaga faaleagaga. (Esekielu 43:7-9) E mautinoa e lē mafai ona faatatauina lenei mea i le tapuaiga a Ieova i le Parataiso. E lē gata i lena, o ositaulaga o le faaaliga e faaatagia ai le vasega faauuina faaositaulaga a o iai pea i le lalolagi, ae lē o le taimi ua uma lo latou toe tutu faalelagi po o le taimi o le Meleniuma. Aisea? Mātau ua faaāta mai ositaulaga o loo auauna i le lotoā tutotonu. I mataupu i lomiga ua teʻa o Le Olomatamata ua faaalia ai faapea o lenei lotoā o loo faaāta ai le tulaga tutasi faaleagaga o ositaulaga lagolago a Keriso a o iai pea i le lalolagi. * Ia matauina foi le faamamafaina e le faaaliga o le lē lelei atoatoa o ositaulaga. Sa faatonu atu ia i latou ina ia osia taulaga mo a latou lava agasala. Sa lapataia i latou i le matautia o le lē mamā—i le faaleagaga ma tau i amio. O lea ua latou lē o faaātaina mai ai le au faauuina ua toe faatutūina, i latou ia na tusi faatatau i ai le aposetolo o Paulo e faapea: “E ilia lava le pu faauma e toe tutū mai ai e ua oti ma le ola pea.” (1 Korinito 15:52; Esekielu 44:21, 22, 25, 27) O ositaulaga i le faaaliga o loo faifaimea faatasi ma auauna tuusaʻo atu i tagata. E lē o le tulaga lea o le a iai i le Parataiso, pe a oo ina iai i le lagi le vasega faaositaulaga. O lea la, o loo aumaia e le faaaliga se ata matagofie o le auala o loo galulue vavalalata ai le au faauuina ma le “motu o tagata e toatele” i le lalolagi i aso nei.—Faaaliga 7:9; Esekielu 42:14.

 ²⁰ O lea la, o le faaaliga o le malumalu na vaaia e Esekielu o loo faaāta mai ai iuga lelei o se faamamāina faaleagaga o loo faataunuuina i aso nei. Peitai o le ā le uiga o lenei mea mo oe? Ua lē tau ina avea o se manatu faalelotu e lē mafai ona malamalama i ai. O loo iai i lenei faaaliga se aafiaga tele e faatatau i lau lava tapuaiga i aso fai soo ia Ieova, le Atua moni e toatasi. I la tatou mataupu o sosoo mai, o le a tatou iloa ai pe faapefea.

[Faaopoopoga i lalo]

E te Manatua?

□ O le ā le uluai faataunuuga o le faaaliga a Esekielu i le malumalu ma lona faiva faaositaulaga?

□ Na faapefea ona iai se uluai faataunuuga o le faaaliga a Esekielu e faatatau i le vaevaeina o le laueleele?

□ I le toe faafoisiaina o Isaraelu anamua, o ai na gaoioi o ni alii sili faamaoni ma o ai na gaoioi o ni “laau tetele o le amiotonu”?

□ Aisea e tatau ai ona iai le faataunuuga autū o le faaaliga o le malumalu a Esekielu a o faagasolo aso e gata ai?

[Fesili mo le Suʻesuʻega]