O Faafitauli e Patino i Aiga e Mātuafai

E MAFAI ONA FIAFIA AIGA E MĀTUAFAI! E FAAPEFEA?

O aiga o ni mātuafai ua avea ma ituaiga o aiga ua taatele i le tele o vaipanoa o le lalolagi. Ae peitai, o aiga e mātuafai e iai o latou faafitauli patino. O le luʻi sili lava e mautinoa o le tausia aʻe o se fanau. E ui i lea, e pei ona o le a faaalia mai i mataupu e lua o loo mulimuli mai, e mafai ona taulau i le tausia aʻe o fanau i se siomaga o se aiga o ni mātuafai.

E MASANI LAVA, E LĒ LELEI FAAUPUGA E LAFO I TAMĀFAI MA TINĀFAI. A O TATOU LAITI, O LE toatele o i tatou na faalogo i ni faamatalaga o le tala faafagogo ia Cinderella, o lē na matuā mafatia i lima o lona tināfai agaleaga. I tamaiti Europa foi latou, na faalogo i le tala faafagogo ia Kiona Sina ma Saa e Toafitu. O le tināfai o Kiona Sina o se faataulaitu amioleaga!

Pe ua aumaia ea e na tala faafagogo se vaaiga saʻo e uiga i aiga e mātuafai? Po o mātuafai uma lava e agaleaga? E leai. O le toatele lava o i latou e mananao mo le mea e silisili ona lelei mo a latou fanau ua maua nei ona o le faaipoipoga. Ae e tatau ona latou fesagai ma ni faafitauli faigata e oo iai le olaga o se aiga e iai se fanaufai.

O Faafitauli o le Tausia Aʻe o se Fanau

Pe a lē taulau le uluai faaipoipoga, o le mafuaaga e masani lava o le lē taʻumatuaina o paaga taitasi. Pe a toe faaipoipo atu la, o le feagai ai ma fanau e mafai ona ōia ai le mafutaga. I nisi o faamaumauga ua iloa ai e silia i le 4 mai le 10 aiga e iai mātuafai ua iu i ni talagā faaipoipoga i uluai tausaga e lima o le faaipoipoga.

Atonu e lē o matauina e ulugalii fou le faaleagaina o faalogona, le feteenaiga o le alofa faamaoni, ma faalogona fuā ma le lē fiafia ua oso aʻe i fanaufai talu le taunuu mai o le matuafai. O le a manatu ai le fanaufai ua sili atu le alofa o lo latou matua moni i le matuafai na i lo i latou. I le ma lea, e faafaigata lava mo se matua ua lafoaia e sana paaga ona malamalama i le pipii atu pea o loto o lana fanau i le paaga muamua. Na taumafai se tasi tamaitiiti e faamatala atu lo la faiā lelei ma lona tamā moni, i lona faapea atu, “Tinā, ou te iloa na leaga le faiga o oe e Tamā, peitai e lelei mai lava o ia ia te au!” O se faaupuga faapena e ui e faamaoni, ae ono tuua ai le tinā ma se faalogona matuā lē fiafia agaʻi i le tamā o le tamaitiiti.

Na taʻutino mai e se tasi tamāfai: “Ou te lei lava saunia e faafetaiaia faafitauli e fesootai atu ma le tausia aʻe o laʻu fanaufai. Na ou oo atu i le tulaga ma le manatu faapea o lea ua ma faaipoipo ma lo latou tinā, o aʻu la o lo latou tamā. Sa  foliga e faapena le faigofie ia te au! Ae na ou faia ni sese se tele, talu ai sa ou lē malamalama i le māfana o tamaiti i lo latou tamā moni.”

E mafai ona aliaʻe ni feeseeseaiga ae maise lava pe a oo mai i aoaiga. E manaomia e tamaiti ni aoaiga alofa, ae peitai e masani lava ona latou teena e oo lava i aoaiga mai se matua moni. Maeu la le faigata ona talia se aoaiga mai se matuafai! E masani lava, a avatu se aoaiga faapea, e ono fai mai le tamaitiitifai: “E lē o oe o soʻu tamā moni!” Maeu le matuitui o na faaupuga i se matuafai alofa!

Pe e mafai ona tausia aʻe ma le manuia fanau i aiga e mātuafai? Pe e mafai e mātuafai ona faia se vaega lelei i le atiina ae o se aiga e iai ni fanaufai? O tali i fesili nei e lua o le ioe pe afai e mulimuli uma tagata i fautuaga o loo aumaia i le Afioga faagaeeina a le Atua, le Tusi Paia.

[Ata i le itulau 3]

“E lē o oe o soʻu tamā moni!”