E Lē Faatuai Mai le Atua e Tusa o Lana Folafolaga

“IEOVA e, ou te valaau seia afea, a e te le faafofoga mai?” O upu na a le perofeta Eperu o Sapakuka, o lē na soifua i le senituri lona fitu T.L.M. Ae e iai sona uiga ua tatou masani ai, pe lē moni ea? O se masaniga faaletagata le manao ia maua loa i le taimi lava lea, ni mea e pele ia i tatou ua leva ona faatalitali i ai. Ma e faapitoa le moni o lena tulaga i le vaitaimi lenei o le vave faamalieina o manaoga.—Sapakuka 1:2.

I le uluai senituri, na iai nisi na lagona faapea ua tatau ona vave faataunuuina folafolaga a le Atua. Ua oo ina lē lava lo latou onosai ma na oo ai lava ina latou manatu faapea ua faiaga po ua faatuai le Atua. Ona o lena mea na tupu, sa tatau i le aposetolo o Peteru ona faamanatu atu ia i latou e matuā ese lava le silasila a le Atua i le taimi mai la tatou vaai. Ua tusi Peteru faapea: “Aua neʻi lilo ia te outou, le au pele, lenei mea e tasi, e tusa i luma o le Alii le aso e tasi ma tausaga e afe, o le afe foi o tausaga e tusa ma le aso e tasi.”—2 Peteru 3:8.

E tusa ai o lea ituaiga o fua faatatau o le taimi, o se tagata la ua 80 tausaga le matua ua na o le lua itula talu ona soifua, ma o le talafaasolopito  atoa o le fanau a tagata pe tusa na o le ono aso lona umi. A tatou vaai la i mea faatasi ai ma le manatu lea, o le a faafaigofie ai mo i tatou ona malamalama i le auala o loo feagai ai le Atua ma i tatou.

Peitai, e lē faapea e lē amanaia e le Atua le taimi. I se tulaga tuufaafeagai, e matuā tausi taimi lava o ia. (Galuega 1:7) O lea, na faapea mai ai Peteru: “E le faatuai mai le Alii i le mea na folafolaina mai, faapei o le manatu a isi tagata i le faatuai; a e peitai ua onosai mai lava o ia ia te outou, ona ua le finagalo ia fano se tasi, a ia oo uma lava i le salamo.” (2 Peteru 3:9) I le lē pei o tagata, e lē o lagona e le Atua le popole e faia mea ona ua lē lava le taimi mo ia e faia ai. Ona o ia o le “Tupu o le vavau,” e ia te ia le tofamamao ofoofogia ma e mafai ai ona ia silafia po o le ā le taimi tonu o le a fetaui ona ia gaoioi ai ina ia aogā mo i latou uma e aafia ai.—1 Timoteo 1:17.

Ina ua maeʻa ona faamatalaina le mafuaaga e foliga mai ua faatuai ai le Atua, ona faaleoina atu lea e Peteru o le lapataiga lenei: “A e sau le aso o le Alii pei o se gaoi.” O lona uiga, o le a oo mai le aso e faamasinoina ai i le taimi e lē o faatalitalia e tagata e oo mai ai. O lea, i fuaiupu o loo sosoo mai, ua faasino atu e Peteru le faamoemoe matagofie mo i latou e faaalia le “amio e tatau ai i le amio lelei ma le amio Atua,” e faapea, latou te ono ulufale atu i le “lagi fou ma le lalolagi fou” ua folafola mai e le Atua.—2 Peteru 3:10-13.

E tatau i lenei mea ona tatou talisapaia atili ai le lei oo mai o le faamasinoga a le Atua i le taimi nei. O lona onosai ua mafai ai ona tatou iloa ana fuafuaga ma fetuunai ai o tatou olaga ina ia tatou mauaina ana faamanuiaga ua folafola mai. Pe e lē tatau ona tatou manatu “o le onosai o lo tatou Alii o le faaolataga lea,” e pei ona finau mai ai Peteru? (2 Peteru 3:15) E ui i lea, e iai le isi vala ua onosai ai le Atua.

Se Vaega o le Agasala e Ao Ona Atoatoa

O le suesueina o feutagaiga a le Atua ma tagata i taimi ua teʻa, tatou te matauina ai le masani ona ia taofia o lana faamasinoga seia oo ina siliga se faamoemoe i se toe faaleleiga. Mo se faataitaiga, e tusa ai ma le faamasinoga a le Atua i tagata Kanana, ua leva ona ia faailoa atu ia Aperaamo a latou agasala. Ae sa lei oo i le taimi e faataunuuina ai lana faamasinoga. Aisea sa lē oo ane ai i lena taimi? Ua faapea mai le Tusi Paia: “Auā ua le atoatoa le agasala a sa Amorī [sa Kananā] i nei ona po,” po o le e pei ona faaupu ai e le faaliliuga a Knox: “E lei oo le amioleaga a sa Amorī i le atoaga e gata mai ai.”—Kenese 15:16. *

Peitai, pe tusa o le 400 tausaga mulimuli ane, na oo mai ai le faamasinoga a le Atua, ma o ē tupuga mai ia Aperaamo, le nuu o Isaraelu, na latou faoa le nuu. Sa na o ni nai tagata toaitiiti lava o sa Kananā, e pei o Raava ma le au sa Kipeonā, na faasaoina ona o a latou amio ma gaoioiga, ae o le isi vaega e toatele, na oo atu i le mea e gata mai ai amioga lē mamā, e pei ona faaalia e tagata suesue o mea e eli mai le eleele. Na latou faia tapuaiga i totoga fanautama o tane, o faiga faatalitane i le malumalu, ma taulaga e osia i tamaiti. Ua faapea mai le Halley’s Bible Handbook: “O ē suesue i toega o mea anamua na latou eliina aai o Kanana na faatafunaina, na maofa i le lē faaumatiaina vave e le Atua o nei aai na i lo le taimi na ia faia ai. O le iuga, na ‘atoatoa le agasala’ a sa Kananā; o la latou amioleaga na “oo atu i le mea e gata mai ai.” E leai la se tasi na te mafai ona tuuaia ma le saʻo le Atua faapea e lē faamasinotonu i lona faamamāina o le nuu ae faatotoe ai na o i latou na faaalia le amio saʻo.

E talitutusa lava foi lena ma aso o Noa. O le mea moni e ui lava ina amioleaga tagata a o lei oo mai le Lolo, ae na filifili ma le alofa le Atua ina ia faaauau pea o latou taimi mo le isi 120 tausaga. A o faagasolo se vaega o lena taimi, na auauna ai Noa o “lē talaʻi le amiotonu.” (2 Peteru 2:5) A o faagasolo taimi, na oo ina matua la latou amioleaga. “Ua silasila mai le Atua i le lalolagi, faauta foi, ua leaga lava; auā o tagata uma ua leaga ia i latou a latou amio i le  lalolagi.” (Kenese 6:3, 12) Ua oo ina ‘atoatoa la latou agasala’; na oo atu o latou manatunatuga sese i sona tumutumuga a o faagasolo le taimi. Ina ua gaoioi la le Atua, sa matuā tonu atoatoa o ia. E na o le toavalu lava tagata na faamonia le amiotonu i fofoga o le Atua, ma na ia faasaoina i latou.

E faapena foi le ata ua vaaia i le feagai ai o le Atua ma Isaraelu. E ui lava ina latou amioai i se auala lē faamaoni ma le matagā, ae na onosai le Atua ia i latou mo le faitau selau o tausaga. Ua faapea mai le tala: “Ua aauina mai e . . . Ieova . . . o e ave ana feau, ua ala aauina lava i latou; auā ua na alofa i lona nuu . . . a ua latou . . . ʻinoʻino i ana afioga, ma ua ula i ana perofeta, ua oo ina tupu le toasa o Ieova i lona nuu, ua oo ina leai se fofo.” (2 Nofoaiga a Tupu 36:15, 16) Na oo atu tagata i le tulaga ua siliga ai se toe faaleleiga. Na o Ieremia ma se vaega toaitiiti na mafai ona faasaoina. E lē mafai ona tuuaia le Atua faapea e lē faamasinotonu ina ua ia faaoo mai le faamasinoga i luga o isi na totoe.

Ua Oo Mai le Taimi e Gaoioi ai le Atua

Tatou te iloa mai nei faataitaiga e faapea o loo taofia e le Atua le faamasinoga o lenei faiga o mea seia oo mai le taimi talafeagai. Ua faailoa mai lenei mea i le faatonuga o loo tuuina atu i le faaoosala faafaatusa a le Atua: “‘Ina faaoo atu ia lau selesaito maai, ina sala ia i fuifui vine o le vine o le lalolagi, auā ua otatā ona fuifui vine.’ Ona faaoo mai ai lea e le agelu o lana selesaito i le lalolagi, ua sala foi e ia le vine o le lalolagi, ua ia lafo atu foi i totonu o le soligāvine tele o le toasa o le Atua.” Mātau “ua otatā” le amioleaga a le fanau a tagata, o lona uiga, ua oo i se tulaga e lē toe mafai ona fai se faaleleiga. Pe a faaoo mai la e le Atua le faamasinoga, o le a mautinoa lava le tonu o lona faalaa mai.—Faaaliga 14:18, 19.

O le talanoaina o manatu o loo taʻua i luga, ua manino ai faapea o le faamasinoga a le Atua faasaga i le lalolagi ua tatau ona latalata mai auā ua amioai le lalolagi i uiga ia na ala ai ona faataunuuina le faamasinoga a le Atua i le taimi ua teʻa. So o se mea tatou te vāai i ai, ua  faatumulia le lalolagi i le sauā, pei lava ona iai a o lei oo mai le Lolo i aso o Noa. O uiga o tagata ua faasolo lava ina talafeagai ma le mea o loo faamatalaina i le Kenese 6:5: “O manatu uma ua mafaufau ifo ai i o latou loto ua na ona leaga ia i aso uma lava.” E oo lava i agasala matuia na ala ai ona faaoo mai e le Atua lana faamasinoga i tagata Kanana ua taatele foi i aso nei.

Ae maise lava talu mai le Taua Muamua a le Lalolagi, ua oo ai le fanau a tagata i suiga e matautia le leaga. Ua vaaia le tafetoto o le eleele i le toto o le faitau miliona. O taua, o le faatamaiaga o se ituaiga o tagata, o tagata faatupu faalavelave matautia, o soligatulafono, ma le lē taupulea ua sasao aʻe i le lalolagi aoao. O oge, o faamaʻi, ma amioga lē mamā ua soo ai lo tatou lalolagi. Ua faailoa mai e faamaoniga uma ua tatou ola nei i le tupulaga amioleaga lea na fetalai faatatau i ai Iesu: “E le mavae atu lava lenei tupulaga, seia oo mai nei mea uma.” (Mataio 24:34) O loo faaatoaina e le lalolagi lana “agasala.” “O fuifui vine o vine o le lalolagi” ua faasolo ina otatā mo le seleselega.

Le Taimi mo Oe e Gaoioi Ai

Na taʻu atu i le aposetolo o Ioane faapea a o latalata mai le faamasinoga, e lua ituaiga otatā o le a iai. I le tasi itu, “o lē amioletonu ia amioletonu pea o ia, o lē eleelea ia eleelea pea o ia.” Ae i le isi itu, “o lē amiotonu ia amiotonu pea o ia, o lē paia ia paia pea o ia.” (Faaaliga 22:10, 11) O lenei vala lona lua o loo tupu e fesootai atu i le galuega tau aʻoaʻoga faale-Tusi Paia o loo faia i le lalolagi aoao e Molimau a Ieova. O le sini o lena galuega o le aʻoaʻoina lea o tagata e faatatau i mea o loo manaomia e le Atua mai ia i latou ina ia mafai ona faitaulia i latou o ni ē tatau ona mauaina le ola e faavavau. Ua oo atu nei lenei galuega i atunuu e 233 e ala i faapotopotoga e 87,000.

E lē faatuai mai le Atua. O loo onosai mai pea o ia ma faatagaina ai le taimi o loo moomia e tagata taitoatasi ina ia “oofu [ai] i le tagata fou” ina ia mafai ai ona agavaa latou te mauaina mea na ia folafolaina. (Efeso 4:24) I aso nei, o loo faatali pea le Atua, e ui lava ina faaauau pea ona leaga tulaga o le lalolagi. O loo faia e Molimau a Ieova i le lalolagi aoao mea uma latou te mafaia ina ia tufa atu i o latou tuaoi le poto e taʻitaʻia ai i le ola e faavavau. (Ioane 17:3, 17) Ma le fiafia lava, i tausaga taitasi e silia i le 300,000 tagata o loo tali mai ma ua papatisoina.

A o faamoemoe atu i le ola e faavavau, o le taimi lenei, e lē ina ia faatali ai, ae ia gaoioi. Auā ua toe o se aga, ona tatou vāai lea i le faataunuuina o le folafolaga a Iesu: “O tagata ola uma o e faatuatua mai ia te au, e le oti lava e oo i le faavavau.”—Ioane 11:26.

[Faaopoopoga i lalo]

[Ata i le itulau 6]

Na faatonuina le faaoosala a le Atua ina ia faaoo atu le selesaito i le vine o le lalolagi pe a oo ina otatā

[Ata i le itulau 7]

O Molimau a Ieova i le lalolagi aoao o loo fesoasoani atu i tagata ina ia latou agavaa mo le mauaina o faamanuiaga e faavavau a le Atua