Lipoti a Ē Faalauiloa le Malo

“E Mafaia Mea Uma e le Atua”

I UPU o loo i luga, e maua i le Mataio 19:26, sa faamaonia le moni i se tamaitai talavou i Venezuela. Ina ua ia aʻoaʻoina le tuuina atu o le faatuatuaga atoa ia Ieova, na mafai ai ona ia foia se faafitauli matuia. Ua ia faapea mai:

“O le tinā o loʻu tinā o sē sa agalelei ma loto alofa. Ae o le mea e faanoanoa ai, ona sa maliu o ia faatoʻā 16 oʻu tausaga. Sa avea lona maliu o se tā ogaoga ia te au. Na oo ai ina faaletonu loʻu mafaufau, ma sa ou lē manao foi e alu atu i fafo i luma o le fale. Na iu ina toetoe lava avea aʻu ma sē ua faanofoesea.

“Sa ou lē alu i le aʻoga, pe ou te faigaluega foi. Sa na o loʻu nofo lava i loʻu potu. I le tuua toatasi ma aunoa ma ni uo, na ou afaina ai i le maʻi o faalogona mafatia. Sa ou lagona le matuā lē aogā ma ou manao ai e oti ma teʻa uma atu ai nei mea. Sa ou tuufesili pea ia te au, ‘Aisea ua ou ola ai pea?’

“Sa masani ona maua mai mekasini o Le Olomatamata ma le Ala Mai! a loʻu tinā mai se talavou Molimau e igoa ia Gisela. I le tasi aso na iloa atu ai e loʻu tinā Gisela o savali ane i luma o lo matou fale ma sa ia talosaga i ai pe mafai ona ia fesoasoani mai ia te au. Na malie Gisela o le a ia taumafai, ae sa ou musu e ma te feiloai. Sa lei avea lena ma mea e faamaamulu ai Gisela. Na ia tusi mai ia te au ma faailoa mai ai e faapea e fia avea o ia ma aʻu uo ma e iai se isi foi e sili mamao atu lona tāua na i lo o ia e manao e avea ma aʻu uo. Ma o lē na ia taʻua, o Ieova le Atua.

“Na pāʻia loʻu loto i lena mea, ma na ou taliina ai loa lana tusi. E pe ā ma le tolu masina o ma fetusiai. Ina ua uma le tele o faatauanauga ma faamalosiauga na faia e Gisela, na faatoʻā ou maua ai le lototele e feiloai ai ma ia. I la maua feiloaiga muamua, na ma suesueina ai ma Gisela le Tusi Paia, e faaaogaina ai le tusi E Mafai ona E Ola e Faavavau i Parataiso i Le Lalolagi. Ina ua maeʻa le suesuega, na ia valaaulia ai aʻu e auai i se sauniga i le Maota o le Malo i lena lava vaipanoa. Na matuā faateia lava aʻu. Ua atoa le fa o tausaga talu ona ou lē toe ulufafo ma le fale, ma o le mafaufau i le agaʻi atu i le auala tele o se mea e fefe ai.

“Sa faaalia pea e Gisela le onosai mo aʻu. Na ia faamautinoa mai ia te au faapea e leai lava se mea ou te fefe ai ma o le a ia sau ma te ō i le sauniga. Mulimuli ane na ou malie loa. Ina ua ma taunuu i le Maota o le Malo, na amata ona ou tete ma sau loʻu āfu. Sa lē mafai ona ou feiloai atu i se tasi. E ui i lea, na ou malie pea e faaauau ona auai i sauniga, ma na asiasi mai pea lava ma le faamaoni Gisela ia te au i vaiaso taitasi.

“Ina ia fesoasoani ia te au e foia loʻu popole, na sau ai Gisela ma vave ona ma ō i le sauniga a o lei taitai ona amata le sauniga. Sa ma tutū i le faitotoa ma faafeiloai tagata uma a o latou taunuu atu. I lena auala na mafai ai ona ou feiloai i le na o se toatasi pe toalua ni tagata i taimi taitasi, na i lo se vaega toatele i le taimi e tasi. Pe a ou lagonaina ua lē mafai ona ou fesagai umi ma tagata, ona sii mai lea e Gisela ia te au o le Mataio 19:26: ‘E lē mafaia e tagata lenei mea, a e mafaia mea uma e le Atua.’

“E ui lava e lē o se mea faigofie, ae mulimuli ane sa mafai lava ona ou auai i se faatasitasiga tele o tagata i se fonotaga matagaluega. Maeu se laasaga tele mo aʻu! Ia Setema 1995, na ou mauaina ai le lototele e talanoa atu ai i toeaina e uiga i le auai i le faiva mai lea fale i lea fale. I le ono masina mulimuli ane ai, ia Aperila 1996, na ou faailogaina ai loʻu tuuina atu ia Ieova e ala i le papatisoga i le vai.

“Pe a fesili mai nei se tasi ia te au pe na faapefea ona ou maua le lototele e faia ai faapea, na ou tali atu: ‘O loʻu naunau e faafiafia Ieova e sili atu na i lo o loʻu fefe.’ A o iai pea nisi o taimi e oo mai ai lagona mafatia, e faamalosia aʻu e loʻu olioli e ala i loʻu auauna o se paeonia sauatoa. I le toe tepa i tua, e tatau ai ona ou ioe i le mea na fai mai ai Gisela. O lea ua iai laʻu Uo o lē e naunau mai ma “faamalosi mai ia te au.”—Filipi 4:13, LF.

[Ata i le itulau 8]

“O loʻu naunau e faafiafia Ieova e sili atu na i lo o loʻu fefe”