Le Tausisia o Laʻu Folafolaga e Auauna i le Atua

UA FAAMATALAINA E FRANZ GUDLIKIES

E na o le toafā o la matou vaega mai le sili atu i le selau o fitafita na faasaoolaina. A o fesagai ma le oti, sa ou faapaʻū ifo i oʻu tulivae ma folafola atu i le Atua, ‘Afai e faasaoina aʻu mai le taua, o le a lē aunoa ona ou auauna atu ia te oe.’

NA OU faia lena folafolaga i le 54 tausaga ua mavae, ia Aperila 1945, ina o avea aʻu ma fitafita i le vaegaau a Siamani. I le taimi lea a o toeitiiti lava faaiuina le Taua Lona Lua a le Lalolagi, ma a o faia se osofaiga malosi mulimuli a le vaegaau a Rusia agaʻi ia Perelini. Sa faatulaga la matou vaega e latalata i le aai o Seelow i le Vaitafe o Oder, e itiiti ifo i le 40 maila [65 kilomita] le mamao mai Perelini. Iina sa tuʻi ai pea i matou i le anoanoai o pulufana i le ao ma le po, ma na matuā faaitiitia ai lava laʻu vaega.

O le taimi lena, ma o le taimi muamua foi lea i loʻu olaga na ou tagi ai ma tatalo atu ai i le Atua. Sa ou manatua pea se mau o le Tusi Paia sa masani ona sii mai e loʻu tinā e mataʻu i le Atua e faapea: “Ia e valaau foi ia te au i le aso e i ai le puapuaga; ou te laveaiina ai oe, ona e vivii mai ai lea ia te au.” (Salamo 50:15) Iina i autu e lalafi ai ma i le fefe ina neʻi teʻi ua ou oti, sa ou faia ai i le Atua le folafolaga lea e pei ona taʻua i le amataga. Na mafai faapefea ona ou tausia lea folafolaga? Ma na faapefea ona avea aʻu ma se tasi o le vaegaau a Siamani?

Le Ola Aʻe i Lithuania

I le 1918, i le vaitaimi o le Taua Muamua a le Lalolagi, na faalauiloa mai ai e Lithuania lona tutoatasi ma faavaeina ai loa se faiga malo e pulea faatemokalasi. Na ou fanau i le 1925 i le itumalo o Memel (Klaipėda) e latalata i le Baltic Sea. E lei leva talu ona soofaatasi le itumalo lea ma Lithuania i le tausaga na seʻi faatoʻā mavae atu ae ou te lei fanau mai.

A o matou laiti, sa matou ola fiafia lava ma oʻu tuafāfine e toalima. O Tamā sa pei o sa matou uo māfana, sa masani ona faifaimea faatasi ma i matou le fanau. O o matou mātua o ni tagata o le Lotu Faaevagelia, ae la te lē auai lava i ni sauniga lotu ona sa lē fiafia Tinā i le faaʻoleʻole o le faifeau. Ae peitai, sa alofa pea o ia i le Atua ma lana Afioga le Tusi Paia, o lea sa ia toaga ai e faitauina.

I le 1939, na puea ai e Siamani le vaega o Lithuania lea na matou nonofo ai. Ona oo lea i le tauamataga o le 1943, na valaaulia ai aʻu mo le auaunaga faavaegaau a Siamani. O se tasi o fetauaiga na ou manuʻa ai, ae ina ua ou toe malosi mai na manua, na ou toe foi atu ai i le vaega o le Eastern Front. O le taimi lena, na suia ai tulaga o le taua ma na solomuli ai Siamani mai vaegaau a Rusia. I le taimi lena na toeitiiti lava a ou oti ai, e pei ona faamatalaina atu i le amataga.

 Le Tausisia o Laʻu Folafolaga

A o faagasolo le taua, na siitia atu ai oʻu mātua i le aai o Oschatz, i Siamani, e i saute sasaʻe o Leipzig. I le taimi lena ina ua iʻu le taua, sa faigata ona iloa le mea sa iai i laua. Ae maeu le fiafia ina ua iu ina toe faatasia i matou! E lei umi se taimi mulimuli ane, ia Aperila 1947, na ma ō atu ai ma Tinā i se lauga lautele na fofogaina mai e Max Schubert, o se tasi o Molimau a Ieova. Sa talitonu Tinā e faapea ua ia maua le lotu moni, ma ina ua uma ona auai i nisi o sauniga, sa oo foi ina ou auai i lona talitonuga.

E lei umi lava se taimi mulimuli ane, na paʻū ai Tinā mai se apefaʻi, ma mafatia ai i ni manuʻa na iu ina maliu ai o ia i ni nai masina mulimuli ane. A o iai i le falemai a o lei maliu o ia, sa ia faalaeiauina aʻu ma le māfana e faapea: “E masani ona ou tatalo ina ia mafai e se tasi o laʻu fanau ona maua le ala i le Atua. O lea ua ou iloa nei ua talia aʻu tatalo, ma ua mafai nei ona ou oti filemu.” Maeu loʻu vaavaai atu i luma i le taimi o le a toe fafagu mai ai Tinā mai le oti ma iloa ua faataunuuina ana tatalo!—Ioane 5:28.

Ia Aokuso 8, 1947, ina ua mavae le na o le fa masina talu ona ou faalogo i le lauga a le uso o Schubert, na papatisoina ai aʻu i se fonotaga na faia i Leipzig e faailoga ai loʻu tuuina atu ia Ieova le Atua. O lea ua iu ina ou faia laasaga e faataunuuina ai laʻu folafolaga i le Atua. E lei umi lava se taimi ae avea aʻu ma paeonia, e pei ona taʻua ai faifeau faataimi atoa o Molimau a Ieova. I lena taimi sa iai paeonia e toeitiiti lava atoa le toʻa 400 sa nonofo i le nofoaga lea na avea mulimuli ane ma vaega o le German Democratic Republic, po o Siamani i Sasaʻe.

O Uluai Tofotofoga o le Faatuatua

Sa taumafai lava loʻu tuaoi i Oschatz e faatosina aʻu i faiga faa-Marx, i le ofoina mai o se aʻoaʻoga i le iunivesite e totogi e le malo pe afai ou te auai atu i le Socialist Unity Party of Germany (SED). Sa ou teena le ofo e pei lava ona teena e Iesu le ofo a Satani.—Mataio 4:8-10.

I se tasi aso ia Aperila 1949, na ō mai ai ni leoleo o le malo se toalua i le fale ou te faigaluega ai ma poloaiina aʻu ina ia ou alu atu matou te ō. Na aveina atu aʻu i le ofisa o le auaunaga mo le puipuiga a Rusia, ma o iina na tuuaia ai aʻu faapea o loo ou galue mo le pulega faatautalatasi a tagata i le itu i Sisifo. Na latou faapea mai e mafai ona ou faamaonia atu loʻu mamā mai lena tuuaiga, i le faaauau pea o laʻu galuega mai lea fale i lea fale ae ia ou lipotiina atu ia te i latou so o se tasi e tautala i ni tala lē lelei faasaga i le faiga malo a Rusia po o le SED, po o so o se tasi foi e asiasi atu i sauniga a Molimau a Ieova. Ae ina ua ou teena la latou fuafuaga, na loka ai aʻu i se sela. Mulimuli ane, na aveina atu ai aʻu i luma o se vaega e foliga mai o se faamasinoga faavaegaau. O le iuga mo aʻu: E 15 tausaga i nofoaga o faasalaga mamafa i Siberia!

Sa ou toafilemu pea, ma na ofo ai leoleo i lena mea. Ona latou faailoa mai lea ia te au e faapea, e tumau pea le umi o loʻu faasalaga, ae ua lava le tau ina ou lipoti faatasi atu i le vaiaso seia oo ina ou nofo sauni e felagolagomai ma i latou. I le manaomia o ni fautuaga mai ni Molimau e sili atu ona taumatuaina, sa ou faimalaga atu ai i Magdeburg, i le mea sa iai le ofisa o le lālā o le Sosaiete o le Olo Matamata i lena taimi. Sa lei faigofie le malaga, talu ai sa vaavaaia aʻu e leoleo. Na faapea mai ia te au Ernst Wauer o lē sa galue i le Matagaluega o Mataupu Faale-Tulafono (Legal Department) i Magdeburg: “Afai e te tau o le a e manumalo. Afai e te lolo atu o le a e toilalo. O le manatu lena na matou aʻoaʻoina mai i nofoaga o faasalaga.” * O le fautuaga lena na fesoasoani ia te au e tausisia ai laʻu folafolaga e auauna i le Atua.

Le Faasāina ma le Toe Taofia

Ia Iulai 1950, na faatu atu ai aʻu e auauna e avea ma ovasia faimalaga. Ae peitai, ia Aokuso 30, na osofaia ai e leoleo lo matou fale i Magdeburg, ma faasāina ai la matou galuega talaʻi. O lea na suia ai loʻu tofiga. Sa tatau ona ma asiasi ma Paul Hirschberger i faapotopotoga pe ā ma le 50, e faaalu ai le tailua i le taitolu aso i le faapotopotoga e tasi, e fesoasoani atu i uso ina ia faamaopoopoina le faaauauina pea o la latou faiva i lalo o faasāsāga. I masina na sosoo ai, e faaono ona ou sao mai i le pueina o aʻu e leoleo!

O se tasi o faapotopotoga na alu atu faaleiloga i ai se tasi o lē na ia faalataina i maʻua i le Stasi,  le Auaunaga mo le Saogalemu a le Setete. O lea, ia Iulai 1951, na puea ai i maʻua ma Paulo i le ala tele e ni tamaloloa se toalima ma a latou fana na faalālā mai. I le toe tepa i tua, sa mafai ona ma iloa ai, sa ma lei faalagolago i le faalapotopotoga a Ieova i le tele sa tatau ona ma faia ai. Sa fautuaina i maʻua e o ma uso matutua ina ia aua lava neʻi o ma ō faatasi. O le soona mautinoa naua na iu ina leiloa ai lo ma saolotoga! E lē gata i lea, ma te lei talanoa muamua foi i ni tala e tatau ona ma fai atu ai pe afai e puea i maʻua.

I le iai na o aʻu i loʻu sela, sa ou aioi atu ma loimata ia Ieova mo se fesoasoani ina ia aua neʻi oʻu faia ni faamatalaga e faalataina ai oʻu uso pe avea aʻu o se tagata e lafoaia loʻu faatuatua. Ina ua ou moe, na faafuasei lava ona fafagu aʻu ina ua ou faalogoina le leo o laʻu uo o Paulo. I luga tonu aʻe lava o loʻu sela, sa iai le potu lea na suesueina ai o ia e leoleo o le Stasi. Talu ai o se po vevela ma le susū o le ea, na tatala ai le faitotoa i le poletito, ma sa mafai ona ou tau lagona laitiiti atu lava mea uma. Mulimuli ane, ina ua suesueina aʻu, o tali foi na sa ou tali atu ai, ma sa ofo ai leoleo. Sa ou manatua pea le mau o le Tusi Paia sa sili ona fiafia i ai Tinā e faapea, “Ia e valaau foi ia te au i le aso e i ai le puapuaga; ou te laveaiina ai oe,” ma sa sili ona faalototeleina ai aʻu.—Salamo 50:15.

Ina ua uma ona faia le suesuega, na taofia ai i maʻua ma Paulo mo le lima masina i nofoaga a le Stasi e vaavaaia ai a o faatali le faamasinoga i le falepuipui i le aai o Halle, ma na mulimuli ane avatu i maʻua i Magdeburg. A o iai i Magdeburg, sa tau atu laʻu vaai i nisi taimi i fale o lo matou lālā sa tapunia i lena taimi. Sa ou moomoo maimau pe ana faapea o loo oʻu faigaluega ai iina na i lo o le tuuina i le falepuipui! Ia Fepuari 1952 na lau mai ai lo ma iuga: “E 10 tausaga i le falepuipui ma le 20 tausaga e leai ai ni o ma aiā tatau e pei ona masani ai tagatānuu uma.”

Le Tausisia o le Faatuatua i le Falepuipui

O Molimau a Ieova o ē sa faasalaina a itiiti mai o le taʻi sefulu tausaga, sa tuuina atu ia i latou ni faailoga faapitoa mo ni taimi na latou iai i le falepuipui. Sa suʻiina se lipine mūmū i le tasi vae o le ofuvae ma le tasi i le lima o o matou ofutino. Sa faapena foi ona faamau se fasi laupapa lapotopoto mūmū i tua o faitotoa o o matou potu ina ia lapataia ai leoleo e faapea, o i matou o ni tagata solitulafono matautia.

O le mea moni sa manatu pule o le falepuipui ia i matou e faapea, o ni pagota e sili atu ona leaga. Sa lē faatagaina i matou e umia se Tusi Paia ona e pei ona faamatala mai e se tasi leoleo e faapea: “O le umia e se tasi o Molimau a Ieova o se Tusi Paia, e tutusa lava lena ma le umia e se tagata solitulafono o se fana i lona lima.” Ina ia aoaoina mai ni vaega o le Tusi Paia, sa matou faitauina ai tusitusiga a le tusitala Rusia o Leo Tolstoy, o lē sa masani ona ia siiina mau o le Tusi Paia i ana tusi. Sa matou aʻo faataulotoina nei mau o le Tusi Paia.

Muamua atu a o lei pueina aʻu i le 1951, ae ua uma ona ma faamau ma Elsa Riemer. Sa masani ona ia asiasi atu pea ia te au i le falepuipui i taimi uma lava na ia mafaia ai ma auina atu ia te au se afifi meaʻai e faatasi i le masina. Sa ia nanāina ai foi i totonu o ana afifi, ia meaʻai faaleagaga. I se tasi taimi, sa ia nanā ai ni mataupu mai se Olomatamata i totonu o ni sosisi. Sa masani foi ona tipi e leoleo ia sosisi ia iloa ai po o iai se mea o nanā ai i totonu, ae i lea taimi na taunuu atu le afiafi ae ua toeitiiti lava oo i le taimi e mānava ai galuega o le aso, ma sa lei siakiina ai.

I lena taimi, na matou potu faatasi ai ma Karl Heinz Kleber ma isi pagota e toatolu e lē o ni Molimau i se tamai sela. O le a faapefea ona ma faitauina Le Olomatamata e aunoa ma le iloa mai? Ia, sa ma faatagā faafoliga atu o loo ma faitauina se tusi, ae i totonu sa ma nanā ai mataupu o Le Olomatamata. Sa ma tufa atu foi nei meaʻai tāua faaleagaga i isi uso Molimau i totonu o le falepuipui.

A o iai i le falepuipui, sa ma faaaogā foi avanoa e taʻu atu ai i isi e uiga i le Malo o le Atua. Sa ou matuā fiafia lava ina ua vaai atu i se tasi o aʻu uo i le falepuipui ua avea o se tagata talitonu ona o le faia faapea.—Mataio 24:14.

Toe Foi Atu i le Faiva Faataimi Atoa

Ia Aperila 1, 1957, ina ua mavae le toetoe lava ono tausaga i le falepuipui, na tatalaina ai loa aʻu. I le itiiti ifo i le lua vaiaso mulimuli ane, na ma faaipoipo ai ma Elsa. Ina ua faalogo leoleo o le Stasi ua ou magalo, sa latou saili i se mea e toe avatu ai aʻu i le falepuipui. Ina ia alofia le ono tupu o lena mea, na ma sopoia ai loa ma Elsa le tuaoi  ma ō atu ma nonofo i Perelini i Sisifo.

Ina ua ma taunuu i Perelini i Sisifo, sa manao le Sosaiete e fia iloa po o ā a ma fuafuaga. Sa ma faamatala atu e faapea, o le tasi o i maʻua o le a paeonia a o le isi o le a faigaluega.

Na fesiligia i maʻua e le Sosaiete e faapea: “O le ā so lua manatu pe a faapea e avea uma oulua ma paeonia?”

Na ma tali atu e faapea: “Afai e mafai lena mea, o le a ma amata loa lava.”

O lea la, sa ma maua sina tupe itiiti i masina taitasi e fesoasoani i le tausiga o i maʻua, ma sa amata loa ona ma auauna e avea o ni paeonia faapito i le 1958. Maeu lo ma fiafia i le vaavaai atu i tagata na matou suesue i le Tusi Paia ua faia suiga i o latou olaga ina ia avea ma auauna a Ieova! O le sefulu tausaga na sosoo ai i le auaunaga o le paeonia faapito, na aʻoaʻoina ai i maʻua ina ia galulue vavalalata faatasi e avea o se tane ma se avā. Sa ma faifaimea faatasi pea ma Elsa, e oo lava i le taimi a o ou faaleleia le taavale. E ma te faitau tusi faatasi foi, suesue, ma tatalo faatasi.

I le 1969 na tofia ai i maʻua i le galuega femalagaai, i le asiasia o faapotopotoga eseese i vaiaso taitasi ina ia auauna atu i manaoga o ona tagata. O Josef Barth, o se tagata ua lava le poto masani i le galuega femalagaai, na ia fautua mai ia te au e faapea: “Afai e te manao ina ia e taulau manuia i lou tofiga, tau lava ina ia avea oe o se uso i le auuso.” Sa ou taumafai e faatatauina lena fautuaga. O le iuga, sa ou maua ai se faiā matuā māfana ma autasi ma uso Molimau, lea sa faafaigofie ai ona ou avatu fautuaga pe a manaomia.

I le 1972, na iloa ai ua maua Elsa i le kanesa ma sa tatau ona faia se taotoga. Mulimuli ane, na maua ai foi o ia i le maʻi o le rumatika. E ui lava ina mafatia o ia i tiga, ae sa ma ō pea i vaiaso taitasi e auauna i faapotopotoga, ma galulue ma tuafāfine i le faiva i le tele na ia mafaia ai.

Le Fetuunai e Tusa ai i Manaoga

I le 1984 na oo ai ina manaomia e mātua o loʻu toalua se tausiga faifai pea, o lea na ma tuua ai le galuega femalagaai ina ia fesoasoani i le tausia o i laua seia oo ina maliliu i le fa tausaga mulimuli ane. (1 Timoteo 5:8) I le 1989, na oo ina maʻi tigaina ai Elsa. Ae o le mea e fiafia ai, na toe maua si ona malosi, ae ua tatau ona ou faia galuega uma i le aiga. O loo oʻu aʻoaʻoina pea le auala e feagai ai ma se tasi e mafatia i tiga i taimi uma. Ae peitai, e ui lava i mafatiaga o le mafaufau ma faalogona tiga, ae o loo tumau pea lo ma naunau i mea faaleagaga.

I aso nei, e faafetai ai ona o loo mafai pea ona ma iai i le lisi o paeonia. E ui i lea, ua oo ina ma talisapaia e faapea, o lo ma tumau i le faamaoni, o le mea lena e sili ona tāua ae e lē o ni tofiga o ma mauaina po o le tele o mea ua mafai ona ma faataunuuina. E ma te mananao e auauna i lo tatou Atua, o Ieova, e lē mo na o ni nai tausaga, ae mo le faavavau. O mea ua oo ia i maʻua ua avea o se toleniga matagofie mo le lumanai. Ma ua foaiina mai e Ieova ia i maʻua le malosi e viivii atu ai ia te ia e oo foi lava i tulaga e sili ona faigata.—Filipi 4:13.

[Faaopoopoga i lalo]

[Ata i le itulau 23]

Na faafalepuipuiina aʻu iinei i Magdeburg

[Ē Ana le Ata]

Gedenkstätte Moritzplatz Magdeburg für die Opfer politischer Gewalt; Foto: Fredi Fröschki, Magdeburg

[Ata i le itulau 23]

Ina ua ma faaipoipo i le 1957

[Ata i le itulau 23]

O i maʻua ma Elsa i aso nei