“Mea Alofa i Tagata” Ina ia Tausia Mamoe a Ieova

“Na afio ae o ia i luga, ma na taʻitaʻi faatagataotaua i le tafeaga; ua na foaiina foi mea alofa i tagata.”—EFESO 4:8.

1. O le ā le faamatalaga na faia e se tuafafine Kerisiano e faatatau i toeaina o lana faapotopotoga?

“FAAFETAI lava mo le tele o la outou tausiga ia i matou. O o outou laufofoga fiafia, o uiga māfana, ma lo outou manatu mamafa mai e matuā moni lava. O loo outou nofo sauni i taimi uma lava e faalogologo mai ma faaoo mai upu mai le Tusi Paia e faagaeetia ai o matou agaga. Ou te tatalo ina ia aua lava neʻi oʻu manatu māmā i lo outou tautiga.” O upu na sa tusi atu ai se tuafafine Kerisiano i toeaina o lana faapotopotoga. E manino mai, o le alofa sa faaalia e leoleo mamoe Kerisiano manatu mamafa na pāʻia ai le loto o lenei tuafafine.—1 Peteru 5:2, 3.

2, 3. (a) E tusa ai o le Isaia 32:1, 2, e faapefea i toeaina o ē alolofa mutimutivale ona latou tausia mamoe a Ieova? (e) O le ā le taimi e mafai ai ona manatu i se toeaina o se meaalofa?

² O toeaina o se sauniuniga mai ia Ieova mo le tausia o ana mamoe. (Luka 12:32; Ioane 10:16) E pele ia Ieova ana mamoe—o le mea moni, e matuā pele lava, o le mafuaaga foi lea na ia faatauina ai i latou i le toto tāua o Iesu. E letioa lava la fiafia le finagalo o Ieova pe a tausia ma le faapelepele e toeaina lana lafu mamoe. (Galuega 20:28, 29) Seʻi mātau foi le faamatalaina faavaloaga o nei toeaina, po o “alii”: “E fai foi le tagata e pei o se lafitaga i le matagi, ma se mea e malu ai i le afā; e pei o vaitafe i le nuu naumati, e pei o le paolo foi o le papa tele i le nuu ua le o i ai se vai.” (Isaia 32:1, 2) Ioe, e tatau ona latou puipuia, faafouina, ma faamafanafanaina ana mamoe. O toeaina o ē leoleoina ma le alofa mutimutivale le lafu mamoe o loo taumafai malosi i latou e ola aʻe e tusa o mea o loo faatalitalia e le Atua mai ia i latou.

³ O ituaiga toeaina na o loo faasino i ai le Tusi Paia faapea o “mea alofa i tagata.” (Efeso 4:8) Pe a e mafaufau i se meaalofa, e te mafaufau i se mea e tuuina mai ina ia faamalie ai se manaoga pe aumaia ai se fiafiaga i lē na te mauaina. E mafai ona manatu i se toeaina o se meaalofa pe afai na te faaaogaina ona tomai e saunia ai fesoasoani manaomia ma saosaolaumea i le fiafiaga o le lafu mamoe. E mafai faapefea ona ia faia lenei mea? O le tali, lea e maua i upu a Paulo i le Efeso 4:7-16, o loo faalautele atili ai le manatu alofa mai o Ieova mo ana mamoe.

“Mea Alofa i Tagata” —O Fea e Aumai Ai?

4. I le faataunuuga o le Salamo 68:18, o le ā le auala na ‘afio aʻe ai [Ieova] i le mea maualuga,’ ma o ai i latou na sa fai ma “mea alofa mo tagata”?

⁴ Ina ua faaaogā e Paulo le faaupuga “mea alofa i tagata,” sa ia toe sii maia upu a le tupu o Tavita, o lē na faapea mai e uiga ia Ieova: “Na e afio ae i le mea maualuga, na e taʻitaʻi faatagataotaua i le tafeaga; na e maua mea alofa mo tagata.” (Salamo 68:18) Ina ua mavae ni nai tausaga o iai le fanauga a Isaraelu i le Nuu o le Folafolaga, na “afio ae” ai faafaatusa Ieova i le Mauga o Siona ma faia Ierusalema ma laumua o le malo o Isaraelu ma avea ai Tavita ma ona tupu. Ae o ai i latou na sa fai ma “mea alofa mo tagata”? O tane o ē na aveina faatagataotaua. O nisi o i latou nei sa faatagataotauaina na mulimuli ane tuuina atu i le au sā Levī e fesoasoani i le galuega i le fale fetafai.—Esera 8:20.

5. (a) Ua faaalia faapefea e Paulo e iai se faatatauga o le Salamo 68:18 i totonu o le faapotopotoga Kerisiano? (e) I le ā le auala na ‘afio aʻe ai [Iesu] i le mea maualuga’?

 ⁵ I le tusi atu a Paulo i Kerisiano i Efeso, ua ia faaalia ai faapea o upu a le faisalamo e iai sona faataunuuga e sili atu i totonu o le faapotopotoga Kerisiano. I le toe faaupuina o le Salamo 68:18, ua tusi ai Paulo: “A ua foaiina mai ia te i tatou taitoatasi o le alofa tunoa, e faatatauina ma le mea foaifuaina mai e Keriso. O le mea lea ua fai mai ai, Na afio ae o ia i luga, ma na taʻitaʻi faatagataotaua i le tafeaga; ua na foaiina foi mea alofa i tagata.” (Efeso 4:7, 8) Iinei o loo faatatau ai e Paulo lenei salamo ia Iesu i le avea ma sui o le Atua. O Iesu, ‘sa manumalo i le lalolagi’ e ala i lona soifuaga faamaoni. (Ioane 16:33) Sa manumalo foi o ia mai le oti ma Satani, e ala i le toe faatuina aʻe o ia e le Atua nai le oti. (Galuega 2:24; Eperu 2:14) I le 33 T.A., na afio aʻe ai Iesu o lē ua toetu mai, “i luga o lagi uma lava”—e maualuga atu na i lo isi foafoaga uma i le lagi. (Efeso 4:9, 10; Filipi 2:9-11) O lona avea o sē manumalo, na ‘taʻitaʻi faatagataotaua ai nisi’ e Iesu mai le fili. Faapefea?

6. I le amata mai le Penetekoso 33 T.A., na amata faapefea e Iesu o lē na afio aʻe i le lagi ona faatamaia le fale o Satani, ma o le ā na ia faia i ‘ē ua faatagataotauaina’?

⁶ A o iai Iesu i le lalolagi, sa ia faaalia ai le sili atu o lona mana na i lo Satani e ala i le laveaiina o i latou na pulea e temoni. Na peiseai ua osofaia e Iesu le fale o Satani, saisaia o ia, ma faoa ana oloa. (Mataio 12:22-29) Seʻi manatu la i le maeu o se gaoioiga fao faamalosi sa ono mafai ona faia e Iesu ina ua toe faatuina mai ma foai atu i ai “le pule uma lava i le lagi ma le lalolagi”! (Mataio 28:18) I le amata mai le Penetekoso 33 T.A., na amata ai e Iesu o lē na afio aʻe i le lagi, i lona fai ma sui o le Atua, ona faatamaia le fale o Satani e ala i le ‘aveesea faatagataotaua’—o tane o ē ua leva ona faapologaina i le agasala ma le oti ma sa i lalo o le pulega a Satani. Sa loto malilie i latou nei o ‘ē ua faatagataotauaina’ ina ia avea ma “auauna a Keriso, o e fai le finagalo o le Atua ma le loto.” (Efeso 6:6) O le iuga, na faasaoloto ai i latou e Iesu mai le pule a Satani, ma i lona fai ma sui o Ieova, na ia tuuina atu ai i latou i le faapotopotoga e fai ma “mea alofa i tagata.” Seʻi tepa faalemafaufau i le lotoa o Satani ua leai sana mea e mafai, a o seʻi ese i latou nei mai lana pulega a o vaavaai atu lava o ia i ai!

7. (a) O ā vala o loo auauna ai “mea alofa i tagata” i totonu o faapotopotoga? (e) O le ā le avanoa ua tuuina atu e Ieova i tane taitoatasi o loo auauna o ni toeaina?

⁷ Po o tatou maua ea na “mea alofa i tagata” i le faapotopotoga i aso nei? O le mea moni, o loo tatou mauaina! Ua tatou maua i latou o loo  auauna o ni toeaina, o loo galulue mamafa o ni ‘au faievagelia, leoleo mamoe, ma ē aʻoaʻo atu’ i le silia ma le 87,000 faapotopotoga o tagata o le Atua i le lalolagi aoao. (Efeso 4:11) O le a matuā faafiafiaina lava Satani pe a latou soona faia le lafu mamoe. Peitai e lē o le mafuaaga lena na tuuina mai ai i latou e le Atua i le faapotopotoga e ala mai ia Keriso. Na i lo lea, na saunia e Ieova nei tane mo le lelei o le faapotopotoga, ma e tali atu i latou ia te ia e tusa ai o mamoe ia ua tuuina mai i la latou tausiga. (Eperu 13:17) Pe afai o e auauna o se toeaina, ua tuuina atu la e Ieova ia te oe se avanoa matagofie e te faamaonia mai ai o oe moni o se meaalofa, po o se faamanuiaga, i ou uso. E mafai ona e faia faapena e ala i le faataunuuina o tiute tauave tāua e fa.

Pe a Iai se Manaoga mo se “Toe Faasaʻoina”

8. I ā auala tatou te manaomia uma ai ona toe faasaʻoina i nisi o taimi?

⁸ Muamua, ua faapea mai Paulo, o “mea alofa i tagata” ua saunia “ina ia faaatoatoaina [“toe faasaʻoina,” NW] ai le au paia.” (Efeso 4:12) O le nauna faa-Eleni ua faaaogā mo le “toe faasaʻoina” e faasino i le tuuina o se mea ina “ia faasaʻo lelei ai.” Ona o ni tagata lē lelei atoatoa, tatou te manaomia uma ai ona toe faasaʻoina mai lea taimi i lea taimi—ia “faasaʻo lelei” mai o tatou mafaufauga, uiga, po o amioga, ia ogatusa ma mafaufauga ma le finagalo o le Atua. Ua saunia ma le alofa e Ieova “mea alofa i tagata” e fesoasoani ia i tatou e toe faia ai faasaʻoga e manaomia. E faapefea ona latou faia o lenei mea?

9. E mafai faapefea e se toeaina ona fesoasoani e toe faasaʻoina se mamoe ua faia se mea sese?

⁹ I nisi taimi, atonu e manaomia ai se toeaina e fesoasoani i se mamoe ua faia se mea sese, atonu na ia “uia se laasaga sese ma lona lē iloa.” E mafai faapefea ona fesoasoani atu se toeaina? Ua faapea mai le Kalatia 6:1 (NW): “Ia taumafai e toe faasaʻo le ua faapeaina ma le loto o le agamalu.” O lea, pe a ofoina atu fautuaga, o le a lē otegia ai e se toeaina lē ua sese, ma fai atu ni upu mamafa. O fautuaga e tatau ona faalaeiau, ae lē ina ia “faamatau” ai lē o fautuaina. (2 Korinito 10:9; faatusatusa i le Iopu 33:7.) Atonu o lena ua iai i le tagata lagona masiasi, o se leoleo mamoe la e alofa na te alofia lona nutimomoia o le agaga o lena tagata. Pe afai o fautuaga e oo lava foi i ni aoaiga e tuuina atu, e manino mai le uunaia ma tuuina atu i se uiga alofa, e mautinoa la o le a toe faasaʻo lelei ai mafaufauga po o amioga a lē o loo sese, ma toe faafoisia mai ai o ia.—2 Timoteo 4:2.

10. O le ā e aofia ai i le toe faasaʻoina o isi?

¹⁰ I le saunia o “mea alofa i tagata” mo le toe faasaʻoina o i tatou, sa finagalo Ieova ina ia avea toeaina o nisi e faafouina ai faaleagaga, ia onomea ma tatau ona faataitai atu i ai ona tagata. (1 Korinito 16:17, 18; Filipi 3:17) O le toe faasaʻoina o isi e aofia ai e lē gata o le faasaʻoina o i latou ua uia se ala sese, ae e fesoasoani atu foi i ē faamaoni ina ia tumau pea i le ala saʻo. * I aso nei, ona o le tele o faafitauli e tauāu ina faaloto vaivai ai, ua manaomia ai e le toatele ni faalaeiauga ina ia tumau pea. O nisi atonu latou te manaomia fesoasoani agaalofa ina ia faasaʻo lelei ai o latou mafaufauga ma manatu o le Atua. Mo se faaaoaoga, o nisi Kerisiano faamaoni o loo tauivi ma ni faalogona ogaoga faapea ua latou lē toe mafaia se mea pe ua leai so latou aogā. O na tagata o “e loto iti” atonu e manatu faapea o le a lē toe alofa mai lava Ieova ia i latou ma e oo lava i ni a latou taumafaiga sili ona lelei ina ia auauna atu i le Atua o le a lē tāitai ona taliaina e ia. (1 Tesalonia 5:14) Peitai o lena ituaiga o mafaufauga e lē o saʻo lelei e tusa ai ma lagona moni o le Atua e uiga i ona tagata tapuai.

11. O le ā e mafai ona fai e toeaina ina ia fesoasoani ai ia i latou o loo tauivi ma ni faalogona faapea ua leai so latou aogā?

¹¹ Toeaina e, o le ā e mafai ona outou fai e fesoasoani atu ai i na tagata? Ia faaali atu ma le agalelei ia i latou se faamaoniga faale-Tusi Paia latou te iloa ai, e manatu mamafa mai Ieova i ana auauna taitoatasi ma ia faamautinoa ia i latou faapea, o nei mau o le Tusi Paia e  faatatau totino atu foi ia i latou. (Luka 12:6, 7, 24) Fesoasoani ia latou iloa o Ieova na ‘tosina’ maia i latou e auauna ia te ia, e mautinoa la o loo ia faatāuaina i latou. (Ioane 6:44) Ia faamautinoa i ai e lē na o latou ua oo i ai na faalogona—e toatele auauna faamaoni a Ieova ua iai foi faalogona faapena. Na iai se taimi na matuā loto vaivai ai le perofeta o Elia ma ia manao ai e oti. (1 Tupu 19:1-4) O nisi Kerisiano faauuina i le uluai senituri sa latou lagona ‘ua faasalaina’ i latou e o latou lava loto. (1 Ioane 3:20) O se faamafanafanaga le iloa faapea, sa iai foi i le au faatuatua i tuā i taimi o le Tusi Paia “faalogona e pei o o tatou faalogona.” (Iakopo 5:17, NW) E mafai foi ona outou autaluina faatasi ma lē ua loto vaivai ni mataupu faalaeiau i Le Olomatamata ma le Ala Mai! O a outou taumafaiga alofa ina ia toe faafoisia i latou na, o le a lē faagaloina e le Atua, o lē ua ia foaiina mai outou e fai ma “mea alofa i tagata.”—Eperu 6:10.

“Ia Atiina ae” le Lafu Mamoe

12. O le ā ua faaalia mai e le faaupuga “ia atiina ae ai le tino o Keriso,” ma o le ā le ki i le atiina ae o le lafu mamoe?

¹² Lona lua, o “mea alofa i tagata” ua tuuina mai ina “ia atiina ae ai le tino o Keriso.” (Efeso 4:12) Iinei o loo faaaogā ai e Paulo se gagana faatusatusa. O le “atiina ae” e manatua ai se galuega faafaugafale, ma o le “tino o Keriso” e faasino atu i tagata—o i latou o le faapotopotoga o Kerisiano faauuina. (1 Korinito 12:27; Efeso 5:23, 29, 30) E manaomia ona fesoasoani atu toeaina i o latou uso ina ia agaʻi ina malolosi faaleagaga. O lo latou sini ina ia “ati ae, ae le ina ia lepetia” le lafu mamoe. (2 Korinito 10:8) O le ki i le atiina ae o le lafu mamoe o le alofa, auā o le “alofa e ati ae ai.”—1 Korinito 8:1, NW.

13. O le ā le uiga o le iai o lagona tiga alofa, ma aisea e tāua ai mo toeaina ona faaalia uiga tiga alofa?

¹³ O se tasi tāfa o le alofa lea e fesoasoani i toeaina e ati ae ai le lafu mamoe o le iai lea o lagona tiga alofa. Ina ia tiga alofa o lona uiga ia iai faalogona alofa atu mo isi—ia malamalama i o latou manatunatuga ma faalogona, ma amanaia tulaga o loo latou vaivai ai. (1 Peteru 3:8) Aisea e tāua ai mo toeaina ona iai lagona tiga alofa? O le mafuaaga sili lava talu ai o Ieova—o lē ua foaiina mai “mea alofa i tagata”—o ia o se Atua e tiga alofa. Pe a puapuagatia pe fesagai ana auauna ma mafatiaga, e mafatia faatasi o ia ma i latou. (Esoto 3:7; Isaia 63:9) E magafagafa o ia i tulaga o loo latou vaivai ai. (Salamo 103:14) E mafai la faapefea, e toeaina ona faaalia le tiga alofa?

14. O ā auala e mafai ai e toeaina ona faaalia le tiga alofa i isi?

¹⁴ Pe a sau ia i latou se tasi ua loto vaivai, latou te faalogologo lelei, ma amanaia faalogona o lena tagata. Latou te taumafai e malamalama i le talaaga o le mea na tupu, uiga totino, ma tulaga o o latou uso. Ma pe a tuuina atu e toeaina se fesoasoani ati ae faale-Tusi Paia, o le a faafaigofie foi i le mamoe ona talia auā o loo aumaia e ni leoleo mamoe ua malamalama lelei ma manatu mamafa mai ia i latou. (Faataoto 16:23) O le tiga alofa e uunaia ai foi toeaina e magafagafa i mea e gata mai ai le malosi o isi ma faalogona e ono tulai mai ai. Mo se faaaoaoga, atonu e leaga faalogona o nisi Kerisiano faamaoni ona ua lē mafai ona latou faia ni mea e tele atu i le auaunaga i le Atua, atonu pe ona ua matua le soifua po ua faaletonu foi le soifua maloloina. I le isi itu, o nisi atonu latou te manaomia ni faalaeiauga ina ia faaleleia ai la latou faiva. (Eperu 5:12; 6:1) O le tiga alofa o le a mafai ai e toeaina ona sailia “upu e faafiafia aʻi” ma ati ae ai isi. (Failauga 12:10) Pe a atiina ae ma faamalosia mamoe a Ieova, o le a uunaia ai i latou e lo latou alofa mo le Atua, ina ia faia mea uma latou te mafai i le auauna atu ia te ia!

O Tane e Faatupuina le Autasi

15. O le ā ua faaalia mai e le faaupuga “loto gatasi i la le faatuatua”?

¹⁵ Lona tolu, ua saunia “mea alofa i tagata” ina ia “oo atu o i tatou uma lava i le loto gatasi i la le faatuatua, ma le iloa lelei o le Alo o le Atua.” (Efeso 4:13) O le fasi fuaitau “loto gatasi i la le faatuatua” e faailoa mai ai le autasi e lē gata i talitonuga ae autasi foi tagata talitonu. O le isi la lea mafuaaga na tuuina mai ai e le Atua ia i tatou “mea alofa i tagata”—ina ia faatupuina  le autasi i ona tagata. E faapefea ona latou faia o lea mea?

16. Aisea e tāua ai mo toeaina ona tausisia se autasi i lo latou lava va?

¹⁶ Muamua lava, e ao ona latou tausisia se autasi i lo latou lava va. Afai e fevaevaeai leoleo mamoe, e ono oo foi mamoe i le tulaga tuulafoaia. O ni taimi tāua sa ono mafai ona faaalu i le leoleoina o le lafu mamoe atonu ua faaalu lē aogā i le faia o ni fono uumi ma ni felafolafoaiga i ni mataupu e faalētāua. (1 Timoteo 2:8) Atonu e lē otometi ona malilie toeaina i mataupu taitasi latou te talanoaina, auā o i latou o ni tane e eseese uma o latou uiga totino. E lē avea le autasi ma pogai e taofia ai le iai o ni o latou manatu e eseese pe taofia ai foi le faaali atu o na manatu i se auala paleni i le taimi o se talanoaga malamalama. E faatumauina e toeaina lo latou autasi e ala i le faalogologo ma le faaaloalo le tasi i le isi e aunoa ma se faamasinosino. E tatau ia i latou taitoatasi ona loto malilie e lolo atu ma lagolago se faaiuga faaiu a le au toeaina, pe afai e lē o solia ai se mataupu silisili o le Tusi Paia. O se agaga gauai e faaalia ai o loo taʻitaʻia i latou e le “poto mai lugā,” lea e “filemu, e agamalu.”—Iakopo 3:17, 18.

17. E mafai faapefea e toeaina ona fesoasoani e faatumauina le autasi i totonu o le faapotopotoga?

¹⁷ E mataalia foi toeaina e faatupuina le autasi i totonu o le faapotopotoga. Pe afai ua iai ni aafiaga faatupu fevaevaeaiga—e pei o le faitala faatiga, se vaivaiga e faauiga sese gaoioiga a isi, po o se uiga faafinauvale—ua lamatia ai le filemu, e nofo sauni i latou e ofo atu fautuaga aogā. (Filipi 2:2, 3) Mo se faataitaiga, atonu ua iloa e toeaina ni tagata ua mātele i le faitio po o nisi e aiā fua i mataupu a isi, ma avea ai ma ē isuisu fua. (1 Timoteo 5:13; 1 Peteru 4:15) O le a taumafai toeaina e fesoasoani i na tagata ina ia latou iloa o lena uiga e feteenai ma mea ua uma ona aʻoaʻoina ai i tatou e le Atua ma e ao ai i tagata taitoatasi ona “ave i lana lava avega.” (Kalatia 6:5, 7; 1 Tesalonia 4:9-12) I le faaaogaina o le Tusi Paia, o le a latou faamatala mai ai faapea, o le tele o mea o loo tuu mai e Ieova i le filifiliga a le loto fuatiaifo o le tagata lava ia, ma e leai se tasi o i tatou e tatau ona faamasino fua i isi i na mataupu. (Mataio 7:1, 2; Iakopo 4:10-12) Ina ia auauna faatasi i le autasi, e tatau ona iai se siomaga o le maufaatuatuaina ma le faaaloalogia i totonu o le faapotopotoga. O le ofoina mai o fautuaga faale-Tusi Paia pe a manaomia, e fesoasoani ai “mea alofa i tagata” ia i tatou ina ia faasaoina lo tatou filemu ma le autasi.—Roma 14:19.

Puipuia o le Lafu Mamoe

18, 19. (a) O “mea alofa i tagata” o loo puipuia i tatou mai ia te ai? (e) Mai le ā le isi lamatiaga o loo manaomia ona puipuia mai ai mamoe, ma ua faapefea ona gaoioi toeaina e puipuia mamoe?

¹⁸ Lona fa, ua saunia mai e Ieova “mea alofa i tagata” ina ia puipuia i tatou mai le taaʻina “i matagi uma lava o matāupu, i le pepelo o tagata, i togafiti leaga ua saunia e faasese ai.” (Efeso 4:14) O le uluai upu Eleni mo le “pepelo” ua taʻua faapea e faauiga atu i le “faimamago i se taisi” po o se “tomai e faatogafiti ai le faiga o le taisi.” Po ua lē faamanatu mai ea e lena mea ia i tatou le faitogafiti poto o loo gaoioi ai aposetate? I le faaaogaina o ni finauga faaʻoleʻole, ua latou mimiloseseina ai le Tusi Paia i se taumafaiga e mailei ese Kerisiano moni mai lo latou faatuatua. E ao ona mataalia toeaina i na “luko saua”!—Galuega 20:29, 30.

¹⁹ E manaomia foi ona puipuia mamoe a Ieova mai isi lamatiaga. Sa lei fefe le leoleo mamoe anamua o Tavita e puipuia le lafu a lona tamā  mai isi manu sa osofai ane. (1 Samuelu 17:34-36) I aso foi nei, e iai tulaga e tulai mai e tatau ai i leoleo mamoe Kerisiano manatu mamafa ona faaalia le lototele ina ia latou puipuia le lafu mamoe mai so o se tasi e ono faaleagaina pe faasauā i mamoe a Ieova, ae maise lava mamoe o loo vaivai ma maileiagofie. O le a vave ona gaoioi toeaina e aveesea mai le faapotopotoga tagata e faia agasala ma le loto i ai o ē ua faaaogā ma le loto i ai togafiti, le taufaasese, ma faufauga ina ia faia ai le amioleaga. *—1 Korinito 5:9-13; faatusatusa i le Salamo 101:7.

20. Aisea e mafai ai ona tatou lagona le saogalemu i le tausiga a “mea alofa i tagata”?

²⁰ Maeu lo tatou loto faafetai mo “mea alofa i tagata”! O la latou tausiga alofa, ua mafai ai ona tatou lagonaina le saogalemu, auā latou te toe faasaʻoina i tatou ma le faapelepele, latou te atiina ae i tatou ma le alofa, e nofo sauni e faatupuina lo tatou autasi, ma loto tetele e puipuia i tatou. Ae tatau faapefea ona manatu nei “mea alofa i tagata” i la latou matafaioi i le faapotopotoga? Ma e mafai faapefea ona faaali atu lo tatou talisapaia o i latou? O fesili nei o le a talanoaina i le mataupu o sosoo mai.

[Faaopoopoga i lalo]

E te Manatua?

□ O ai “mea alofa i tagata,” ma aisea ua tuuina mai ai i latou e le Atua i le faapotopotoga e ala mai ia Keriso?

□ E faapefea ona faataunuuina e toeaina la latou tiute tauave ina ia toe faasaʻoina le lafu mamoe?

□ O le ā e mafai e toeaina ona fai e ati ae ai o latou uso talitonu?

□ E mafai faapefea e toeaina ona faatumauina le autasi o le faapotopotoga?

[Fesili mo le Suʻesuʻega]

[Ata i le itulau 10]

O uiga tiga alofa e fesoasoani i toeaina e faalototele ai ia i latou ua loto vaivai

[Ata i le itulau 10]

O le autasi o toeaina e faatupuina ai foi le autasi i le faapotopotoga