Talisapaia “Mea Alofa i Tagata”
Talisapaia “Mea Alofa i Tagata”
“Ia outou iloa e o galulue ia te outou, ma . . . ia matuā mānatua i latou ma le alofa, ona o la latou galuega.”—1 TESALONIA 5:12, 13.
1. E tusa ai o le Galuega 20:35, o le ā se malosi e aumai e le foai atu? Fai se faataitaiga.
“E SILI le manuia o le na te foai atu, i lo le na te talia mai.” (Galuega 20:35) Pe mafai ona e manatua le taimi mulimuli na e tofo totino ai i le moni o na fetalaiga a Iesu? Atonu pe o se meaalofa na e foai atu i se tasi e te alofa faapelepele i ai. Sa e filifilia ma le faaeteete, ona e te manao ia avea o se mea o le a faapelepele i ai lē pele ia te oe. O foliga fiafia ua vaaia i lē pele ia te oe—maeu le faamafanafanaina ai o lou loto! Pe afai e saʻo uunaiga, e avea ai le foai atu o se faaaliga o le alofa, ma o le faaalia mai o le alofa e iai sona malosi e aumai ai ia i tatou le fiafia.
2, 3. (a) Aisea e mafai ai ona faapea atu e leai se tasi e sili atu sona fiafia na i lo Ieova, ma e mafai faapefea e le sauniuniga o le “mea alofa i tagata” ona olioli ai lona finagalo? (e) O le ā tatou te lē mananao e fai i se meaalofa mai le Atua?
2 O ai la se isi, e mafai ona sili atu sona fiafia na i lo Ieova, o Lē Foai Mai “mea lelei uma”? (Iakopo 1:17; 1 Timoteo 1:11) O meaalofa uma na te foai maia e uunaia e le alofa. (1 Ioane 4:8) O le tulaga moni lena i le meaalofa lea na foai mai e le Atua i le faapotopotoga e ala mai ia Keriso—o “mea alofa i tagata.” (Efeso 4:8) O le sauniuniga o toeaina e vaavaaia le lafu mamoe o se faailoaga lea o le loloto o le alofa o le Atua mo ona tagata. O nei tane e filifilia ma le faaeteete—e tatau ona latou ausia agavaa faale-Tusi Paia. (1 Timoteo 3:1-7; Tito 1:5-9) Ua latou iloa e tatau ona latou “faasaoina [“faia ma le alofa,” NW] le lafu mamoe,” ona maua ai lea e mamoe se mafuaaga latou te loto faafetai atu ai i nei leoleo mamoe alolofa. (Galuega 20:29; Salamo 100:3) Pe a silasila mai Ieova ua faatumuina loto o ana mamoe i lena agaga faafetai, e mautinoa lava o le a olioli ai foi lona finagalo!—Faataoto 27:11.
3 E mautinoa tatou te lē mananao e faalēaogā le tāua o se meaalofa mai le Atua; tatou te lē mananao foi e faaalia se uiga lē talisapaia i ana meaalofa. E lua la fesili ua lāgā ai: E tatau faapefea ona manatu toeaina i la latou matafaioi i le faapotopotoga? Ma e mafai faapefea e le isi vaega uma o le lafu mamoe ona faaali atu lo latou talisapaia o “mea alofa i tagata”?
‘O i Matou o le Au Faigaluega ma Outou’
4, 5. (a) O le ā na faatusa i ai e Paulo le faapotopotoga, ma aisea ua fetaui lelei ai lenei tala faatusa? (e) O le ā le tulaga na faaalia e le tala faatusa a Paulo faapea e tatau ona tatou manatu ma feutagai ai o le tasi i le isi?
4 Ua tuuina mai e Ieova vaega o le pule i “mea alofa i tagata” i totonu o le faapotopotoga. O le mea moni, e lē mananao toeaina latou te faaaogaseseina la latou pule, ae ua latou iloa, ona o i latou o ni tagata lē lelei atoatoa, e matuā faigofie lava ona oo i lea tulaga. E tatau la faapefea ona latou manatu ifo ia i latou lava i la latou faiā ma isi tagata uma o le lafu mamoe? Seʻi manatu i le tala faatusa na faaaogā e le aposetolo o Paulo. Ina ua uma ona talanoaina le mafuaaga ua saunia ai “mea alofa i tagata,” ona tusi mai lea o Paulo: “Ia tutupu i tatou ia te ia i mea uma, o le ulu lava ia, o ia foi o Keriso; e mai ia te ia ona tupu o le tino uma lava, o loo o faatatauina ma faasooina i ua uma lava e fesoasoani i ai, e tusa ma le galuega i le fua o itu tino taitasi, ia iu ina atiina ae le tino e ia lava i le alofa.” (Efeso 4:15, 16) O lea ua faatusa ai e Paulo le faapotopotoga, e aofia ai toeaina ma isi sui, i le tino o se tagata. Aisea ua fetaui lelei ai lenei tala faatusa?
5 Ua faia aʻe le tino o le tagata i le tele o ni vaega eseese, ae tasi lava le ulu. Peitai, e leai se vaega o i le tino—leai se musele, leai se uaua, leai se alātoto—e faapea e lē aogā. E tāua uma lava vaega taitasi ma e iai uma so latou sao i le ola maloloina ma le faamatagofieina o le tino atoa. E faapena foi le faapotopotoga, ua faia aʻe i le toatele o tagata eseese, peitai o tagata uma taitoatasi—pe talavou pe matua, pe malosi pe faamaʻimaʻi—e mafai uma ona faia so latou sao i le maloloina atoa faaleagaga ma le faamatagofieina o le faapotopotoga. (1 Korinito 12:14-26) E leai se tasi e tatau ona lagona faapea e matuā faatauvaa o ia ma leai sona aogā. Ae i le isi foi itu, e leai se tasi e tatau ona iai ni lagona fiasili, auā o i tatou uma lava—o leoleo mamoe faapea foi ma mamoe—o se vaega o le tino, ma e tasi lava lo tatou ulu, o Keriso lea. O lea ua faatulaga mai ai e Paulo se ata matagofie o le alofa, le manatu mamafa, ma le faaaloalo e tatau ona tatou faaalia e le tasi i le isi. O le amanaiaina o lena mea e fesoasoani i toeaina ina maua ai sa latou vaaiga loto maulalo ma paleni i la latou matafaioi i le faapotopotoga.
6. E ui sa ia te ia le pule faaaposetolo, ae na faapefea ona faaalia e Paulo se agaga loto maulalo?
6 E lē taumafai nei “mea alofa i tagata” e pulea ola po o le faatuatua o o latou uso talitonu. E ui sa ia Paulo le pule faaaposetolo, ae na ia taʻu atu ma le loto maulalo i uso i Korinito: “E leai foi so matou fia pule i lo outou faatuatua, a o fesoasoani i matou i lo outou olioli; auā o le faatuatua tou te tumau ai.” (2 Korinito 1:24) Sa lei manao Paulo na te pulea le faatuatua ma le auala o loo ola ai ona uso. O le mea moni, sa ia iloa e leai se pogai o le a ia faia ai faapea, auā sa ia faaalia lona mautinoa ua avea i latou o ni tane ma ni fafine faatuatua, o ē na ala ona iai i le faalapotopotoga a Ieova ona sa latou mananao e faia le mea ua tonu. O lea, i lona tautala e uiga ia te ia lava ma lana aumea faimalaga o Timoteo, o lona uiga sa faapea mai Paulo: ‘O la ma galuega ina ia galulue faatasi ma outou i le auauna atu i le Atua ma le fiafia.’ (2 Korinito 1:1) Maeu se agaga loto maulalo!
7. O le ā ua iloatino e toeaina loto maulalo e faatatau i la latou matafaioi i le faapotopotoga, ma o le ā le mautinoa o loo ia i latou e faatatau i o latou uso galulue?
7 O le galuega foi lena a “mea alofa i tagata” i aso nei. O i latou o ‘se au faigaluega faatasi mo lo tatou olioli.’ Ua iloatino e toeaina loto maulalo faapea e lē o latou e filifilia po o le ā le tele o mea e mafai e isi ona fai i le auaunaga i le Atua. Ua latou iloa e ui ina mafai ona latou faalaeiau atu i isi ina ia faateleina pe faaleleia atili la latou faiva, ae o le auauna atu i le Atua e tatau ona puna aʻe mai se loto naunautai. (Faatusatusa i le 2 Korinito 9:7.) Ua latou mautinoa pe afai e fiafia o latou uso galulue, o le a latou faia foi mea uma latou te mafai. O lea ua avea ai ma o latou faanaunauga mai le loto le fesoasoani atu i o latou uso ia “auauna atu ia Ieova ma le fiafia.”—Salamo 100:2.
Fesoasoani i Tagata Uma Ina ia Auauna ma le Fiafia
8. O ā nisi o auala e mafai e toeaina ona fesoasoani ai i o latou uso ina ia auauna ia Ieova ma le olioli?
8 Toeaina e, e mafai faapefea ona tou fesoasoani atu i o outou uso ina ia latou auauna ma le fiafia? E mafai ona e faalaeiau e ala i au faaaoaoga. (1 Peteru 5:3) Ia faaali atu lou maelega ma lou olioli i le faiva, ona mafai lea e isi ona maua le lototele e faataitai ai i lau faaaoaoga. Ia faamālō i isi mo a latou taumafaiga mai le loto atoa. (Efeso 4:29) O se faamālō māfana ma le moni e fesoasoani i isi ia latou lagona ai e aogā ma manaomia i latou. E faalaeiau ai i mamoe ina ia mananao e faia le mea silisili latou te mafai e auauna ai i le Atua. Alofia le faia o ni faatusatusaga lē lelei. (Kalatia 6:4) O faatusatusaga faapena e na ona faalotovaivai ai o isi na i lo le uunaia ai o i latou e faia ni faaleleiga. Ae maise foi, o mamoe a Ieova o ni tagata taitoatasi—e eseese uma o latou tulaga ma tomai. I le pei o Paulo, ia faailoa atu lou talitonu mautinoa i ou uso. O le alofa “e talitonu i mea uma,” e lelei la pe afai tatou te talitonu e alolofa o tatou uso i le Atua ma mananao e faafiafia o ia. (1 Korinito 13:7, LT) Pe a e faaalia le ‘faaaloalo i isi,’ e te utufia mai ai mea e sili ona lelei mai ia i latou. (Roma 12:10) Ia mautinoa a oo ina faalaeiauina ma faafouina agaga o mamoe, e toatele lava o le a latou faia mea uma latou te mafai e auauna atu ai i le Atua, ma o le a latou maua ai le olioli i lena auaunaga.—Mataio 11:28-30.
9. O le ā le vaaiga agaʻi i uso toeaina o le a fesoasoani i toeaina taitoatasi e auauna ai ma le fiafia?
9 O lou manatu ifo ma le loto maulalo ia te oe o se ‘aufaigaluega faatasi’ o le a fesoasoani lea ia te oe e te auauna ai ma le olioli ma talisapaia meaalofa tutasi a ou uso toeaina. E tofu lava le toeaina ma ana taleni ma ona tomai e mafai ona ia faaaogā mo le lelei o le faapotopotoga. (1 Peteru 4:10) O le tasi atonu ua ia te ia le meaalofa o le aʻoaʻo atu. O le isi atonu o sē matuā lelei i le faamaopoopoina o mea. Ae o le isi foi atonu e matuā faigofie ona faalatalata atu i ai ona o ona uiga māfana ma le agaalofa. O le mea moni lava, e leai se toeaina ua ia te ia uma meaalofa e tutusa lelei lo latou uigā. Po o le iai ea o se meaalofa patino—seʻi faapea, o le meaalofa o le aʻoaʻo atu—o le a sili aʻe ai le tasi toeaina i le isi? E matuā leai lava! (1 Korinito 4:7) Ae i le isi foi itu, e leai se mafuaaga o le a fuā ai fua i le meaalofa ua iai i le isi toeaina pe lagona faapea ua leai sou aogā pe afai ua maua e lena toeaina le faamālō mai isi ona o se tomai ua ia te ia. Ia manatua, o lena foi e ia te oe meaalofa o loo silafia mai e Ieova ia te oe. Ma e mafai ona ia fesoasoani ia te oe e ati ae na meaalofa ma faaaogā mo le lelei o ou uso.—Filipi 4:13.
‘Ia Usiusitai ma ia Gauai’
10. Aisea o se mea fetaui ai lo tatou faaalia o le agaga talisapaia mo “mea alofa i tagata”?
10 Pe a tatou maua se meaalofa, o se mea fetaui le faaalia o le agaga talisapaia. Ua faapea mai le Kolose 3:15: “Ia outou saga faafetai.” Ae faapefea la i “mea alofa i tagata,” le meaalofa tautele ua foai mai e Ieova ia i tatou? O le mea moni, e muamua ona tatou faafetai atu ia Ieova, o Lē Foai Maia Meaalofa ma le matamau. Ae faapefea i “mea alofa i tagata” lava latou? E mafai faapefea ona tatou faaalia atu tatou te talisapaia i latou?
11. (a) E mafai faapefea ona tatou faaalia lo tatou talisapaia o “mea alofa i tagata”? (e) O le ā le tāua o le uiga o faaupuga ‘ia usiusitai’ ma ‘ia gauai’?
11 E mafai ona tatou faaalia lo tatou talisapaia o “mea alofa i tagata” e ala i le vave ona tatou utagia o a latou fautuaga ma faaiuga faale-Tusi Paia. Ua tōmatauina i tatou e le Tusi Paia: “Ia outou usiusitai i o outou taʻitaʻi ma outou gauai i ai; auā o loo leoleo i latou mo o outou agaga, latou te tala atu le tala i ai, ina ia faia ma le olioli, a e aua ma le tiga; auā e le aoga lea ia te outou.” (Eperu 13:17) Seʻi mātau e lē gata o i tatou e tatau ona ‘ia usiusitai,’ ae ‘ia gauai’ atu foi ia i latou o loo taimua. O le upu Eperu mo le ‘ia gauai’ o lona uiga moni lava “ia e lolo atu i lalo.” I sona manatu e faatatau i faaupuga ‘ia usiusitai’ ma le ‘ia gauai,’ ua faapea mai ai le tagata poto faapitoa i mataupu faale-Tusi Paia, o R. C. H. Lenski: “E usitai se tasi pe afai e ioeina e ia le mea ua taʻu atu na te faia, ua faatalitonuina ai o ia i le saʻo ma le aogā o lea mea; e lolo atu se tasi . . . e ui e ese sona manatu.” Pe a tatou malamalama ma ioeina le taitaiga a i latou o loo taimua, e vave foi la ona tatou usiusitai. Ae faapefea pe afai tatou te lē malamalama i le mafuaaga na faia ai se faaiuga patino?
12. Aisea e tatau ai ona tatou gauai pe lolo atu, e tusa lava pe tatou te lē malamalama atoatoa i le mafuaaga na faia ai se faaiuga patino?
12 O iinei la e manaomia ai lo tatou gauai atu, pe lolo atu. Aisea? O se tasi o pogai, e manaomia ona tatou faatuatuaina faapea, o loo faanaunau nei tane agavaa faaleagaga i le mea e sili ona lelei mo i tatou. Ae maise ai, ua latou iloa lelei lava e tatau ona latou tala atu se tala ia Ieova mo mamoe ia ua tuuina mai i la latou tausiga. (Iakopo 3:1) E lē gata i lea, e lelei ona tatou manatua atonu tatou te lē o iloa uma mea moni e lē o faailoaina i le lautele na māfua ai le faia o se faaiuga e faavae i mea ua latou iloa.—Faataoto 18:13.
13. O le ā e mafai ona fesoasoani ia i tatou e gauai atu ai pe a oo i faaiuga taufaamasinoga a toeaina?
13 Ae faapefea le gauai atu pe a oo i faaiuga taufaamasinoga? E mautinoa, atonu e lē faigofie lenei mea, ae maise pe afai o le faaiuga ia faateaina se tasi tatou te alolofa i ai—o se tauaiga po o se uo māfana. O iinei foi e sili ai ona lelei le lolo atu i le iuga taufaamasinoga ua faia e “mea alofa i tagata.” O loo iai i latou i se tulaga e mafai ona latou feutagai ai ma le mataupu na i lo tatou, ma atonu o loo sili atu ona latou iloa lelei mea moni. E masani ona tiga lagona o nei uso i ni faaiuga faapena; o se tiute tauave mamafa le ‘faia o se faamasinoga mo Ieova.’ (2 Nofoaiga a Tupu 19:6) Latou te faia taumafaiga uma ina ia faaalia le alofa mutimutivale, auā latou te manatua o le Atua e “nofo sauni e faamagalo.” (Salamo 86:5, NW) Ae tatau foi ona latou tausia le mamā o le faapotopotoga, ma ua faatonu mai ai e le Tusi Paia ina ia latou faateʻa ese tagata e faia mea sese ma le lē salamō. (1 Korinito 5:11-13) O le tele o taimi, e talia ai e lē ua faia le mea sese le faaiuga. Atonu foi o le aoaiga o le mea tonu lea o loo ia manaomia ina ia toe atamai ai. Afai la o i tatou, o ē pele ia te ia, tatou te gauai atu pe a oo ina faia se faaiuga, o lona uiga o lena ua tatou fesoasoani atu ai ia te ia ina ia ona maua aogā mai le aoaiga.—Eperu 12:11.
“Ia Matuā Mānatua i Latou”
14, 15. (a) E tusa ai o le 1 Tesalonia 5:12, 13, aisea ua ono ma tatau ai ona tatou manatu i toeaina? (e) Aisea e mafai ai ona faapea atu o toeaina o loo ‘galulue mamafa ia i tatou’?
14 E mafai foi ona tatou faaalia lo tatou talisapaia o “mea alofa i tagata” e ala i le manatua o i latou. I lana tusi atu i le faapotopotoga i Tesalonia, na timai atu ai Paulo i tagata o le faapotopotoga: “Ia outou iloa e o galulue [mamafa] ia te outou, ma pule ia te outou i la le Alii, ma latou apoapoai atu ia te outou; ia matuā mānatua i latou ma le alofa, ona o la latou galuega.” (1 Tesalonia 5:12, 13) “Galulue mamafa”—po ua lē faamatala ai ea i lena faaupuga, toeaina tuutoina o ē ua foai mai ma le lē manatu faapito i latou lava auā so tatou lelei? Seʻi manatunatu, mo sina taimi, i le avega mamafa o loo tauamoina e nei uso pele.
15 O le toatele o i latou, o ni tane tausi aiga o ē tatau ona faia ni galuega totogi ina ia tausia o latou aiga. (1 Timoteo 5:8) Afai e iai se fanau a le toeaina, e manaomia e nei tamaiti le taimi ma le uaʻi atu i ai a lo latou tamā. Atonu e manaomia ona ia fesoasoani ia i latou i a latou meaaʻoga, ma faatulaga foi se taimi mo i latou e faagaoioi ai lo latou malosi talavou i ni faafiafiaga ma ni tafaoga aogā. (Failauga 3:1, 4) O le mea sili ona tāua, na te tausia manaoga faaleagaga o lona aiga, e ala i le faia e lē aunoa o se suesuega faale-Tusi Paia a le aiga, le galulue faatasi ma i latou i le faiva i le fanua, ma ave i latou i sauniga faa-Kerisiano. (Teuteronome 6:4-7; Efeso 6:4) Aua neʻi galo ia i tatou e lē gata i na tiute tauave o loo tutusa ai i latou ma le toatele o i tatou, ae ua iai foi i toeaina ni tiute faaopoopo: le sauniunia o vaega i sauniga, le faia o asiasiga faaleoleo mamoe, le tausia o le lelei faaleagaga o le faapotopotoga ma, pe a manaomia, o le taulimaina o mataupu taufaamasinoga. O nisi toeaina e iai foi ma isi a latou tiute tauave faaopoopo e fesootai atu i fonotaga matagaluega, tauaofiaga itumalo, fausiaina o Maota o le Malo, ma le Komiti o Mataupu Tau Falemai (Hospital Liaison Committees). O le mea moni lava, o loo “galulue mamafa” nei uso!
16. Faamatala mai ni auala e mafai ona tatou manatua ai toeaina.
16 E mafai faapefea ona tatou manatua i latou? Ua faapea mai se faataoto a le Tusi Paia: ‘O le upu i ona aso ua tatau i ai, e lelei naua lea!’ (Faataoto 15:23; 25:11) O upu la o le talisapaia moni ma faalaeiauga e mafai ona faaali atu ai ia i latou e tatou te lē o manatu māmā i a latou galuega mamafa. E tatau foi ona tatou fuafua lelei i mea o loo tatou faatalitalia mai ia i latou. I le isi itu, e tatau ona tatou lagona le saoloto e faalatalata atu ia i latou mo se fesoasoani. E iai taimi atonu ‘ua atuatuvale ai o tatou loto’ ma ua tatou manaomia ni faalaeiauga, taiala, po o ni fautuaga faale-Tusi Paia mai ia i latou o ē ua “mafaia ona aʻoaʻo atu” le Afioga a le Atua. (Salamo 55:4; 1 Timoteo 3:2) Ae i le taimi e tasi, e manaomia ona tatou manatua e faatapulaa le tele o se taimi e mafai e se toeaina ona tuuina mai ia i tatou, auā e lē mafai ona ia lafoaia manaoga o lona ia foi aiga po o isi tagata o le faapotopotoga. O le iai o “lagona alofa faaleuso” mo nei uso galulue mamafa, o le a tatou lē mananao ai e tagisā ma le lē talafeagai ia i latou. (1 Peteru 3:8, NW) Na i lo lea, seʻi o tatou talisapaia po o le ā lava se taimi ma se uaʻi mai e mafai ona latou aumaia ma le talafeagai ia i tatou.—Filipi 4:5.
17, 18. O ā faataulaga ua faia e le toatele o avā e toeaina a latou tane, ma e mafai faapefea ona tatou faaalia e tatou te lē o manatu māmā i nei tuafāfine faamaoni?
17 Ae faapefea avā a toeaina? Po ua lē tatau ma onomea foi ona tatou manatua i latou? Ae maise, o lea ua latou faaavanoa mai a latou tane mo le faapotopotoga. E masani ona manaomia ai i lenei itu ni a latou faataulaga. Mai lea taimi i lea taimi, e tatau ai i toeaina ona faaalu ni itula o le afiafi e taulimaina ai mataupu a le faapotopotoga, o ni taimi sa ono mafai ona latou faaaluina ma o latou aiga. I le tele o faapotopotoga, o loo loto malilie ai fafine Kerisiano faamaoni e faia na faataulaga ina ia mafai e a latou tane ona tausia mamoe a Ieova.—Faatusatusa i le 2 Korinito 12:15.
18 E mafai faapefea ona tatou faaalia e tatou te lē o manatu māmā i nei tuafāfine Kerisiano faamaoni? E mautinoa lava e ala i le lē tagisā ma le lē talafeagai i a latou tane. Ae aua foi neʻi galo ia i tatou le uigā o nai upu faigofie o le talisapaia. Ua faapea mai le Faataoto 16:24: “O upu matagofie, o le meli ua sisina ifo ia; e suamalie i le loto, ma le mea e malolo ai ivi.” Seʻi manatu i se mea na tupu. Ina ua uma se sauniga faa-Kerisiano, na faalatalata atu se ulugalii i se toeaina ma talosaga atu pe mafai ona latou talanoa e uiga i le la tama tama talavou. A o talanoa le toeaina ma le ulugalii, sa faatalitali ma le onosai lana avā. Ina ua maeʻa, ona sōsō atu lea o le tinā i le avā a le toeaina ma faapea atu: “Ou te fia faafetai atu ia te oe ona o le taimi na faaaluina e lau tane e fesoasoani mai ai i loʻu aiga.” O na upu faigofie, ma le mālie o le agaga talisapaia sa pāʻia moni ai le loto o le avā a lena toeaina.
19. (a) I le avea o toeaina o se vaega, o ā fuafuaga o loo latou faataunuuina ma le faamaoni? (e) O le ā e tatau ia i tatou uma lava ona filifili maumauai e fai?
19 O le saunia mai o toeaina ina ia tausia mamoe o se tasi o ‘meaalofa lelei’ a Ieova. (Iakopo 1:17) E leai, e lē lelei atoatoa nei tane; i le pei foi o i tatou uma, latou te faia mea sese. (1 Tupu 8:46) Peitai, i le avea o se vaega, ua faataunuu ai ma le faamaoni e toeaina i faapotopotoga i le lalolagi aoao, fuafuaga sa faafinagaloina e Ieova mo i latou—ia faasaʻoina, atiina ae, faaautasia, ma puipuia le lafu mamoe. Tau ina ia filifili toeaina taitoatasi e faaauau ona latou tausia ma le alofa mamoe a Ieova, o iina e faamaonia atu ai o i latou o ni meaalofa, po o ni faamanuiaga, i o latou uso. Ma tau ina ia tatou filifili maumauai e faaalia lo tatou talisapaia mo “mea alofa i tagata” e ala i le usiusitai ma gauai atu ia i latou ma e ala i le manatua o i latou ona o a latou galuega mamafa. Maeu se loto faafetai e mafai ona ia i tatou ona ua saunia mai ma le alofa e Ieova tane o ē, o loo mafai ona faapea atu i ana mamoe: ‘O la matou galuega ina ia fesoasoani ia te outou ia auauna atu i le Atua ma le fiafia’!
O le a Faapefea Ona E Tali?
□ Aisea e mafai ai ona faatusatusa atu ma le talafeagai le faapotopotoga i se tino?
□ E mafai faapefea ona fesoasoani atu toeaina i o latou uso ina ia auauna ia Ieova ma le fiafia?
□ Aisea e tatau ai ona lē gata ina usiusitai ae ia gauai foi ia i latou o loo taimua?
□ I ā auala e mafai ona tatou manatua ai toeaina?
[Fesili mo le Suʻesuʻega]
[Ata i le itulau 16]
Toeaina e, ia faamālō atu i isi mo a latou taumafaiga ma le tagata atoa
[Ata i le itulau 17]
O le faaaoaoga maelega a toeaina i le faiva, e mafai ai ona latou fesoasoani i tagata o o latou aiga ma isi ina ia auauna ma le fiafia
[Ata i le itulau 18]
Tatou te talisapaia o tatou toeaina galulue mamafa!