Fesili Mai le Au Faitau

Po o le ‘faailogaina’ na taʻua i le 2 Tesalonia 3:14 o se faatulagaga aloaia faalefaapotopotoga, pe o se mea e faia e Kerisiano taitoatasi e alofia ai ē e lē pulea?

O le mea na tusi atu ai Paulo i tagata Tesalonia ua faaalia ai e iai se vaega patino a toeaina i lena ‘faailogaina.’ Peitai, pe a maeʻa lea, ona tausisia ai lea e Kerisiano taitoatasi, e faia faapea faatasi ai ma ni sini faaleagaga e mafaufau i ai. E sili atu ona tatou talisapaia lelei lenei tulaga e ala i le iloiloina o le fautuaga a Paulo i lona uluai faatulagaga.

Na fesoasoani Paulo i le faavaeina o le faapotopotoga i Tesalonia, i le fesoasoani atu lea i tamaloloa ma fafine ina ia avea ma ē talitonu. (Galuega 17:1-4) Mulimuli ane na ia tusi ai mai Korinito e faamālō ma faalaeiau ia i latou. Na ofoina atu foi e Paulo fautuaga na manaomia. Na ia augani atu ia i latou ‘ia nonofo ma le fifilemu, ia fai a latou lava feau, ma ia galulue i o latou lava lima.’ E iai nisi na lē amio faapena, o lea na faaopoopo atu ai Paulo: “Matou te aioi atu foi ia te outou, le au uso e, ia outou apoapoai atu i e amio faapiopio, ia faamafanafana i e loto iti, ia fesoasoani i e o vaivai.” E aliali manino mai, sa iai nisi na “amio faapiopio” * i lo latou lotolotoi o ē na manaomia fautuaga.—1 Tesalonia 1:2-10; 4:11; 5:14.

I ni masina mulimuli ane, na tusia ai e Paulo lana tusi lona lua i tagata Tesalonia, ma ni faamatalaga atili e faatatau i le faatasi mai o Iesu i le lumanai. Na tuuina atu atili foi e Paulo ni taiala e faatatau i le auala e feagai ai ma ē faapiopio o ē sa ‘lē galulue ae na matamata fua i galuega a isi.’ O a latou gaoioiga sa tuufaafeagai ma le faaaoaoga a Paulo o sē e galue mamafa ma e feteenai foi ma lana faatonuga manino ina ia galue auā le tausia o le tagata lava ia. (2 Tesalonia 3:7-12) Na faatonu mai  Paulo e iai ni laasaga patino e tatau ona uia. O nei laasaga e mulimuli mai pe a uma ona faia e toeaina le gaoioiga o le apoapoai po o le fautuaina o lē ua faapiopio. Na tusi Paulo faapea:

“Matou te fai atu ia te outou, le au uso e, . . . tou te vavae ese i uso uma o e amio faapiopio, ma le le tusa ma le uputuu na latou maua ia te i matou. A o outou le au uso e, aua neʻi outou faavaivai i le amio lelei. Pe afai e le gauai se tasi i la matou upu i lenei tusi, ia faailogaina lea tagata; aua foi tou te feoai ma ia, ina ia masiasi ai o ia. Aua foi tou te manatu o ia o le fili, a ia outou apoapoai atu ia te ia pei o le uso.”—2 Tesalonia 3:6, 13-15, LT.

O lea, o laasaga atili e uia e aofia ai le vavae ese mai ē amio faapiopio, faailogaina i latou, aua le toe feoai ma i latou, peitai ia apoapoai atu ia i latou o ni uso. O ā tulaga o le a oo ai ina uia e tagata o le faapotopotoga na laasaga? O se fesoasoani e faamanino ai lenei mea, seʻi tatou saili ia iloa tulaga e tolu sa lē taulai atu i ai Paulo iinei.

1. Ua tatou iloa e lē lelei atoatoa Kerisiano ma e iai vaivaiga. Ae ui i lea, e avea le alofa ma faailoga o le Faa-Kerisiano moni, o lea ua manaomia ai ona tatou faaalia ni uiga malamalama ma faamagalo atu i mea sese a isi. Mo se faataitaiga, atonu e pa aʻe le ita o se Kerisiano ma ua lē mataofia, o se mea e seāseā ona tupu, e pei ona sa tupu i le va o Panapa ma Paulo. (Galuega 15:36-40) Pe ona o le lē lavā, atonu o le a tautala atu ai se tasi i ni upu malolosi ma le tutui. I tulaga faapena, e ala i le faaalia o le alofa ma faatatauina fautuaga a le Tusi Paia, e mafai ai ona tatou ufiufi le sese, ma faaauau pea ona ola, feoai, ma galulue ma lo tatou uso Kerisiano. (Mataio 5:23-25; 6:14; 7:1-5; 1 Peteru 4:8) E manino lava la, o lē taulau faapenei sa lē o mea ia na talanoaina e Paulo i le 2 Tesalonia.

2. Sa lē talanoa atu foi Paulo i se tulaga faapea ua filifili ai se Kerisiano lava ia e faatapulaa le aumea atu i se tasi e lē lelei ona ala po o uiga—mo se faataitaiga, o se tasi e foliga mai e matuā uaʻi atu i faafiafiaga po o mea faitino. Po o se matua atonu ua faatapulaa le aumea atu o lana tama i talavou o ē lē amanaia le pule a mātua, e malōvale pe lamatia le auala e taaalo ai, pe lē manatu mamafa i le Faa-Kerisiano. O faaiuga faapena e fitoitonu i le tagata lava ia e talafeagai ai ma le mea tatou te faitau i ai i le Faataoto 13:20: “O lē latou te feoai ma tagata popoto, e poto lava ia; a o le uo a e valelea, e leaga ai lava ia.”—Faatusatusa i le 1 Korinito 15:33.

3. I se tulaga ese e matuia tele, na tusi atu Paulo i Kerisiano e faatatau i se tasi e amioai i le faia o le agasala matuia ma e lē salamō. O tagata agasala faapena e lē salamō e tatau ona tuu ese mai le faapotopotoga. E mafai ona faapea atu, sa tatau ona tuuina atu le tagata “amio leaga” ia Satani. Pe a uma lena, sa lē toe feoai ai Kerisiano moni ma tagata amioleaga faapena; na uunaia e le aposetolo o Ioane Kerisiano ina ia aua foi neʻi ofo alofa atu ia i latou. (1 Korinito 5:1-13; 2 Ioane 9-11) Ae peitai, e lē fetaui foi lenei tulaga ma le fautuaga o i le 2 Tesalonia 3:14.

O le tulaga e aofia ai ē “amio faapiopio” sa talanoaina i le 2 Tesalonia, e ese mai tulaga e tolu o i luga. Na tusi Paulo faapea na avea pea i latou nei ma ‘uso,’ ma e ao ona apoapoai atu i ai ma e tatau ona faia pea o ni uso. O lea, o le faafitauli i uso “amio faapiopio” sa lē iai i le vaega o se mataupu totino i le va o Kerisiano lava ia, ma sa lei lava foi le matuia tele faapea sa tatau ai ona taulimaina e toeaina i se gaoioiga e faateaina ai, e pei ona sa faia e Paulo e fesootai atu i le tulaga lē mamā i Korinito. O ē “amio faapiopio” sa lē nofosala i se agasala mamafa, e pei ona sa iai le tagata lea na faateaina i Korinito.

O ē “amio faapiopio” i Tesalonia na nofosala ina ua iloga lo latou see ese mai le Faa-Kerisiano. Sa latou mumusu e galulue, a lē ona sa manatu i latou ua lata le afio mai o Keriso ia pe ona sa paie i latou. E lē gata i lea, sa iloga lo latou faatupuina o se tulaga vevesi e ala ‘i le matamata fua i galuega a isi,’ [“aiā fua i mea e leai sa latou feau i ai,” NW]. E aliali mai sa fautuaina soo i latou e toeaina o le faapotopotoga, e tusa ai ma le fautuaga a Paulo i lana uluai tusi ma faapena foi i isi timaiga tauatua. (Faataoto 6:6-11; 10:4, 5; 12:11, 24; 24:30-34) Ae sa faaauau pea ona maumauai i se ala na faalumaina ai le faapotopotoga ma sa ono mafai foi ona faataitai i ai isi Kerisiano. O le toeaina Kerisiano la o Paulo, sa ia faailoa faalauaitele mai a latou amioga faapiopio, ma faaalia mai ai i lumamea o latou ala sese, ae e aunoa ma le taʻu mai o igoa o nei tagata.

Sa ia faailoa atu foi i le faapotopotoga faapea e talafeagai ia i latou o ni Kerisiano taitoatasi ona ‘faailogaina’ ē amio faapiopio. Ua taʻu mai ai faapea e tatau i tagata taitoatasi ona mataulia i latou o ē tutusa a latou amioga ma amioga ia na lapataia faalauaitele ai le faapotopotoga. Na fautua atu Paulo faapea ina ia ‘aua foi neʻi latou feoai ma so o se uso e amio faapiopio.’ E mautinoa e lē o le uiga o lena mea o le matuā lē amanaia atoatoa o se tagata, auā foi sa tatau ona latou ‘apoapoai atu pea ia te ia pei o le uso.’ O le a faaauau pea ona iai ni fesootaiga faa-Kerisiano i sauniga ma atonu foi i le faiva. E mafai ona latou faamoemoe faapea atonu o le a talia e lo latou uso le apoapoaiga ma lafoai ai ona ala faalēmanuia.

 O le ā le uiga o lo latou ‘lē toe feoai’ ma ia? E foliga mai, sa faatatau atu i faatasiga faasamasamanoa. (Faatusatusa i le Kalatia 2:12.) O lo latou taofia o le faia o ni feutagaiga faasamasamanoa ma faafiafiaga ma ia atonu e faailoa atu ai ia te ia faapea e lē fiafia tagata o tausisia mataupu silisili i ona ala. E tusa foi lava pe lē ma ai o ia ma sui ai, ae o le a faaitiitia ai foi le aʻoaʻoina e isi o ona ala ma pei ai o ia. I le taimi foi lava e tasi, e ao ona taulai atu ai pea nei Kerisiano taitoatasi e tausisi i mea e atiina ae ai. Na fautua atu Paulo ia i latou e faapea: “A o outou le au uso e, aua neʻi outou faavaivai i le amio lelei.”—2 Tesalonia 3:13.

Ma le manino lava, o lenei fautuaga faaaposetolo e lē fai ma faavae e vaai maulalo pe faamasino ai i o tatou uso o ē e faia mea sese laiti. Na i lo lea, o le sini o le fautuaga ina ia fesoasoani atu ai i se tasi o lē ua uia se ala e afaina ai faalogona o isi ua iloga le feteenai ma le Faa-Kerisiano.

Sa lei faavaeina mai e Paulo ni tulafono auiliili e pei o loo taumafai e fau aʻe se faiga e lavelave. Ae ua manino lelei e faapea e tatau ona muamua fautuaina e toeaina lē ua amio faapiopio ma taumafai e fesoasoani ia te ia. Pe afai e lē taulau toeaina ma faaauau pea lea tagata i se auala e afaina ai faalogona o isi ma e iai le avanoa e mafai ona faataitai atu isi i ai, e ono mafai la ona faia sa latou faaiuga faapea e tatau ona lapataia le faapotopotoga. E mafai ona latou fuafuaina le faia o se lauga pe aisea e tatau ai ona alofia lena amioga faapiopio. O le a latou lē taʻuina mai ni igoa, peitai o la latou lauga e fai ma lapataiga o le a fesoasoani e puipuia ai le faapotopotoga auā o ē taliaina le lapataiga o le a matuā faaeteete ina ia faatapulaa faatasiga faasamasamanoa ma so o se tasi ua manino lona faaalia mai o lena amioga faapiopio.

E faamoemoe e iai se taimi o le a masiasi ai lē o amio faapiopio i ona ala ma uunaia ai o ia e fai se suiga. A o mataulia e toeaina ma isi o le faapotopotoga le suiga, ona filifili lea e i latou taitoatasi e faamutaina taofiofiga na latou faia i a latou lava faatasitasiga faasamasamanoa.

O lea la, i le aotelega: O toeaina o le faapotopotoga e taimua i le ofoina atu o le fesoasoani ma fautuaga pe afai e iai se tasi o loo amio faapiopio. Pe afai e lē o iloa e ia le sese o lona ala ae faaauau pea ona avea ma taaʻiga leaga, e ono mafai la e toeaina ona lapataia le faapotopotoga e ala i se lauga e faamanino ai le vaaiga a le Tusi Paia—po o le tuutala ma ē lē talitonu, ia po o le ā lava le ala lē tatau o loo iai. (1 Korinito 7:39; 2 Korinito 6:14) Ua faapea ai ona lapataia Kerisiano o i le faapotopotoga ma e mafai ai e tagata taitoatasi ona filifili e faatapulaa so o se faatasiga faasamasamanoa ma ē ua manino mai lo latou tausisia o se ala faapiopio ae o loo avea pea i latou ma uso.

[Faaopoopoga i lalo]

[Ata i le itulau 31]

E apoapoai atu toeaina Kerisiano i ē amio faapiopio ma i le taimi e tasi latou te vaai ia i latou o ni uso talitonu