Faauigaina o le Tusi Paia—I le Taaʻiga a Ai?

O SE tasi o faauigaga o le upu “faauiga” o le “ia malamalama le tagata i se mea e tusa ai o lona talitonuga, lana faaiuga, po o lona tulaga o iai.” (Webster’s Ninth New Collegiate Dictionary) O lea la, o le faauigaina e se tasi o so o se mea lava, e masani ona taaʻina e lona talaaga, i ana aʻoaʻoga, ma le siomaga na ola aʻe ai.

Ae faapefea la le faauigaina o le Tusi Paia? Po o tatou saʻoloto ea e faamatala fuaitau o le Tusi Paia e tusa ai ma o tatou lava ‘talitonuga, faaiuga, po o tulaga o iai’? O le mea masani, o le toatele o tagata atamamai faapitoa i le Tusi Paia ma tagata o loo faaliliuina le Tusi Paia, e faapea mai latou te lē o faia lena mea, ae o loo taʻitaʻia i latou e le Atua.

O se faaaoaoga, o le faamatalaga o loo taʻua i le faaopoopoga pito i lalo mo le Ioane 1:1 i le tusi A New Version of the Four Gospels, na lomia i le 1836 e John Lingard i lalo o se igoafai “Se Katoliko.” O loo faapea mai: “O tagata o talitonuga eseese faalotu ua latou mautinoa o loo iai faamaoniga o o latou talitonuga i tusitusiga paia: auā o le mea moni, e lē o le Tusi Paia e faailoa maia ia i latou manatu, ae latou te faaofi atu a latou lava faauigaga i le Tusi Paia.”

E ui sa lelei ona faaupu mai le manatu, ae o le ā tonu le faanaunauga o le tusitala? Na fai lana faamatalaga ina ia lagolagoina ai lana faaliliuga o lena fuaiupu, lea sa ia faaliliuina e faapea: “Sa i le amataga ‘le upu;’ ma sa i le Atua ‘le upu’; ma o le Atua foi ‘le upu,’” o se faaliliuga moni lava e lagolagoina le Tasitolu.

O le ā na uunaia ai le tusitala e faaliliu le Ioane 1:1 e lagolagoina ai le aʻoaʻoga o le Tasitolu? Po o ‘le Tusi Paia ea na faailoa maia’ ia te ia ina ia faia faapea? E lē mafai lena mea auā e leai se vaega i le Tusi Paia e maua i ai le aʻoaʻoga o le Tasitolu. Seʻi mātau le mea ua fai mai ai le New Encyclopædia Britannica e tusa ai o lenei manatu: “E leai se upu Tasitolu ma e matuā leai lava se aʻoaʻoga mautu faapena o aliali mai i le Feagaiga Fou.” E lē gata i lea, na taʻua e le polofesa o E. Washburn Hopkins, mai le iunivesite o Yale, e faapea: “E foliga mai sa lei iloa e Iesu ma Paulo le aʻoaʻoga o le tasitolu; . . . e leai ma se la faamatalaga e uiga i ai.”

O le ā la, sa tatou faaiuga e faatatau ia i latou o ē lagolagoina se faaliliuga e lagolagoina ai le Tasitolu o le Ioane 1:1 po o se isi lava fuaiupu o le Tusi Paia? E tusa ai ma le manatu o Mr. Lingard lava ia, “e lē o le Tusi Paia e faailoa maia ia i latou manatu, ae latou te faaofi atu a latou lava faauigaga i le agaga po o le manatu o le Tusi Paia.”

E fiafia lava, ua ia i tatou le Afioga a le Atua e fai mo tatou taʻiala i lenei mea. Na faapea mai le aposetolo o Peteru: “Ia muai iloa lenei mea, ua leai se valoaga o i le Tusi e faamatalafuaina. Auā e le o le loto o tagata na tuu mai ai le valoaga anamua, a o tagata o le Atua na talatalaina mai ina ua osofia mai e le Agaga Paia.”—2 Peteru 1:20, 21.