Omiga Mai Aumea—Pe Mafai Ona e Lelei Ai?

O i tatou uma lava na fananau mai ma le faanaunauga autū ina ia taliaina e a tatou aumea. E leai se tasi e manao e faaesea, ma teena. O lea la, i tulaga eseese, e mafai ona taaʻina i tatou e a tatou aumea.

O SE aumea ua faamatalaina o “se tasi e tutusa lona tulaga ma se isi, . . . o sē e auai faatasi i se faapotopotoga e tasi, e faalagolago [faapitoa] lava i tausaga, vasega, po o tulaga.” O le iuga, o omiga mai aumea, o se malosiaga ua faaoo mai ia i tatou e a tatou aumea, o lea la e iai ni taimi tatou te faataitai atu ai ma le loto i ai pe aunoa foi ma lo tatou iloaina i auala latou te mafaufau pe gaoioi ai. O omiga mai aumea e masani ona vaai i ai o se aafiaga leaga. Peitai, e pei o lea o le a tatou vaai i ai, e mafai ona tatou liliuina mo lo tatou lelei.

O Taaʻiga i so o se Ituaiga Matua

O omiga mai aumea e lē faatapulaaina i ē iti; e aafia ai so o se ituaiga matua lava. E iloa ona taaʻiga pe afai o lea o loo tatou tuufesili ia i tatou lava i fesili e pei o nei: “O loo faia e isi, aisea e lē mafai ai ona ou faia?” “Aisea e tatau ona ese ai lava aʻu?” “O le ā o le a manatu pe fai mai ai isi?” “O loo tuutala ma ua faaipoipo aʻu uo uma lava, ae o aʻu e leai. Po o iai ea se mea o faaletonu ia te au?

A o aafia so o se ituaiga matua i omiga ina ia faatutusa atu, ae tele ina iai ni taaʻiga i le taimi e avea ai ma talavou. Ua taʻua i le World Book Encyclopedia e faapea “o le toatele o talavou ua faasolo ina matutua ua oo ina matuā aafia lava i taaʻiga a a latou vaega o aumea—le liʻo lea o a latou uo ma ē masani. Ua vaavaai atu nei talavou i a latou vaega o aumea, na i lo o o latou mātua mo le faamaoniga, ma atonu ua suia ai a latou amioga ina ia mauaina ai lena faamaoniga.” Ua faaopoopo mai, o talavou, “ua manatu latou te tuputupu aʻe lava e pei ona masani ai pe afai e talia ma fiafia a latou aumea ia i latou.” Ona o lena manatu ua latou “oo ai ina aafia i mea latou te manatu e taʻutaʻua ai i latou, e pei o le faiga o o latou laei, le tomai e faatosina ai, ma le taulau manuia i se tuugatala.”

Ua iloaina e ulugalii faaipoipo e faapea o a latou filifiliga e faatatau i le ituaiga o fale e faatau pe mautotogi ai, le ituaiga o taavale e feoai ai, pe tatau ona faia ni fanau pe leai, ma isi lava mea e tele, ua taaʻina ona o omiga mai aumea—o mea e taliaina e lo latou vaipanoa, i a latou uo po o vaega o tagata. O nisi aiga ua oo lava ina faia ni aitalafu tetele ina ia maua ai pea ni mea faitino e faatutusa atu ai i tuaoi ma aumea. Ioe, o o tatou sini, o o tatou mafaufauga, ma a tatou filifiliga e masani ona maileia i le malosi iloagata o omiga mai aumea. I le iloaina la o lona malosi, pe e mafai la ona tatou feagai ma omiga mai aumea i se auala e lelei, ina ia fesoasoani ia i tatou e uia le ala tatou te mananao e ui ai? O le mea moni, e mafai!

Faaaogaina Lelei o Taaʻiga Lelei Mai Aumea

Ua iloaina e fomaʻi ma isi tagata popoto faapitoa i mea tau le soifua maloloina le aogā o le siomia o a latou tagata maʻi i se  siomaga o loo iai ni tagata e iai ni uiga mautinoa ma isi taaʻiga lelei. O se siomaga faapena e mafai ona avea ma faagaeega e toe maua ai le malosi. Mo se faaaoaoga, o tagata ua mumutu ni o latou aao, e masani ona fesoasoani faaaoaoga lelei ma faalaeiauga a isi foi na mafatia i ni tulaga talitutusa faapena ina ia latou onosaia ai mo se taimi umi togafitiga ina ia toe faafoisia lo latou malosi faaletino ma tau i faalogona. E manino lava, o le faaaofia o se tasi i se siomaga lelei, e aofia ai se vaaiga mautinoa, o nisi e fai ma faaaoaoga lelei, o se auala lena o le faaaogaina tatau o le ituaiga saʻo o taaʻiga mai aumea.

E faamaonia foi le moni o lenei mataupu silisili i totonu o le faapotopotoga Kerisiano, auā ina ia maua aafiaga lelei mai aumea o se tasi lea o mafuaaga ua poloaiina ai e Ieova ona tagata ina ia faatasitasi e lē aunoa. Ua uunaia i tatou e le Atua ina ia ‘taufaatupu le alofa ma galuega lelei o le tasi i le isi ma fefaalaeiauai le tasi i le isi.’ (Eperu 10:24, 25) O se faalaeiauga faapena e matuā tāua ona e tele omiga e faavaivaia ma faatiga ai o loo iai i le lalolagi i ona po nei. Ona o nei omiga, e tatau i Kerisiano ona ‘latou finafinau’ ina ia tumau ona malolosi faaleagaga. (Luka 13:24) O lea, tatou te manaomia ai ma talisapaia le lagolagosua alofa mai uso talitonu. E faaopoopo atu i ai, atonu e ao i nisi ona latou onosaia “mea matuitui i le tino,” atonu o le tulaga maʻi po o le lē mafaia ona toe faagaoioi o se vaega o le tino. (2 Korinito 12:7) Atonu o nisi o loo tauivi ina ia foia ni masaniga leaga po o ni mafatiaga, pe atonu foi ua latou iloaina le faigata ona mauaina o mea manaomia o le olaga. O lea la, ua tatou atamamai i lo tatou auaufaatasi ma tagata e vavalalata atu ia Ieova le Atua ma olioli e auauna ia te ia. O aumea faapena o le a faagaeetia ma fesoasoani ia i tatou e ‘tumau ma le faamaoni seia oo i le gataaga’—Mataio 24:13.

E ala la i le filifilia o aumea saʻo, e mafai ai ona tatou pulea taaʻiga latou te taaʻina ai i tatou. E lē gata i lena, o meaʻai lelei faaleagaga ma taiala aogā o loo laulauina i sauniga faa-Kerisiano e faatāua atili ai faalaeiauga totino o loo tatou mauaina mai a tatou aumea.

O le mea moni o le auai i sauniga faa-Kerisiano e lē faigofie i taimi uma. Atonu o nisi e latou te mauaina mai na o sina lagolagosua itiiti po o le leai foi mai a latou paaga faaipoipo, o isi atonu e iai a latou fanau e sauni, o isi o loo iai foi le faafitauli o le leai o se auala. Ae mafaufau: Pe afai e te lē faatagaina nei toatuga e taofia oe, e ono faalaeiauina ai isi i lau faaaoaoga o ē atonu o loo tauivi foi ma ni tulaga faapena. I se isi faaupuga, e lē gata ina avea o se faaaoaoga lelei ae ua saunia ai se ituaiga o taaʻiga lelei a aumea—ma e aunoa ma le aliali atu ai o se faiga fai faamalosi.

O le mea moni, o le aposetolo o Paulo, o lē na tauivi ma le tele o faigata ma toatuga, na ia faalaeiauina Kerisiano ina ia faataitai i lana faaaoaoga lelei ma faaaoaoga a isi foi Kerisiano taʻumatuaina. Na ia faapea mai: “Le au uso e, ia outou faaaʻoaʻo faatasi mai ia te au, ia outou vaavaai foi i e o savavali faapea, faapei ona fai o i matou ma faaaʻoaʻo ia te outou.” (Filipi 3:17; 4:9) Na vaavaai atu uluai Kerisiano i Tesalonia i le faaaoaoga lelei a Paulo. Na tusi mai Paulo e faatatau ia te i latou: “Sa outou faaaʻoaʻo mai foi ia te i matou, atoa ma le Alii, ina ua outou talia le upu i le puapuaga tele, ma le olioli mai le Agaga Paia; o lea ua avea ai outou ma faaaʻoaʻo i e ua faatuatua uma lava o i Maketonia atoa ma Akaia.” (1 Tesalonia 1:6, 7) O o tatou uiga mautinoa ma faaaoaoga lelei e mafai ona iai se aafiaga tutusa ia i latou o loo tatou aumea atu i ai.

Alofia Taaʻiga Lē Lelei

Pe afai tatou te mananao e alofia omiga lē mamā mai aumea, e tatau ona tatou teena taaʻiga a i ‘latou o ē savavali i la le tino.’ (Roma 8:4, 5; 1 Ioane 2:15-17) A lē faia faapea, o omiga leaga mai aumea o le a tataʻi ese ai i tatou mai ia Ieova ma ana fautuaga atamai. Ua faapea mai le Faataoto 13:20: “O lē latou te feoai ma tagata popoto, e poto lava ia; a o le uo a e valelea, e leaga ai lava ia.” Pe mafai ona e manatua se tasi o lē na oo i ai ni iuga leaga ona o omiga lē lelei mai aumea? Mo se faaaoaoga, o nisi Kerisiano, ua taʻitaʻiina atu i le matapeapea i mea faitino, amioga lē mamā, po o le faaaogaseseina o fualaau faasāina ma le ava malosi ona o taaʻiga mai a latou aumea.

 E oo lava i totonu o le faapotopotoga Kerisiano, e mafai ona tatou aafia i ni taaʻiga o omiga lē lelei mai aumea pe afai tatou te filifilia tagata vaivai faaleagaga o ni a tatou uo vavalalata. (1 Korinito 15:33; 2 Tesalonia 3:14) O tagata faapena e masani ona leai so latou faanaunauga e talanoaina ni mea faaleagaga; atonu e oo foi ina latou faatauemu ia i latou o loo fiafia i talanoaga faapena. Pe afai tatou te filifilia i latou nei o ni a tatou uo vavalalata, e ono taaʻina ai foi i tatou i lena lava tulaga, ma e lē umi lava, ae tatou iloaina ai ua tatou faaalia atu mafaufauga ma uiga e tutusa ma i latou. E ono oo foi ina amata ona tatou vaai maulalo ai ia i latou o ē o loo faamaoni lo latou faatuatua ma o loo taumafai e faia se agaigai i luma faaleagaga.—1 Timoteo 4:15.

Maeu le sili atu ona atamai o le atiina ae o ni faauoga ma i latou o loo taumafai e faafiafia Ieova, o ē e fiafia i mataupu faaleagaga! O ituaiga aumea faapena o le a fesoasoani ai ia i tatou e faaali atu le “poto mai lugā.” E “muamua ona mamā, i le ua filemu, e agamalu, e ganagofie, e tumu i le alofa ma fua lelei, . . . e le faatagā fai.” (Iakopo 3:17) E lē o le uiga o lenei mea e faapea e lē mafai ona talanoa tagata e mafaufau faaleagaga i isi mea e ese mai mataupu faaleagaga. E lē o lena! Seʻi mafaufau foi i mataupu eseese mananaia o loo talanoaina i lomiga a le Olo Matamata e pei o le mekasini o le Ala Mai! O mataupu aogā mo talanoaga e matuā fau ma soloi, ma e ala i le naunau i le tele o mataupu, tatou te faaalia ai le naunau i le ola ma galuega na faia e Ieova.

E pei lava ona faaleleia e se tagata taalo tenisi ona tomai e ala i le taaalo faatasi ma isi tagata taaalo lelei, e mafai foi e aumea saʻo ona atiina ae ai i tatou i le tulaga faalemafaufau, faalogona, ma le faaleagaga. I le isi itu, o aumea sese e mafai ona taʻitaʻi sese ai i tatou i se ala faagutugutulua e ala i le uunaia o i tatou e ola i se olaga uigalua. Maeu le sili atu o le olioli i se loto fuatiaifo mamā faatasi ai ma le faaaloalogia totino!

Nisi na Mauaina Aogā

Ua iloa e le toatele o tagata e faapea o le aʻoaʻoina o aʻoaʻoga faale-Tusi Paia ma ana faatulagaga tau amioga tatau ma manaoga faaleagaga e lē faigata tele. Peitai, o le mea e faigata, o le faatatauina lea o nei mea. E pei ona faaalia mai i faaaoaoga o loo mulimuli mai, o taaʻiga lelei mai aumea e mafai ona fesoasoani ia te i tatou e auauna ai o se tagata atoa ia Ieova.

Na faapea mai se tasi o Molimau a Ieova o lē o loo i le auaunaga faataimi atoa ma lana avā, o faaaoaoga a ana aumea na aafia ai ona sini i le olaga. A o ia tuputupu aʻe, sa tatau ona faafesagaia e ia ni taaʻiga lē mamā. Peitai sa ia filifili e avea ma ana uo i latou na faamalosia o ia ina ia auai e lē aunoa i le faiva ma auai i sauniga faa-Kerisiano. O le pipii atu i nei aumea na fesoasoani ia te ia e oo atu ai i le taʻumatuaina faaleagaga.

Ua tusi mai e faapea le isi Molimau: “Ina ua ma faaipoipo ma laʻu avā, ona ma siitia atu loa lea i se faapotopotoga e iai se ulugalii e pei o maʻua le matutua sa paeonia sauatoa. O le la faaaoaoga na fesoasoani ina ia ma auai i le faiva faataimi atoa. Ona ma galulue ai foi lea o maʻua  i le atiina ae o le agaga faapaeonia i le faapotopotoga. O le iuga, e toatele na auai faatasi ma i matou o ni paeonia.”

O le aumea faatasi ma i latou o ē e iai o latou sini faatiokarate e mafai ona faafaigofie ai ona usiusitai ia Ieova. O le isi lena o aafiaga aogā o taaʻiga lelei a aumea. O se Molimau na amata ona auai i le faiva faataimi atoa a o tama talavou ma mulimuli ane ai avea ma ovasia femalagaai, o lea ua auauna nei i se tasi o ofisa o le lālā a le Sosaiete o le Olo Matamata. Ua ia tusi mai: “O nisi o oʻu manatunatuga e sili ona leva ma sili ona ou fiafia ai a o oʻu laitiiti o le asiasi mai lea o auauna faataimi atoa i lo matou aiga. Sa iai pea le avanoa mo se mālō e asiasi mai e matou te fai ʻaiga. O se tasi ovasia matagaluega na ia aumaia ia te au se ato talaʻi ina ua faatoʻā sefulu oʻu tausaga. Sa ou teuina faapelepele pea lena ato seia oo mai i le asō.”

I le toe mafaufau atu i tausaga o lona talavou, ua faaopoopo mai lenei Molimau e faapea: “O le toatele o tama talavou i le faapotopotoga na mananao e auai i galuegafai a le faapotopotoga, ma o la latou faaaoaoga na faalaeiauina ai isi o i matou ina ia iai foi lena lagona e tasi.” Na fesoasoani aumea lelei i lenei talavou, e pei o se tamai tatupu, e tuputupu lauolaola aʻe, e avea o se tane Kerisiano e pei o se laau. Mātua, po o tou valaauliaina ea i o outou aiga i latou o ē e mafai ona iai se taaʻiga mautinoa ma atiina ae mo a outou fanau?—Malaki 3:16.

O le mea moni, e lē o tatou uma e mafai ona auai i le faiva faataimi atoa e pei o tagata ia faatoʻā uma ona taʻuaina. Ae o tatou uma lava e mafai ona aʻoaʻo ia alofa ia Ieova ‘ma o tatou loto atoa, agaga atoa, ma le manatu atoa.’ (Mataio 22:37) O a tatou filifiliga o aumea e faia aʻe ai se matafaioi autū i le atiina ae o le alofa ma o tatou faamoemoega mo le ola e faavavau.

Na aumai e le faisalamo se taiala e faigofie ae uigā e taulau manuia ai i le olaga: “Amuia le tagata e le savali i le filifiliga a e amio leaga, e le tu foi o ia i le ala o e agasala, e le nofo foi i le nofoa o e tauemu; a e naunau o ia i le tulafono a Ieova; e mafaufau foi o ia i lana tulafono i le ao atoa ma le po. O ia foi e faapei o le laau ua totō i tafatafa ane o vaitafe, e fua mai ona fua i ona lava tau; e le toulu foi ona lau; e manuia foi mea uma na te faia.”—Salamo 1:1-3.

Maeu se faamautinoaga matagofie! E ui lava tatou te lē lelei atoatoa ma faia measese, ae o le a taulau manuia o tatou olaga pe afai tatou te faataga Ieova e taʻitaʻiina i tatou ma faaaogaina atoatoa lenei sauniuniga ua foaiina mai e le Atua o taaʻiga lelei mai aumea—‘lo tatou auuso atoa o i le lalolagi.’—1 Peteru 5:9.

[Ata i le itulau 24]

Ua ofoina mai e le faapotopotoga se ituaiga lelei o taaʻiga mai aumea

[Ata i le itulau 25]

Mātua, faalaeiau a outou fanau ina ia miomiō faatasi ma aumea e atiina ae ai