Faamalosia e Fai Atu e “Leai, e Lē Faia le Measesē”

UA FAAMATALA mai e Timoteo e faapea: “Ina o sefululima oʻu tausaga ma o loo galue i se faleoloa, na valaaulia ai aʻu e se tama ma te faigaluega faatasi ou te alu atu i lona fale. Na faapea mai o ia, o le a lē iai ona mātua, ma o le a iai ni teine iinā, ma o le a maua ai le avanoa e faia ai ni feusuaʻiga.” O le tele o tagata talavou i aso nei o le a vave lava ona tali atu ua lelei i se valaaulia faapena. Ae o le ā le tali atu a Timoteo? “Sa vave ona ou taʻu saʻo atu ia te ia i lena lava taimi e faapea, ou te lē alu atu ma ona o loʻu loto fuatiaifo faa-Kerisiano, ou te lē manao ai e fai ni feusuaʻiga ma se tasi ou te leʻi faaipoipo atu i ai.”

A o faamatala atu lona tetee, e leʻi iloa e Timoteo sa faalogologo ane se teine talavou faigaluega i le faleoloa. O lona tulaga mamā na faatupu ai le fia iloa o le teine, ma sa leʻi pine ae fesagaʻi o ia ma le tofotofoga e fai atu ai foʻi e leai, i lena teine—ma i le tele o taimi, e pei ona o lea o le a tatou vaai i ai mulimuli ane.

O le saputu mai o tofotofoga ia i tatou, o le mea moni, e lē o se mea fou lea i o tatou aso. I le 3,000 tausaga ua mavae, na tusi ai le tupu o Solomona e faapea: “Loʻu atalii e, afai e faaoleole ia te oe tagata agasala, aua neʻi e usiusitai i ai; . . . taofi ia ou vae neʻi ui i lo latou ala.” (Faataoto 1:10, 15) Na poloaʻiina e Ieova lava ia le nuu o Isaraelu e faapea: “Aua e te mulimuli atu i le toatele e fai le amio leaga.” (Esoto 23:2) Ioe, i nisi taimi e tatau ona tatou fai atu e leai, e tetee atu ai i tofotofoga ina ia faia le measesē, e ui lava e foliga mai e lē o se faiga taatele lea.

O le Fai Atu e Leai e Tāua Faapitoa Lava i Aso Nei

O le fai atu e leai i le faia o measesē, sa lē faigofie, ma e matuā faigata faapitoa lava i aso nei, auā o lea ua tatou ola i aso ua taʻua e le Tusi Paia o “aso e gata ai” o lenei faiga o mea. E moni lava e tusa ai ma valoaga o le Tusi Paia, o tagata, ua masani ona avea ma ē mananaʻo i mea faafiafia ma faiga sauā, ua lē mananaʻo i mea faaleagaga ma amioga mamā. (2 Timoteo 3:1-5) Ua taʻua e se peresitene o le iunivesite a Jesuit e faapea: “Ua ia i tatou ni tapulaa masani ua tofotofoina ma iloa ai ua iai se faaletonu po ua lē o toe aogā. I le taimi nei, e foliga mai ua matuā leai lava ni taʻiala tauamio.” I se uiga faapena, na faapea mai ai se alii faamasino o se faamasinoga maualuga: “Ua lē o toe mafai ona iloa le eseesega o mea. Ua faanenefu mea uma. . . . E toʻaitiiti lava ni nai tagata o loo iloa le eseesega o le saʻo ma le sesē. Ua manatu o se agasala pe a maua, ae lē o se agasala le faia o le amioleaga.”

Na tusi mai le aposetolo o Paulo e faatatau i tagata e iai uiga faaalia faapena: “O loo faapouliuligia o latou mafaufau, o liliueseina i latou i le ola o i le Atua, ona o le valea ua ia i latou, ona o le maaa o latou loto; ua latou le lagona se mea, ua tuuina atu i latou ia i latou i le matāitu e fai mea leaga uma lava ma le tuʻinanau i ai.” (Efeso 4:18, 19) Ae o loo faatali mai faalavelave mo i latou. Na faalauiloa mai e Isaia faapea:  “Oi talofa ia te i latou o e fai mai, ua lelei le mea leaga, a e leaga le mea lelei; o e fai ma malamalama le pouliuli, a e fai foi ma pouliuli le malamalama.” (Isaia 5:20) E lē gata e selesele e i latou nei mea na latou lūlū i le taimi nei, ae o le a lē pine foi ae latou tofo i le “auē” sili—le faamasinoga lē manuia mai ia Ieova.—Kalatia 6:7.

Fai mai le Salamo 92:7: “A tupu olaola o e amio leaga e pei o le vao iti, a fuga mai foi i latou uma o e fai mea leaga, e faapea i latou ina ia faaumatia e oo i le faavavau lava.” I se isi faaupuga, o lenei matuā faatuputeleina o le amioleaga, o le a lē faaauau pea e faavavau, ma avea ai le olaga ma mea ua faigatā i tagata uma ona ola ai. O le mea moni, na fetalai Iesu e faapea, “o le tupulaga” na faapogaia nei faiga leaga o i latou lava na o le a soloiesea e le Atua e ala i se “puapuaga tele.” (Mataio 24:3, 21, 34) O lea, afai tatou te mananaʻo ia faasaoina mai lena puapuaga, e manaʻomia ona tatou iloa le saʻo mai le sesē e tusa ai ma tapulaa a le Atua; ma o le mea moni, e tatou te manaʻomia foi le malosi tau i amioga tatau e fai atu ai e leai i le faia o ituaiga uma lava o measesē. E ui e lē faigofie lenei mea, ae ua saunia e Ieova mo i tatou ni faaaʻoaʻoga faalaeiʻau i vaitaimi o le Tusi Paia ma i aso nei.

Aʻoaʻo Mai i se Taulealea Talavou o Lē na Fai Atu e Leai

E foliga mai e sili atu ona faigatā le fai atu e leai i le faia o le faitaaga ma le mulilua, e oo lava i nisi i le faapotopotoga Kerisiano. O Timoteo, lea na taʻua i le amataga o le mataupu, sa ia teu i lona loto le faaaʻoaʻoga a le talavou o Iosefa, lea o loo faamauina i le Tusi Paia i le Kenese 39:1-12. Sa faaalia e Iosefa le malosi tau i amioga tatau ina ua faatauanauina pea e le avā a Potifara, se tamalii o Aikupito, ina ia faia se feusuaʻiga ma ia. Ua faapea mai le faamatalaga e uiga ia Iosefa, sa “le mafai o ia ma ua fai atu . . . Pe faapefea ona ou faia lenei mea leaga tele ma ou agasala ai i le Atua?”

Na faapefea ona maua e Iosefa le malosi tau i amioga tatau e fai atu ai e leai i le avā a Potifara i lea aso ma lea aso? Muamua lava, sa tāua ia te ia lana faiā ma Ieova e sili mamao atu i lo o ni fiafiaga e vave ona mavae. E lē gata i lea, e ui lava sa lē iai o ia i lalo o le tulafono tauatua (le Tulafono a Mose lea e leʻi aumaia i lena taimi), ae sa manino lelei i le mafaufau o Iosefa mataupu silisili tauamio; sa ia iloa e faapea, o le faia o le faitaaga ma le avā a Potifara maʻi valea i feusuaʻiga, o se agasala lea e lē gata i le va ma lana tane ae faapea foi i le Atua.—Kenese 39:8, 9.

E mautinoa lava sa malamalama Iosefa i le tāua o le alofia o le amata ona faagaeeina o tuʻinanauga o le a mafai ona faapogaia ai se lagona mū o tuʻinanauga lē pulea. O se faiga atamai mo se Kerisiano ona mulimuli i le faaaʻoaʻoga a Iosefa. Ua taʻua i le Watchtower o Iulai 1, 1957, e faapea: “E tatau ona ia iloa ona vaivaiga faaletino ma aua neʻi manatu e mafai ona ia pulea tuʻinanauga o le tino e tusa ai ma tapulaa a le Tusi Paia ma taofi ai iinā. E tusa lava pe atonu sa ia taulau manuia i le faia o lena mea mo sina taimi, ae o le a iʻu lava ina sopo tapulaa atu ai i le faia o le agasala. E mautinoa le tupu o lenei mea, talu ai o tuʻinanau e faaolaolaina e oo ina tutupu malolosi ma oo ina matuā pulea ai le tagata. Ona oo ai lea ina matuā sili atu ona faigatā ia te ia ona faagalo na mea. O le puipuiga sili ona lelei mo ia o le teena lea o na faanaunauga i le amataga.”

E sili atu ona faigofie pe a teena na faanaunauga i le amataga a o tatou faatupuina se naunau alofa mo le mea saʻo ma ʻinoʻino i le mea leaga. (Salamo 37:27) Ae e manaʻomia ona tatou galulue maumauaʻi pea i ai. Afai tatou te faia faapea faatasi ma le fesoasoani a Ieova, o le a faamalosia ai lo tatou alofa mo le mea saʻo ma ʻinoʻino i le mea leaga. O le mea moni, i le taimi nei, e tatau ona tatou tutumau i le mataala, e pei ona faatonu mai e Iesu, ma ia maumauaʻi i le tatalo ina ia faasaoina mai tofotofoga ma ia laveaʻiina mai lē o loo leaga.—Mataio 6:13; 1 Tesalonia 5:17.

Fai Atu e Leai i Omiga Mai Au Tupulaga

O se tasi taaʻiga i le faia o le measesē, o omiga mai au tupulaga. Na taʻutino mai e se tasi talavou e faapea: “O loo oʻu ola i se olaga uigalua —o le tasi i le aʻoga ma le isi i le aiga. I le aʻoga matou te faifai mea ma tamaiti o ē e tāutala i upu masoā e toetoe lava i taimi uma e tāutatala ai. Ma ua oo foʻi ina ou pei o i latou. O le ā e tatau ona ou faia?” O le mea e manaʻomia, o le lototele lea e faaesea ai oe, ma o le tasi o auala e maua ai le lototele o le faitauina lea ma mafaufau loloto i faamatalaga a le Tusi Paia o loo taʻu mai ai ia i tatou e uiga i auauna faamaoni a le Atua e pei o Iosefa. O isi faaaʻoaʻoga lelei, o Tanielu, Sataraka, Mesako, ma Apeteniko—o tane talavou e toʻafā o ē na faaalia le loto tetele e faaesea ai i latou mai a latou tupulaga.

A o aʻoaʻoina faatasi ma isi tane talavou i le maota o le tupu o Papelonia, sa manaʻomia ai e nei tane talavou Isaraelu e toʻafā ona aai “i lea aso ma lea aso i mea taumafa a le tupu.” I le lē mananaʻo e solia se vala o le tulafono tau meaʻai o le Tulafono a Mose, na latou fai atu ai e leai, i nei meaʻai. Sa manaʻomia ai i lena mea le malosi—le matuā sili atu ona faamalosi, ona o meaʻai, o “mea taumafa a le tupu,” e lē taumatea sa avea o se tofotofoga tele. Maʻeu se faaaʻoaʻoga lelei na faataatia e nei taulelea talavou mo Kerisiano i aso nei o ē atonu o tofotofoina, pe oo lava ina uunaʻia e inu ia onanā i le ava malosi pe tagofia foi fualaau faasāina ma le tapaa!—Tanielu 1:3-17.

Na faaalia foi e Sataraka, Mesako, ma Apeteniko le moni o upu na fetalai ai Iesu Keriso mulimuli ane: “O lē faamaoni i le mea itiiti, e faamaoni foi o ia i mea e tele.” (Luka 16:10) O lo latou tutumau ma le loto tetele i le mataupu faatauvaa i meaʻai ma le iʻuga lelei na tuuina atu e Ieova, e lē taumatea na faamalosia ai i latou mo se tofotofoga e sili atu ona matuiā mulimuli ane. (Tanielu 1:18-20) Na oo mai lenei tofotofoga ina ua faatonuina i latou ina ia faia se gaoioiga ifo i tupua lea afai e lē faia, o le a faasalaina i latou i le oti e ala i se afi. Ma le loto tetele, na maumauaʻi ai nei tane talavou e toʻatolu e tapuaʻi atu tau lava o Ieova, i le faatuatua atoatoa atu ia te ia e tusa lava po o le ā le iʻuga e oo i ai. Na toe faamanuia ai foi i latou e Ieova ona o lo latou faatuatua ma le loto tetele—i le puipuia faavavega o i latou i le taimi lea mai le mumū o le afi ina ua lafoina i latou i se ogaumu e matuā uigaese le aasa.—Tanielu 3:1-30.

O loo iai i le Afioga a le Atua le tele o isi faaaʻoaʻoga e uiga ia i latou o ē na fai atu e leai i le faia o measesē. Na fai atu Mose e leai i le “taʻua o ia o le tama a le afafine o Farao,” e ui lava sa avatu ai e lenei mea ia te ia se avanoa telē e soona fai ai le “fiafia i le agasala e vave mavae” i Aikupito. (Eperu 11:24-26) Sa teena foi e le perofeta o Samuelu le faaaogāsesēina o lana pule i le talia o ni faiga faatogafalea. (1 Samuelu 12:3, 4) Na tali atu ma le loto tetele aposetolo o Iesu Keriso e leai, ina ua faatonuina i latou e aua neʻi toe talaʻi. (Galuega 5:27-29) Na fai atu ma le maumauaʻi foi Iesu lava ia e leai, i le faia o measesē uma—seʻia oo lava i le taimi mulimuli o lona soifuaga ina ua ofoina atu e fitafita ia te ia le “uaina ua fefiloi ma le muro.” O le taliaina o lea mea e ono faavaivaia ai lana faaiʻuga i lena taimi faigatā.—Mareko 15:23; Mataio 4:1-10.

O le Fai Atu e Leai—O se Mataupu e Faalagolago i ai le Ola ma le Oti

Na fetalai Iesu: “Ia outou ulu atu i le faitotoa va apiapi; auā e va tele le faitotoa, e lautele foi le ala e tau atu i le malaia, e toatele foi i latou o e ui atu ai. Auā e va apiapi le faitotoa, e lauitiiti foi le ala e tau atu i le ola, e toaitiiti foi i latou o e maua.”—Mataio 7:13, 14.

E lauiloa le ala vātele auā e faigofie ona ui atu ai. O i latou e ui ai i lea auala e naunau i le faamalieina o i latou, ua lolo atu i mafaufauga ma auala faaletino, ma e latou te lē mananaʻo e faaesea mai ai i latou, ae ua lolo e ōgatasi ma ala o le lalolagi a Satani. Ua latou lagona le taofiofia o i latou i tulafono tauamio a le Atua ma ana mataupu silisili. (Efeso 4:17-19) Peitaʻi, na fetalai patino mai lava Iesu, o le ala vātele ‘e tau i le faaumatiaga.’

Ae aisea na fetalai ai Iesu e faapea e toʻaitiiti e latou te filifilia le ala vāapiapi? O le māfuaaga autū, talu ai, e na o le toʻaitiiti lava tagata e mananaʻo e pulea o latou olaga e tulafono ma mataupu silisili a le Atua, ma ia latou maua le fesoasoani e tetee atu ai i le tele o faatosinaga ma avanoa e faia measesē ia o siomia ai i  latou. E lē gata i lea, e na o le toʻaitiiti lava i latou o loo nofo sauni e tau faasaga i tuʻinanauga leaga, omiga mai tupulaga, ma le fefe ina neʻi oo mai ia i latou ni tauemuga ona o le ala ua latou filifilia.—1 Peteru 3:16; 4:4.

Ua malamalama atoatoa i latou nei i le lagona sa i le aposetolo o Paulo ina ua ia faamatalaina le taua lea na ia tauina ina ia fai atu e leai i le agasala. I le pei o le lalolagi i aso nei, na saunia e tagata o Roma ma tagata Eleni o aso o Paulo se ala vātele o avanoa e māfuli atu i le faia o measesē. Na faamatala e Paulo e faapea, talu ai sa iloa e lona mafaufau le mea saʻo, sa faia ai se ‘taua’ faifai pea ma lona tino, lea sa lolo atu i le faia o le measesē. (Roma 7:21-24) Ioe, sa iloa e Paulo e faapea, o lona tino o se auauna lelei ae o se matai leaga foi, o lea, na ia aʻoaʻoina ai e fai atu e leai i ai. Na ia tusia e faapea: “A ou te faatoilaloina loʻu nei tino, ma aʻu fai ai ma pologa.” (1 Korinito 9:27) Na faapefea ona ia maua se manumalo faapena? E lē o sona lava malosi, lea sa lē lavā tatali e tusa ai ma le tauiviga, ae o le fesoasoani o le agaga o le Atua.—Roma 8:9-11.

O le iʻuga, e ui lava sa lē lelei atoatoa Paulo, ae sa tumau i lona faamaoni ia Ieova e oo lava i le iʻuga. A o toeitiiti oo i lona maliu, sa mafai ona ia tusi mai e faapea: “Ua ou tau le taua lelei, ua iu ia te aʻu le tausinioga, ua ou taofi i le upu o le faatuatua. O lenei, ua teuina mo aʻu le pale o le amiotonu.”—2 Timoteo 4:7, 8.

A o tatou tau ma o tatou lē lelei atoatoa, maʻeu ni faaaʻoaʻoga e faalaeiʻau ai ua tatou maua, e lē na o faaaʻoaʻoga a Paulo, ae faapea foi ma i latou o ē na avea o ni faaaʻoaʻoga ia te ia—Iosefa, Mose, Tanielu, Sataraka, Mesako, Apeteniko, ma le toʻatele o isi. E ui lava o i latou o ni tagata e lē lelei atoatoa, ae o nei tagata faatuatua taʻitoʻatasi sa tali atu e leai, i le faia o measesē, e lē ona o le faaua maaa pe loto fatu, ae ona o le malosi tau i amioga tatau mai le agaga o Ieova. (Kalatia 5:22, 23) O i latou o ni tagata faaleagaga. Latou te gālala i tuleiga uma mai le fofoga o Ieova. (Teuteronome 8:3) O lana afioga sa avea ma mea e maua ai e i latou le ola. (Teuteronome 32:47) E silisili i mea uma lava, sa latou alolofa ia Ieova ma matataʻu ia te ia, ma faatasi ai ma lana fesoasoani, sa latou atiina aʻe ma le onosaʻi se ʻinoʻino i le faia o measesē.—Salamo 97:10; Faataoto 1:7.

Tau ina ia tatou pei o i latou. O le mea moni, o le maumauaʻi i le faaauau pea ona fai atu e leai, i le faia o so o se ituaiga o measesē, e tatou te manaʻomia ai le agaga o Ieova e pei lava ona sa latou manaʻomia. E foaʻi mai ma le agalelei e Ieova ia i tatou lona agaga pe afai tatou te ōle atu i ai ma le faamaoni, suʻesuʻe lana Afioga, ma auai e lē aunoa i sauniga faa-Kerisiano.—Salamo 119:105; Luka 11:13; Eperu 10:24, 25.

O Timoteo lea na taʻua i le amataga, sa lagona le fiafia ona na te leʻi tuulafoaʻia ona manaʻoga faaleagaga. O le tamaʻitaʻi talavou faigaluega o lē na faalogo atu i le talanoaga a Timoteo ma lana aumea i le galuega ma sa tosina sesē ai i le amio lelei a Timoteo, na mulimuli ane ia valaauliaina e aunoa ma le iloa e se tasi Timoteo e alu atu i lona fale ina ua lē o iai lana tane. Sa teena e Timoteo. Sa lē fiu gofie lea tamaʻitaʻi, sa ia valaaulia pea o ia i le tele o taimi, e pei lava o le avā a Potifara. Sa fai atu ma le maumauaʻi ma le agalelei Timoteo e leai, i taimi uma o na valaaulia. Sa oo lava ina ia avatu se molimau lelei mai le Afioga a le Atua i lena tamaʻitaʻi. I le matuā loto faafetai ia Ieova ona o le foaʻiina atu ia te ia o le malosi tau i amioga tatau e fai atu ai e leai, ua faaipoipo fiafia nei Timoteo i se tuafafine Kerisiano amio lelei. O le mea moni, o le a faamanuia ma faamalosia e Ieova i latou uma o ē mananaʻo e tausisia lo latou faamaoni faa-Kerisiano e ala i le fai atu e leai, i le faia o measesē.—Salamo 1:1-3.