O le ā e Mafai Ona Fai e Uiga i le Loto Vaivai?

E MAFAI faapefea e se tagata ona tau faasaga i le loto vaivai? O le fesili lenei na faatulaʻi atu i nisi o ovasia femalagaaʻi, o ē e asiasi atu e lē aunoa i faapotopotoga o Molimau a Ieova. O a latou tali e mafai ona fesoasoani ia i tatou ina ia iloilo ai māfuaaga o le loto vaivai, ma ni vaifofō mo lenei tulaga lea e mafai ona aafia ai so o se Kerisiano.

E sili atu mea e manaʻomia e fesagaʻia ai le loto vaivai na i lo o le tau ina vailiili, ae o āuga atonu e aofia ai le lē fiafia e tatalo po o le faia o suʻesuʻega totino, tau lē auai pea i sauniga, ua leai se aasa, ma e oo foʻi lava i le tau lē āno ane i aumea Kerisiano. Ae peitaʻi, o se tasi o faailoga e sili ona iloa gofie ai, o le lē toe maelegā lea i le galuega faaevagelia. Seʻi o tatou iloiloina āuga ma talanoaina ni vaifofō.

Loto Vaivai i la Tatou Galuega Faaevagelia

Sa silafia lelei e Iesu Keriso e uiga i faigatā e ō mai faatasi ma le tofiga o le faia o soo. (Mataio 28:19, 20) Sa ia aauina atu ona soo e pei o “mamoe i le va o luko,” i le silafia e faapea, ona o la latou galuega talaʻi, o le a oo ai sauāga ia i latou. (Mataio 10:16-23) Ae peitaʻi, sa lē o se māfuaaga lea mo i latou e loto vaivai ai. O le mea moni, o auauna a le Atua o ē na faalagolago atu ia Ieova e ala i le tatalo ua faamalosia i latou ona sauāga.—Galuega 4:29-31; 5:41, 42.

E tusa lava pe sa leʻi pagatia soo o Keriso i ni sauāga matuiā i nisi taimi, ae e lē o taimi uma lava sa talileleia ai pea i latou. (Mataio 10:11-15) E faapena foʻi ona lē faigofie ona faia o le galuega talaʻi a Molimau a Ieova i aso nei. * I le toʻatele o tagata, o le talitonu i le Atua, o se mataupu totino a le tagata lava ia, ma e latou te lē mananaʻo e talanoaina. O isi e latou te lē fia auai lava i se faalapotopotoga faalelotu ona o o latou faalogona faaituʻau e faatatau i lena faalapotopotoga faalotu. E mautinoa, o le lē āno mai o tagata, le leai o ni iʻuga lelei, po o isi faafitauli eseese e mafai ona avea ma pogai mataʻutia o le loto vaivai. E mafai faapefea ona foʻia nei toʻatugā?

Mauaina o Iʻuga e Sili Ona Lelei

O le ʻoliʻoli lea tatou te mauaina mai i la tatou faiva, e tele ina fesootaʻi atu i iʻuga o mauaina. E mafai la faapefea ona tatou maua se faiva e sili atu ona fuatele? Ia, o i tatou o “fai faiva i tagata.” (Mareko 1:16-18) O tagata fai faiva i Isaraelu anamua, sa ō e fagogota i le po, o le taimi lea e latou te maua ai le tele o iʻa. E manaʻomia foʻi ona iloilo la tatou oganuu ina ia tatou ō atu e “fagogota” i le taimi e maua atu ai le toʻatele o tagata i o latou fale ma o le a sili atu ai ona tali lelei mai i la tatou feʻau. Atonu pe faia lenei mea i le afiafipo, i faaiʻuga o vaiaso, po o se isi taimi. E tusa ai ma le faamatalaga a se tasi ovasia femalagaaʻi, e aogā ona fai o lenei mea i vaipanoa e faigaluega ai tagata i le aso atoa. Ua ia mātauina e faapea, o le molimau atu i afiafipo, e masani ona maua ai iʻuga e sili ona lelei. O le molimau atu e ala i telefoni ma talaʻiga lē fuafuaina, e mafai ai ona tatou feiloaʻi atu i le toʻatele o isi tagata.

O le finafinau i le faiva ua maua ai ni iʻuga lelei. I Europa i Sasaʻe ma isi atunuu o Aferika, o loo lelei ai le agaʻigaʻi i luma o le galuega talaʻi o le Malo, ma ua iʻu ai lenei i ni faatelega  lelei. I se tulaga tutusa, ua faavaeina le tele o faapotopotoga i vaipanoa ua leva ona manatu i ai e faapea e lē fua mai e oo lava i oganuu e galueaʻiina soo. Ae peitaʻi, e faapefea pe afai e lē o fua mai i la outou oganuu ni iʻuga faapena?

Tausisia Pea se Uiga Lelei

O le manatua lelei pea o sini na faataatitia e Iesu, o le a fesoasoani ia i tatou ina ia aua neʻi loto vaivai a o fesagaʻi ma le lē āno mai o tagata i le faiva. Sa manaʻo Keriso ina ia sailia e ona soo i latou ua tatau ai, ae lē o le faaliliuina o le anoanoaʻi o tagata. I nisi taimi, sa ia taʻua ai e faapea, e matuā anoanoaʻi tagata o le a lē talia le tala lelei, e pei lava o le toʻatele o tagata Isaraelu sa lē faalogo i perofeta o aso anamua.—Esekielu 9:4; Mataio 10:11-15; Mareko 4:14-20.

Ua talia ma le loto faafetai e tagata taʻitoʻatasi le “tala lelei o le malo” o i latou o loo “mataala i o latou manaʻoga faaleagaga.” (Mataio 24:14; 5:3, NW ) Latou te mananaʻo e auauna i le Atua i le auala ua ia faamaʻoti maia. O lea, o iʻuga o la tatou galuega e sili atu ona fesootaʻi i tulaga o loto o tagata na i lo tatou tomai i le taulimaina o le feʻau. O le mea moni, e manaʻomia ona tatou faia le mea aupito sili ina ia logoleleia ai i tagata le tala lelei. Peitaʻi, o iʻuga, e faalagolago i le Atua, auā na fetalai Iesu: “E le mafai se tasi ona sau ia te au, pe a le tosina mai e le Tamā ua auina mai aʻu.”—Ioane 6:44.

O la tatou galuega faaevagelia ua faalauiloa atu ai le suafa o Ieova. E tusa lava pe faalogo tagata pe leai, a o la tatou galuega talaʻi ua saosaolaumea i le faapaiaina o le suafa paia o Ieova. E lē gata i lea, e ala i la tatou galuega faaevagelia, ua tatou faamaonia atu ai o i tatou o soo o Keriso, ma ua ia i tatou le faaeaga o le faia o se sao i le galuega e aupito sili ona tāua ua faia i o tatou aso.—Mataio 6:9; Ioane 15:8.

Le Loto Vaivai ma Faiā

O nisi faiā faaletagata, pe i se faiā faaleaiga po o i le faapotopotoga, e mafai ona faapogaia ai le loto vaivai. Mo se faataʻitaʻiga, e iai le faalogona lea e faapea, e lē o malamalama isi ia te oe. O uiga lē lelei atoatoa o uso talitonu e mafai ona faaloto vaivai ai i tatou. O lea, e mafai ona fesoasoani tele mai le Tusi Paia ia i tatou.

‘O le aufaatasiga o le au uso’ i le lalolagi aoao ua faia aʻe ai se aiga faaleagaga e matuā toʻatele lava. (1 Peteru 2:17) Ae o le lagona o le avea ma sui o ni tagata autasi, e mafai ona mou atu pe a mapuna aʻe tulaga faigatā ona o ni uiga totino e feteenaʻi. E mautinoa lava, sa lē mafai ona ʻalofia e Kerisiano o le uluaʻi senituri na faafitauli, talu ai sa faamanatu atu pea e le aposetolo o Paulo ia i latou ina ia nonofo faatasi ma le autasi. Mo se faaaʻoaʻoga, sa ia apoapoaʻi atu i fafine Kerisiano e toʻalua o—Evotia ma Sunetui—ina ia faalelei o la feeseeseaʻiga.—1 Korinito 1:10; Efeso 4:1-3; Filipi 4:2, 3.

Afai o lena le faafitauli, e mafai faapefea ona tatou toe faatupu se alofa faamaoni mo o tatou uso ma tuafāfine? E ala i le faamanatu ifo ia i tatou lava e faapea, na maliu Keriso mo i latou ma o loo faaalia foʻi e i latou le faatuatua i lana taulaga togiola e pei o i tatou. E tatau foʻi ona tatou manatua e faapea, ua nofo sauni le toʻatele o o tatou uso e faataʻitaʻi ia Iesu Keriso e ala i le tuuina o o latou ola i se tulaga lamatia mo i tatou.

I ni tausaga ua mavae, i Pale i Falani, sa leʻi faatalatū se Molimau talavou i lona tago atu ma uu mai se ato paʻu sa iai se pomu na tuu i fafo atu o le Maota o le Malo. Sa tamoʻe atu o ia agaʻi i lalo i le tele o ni faasitepu a o leʻi togiina le ato paʻu i se vaipuna, ma o iinā na pā ai le pomu. Ina ua fesiligia po o le ā na uunaʻia o ia e tuuina lona ola i se tulaga lamatia i lenei auala, na ia tali mai: “Sa ou iloa ua iai o tatou ola i se tulaga lamatia. O lea, sa ou manatu ai e sili loʻu oti na o aʻu na i lo o le oti o i tatou uma.” * Maʻeu se faamanuiaga i le iai o ni aumea faapena o ē ua nofo sauni e mulimulituʻi i le faaaʻoaʻoga a Iesu!

E lē gata i lea, e mafai ona tatou mafaufau loloto i le agaga o le felagolagomaʻi sa iai i Molimau a Ieova o ē na i nofoaga o faasalaga i le  taimi o le Taua Lona Lua a le Lalolagi. * Ma talu ai nei lava, sa faapena foʻi ona tūtūmau i le faamaoni o tatou uso ma tuafāfine i Malawi i le avea o ni Kerisiano moni. Pe e lē avea ea le manatu e faapea, o le a faapena foʻi ona faia e o tatou uso i la tatou faapotopotoga i lalo o tulaga faigatā, e uunaʻia ai i tatou e faagalo pe aua le soona popole ai i faiā e lē o lelei ma mea faigatā i aso taʻitasi? Afai tatou te ati aʻe le finagalo o Keriso, o le a avea ai a tatou faiā i aso taʻitasi ma o tatou uso tapuaʻi ma puna e faafouina ai, ae lē o le faaloto vaivai ai.

Faalogona Totino e Faavaivai Ai

“O le faamoemoe ua tuai ona taunuu e faanoanoa ai le loto; a o le manao ua taunuu, o le laau o le ola lea.” (Faataoto 13:12) I manatu o nisi o auauna a Ieova e faapea, ua tuai tele ona oo mai le iʻuga. Ua iloa e Kerisiano o le vaitaimi lenei o loo tatou ola ai ua ‘matuā faigatā lava ona faafesagaʻia,’ e pei ona manatu ai le toʻatele o isi tagata lē talitonu.—2 Timoteo 3:1-5.

Peitaʻi, i se faaeseesega ma tagata lē talitonu, e ao i Kerisiano ona ʻoliʻoli e vaai i nei taimi faigatā o le “faailoga” o le faatasi mai o Iesu, lea ua faaalia ai e faapea, ua lē o toe umi se taimi ona aumaia lea e le Malo o le Atua se iʻuga i lenei faiga amioleaga o mea. (Mataio 24:3-14) E tusa lava pe oo ina faateleina le leaga o tulaga o mea—e pei ona mautinoa o le a faapena pe a oo mai le “puapuaga tele”—ae o nei mea tutupu ua avea o se puna o le ʻoliʻoli ia i tatou ona ua faataʻimua mai e nei mea tutupu le oo mai o le lalolagi fou a le Atua o loo fotuaʻi mai.—Mataio 24:21; 2 Peteru 3:13.

O le manatu i le tuai ona faalaa mai o le Malo o le Atua i mataupufai a tagata i aso nei, e ono faapogaia ai se Kerisiano e faateleina le taimi e tuutōina atu i le sailia o mea faitino. Afai la na te faatagaina mea faapena, e pei o galuega totogi ma faafiafiaga e fao uma lona taimi ma lona malosi, o le a faafaigatā ai la ia te ia ona faataunuuina lelei ona tiute tauave faale-Tusi Paia. (Mataio 6:24, 33, 34) O uiga faapena e oo mai ai le fiu ma faapea ona faaloto vaivai ai. Na taʻua e se tasi ovasia femalagaaʻi e faapea: “E lē o se mea talafeagai le taumafai e ati aʻe se vaaiga lē moni e uiga i le olaga i le lalolagi fou i lenei faiga tuai o mea.”

Vaifofō e Lua e Sili Ona Lelei

O le taimi lava e iloa ai le tonu ina ua maeʻa se iloiloga, e mafai faapefea e se tagata ona maua se vaifofō aogā? O suʻesuʻega totino o le tasi lea o auala aupito sili ona lelei ua maua. Aiseā? Na taʻua e se ovasia femalagaaʻi e faapea: “Auā e faamanatu mai ai ia i tatou le māfuaaga e tatou te faia ai le mea e tatau ona tatou faia.” A ua faamatala mai e le isi: “O le talaʻi ona o le manatu e faapea o se tiutefai, e oo ina avea o se avega mamafa i nisi taimi.” Ae o le faia lelei o suʻesuʻega totino, e fesoasoani lea ia i tatou e maua ai manatu maʻoti e uiga i la tatou vaega a o tatou tulata atu i le iʻuga. E tusa ai ma lea lava manatu, ua faamanatu mai ai pea e le Tusi Paia ia i tatou e uiga i le manaʻomia ona fafagaina lelei i tatou i meaʻai faaleagaga ina ia maua ai le fiafiaga moni i le faia o le finagalo o le Atua.—Salamo 1:1-3; 19:7-10; 119:1, 2.

E mafai ona fesoasoani toeaina i isi ina ia manumalo mai le loto vaivai e ala i le faia o asiasiga faaleoleo mamoe faalaeiʻau ia i latou. I taimi o nei asiasiga, e mafai e toeaina ona faaali atu e faapea, e matuā talisapaia lava i tatou taʻitoʻatasi ma e iai so tatou nofoaga tāua i tagata  o Ieova. (1 Korinito 12:20-26) I le faasino atu i uso Kerisiano, na faapea mai se tasi toeaina: “I le faamamafaina o lo latou tāua, ou te faamanatu atu ai ia i latou e uiga i mea na latou faataunuuina i taimi ua mavae. Ou te faailoa atu ia i latou e faapea, e tāua i latou i le silafaga a Ieova ma na faamaligiina le toto o lona Alo e fai ma sui o i latou. E masani lava ona taliaina lelei lenei manatu. O le avatua o nei fautuaga faatasi ma faamatalaga maumaututū mai le Tusi Paia, ua mafai ai e i latou na loto vaivai ona faataatitia ni sini fou, e pei o le tatalo faatasi o se aiga ma suʻesuʻega ma le faitauina o le Tusi Paia.”—Eperu 6:10.

I le taimi o asiasiga faaleoleo mamoe, e manaʻomia ona faaeteete toeaina ina ia aua neʻi faafoliga atu i le asiasiga e faapea e faigatā tele ona faamalieina le Atua. Na i lo lea, e mafai ona fesoasoani toeaina i uso tapuaʻi loto vaivai e malamalama i le manatu e faapea, e lē mamafa le avega ua tuuina atu i soo o Iesu. I le iʻuga, e avea ai la tatou auaunaga faa-Kerisiano ma puna o le olioli.—Mataio 11:28-30.

Faatoʻilaloina le Loto Vaivai

Po o le ā lava le mea e pogai ai, ae o le loto vaivai o se mala e tatau ona tau faasaga i ai. Ia manatua foʻi, e lē na o i tatou o aafia ai i lenei taua. Afai ua tatou loto vaivai, seʻi o tatou talia le fesoasoani a tatou aumea Kerisiano, ae maise lava le ʻau toeaina. O le faia faapea, e mafai ona tatou faaitiitia ai lagona o le loto vaivai.

E sili i mea uma lava, e manaʻomia ona tatou liliu atu i le Atua mo se fesoasoani e manumalo ai i le loto vaivai. Afai tatou te faalagolago atu ia Ieova faatasi ma le tatalo, e ono mafai ona fesoasoani mai o ia ia i tatou e faatoʻilaloina atoatoa le loto vaivai. (Salamo 55:22; Filipi 4:6, 7) I lea, i le avea ma ona tagata e mafai ona tatou saʻafi faatasi ma le faisalamo o lē na pese e faapea: “Amuia le nuu ua latou lagona le leo fiafia; Ieova e, latou te savavali i le malamalama o ou fofoga. Latou te fiafia lava i lou suafa i aso uma lava; o lau amiotonu foi e maualuluga ai i latou. Auā o oe lo latou matagofie e i ai le malosi; o lou finagalo alofa foi ua faamaualugaina ai lo matou nifo.”—Salamo 89:15-17.

[Faaopoopoga i lalo]

[Ata i le itulau 31]

O asiasiga faaleoleo mamoe a toeaina alolofa e ati aʻe ai e mafai ona fesoasoani i Kerisiano e manumalo ai i le loto vaivai