Ua Faamatalaina le Tusi o Tanielu!

SA MATUĀ naunau le ʻau usufono ina ia maua ni a latou kopi o le tusi fou e 320 itulau na tatalaina, Uaʻi Atu i le Valoaga a Tanielu! O ā ni o latou lagona e faatatau i le tusi? Seʻi manatu i faamatalaga a nisi.

“E pei o le toʻatele o talavou, e ese ma le faigatā ia te aʻu ona fiafia i le suʻesuʻeina o le talafaasolopito anamua. O lea, ina ua maua laʻu kopi o le tusi fou, Uaʻi Atu i le Valoaga a Tanielu! ou te leʻi matuā fiafia tele e faitau i ai, ae sa ou taumafai lava. Se na matuā sesē lava oʻu manatu sa iai! O se tasi o tusi aupito silisili lea ua ou faitau i ai. O se tusi faaoso naunau moni lava! Sa leʻi iai ia te aʻu se lagona faapea o loo oʻu faitauina se tala i se mea na tupu i le faitau afe tausaga ua tuanaʻi. I le taimi muamua lava, na ou lagona ai le mafai ona tuu o aʻu i le tulaga o Tanielu. Na mafai ona ou faaāta moni lava le tulaga e iai pe a aveesea oe mai lou aiga, ma avatu i se atunuu ese, ma tofotofoina soo ai lou faamaoni. Faafetai lava mo lenei tusi.”—Anya.

“O le mea na sili ona fesoasoani mai ia te aʻu o le feʻau lē masesē faapea o loo faatonutonuina atoatoa e Ieova mataupu o loo aafia ai ona tagata. E ala mai i vaaiga ma miti a Tanielu ma isi na ia faamatalaina, ua manino mai ai faapea e faataunuu e lo tatou Atua mea tutupu e tusa ai o mea na ia fuafuaina. Ua faamalosia e lenei mea le faamoemoe o loo ia i tatou e faatatau i āta faavaloaga o loo i le Tusi Paia e faatatau i le lalolagi fou o le a ia faia.”—Chester.

“Ou te fiafia i le auala ua outou toe faamanatu mai ai Tanielu e pei lava o loo ola. Ua oo ai ina ou masani lelei ia te ia talu ai le auala o loo outou faamatilatila mai ai mea sa ia manatu mamafa i ai faapea foʻi ma ona popolega. Ua mafai ona ou malamalama lelei ai i le māfuaaga na avea ai o ia ma sē e matuā manaʻomia e Ieova. A o iai o ia i ona tofotofoga uma ma sauāga, sa ia leʻi popole naʻuā ia te ia lava. O lona popolega sili lava e mo Ieova ma Lona suafa matagofie. Faafetai lava mo le faamatilatila mai o nei manatu.”—Joy.

“O le mea lenei ua leva ona matou faatalitali i ai! E leʻi faaalia muamua mai lava le tele e mafai ona faatatauina tonu mai ai le tusi o Tanielu ia i tatou. Ina ua maeʻa ona ou faitauina se vaega tele o le tusi fou i le afiafi lava lena na ou mauaina ai, sa taofi laʻu faitau ae fai laʻu tatalo faafetai ia Ieova.”—Mareko.

“O le mea ma te leʻi faatalitalia o le aafiaga lea o le a iai i la ma fanau. O le lima ma le ono tausaga lo la matutua. . . . E ui ina avea tala ia Tanielu, Hanania, Mesaelu, ma Asaria ma nisi o tala e pito sili ona la fiafia i ai i le tusi o Laʻu Tusi o Tala o Le Tusi Paia, ae o le auala o loo taulimaina ai i le tusi o le Daniel’s Prophecy ua aafia ai i laʻua i se auala ma te leʻi faatalitalia. E ui lava foʻi ina laiti i laʻua, ae e foliga mai ua pei lava i laʻua o nei tama talavou amiotonu. Maʻeu ni faaaʻoaʻoga lelei mo la ma fanau e faaaʻoaʻo i ai! Maʻeu le ofoofogia o lenei meafaigaluega ua outou aumaia mo i matou! Faafetai, faafetai tele lava!”—Peteli.

“Na ou lagona e pei lava o lea matou te iai faatasi ma tama talavou Eperu a o latou fesagaʻi ma tofotofoga o lo latou faatuatua; ma na faalaeiʻauina ai aʻu ina ia iloiloina loʻu lava faatuatua. Ua faamatala e le pusa o le autaluga ua faamatuaina “What Did You Discern?” (“O le ā sa E Iloaina?”) le mea o loo taʻua e le mataupu i le loto. Faafetai lava mo lenei foʻi galuega lelei.”—Litia.