Tino Laiti, ae Lototetele

O LE A faapēfea ona e talanoa atu i ni tagata e te lē masani ai e uiga i le Malo o le Atua pe a faapea o lou umī e na o le 30 inisi [76 senitimita]? E mafai ona faamatala atu e Laura ia te oe. Ua 33 ona tausaga, ma o lona umī lena, na o le 30 inisi [76 senitimita]. E nonofo i laʻua ma lona uso o Maria, o lē e 24 ona tausaga ae 34 inisi [86 senitimita] lona umī i Quito, i Ekutoa. Seʻi tuu atu ia i laʻua e faamatala mai toʻatugā o laʻua faafesagaʻia i le la faiva faa-Kerisiano.

“Ina ia oo atu i le ma oganuu e talaʻi ai ma sauniga faa-Kerisiano, ma te savavali ai pe ā ma le tasi vae tolu o le maila [ʻafa kilomita] i le mea e puʻe ai le pasi. Mai le mea e tuu ai maʻua e le pasi, ma te toe savavali ai i le isi tasi vae tolu o le maila [ʻafa kilomita] e puʻe le isi pasi. O le mea e leaga ai, ona e lima ni taʻifau feʻai lava e nonofo ai i lenei auala. E ese lo ma fefefe i taʻifau ona e mafai ona foliga mai lo latou lapopoa ia i maʻua e pei ni solofanua. Ina ia tutuli ese nei taʻifau pe a manaʻomia, ma te ō ma ave se laau lea e fai ma nanā i tafatafa ane o le auala a o leʻi sau le pasi ina ia mafai ona ma toe ō ma ave pe a ma toe foʻi i le fale.

“O se isi laasaga e faigatā moni lava mo maʻua o le taimi lea ma te feosofi ai i luga o le pasi. E ma te tutū i luga o se faaputuga palapala i le mea e faatali ai le pasi ina ia faigofie ai ona ma feosofi. O nisi avepasi e faatū tonu lava i le mea o loo iai le faaputuga palapala ae o isi e leai. Ona o lena tulaga, e fesoasoani ai lē o loo umī o i maʻua i lē e puupuu e faaoso i luga o le pasi. O le puʻeina o le pasi lona lua ma te manaʻomia ai lava se taumafaiga moni ina ia sopoʻia se auala pisi ona e pupuu o ma vae. Ona o lo ma tino laiti, e faaopoopo mai ai foʻi se isi luʻi o le mamafa o ato talaʻi. Ina ia faamāmā la le ato, e ma te faaaogāina ai se Tusi Paia laitiiti ma e faatapulaa foʻi le aofaʻi o tusi ma te aveina.

“E ese lo ma matamumuli talu mai lava lo ma laiti. E iloa e o matou tuāʻoi lo ma matafefefe e talanoa atu i ni tagata ese. O lea na faateʻia ai i latou ma māofa i le vaʻai mai ia i maʻua o tuʻituʻi atu i o latou faitotoʻa, ma e masani lava ona latou faalogo mai ia i maʻua. Peitaʻi i nofoaga e lē iloaina lelei i maʻua, e tele ina vaʻai mai ai tagata ia i maʻua ua na o ni saa; ma e lē masani ona latou uaʻi moni mai i la ma feʻau e pei ona tatau ai. Ae ui i lea, o le lagonaina o le alofa o Ieova e aumaia ai le lototele e faaauau pea i le galuega faaevagelia. O le mafaufau loloto foʻi i le Faataoto 3:5, 6 e aumaia ai ia i maʻua le lototele.”

E pei ona sa faaalia e Laura ma Maria, o le finafinau e ui i faafitauli o le tino e mafai ona faamamaluina ai le Atua. Na tatalo le aposetolo o Paulo ina ia aveese mai ia te ia “le mea matuitui i le tino,” atonu o se maʻi o le tino. Peitaʻi na fetalai atu le Atua ia te ia: “O loʻu nei alofa tunoa e lava lea  e fesoasoani ia te oe; auā o le vaivai e faaatoaina ai loʻu mana.” Ioe, e lē tau manaʻomia ona aveesea ni tulaga lē atoatoa o o tatou tino ina ia mafai ai ona auauna i le Atua. O le faalagolago atoatoa atu i le Atua e mafai ona fesoasoani ia i tatou ina ia faia ai mea e silisili tatou te mafai e tusa ai ma o tatou tulaga. Talu ai o le auala lea na manatu ai Paulo i “mea matuitui i le tino” na ia faapea ai: “Pe a ou vaivai, ona ou malosi ai lea.” (2 Korinito 12:7, 9, 10) I ni tausaga mulimuli ane ai na tusi ai e faapea Paulo: “Ou te mafaia mea uma lava ona o ia ua faamalosi mai ia te au.”—Filipi 4:13, LF.

I ona po nei, ua faataunuuina ai e le Atua lana galuega tele e ala i tane, fafine, ma tamaiti o ē ua tuutōina atu atoatoa ia te ia. O le toʻatele o i latou e lē atoatoa le mālosi i nisi itu. E ui e faamoemoe atu i latou uma i le faamālōlōga tauatua i lalo o le Malo o le Atua, ae e lē o faatali i latou seʻia aveesea e le Atua o latou faafitauli a o leʻi taumafai e faia se vaega i lana auaunaga.

Po o e aafia i nisi o maʻi o le tino? Ia lototele! E ala i lou faatuatua e mafai ai ona e aofia ai ia i latou e pei o Paulo, Laura ma Maria. E mafai ona faapea atu o i latou na, e pei lava o le tulaga sa iai tane ma fafine faatuatua i taimi anamua: “Na faamalosia ai i latou sa vaivai.”—Eperu 11:34.

[Ata i le itulau 8]

Maria

Laura

[Ata i le itulau 9]

O loo fesoasoani atu Maria ia Laura e faaoso i luga o le pasi

[Ata i le itulau 9]

“E ese lo ma fefefe i taʻifau ona e mafai ona foliga mai lo latou lapopoa ia i maʻua e pei ni solofanua”

I le pito i lalo: O Laura ma Maria ma ē sa latou suʻesuʻeina ma i laʻua le Tusi Paia