O i Tatou o Ni Ē Faatuatua

Folafolaina o le Tala Lelei i Togāaraisa o Taiwan

E MASANI lava ona iai timuga tetele i Taiwan lea ua mafai ai ona maua ni seleselega lelei o araisa e faalua i tausaga taʻitasi. Peitaʻi, i nisi taimi sa tatau ona timu ai ae ua leai se timu, ma e mamate ai ia faamiliga. Pe faavaivai ai ea le faifaatoʻaga pe a tupu lenei mea? E leai. Ua ia iloa e manaʻomia le finafinau. E na te toe faia foʻi nisi faamiliga fou ma toe totō ai i le fanua. Ma afai la e faaleleia ia tulaga, o le a maua ai e le faifaatoʻaga se seleselega lelei. I nisi taimi, e tai faapena lelei lava le totōina ma le seleseleina faaleagaga.

Finafinau i le Seleselega Faaleagaga

I le faagasologa o tausaga, sa galulue malolosi ai Molimau a Ieova i Taiwan i le totōina o fatu ma le seleseleina o fua o upu moni faale-Tusi Paia i nisi o vaipanoa sa foliga mai e lē fua mai. O se tasi o faaaʻoaʻoga o le Itumalo o Miao-li. Sa itiiti lava se tali mai i ni taumafaiga patino sa faia i nisi taimi e molimau atu i lena vaipanoa. O lea, i le 1973, na tofia ai se ulugalii paeonia faapito e galulue ai iinā e avea o ni ē folafola faataimi atoa le Malo. I le taimi muamua, sa faaalia ai e nisi le fiafia i le tala lelei. Ae peitaʻi, sa leʻi pine lava ae toe mou atu lena fiafia. Ona toe tofia lea o nei paeonia faapito i se isi vaipanoa.

I le 1991, na tofia atu ai isi paeonia faapito e toʻalua iinā. Ae na toe faaalia foʻi i taualumaga e faapea, e leʻi oo i le tau lelei mo le tuputupu aʻe faaleagaga. Ina ua mavae ni nai tausaga, ona toe tofia lea o ia paeonia faapito e toʻalua i isi oganuu faatasi ma le faamoemoe o le a sili atu ona fua lelei mai. O lea, sa taatia ai le laueleele mo se taimi umi e leʻi faatoʻaina.

Le Toe Faafouina o Taumafaiga na Taulau ai le Seleselega

Ia Setema 1998 na filifili ai e faia se taumafaiga e saʻilia ia vaipanoa e sili ona fuatele mai i le oganuu telē e leʻi tofia i ni faapotopotoga i Taiwan. Na faapefea ona faataunuuina lenei mea? E ala i le tofia o ni paeonia faapito lē tumau se toʻa 40 e galulue i oganuu e matuā toʻatele tagata e nonofo ai ia e leʻi tofia muamua.

Sa aofia ai ni aai soofaatasi se lua i le Itumalo o Miao-li i oganuu na filifilia mo le tauiviga. E toʻafā ni tuafāfine nofofua na galulue ai iinā mo le tolu masina e faataʻitaʻi ai le oganuu. E leʻi pine lava talu ona latou taunuu atu, na latou tusia ai ma le mitamita ni lipoti e uiga i le aofaʻi o tagata fiafia na latou maua. E oo ane i le taimi ua uma lo latou tolu masina o le auaunaga paeonia i lea vaipanoa, sa latou faia le tele o suʻesuʻega faale-Tusi Paia i aiga. Sa latou faavaeina foʻi se suʻesuʻega tautusi a vaega faatasi ai ma le fesoasoani a se tasi o toeaina mai se faapotopotoga e latalata ane.

Sa faamanino mai e le toʻatolu o nei tuafāfine lo latou mananaʻo e faaauau pea ona latou tausia lenei “faamiliga” fou ia ua matuā tutupu lelei. O le iʻuga, o le toʻalua o i latou na tofia ina ia avea ma paeonia faapito tumau, ma o lona tolu sa faaauau pea ona auauna ai iinā i le avea o se paeonia sauatoa. Sa siitia atu i lena vaipanoa se toeaina mai se faapotopotoga e tau lalata ane ina ia fesoasoani ia te i latou. E sili atu i le 60 ē na auai i le uluaʻi lauga lautele na faia i lena vaipanoa. I le taimi nei, o loo fesoasoani atu ai le faapotopotoga o loo tau lalata ane i lenei vaega fou e faia e lē aunoa a latou sauniga i Aso Sa e faaopoopo i nisi o suʻesuʻega tautusi. Atonu e lē o toe umi lava ae faavaeina se faapotopotoga fou i lea vaipanoa.

 O le Finafinau ua Aumaia ai Faamanuiaga i Isi Vaega o Taiwan

E tai faapena foʻi le auala e tali mai ai isi vaipanoa. I le Itumalo o I-lan i le vaega i mātū i sasaʻe o le motu, na faavaeina ai se Suʻesuʻega Tautusi fou a le Faapotopotoga i le vaipanoa lea na galulue ai ia paeonia faapito lē tumau.

Ao faia ni asiasiga mai lea fale i lea fale i se tasi afiafipo, na feiloaʻi ai se paeonia faapito lē tumau ma se tama talavou ma faasino ia te ia se tamaʻi pepa o loo lisiina ai taimi o sauniga a le faapotopotoga. Sa ia talosaga atu loa: “E mafai ona ou auai i sauniga i le po taeao? Afai e mafai, o le ā se ofu e tatau ona ou ofuina?” Sa faia e lenei paeonia i vaiaso taʻitasi ni suʻesuʻega faale-Tusi Paia se valu ma tagata fiafia. Sa leʻi pine lava ae faia e nisi o tagata suʻesuʻe ni fuafuaga e avea ai i latou lava ma tagata talaʻi o le tala lelei, faatasi ma le sini ina ia papatisoina i latou.

O se tasi tamaʻitaʻi i lenei lava aai, sa tele tausaga o alu i le lotu ae lē mafai ona maua se tasi e aʻoaʻoina o ia i le Tusi Paia. Ina ua faalogo o ia e uiga i le fuafuaga o le faia o suʻesuʻega faale-Tusi Paia, sa ia puʻea loa le avanoa. Sa faalaeiauina o ia ina ia muaʻi sauniuni ana lesona. Ina ua taunuu atu le paeonia faapito lē tumau e faia le suʻesuʻega, sa ia iloa ai sa faia e le tamaʻitaʻi lana “galuega na tuu atu e fai” i le faatauina mai o se tamaʻi api lea sa ia tusia ai ia fesili i le mataupu o le a ia suʻesuʻeina. Sa ia tusia foʻi ana tali mo fesili taʻitasi. Sa ia kopiina foʻi i lana api ia mau uma na faasino mai i lana lesona. E oo ane i le taimi na taunuu atu ai le tuafafine e faia le uluaʻi suʻesuʻega, ae ua uma ona sauniunia e le fafine ia uluaʻi lesona e tolu!

Na iai foʻi ni iʻuga faapena i le aai o Dongshih i le ogatotonu o Taiwan. Na tufaina atu ai e paeonia faapito lē tumau le sili atu i le 2,000 polosiua i le tolu masina na la galulue ai iinā. E oo ane i le masina lona tolu, sa la faia ai ni suʻesuʻega faale-Tusi Paia se 16 i aiga. Na matuā faatamaʻia le aai i se mafuiʻe na taia ai le ogatotonu o Taiwan ia Setema 21, 1999, ae ua faaauau pea e nisi tagata lotofiafia ona agaʻigaʻi i luma faaleagaga, e ui lava e faimalaga i latou pe ā ma le itula ina ia auai i sauniga i le Maota o le Malo pito latalata ane. Ioe, e manaʻomia le finafinau ina ia seleseleina mai ni fua lelei i le itu faaletino po o le itu faaleagaga.

[Faafanua i le itulau 8]

(Tagaʻi i le lomiga mo le ata atoa)

SAINA

Taiwan Strait

TAIWAN

[Faamatalaga i Ata]

Mountain High Maps® Copyright © 1997 Digital Wisdom, Inc.