Fesili Mai le ʻAufaitau

I le Isaia mataupu e 53 o loo iai se valoaga taʻutaʻua e uiga i le Mesia. O loo faapea mai le Isa 53 fuaiupu e 10: “Ua finagalo Ieova e tuʻimomomo ia te ia, ua ia faatigaina o ia.” O le ā e uiga i ai lenei mea?

E faigofie lava ona iloa le māfuaaga e ono lāgā ai se fesili e faatatau i le Isaia 53:10. E lē manatu Kerisiano moni faapea o lo tatou Atua alofa mutimutivale ma alofa fua o le a ia finagalo ina ia tuʻimomomoina pe faatigāina se tasi. Ua aumai e le Tusi Paia ia i tatou le faavae e mautinoa ai, e lē fiafia le finagalo o le Atua i le faataugāina o se tasi e lē sala. (Teuteronome 32:4; Ieremia 7:30, 31) I le gasologa o senituri, atonu sa iai ni taimi na faataga ai e Ieova le oo mai o mafatiaga ona o ni māfuaaga e ōgatusa ma lona atamai ma lona alofa. Peitaʻi e mautinoa lava na te leʻi faapogaia lona Alo pele, o Iesu, ina ia puapuagatia. O lea la, o le ā tonu lava le mea o loo fai mai ai lenei fuaitau?

E mafai ona tatou maua se fesoasoani e malamalama ai i le aano tonu o le manatu pe a tatou talanoaina le fuaiupu atoa, ma mātau vaega e lua na o loo faaaogā ai le upu “finagalo.” E faitauina faapea le Isaia 53:10: “Ua finagalo Ieova e tuʻimomomo ia te ia, ua ia faatigaina o ia; pe afai na te faia se taulaga mo agasala, ona iloa lea e ia o lana fanau, e faalevalevaina ona aso, o le finagalo foi o Ieova e manuia lea ia te ia.”

O le feʻau atoa a le Tusi Paia ua faaalia ai faapea ‘o le finagalo o Ieova,’ lea e taʻua i le iʻuga o le fuaiupu, e faaautū atu i le faataunuuina o lana fuafuaga e ala i le Malo. O le faia e Ieova o lenei mea o le a faaeaina ai lana pule silisili ese ma mafai ai ona aveesea le agasala tuufaasolo—a tatou agasala mai tagata usiusitai. (1 Nofoaiga a Tupu 29:11; Salamo 83:18; Galuega 4:24; Eperu 2:14, 15; 1 Ioane 3:8) O le ki i nei gaoioiga uma o le tatau lea ona aumaia le Alo o le Atua e avea o se tagata ma saunia ai le taulaga togiola. E pei ona tatou iloa, i le faagasologa o nei mea sa puapuagatia ai Iesu. Ua taʻu mai e le Tusi Paia ia i tatou e faapea “o mea sa tiga ai o ia na aʻoaʻoina ai o ia ia usiusitai.” O lona uiga la sa maua e Iesu ni aogā mai lena puapuagatia.—Eperu 5:7-9.

Sa muaʻi silafia e Iesu o le ala mamalu lea o le a ia uia, o le a aofia ai ni tigā. Ua manino mai lenei manatu i ana upu o loo faamauina i le Ioane 12:23, 24, lea tatou te faitau ai e faapea: “Ua oo mai ona po e oo ai le Atalii o le tagata i lona mamalu. E moni, e moni, ou te fai atu ia te outou, Afai e le paū le fua o le saito i le eleele ma pala ai, e tumau pea o le mea e tasi; a e afai e pala, ona fua tele mai ai lea.” Ioe, sa silafia e Iesu e tatau ona ia tausisia lona faamaoni seʻia oo lava i le puapuagatia i le oti. Ua faaauau mai le tala: “‘O loo ātu nei loʻu loto, pe se a foi se mea ou te fai atu? Loʻu Tamā e, faaola mai ia te au ai lenei itu aso. A o le mea lava lea na ou oo mai ai i lenei itu aso. Loʻu Tamā e, ia e tuuina atu le mamalu i lou suafa.’ Ona oo mai ai lea o le siufofoga mai le lagi, ‘Ua ou tuuina atu le mamalu, ou te toe tuuina atu foi i ai le mamalu.’” —Ioane 12:27, 28; Mataio 26:38, 39.

O le manatu lea o lenei mataupu atoa ua mafai ai ona tatou malamalama i le Isaia 53:10. Na silafia lelei e Ieova o mea o le a tutupu i lona Alo o le a aofia ai le tuʻimomomoina, i sona uiga. Peitaʻi, i lona silafiaina o le iʻuga faamamaluina ma aogā e tele o le a iʻu i ai, sa finagalo ai Ieova i le mea o le a oo ia Iesu. O le faauigaga la lena o le ‘finagalo o Ieova e tuʻimomomoina’ le Mesia. E oo foʻi ia Iesu sa finagalo o ia i le mea na ia mafai ona fai ma faataunuuina. E moni lava la, e pei ona faaiʻu mai le Isaia 53:10, ‘o le finagalo o Ieova na manuia ai o ia.’