Ia Faaalia se Uiga Faatalitali!
Ia Faaalia se Uiga Faatalitali!
“Ou te faamoemoe [faatalitali] i le Atua o loʻu olataga; e faafofoga mai loʻu Atua ia te au.”—MIKA 7:7.
1, 2. (a) Na faapefea i se uiga sesē ona āfaina ai le fanauga a Isaraelu a o iai i le vaomatua? (e) O le ā e mafai ona tupu i se Kerisiano na te lē atiina aʻe se uiga talafeagai?
E TELE mea i le olaga e mafai ona vaai i ai a lē i se tulaga mautinoa, pe i se tulaga lē mautinoa, e fuafua lava i o tatou uiga faaalia. A o iai le fanauga a Isaraelu i le vaomatua, na saunia faavavega ai le manai mo i latou. Sa tatau ona latou vaavaai solo i le laueleele lafulafuā ma matuā lotofaafetai ai ia Ieova ona o le saunia o mea e tausi ai i latou. O lena mea o le a atagia ai se uiga mautinoa. Ae na i lo lena, sa latou manatua le lasi o taumafa eseese i Aikupito ma faitio ai faapea e leai se tofo lelei i le manai. Pagā se uiga lē mautinoa!—Numera 11:4-6.
2 E faapena foʻi ona mafai e uiga o se Kerisiano i aso nei ona faapogaia ai mea ina ia foliga mai, pe lelei pe leaga. Pe a aunoa se Kerisiano ma se uiga talafeagai, e faigofie lava ona mou atu lona olioli, ma e mataʻutia lena tulaga talu ai, e pei ona faapea mai Neemia: “O le fiafia ia Ieova o lo [tatou] malosi lea.” (Neemia 8:10) O se uiga mautinoa ma le olioli e fesoasoani ina ia tatou malolosi ai pea ma faatupulaʻia ai le filemu ma le autasi i le faapotopotoga.—Roma 15:13; Filipi 1:25.
3. Na faapefea i se uiga talafeagai ona fesoasoani ia Ieremia i taimi faigatā?
3 E ui lava ina ola i taimi faigatā, ae sa faaalia pea e Ieremia se uiga mautinoa. E oo lava i le taimi na ia molimauina ai le mataʻutia o le faatoʻilaloina o Ierusalema i le 607 T.L.M., sa mafai ona ia vaaia le vala mautinoa o mea. Sa leʻi faagaloina e Ieova Isaraelu, ma na faasaoina ai le nuu. Na tusi mai Ieremia i le tusi o Auega e faapea: “O le alofa o Ieova ua le faaumatia ai i tatou, ona ua le mavae o lona alofa mutimutivale; e fou mai ia i taeao uma; e tele lou faamaoni.” (Auega 3:22, 23) I le gasologa o le talafaasolopito, ua taumafai ai auauna a le Atua a o fesagaʻi ma tulaga sili ona faigatā, e tausisia o latou uiga mautinoa, ma le olioli.—2 Korinito 7:4; 1 Tesalonia 1:6; Iakopo 1:2.
4. O le ā le uiga sa tausisia e Iesu, ma na faapefea ona fesoasoani lena uiga ia te ia?
4 E onoselau tausaga talu ona mavae atu Ieremia, sa maua ai e Iesu se fesoasoani e tumau ai, ona o ona uiga mautinoa. Tatou te faitau e faapea: “O [Iesu] na onosai i le satauro, na faatauvaa ia te ia le mā, ona o le olioli sa tuu i ona luma, ua nofo foi o ia i le itu taumatau o le nofoālii o le Atua.” (Eperu 12:2) Po o ā lava teteega po o sauāga sa tatau ona fesagaʻia e Iesu—e oo lava i le tigā matuitui o le laau faaoosala—ae sa taulaʻi pea lona mafaufau i “le olioli sa tuu i ona luma.” O lena olioli o le faaeaga lea e faaeaina ai le pule silisili ese a Ieova ma faapaiaina lona suafa faapea le faamoemoe o le aumaia o faamanuiaga sili i tagata usiusitai i le lumanaʻi.
Ia Iai se Uiga Faatalitali
5. O le ā se tulaga e masani ona tupu, lea o le a fesoasoani ai le ia i tatou o se uiga faatalitali ina ia tausia se vaaiga talafeagai i mataupu?
5 Pe afai tatou te ati aʻe se uiga faalemafaufau e pei o lea sa ia Iesu, o le a lē mou ese atu ai mai ia i tatou le olioli o Ieova e tusa lava pe lē o taimi uma e tutupu ai mea i le auala ma le taimi tatou te faatalitalia e tutupu ai. Na faapea mai le perofeta o Mika: “O aʻu, ou te faatalitali ia Ieova, ou te faamoemoe [faatalitali] i le Atua o loʻu olataga.” (Mika 7:7; Auega 3:21) E mafai foʻi e i tatou ona faaalia se uiga faatalitali. E faapefea? E tele auala e fai ai. O se faataʻitaʻiga, atonu tatou te manatu e iai se uso o i se tofiga tau pule ua ia faia se gaoioiga sesē ma ua manaʻomia ai se faasaʻoga vave. O le iai o se uiga o le faatalitali o le a tatou manatu ifo ai faapea, ‘Pe na sesē moni lava lana mea na fai, pe lē o aʻu lea e sesē loʻu manatu? Pe afai na sesē o ia, faamata ea o lea o loo faataga e Ieova mea e tutupu talu ai na te silafia o le a toe faaleleia e le tagata lona tulaga ma o le a lē talafeagai ai ona vavevave e faia ni faasaʻoga mamafa?’
6. O le a faapefea ona fesoasoani se uiga faatalitali i se tasi o loo tauivi ma sona faafitauli totino?
6 Atonu e manaʻomia se uiga faatalitali pe afai tatou te atuatuvale i se faafitauli totino pe o loo tauivi ma se vaivaiga. Seʻi faapea o loo tatou ole atu ia Ieova mo se fesoasoani, ae o loo iai pea le faafitauli. O le ā loa se mea e fai? E ao pea ona faaauau lo tatou faia po o le ā lava se mea e mafai e lo tatou malosi ona fai e foʻia ai le faafitauli, ona faatuatua lea i fetalaiga a Iesu: “Ia outou ole atu, ona foaiina mai ai lea ia te outou; ia outou saili, ona outou maua ai lea; ia outou tuʻituʻi atu, ona toina mai ai lea ia te outou.” (Luka 11:9) Ia tatalo pea, ma faatalitali ia Ieova. I se taimi talafeagai ma i lana lava auala, o le a tali mai ai Ieova i au tatalo.—1 Tesalonia 5:17.
7. I le ā le auala o le a fesoasoani ai se uiga faatalitali i le auala tatou te vaai ai i se malamalamaga o le Tusi Paia o loo faasolosolo ona faamanino atili?
7 A o faagasolo faataunuuga o valoaga a le Tusi Paia, ua faapena foʻi ona faamanino atili ai lo tatou malamalamaga i mau o le Tusi Paia. Peitaʻi, e iai taimi, tatou te ono manatu ai ua tuai ona aumai se faamalamalamaga o se mataupu. Pe afai e lē tupu lena mea i le taimi tonu na tatou mananaʻo e tupu ai, po o tatou lotomalilie ea e faatalitali? Ia manatua, sa silafia e Ieova e talafeagai ona faasolosolo mālie le faaalia mai o “le mea lilo e uiga ia Keriso” mai lea taimi i lea taimi, mo le umi e tusa ma le 4,000 tausaga. (Efeso 3:3-6, LF) Pe iai la se māfuaaga o le a lē lava ai fua lo tatou onosai? Pe tatou te masalomia ea le tofia o le “auauna faamaoni ma le mafaufau” e avatu i tagata o Ieova “a latou mea e ʻai i ona itu aso”? (Mataio 24:45) Aiseā tatou te taofia ai i tatou mai le mauaina o le olioli faale-Atua ona e lē o atoatoa ona faamalamalama mai mea uma? Manatua, o Ieova na te filifilia po o afea ma e faapefea ona faailoa mai ana “mataupu faalilolilo.”—Amosa 3:7, NW.
8. Ua faapefea ona aogā le onosai o Ieova i le toʻatele o tagata?
8 E ono lotovaivai nisi talu ai e iai lo latou lagona faapea, ua autausagā o latou auauna ma le faamaoni, ma atonu o le a latou lē soifua pea e vaai atu i “le aso tele ma le silisili o Ieova.” (Ioelu 2:30, 31) Peitaʻi, e mafai pea ona faalaeiauina i latou pe a tagaʻi atu i le vala mautinoa. Na fautua mai Peteru: “Ia outou manatu o le onosai o lo tatou Alii o le faaolataga lea.” (2 Peteru 3:15) Ua avea le onosai o Ieova ma avanoa e aʻoaʻoina ai e le faitau miliona o tagata lotofaamaoni le upu moni. Po ua lē ofoofogia ea lena mea? E lē gata i lea, o le umi lava ona faaalia e Ieova o lona onosai, o le tele foʻi lena o le taimi ‘tatou te galueaiina ai pea lo tatou faaolataga i le mataʻu ma le gatete.’—Filipi 2:12, LF; 2 Peteru 3:11, 12.
9. Pe afai e gata mai mea e mafai ona tatou faia i le auaunaga a Ieova, o le a faapefea la i se uiga faatalitali ona fesoasoani ia i tatou e onosaia ai lea tulaga?
9 O se uiga faatalitali e fesoasoani mai ina ia tatou lē lotovaivai ai pe a avea teteega, o maʻi, le soifuaga matua, po o isi faafitauli e taofia ai i tatou i le auaunaga o le Malo. E faatalitalia e Ieova i tatou ina ia auauna atu ia te ia ma le lotoatoa. (Roma 12:1) Ae peitaʻi, o le Alo o le Atua, e “alofa atu ia i le ua vaivai ma le ua mativa,” e na te lē tāpā maia ni mea e sili atu na i lo mea e mafai ona tatou ofoina atu ma le talafeagai; e lē faia foʻi faapena e Ieova. (Salamo 72:13) O lea, ua faalaeiauina ai i tatou ina ia faia le mea tatou te mafai, ma faatalitali ma le onosai seʻia oo ina suia tulaga o mea—a lē i lenei faiga o mea pe i le faiga o mea o loo sau. Manatua: “E le amioletonu le Atua, na te le faagalogaloina la outou galuega ma le alofa ua outou faaali mai ai i lona suafa, auā na outou auauna i le au paia, i le o loo outou auauna i ai.”—Eperu 6:10, LF.
10. O le ā se uiga lē faale-Atua e mafai ona ʻalofia e se tasi o loo ia te ia le uiga faatalitali? Faamatala mai.
10 O se uiga faatalitali e fesoasoani foʻi ia i tatou e ʻalofia ai le uiga fiasili. O nisi o ē ua avea ma aposetate sa lē naunau e faatalitali. Atonu sa ia i latou se lagona faapea e manaʻomia ni fetuutuunaʻiga, a lē i le malamalamaga faale-Tusi Paia, pe i ni mataupu tau i le faalapotopotoga. Peitaʻi, o le mea na lē taulau ona latou amanaʻia e faapea, o le agaga o Ieova lea e uunaʻia ai le auauna faamaoni ma le mafaufau ina ia faia fetuutuunaʻiga i Lana taimi atofaina, ae lē i le taimi tatou te ono lagona ai se manaʻoga e faia faapea. Ma o so o se fetuutuunaʻiga lava e ao ona ōgatusa ma le finagalo o Ieova, ae lē i ni o tatou manatu totino. E faaaogā e aposetate se uiga fiasili e mimilo sesē ai o latou mafaufauga ma latou faatausuai ai. Peitaʻi pe ana fai e ia i latou le uiga faalemafaufau o Keriso, e semanū e mafai lava ona latou faatumauina lo latou olioli ma tumau ai faatasi ma tagata o Ieova.—Filipi 2:5-8.
11. E mafai faapefea ona tatou faaaogā lelei le taimi o loo faatalitali ai, i le faataʻitaʻi atu i faaaʻoaʻoga a ai?
11 O le mea moni, o le tausisia o se uiga faatalitali e lē faapea ai ua paiē pe lē toe galulue. O loo iai mea tatou te faia. Mo se faataʻitaʻiga, e manaʻomia ona faatumu o tatou taimi i a tatou suʻesuʻega totino o le Tusi Paia ma faaalia ai le naunautaʻi i mea faaleagaga lea foʻi sa faaalia e perofeta faatuatua e oo lava i agelu. I le taʻua o lena naunautaʻiga, ua faapea mai ai Peteru: “O le faaolataga lea na tausailiili i ai ma tausuesue i ai o perofeta . . . o mea ia e naunau i ai le au agelu i le fia matamata i ai.” (1 Peteru 1:10-12, LF) E lē gata o suʻesuʻega totino o se mea e tatau lava ona fai, ae faapena foʻi i le auai e lē aunoa i sauniga ma le tatalo. (Iakopo 4:8) O i latou e faaalia le mataala i o latou manaʻoga faaleagaga e ala i le fafaga e lē aunoa o i latou i meaʻai faaleagaga ma le auaumea faatasi ma o latou uso Kerisiano e faaalia ai ua ia i latou le uiga faalemafaufau o Keriso.—Mataio 5:3.
Ia Iai se Vaaiga Talafeagai
12. (a) O le ā le tutoʻatasi na saʻilia e Atamu ma Eva? (e) O le ā ua avea ma iʻuga o le mulimuli atu o tagata i le ala na uia e Atamu ma Eva?
12 Ina ua foafoaina e le Atua le uluaʻi ulugalii faaletagata, sa ia te ia pea le aiā na te faatulaga atu ai tapulaa o le mea e saʻo ma le mea e sesē. (Kenese 2:16, 17) Sa mananaʻo Atamu ma Eva e tutoʻatasi ese mai le taʻitaʻiga a le Atua, lea la ua iʻu ai i le ituaiga o lalolagi lea ua tatou vaaia i aso nei. Na faapea mai le aposetolo o Paulo: “Faapei ona oo mai o le agasala i le lalolagi i le tagata e toatasi, o le oti foi ona o le agasala, ona oo mai ai lea o le oti i tagata uma lava, auā ua agasala uma lava.” (Roma 5:12) E ono afe tausaga o le talafaasolopito o le tagata talu mai taimi o Atamu, ua faataʻitaʻia mai ai le moni o upu nei a Ieremia: “Ieova e, ua ou iloa e le o i le tagata lona ala, e le o i le tagata e savali ona faatonuina le mea e ui ai o ia.” (Ieremia 10:23) E lē faapea o se mafaufau leaga le ioeina o le moni o upu a Ieremia. O se mea ua talafeagai. Lea la ua manino nei le māfuaaga sa faapea ai na senituri uumi lava, pe a ‘pule le tasi tagata i le tasi, e leaga ai o ia lava,’ talu ai ua faia e tagata a latou pulega e tutoʻatasi ese ai mai le Atua.—Failauga 8:9.
13. O le ā le vaaiga talafeagai a Molimau a Ieova e tusa ai o mea e mafai ona faataulauina e tagata?
13 Pe a vaai atu i le tulaga o le fanau a tagata, ua iloatino ai e Molimau a Ieova e iai tapulaa o mea e mafai ona ausia i le faiga o mea o iai nei. O se uiga mautinoa e mafai ona faaumiumi ai pea lo tatou olioli, peitaʻi e lē o le vaifofō lea i mea uma. I le amatamataga o vaitausaga mai le 1950, na lolomi ai e se taʻitaʻi lotu Amerika se tusi na sili ona taulia lona faatauina atu, sa taʻua, The Power of Positive Thinking. Na taʻua i le tusi faapea, o le tele o toʻatugā e mafai ona foʻia pe afai e taulimaina i se uiga mautinoa. E mautinoa lava le manaia o le iai o ni mafaufauga mautinoa. Peitaʻi o mea ua tutupu, e faaalia ai o le poto, le tomai, o mea faaletino e maua ai, ma le tele o isi vala ua faatapulaa mai ai mea e mafai e i tatou taʻitoʻatasi ona faataulauina. Ma i le tulaga o le lalolagi aoao, ua fai lava sina matuiā o faafitauli ua tau lē mafai e tagata ona foʻia ma le manuia—e ui lava i ni o latou mafaufauga mautinoa o iai!
14. Pe iai ea i Molimau a Ieova ni uiga lē lelei? Ia faamatala.
14 Ona o la latou vaaiga talafeagai i na mataupu, ua tuuaʻia ai Molimau a Ieova i nisi taimi faapea e lē lelei o latou uiga. E ui i lea, o loo naunau i latou e taʻu atu i tagata Lē ua na o ia e mafai ona faaleleia e faavavau faafitauli o tagata. O iinei foʻi ua latou faataʻitaʻia ai le uiga faalemafaufau o Keriso. (Roma 15:2) Ma o loo latou galulue mamafa e fesoasoani atu i tagata ia latou maua se faiā lelei ma le Atua. Ua latou iloa, o la latou galuega lenei o le a mulimuli ane faataulauina ai mea e sili ona lelei.—Mataio 28:19, 20; 1 Timoteo 4:16.
15. E faapefea i le galuega a Molimau a Ieova ona faaleleia ai tagata taʻitoʻatasi?
15 E lē faatalalē Molimau a Ieova i faafitauli faaleolaga nei—aemaise lava amioga leaga e lē faale-Tusi Paia—o loo faia i lo latou lotolotoi. A o leʻi avea se tagata fiafia ma se tasi o Molimau a Ieova, e na te faia suiga, e masani lava ona taumafai e manumalo mai amioga leaga ua ola ai lea e lē fiafia ai le finagalo o le Atua. (1 Korinito 6:9-11) O lea ua fesoasoani atu ai Molimau a Ieova i tagata lototalisapaia ina ia latou foʻia le onā, le ola faalagolago i fualaau faasāina, o amioga lē mamā, ma le naunau atu i pelēga tupe. O na tagata ua toe faafouina olaga ua latou iloa nei ona saunia mea mo o latou aiga i se auala talafeagai ma le faamaoni. (1 Timoteo 5:8) Pe afai e fesoasoani atu i tagata taʻitoʻatasi ma aiga i lenei auala, o le a faaitiitia ai faafitauli i totonu o le nuu po o se atunuu—o le a faaitiitia i latou ua ola i fualaau faasāina, e faaitiitia faiga sauā i aiga, ma isi mea faapena. I lo latou avea o ni tagatanuu e usiusitai i tulafono ma i le fesoasoani atu i isi e suia o latou olaga mo se lelei, ua faamāmā ai e Molimau a Ieova le avega mamafa a i latou o i tofiga tau pule, o ē o loo taumafai e foʻia faafitauli faaleolaga nei.
16. Aiseā e lē aafia ai Molimau a Ieova i gaoioiga a tagata mo ni suiga o mea?
16 O lea la, po ua suia ea e Molimau a Ieova le tulaga o amioga tatau i le lalolagi? I le sefulu tausaga ua tuanaʻi atu, na faateleina ai le aofaʻiga o Molimau maelega mai le itiiti teisi ifo lava i le 3,800,000 sa iai ae oso aʻe i le toetoe 6,000,000. O se faatelega lena o le pe tusa ma le 2,200,000 tagata, o le toʻatele o i latou sa lafoaʻia faiga lē tonu sa iai ina ua latou avea ma Kerisiano. E tele olaga na toe faaleleia! Peitaʻi, e matuā itiiti lava lenei aofaʻiga pe a faatusatusa atu i le faatelega o le aofaʻiga o tagata i le lalolagi i lena lava vaitaimi—875,000,000! Ua iloa e Molimau a Ieova o le puna o lo latou olioli o le fesoasoani atu lea i tagata lototalisapaia, e ui lava ina latou iloa e toʻaitiiti ni tagata o le a savavali i le ala i le ola. (Mataio 7:13, 14) A o faatalitalia e Molimau suiga i le lalolagi aoao mo se lelei lea e na o le Atua e mafai ona ia faia, ua latou lē aafia lava i gaoioiga a tagata mo ni suiga o mea, lea e masani ona amata mai i ni faanaunauga lelei ae iʻu ane ua faasesēina ai pe oo atu lava i faiga sauā.—2 Peteru 3:13.
17. O le ā na faia e Iesu e fesoasoani ai i ē na latou faifaimea faatasi, ae o le ā na te leʻi faia?
17 I le uia o lenei laasaga, ua faaalia ai e Molimau a Ieova le uiga mautinoa ia Ieova, lea foʻi sa faaalia e Iesu a o iai i le lalolagi. I tuā i le uluaʻi senituri, na faatino ai e Iesu vavega o faamālōlōga. (Luka 6:17-19) Na oo lava ina ia faatūina mai ē ua oti. (Luka 7:11-15; 8:49-56) Peitaʻi na te leʻi aveesea le faafitauli o maʻi pe faatoʻilalo le fili o le oti. Na ia silafia e leʻi oo i le taimi atofaina a le Atua mo lena mea. E tusa ai o ona tomai silisili o se tagata lelei atoatoa, e mautinoa le tele o ni mea atonu sa mafai ona faia e Iesu e foʻia ai faafitauli tugā i mea faapolotiki ma mea o le olaga nei. E foliga mai e iai nisi o ē na latou ola faatasi i lena vaitaimi sa mananaʻo ina ia ona tauaveina le pule ma gaoioi ai i lenei auala, peitaʻi sa faafitia e Iesu. Tatou te faitau ai: “Ua iloa e ia tagata le faailoga na faia e Iesu, ona faapea lea o i latou, ‘E moni, o lea lava perofeta lenei, o lē maliu mai i le lalolagi.’ Ua silafia foi e Iesu, o le a o mai i latou e pue ia te ia, ina ia latou faia o ia ma tupu, ona toe maliu ese ai lea o ia e toatasi i le mauga.”—Ioane 6:14, 15.
18. (a) Na faapefea ona faaalia pea e Iesu se uiga faatalitali? (e) Ua faapefea ona suia gaoioiga a Iesu talu mai le 1914?
18 Sa teena e Iesu lona aafia i faiga faapolotiki pe i galuega a le lalolagi talu ai sa ia silafia e leʻi oo ane le taimi na te maua ai le mana tautupu ma faatino ai ana galuega o le faamālōlōina o tagata uma i so o se mea. E oo lava i le taimi na afio ai o ia i le lagi i lona olaga faaleagaga e lē mafai ona toe maliu, sa ia lotomalie e faatalitali mo le taimi atofaina a Ieova a o leʻi faia sana gaoioiga. (Salamo 110:1; Galuega 2:34, 35) Peitaʻi ane, talu mai ona faanofotupuina e avea ma Tupu o le Malo o le Atua i le 1914, ua agaʻi atu ai pea o ia “o loo manumalo, o le a manumalo pea ia.” (Faaaliga 6:2; 12:10) Maʻeu so tatou lotofaafetai e gauaʻi atu i lona tulaga tautupu, a o filifili isi o ē faapea mai o ni Kerisiano, ina ia latou teena pea aʻoaʻoga a le Tusi Paia e faatatau i le Malo!
Faatalitali—Puna o Lagona Tigā po o le Olioli?
19. O afea e avea ai le faatalitali ma pogai “e faanoanoa ai le loto,” ae o afea e avea ai ma puna o le olioli?
19 Sa iloa e Solomona e mafai e le faatalitali ona oo mai ai lagona tigā. Na ia tusi mai: “O le faamoemoe ua tuai ona taunuu e faanoanoa ai le loto.” (Faataoto 13:12) O le mea moni, pe afai e iai i se tagata ni faatalitaliga e lē faavaea, e mafai ona faanoanoa ai lona loto i lagona lē fiafia. E ui i lea, o le faatalitali mo ni mea mananaia e tutupu—atonu o se faaipoipoga, le fanau mai o se tamaitiiti, po o se toe faatasiga ma ni tagata tatou te alolofa i ai—e mafai ona faatumulia ai i tatou i le olioli a o leʻi taitai oo mai le aso e faataunuu ai lena mea. E faateteleina lena olioli pe afai tatou te faaaogā ma le atamai le taimi lea e faatalitali ai, e fai ai ni sauniuniga mo lena mea o le a oo mai.
20. (a) O ā mea tutupu ofoofogia o loo tatou faatalitali ma le mautinoa e vaai atu i ai? (e) E mafai faapefea ona tatou maua le olioli a o faatalitali atu mo le faataunuuina o fuafuaga a Ieova?
20 Pe afai e ia i tatou le mautinoa atoatoa faapea o le a faataunuuina mea o tatou faatalitalia—e tusa lava pe tatou te lē iloa po o afea o le a faataunuu ai—ona lē avea lea o le vaitaimi o loo faatalitali ai ma pogai “e faanoanoa ai le loto.” E iloa e tagata tapuaʻi faamaoni a le Atua ua matuā lalata mai lava le Pulega Faameleniuma a Keriso. Ua latou mautinoa o le a latou vaai i le faaiʻuina o le oti ma faamaʻi. Latou te naunautaʻi e faatalitali atu ma le olioli i le taimi o le a latou toe faafeiloaʻia ai le faitau piliona o ē ua maliliu, e aofia ai ē pele ia i latou ua maliliu. (Faaaliga 20:1-3, 6; 21:3, 4) I nei taimi o mala i meafaiola ma le siʻosiʻomaga, ua latou fiafia ai i le faamoemoe mautinoa o le vaai atu i se Parataiso o le a faavaeina i le lalolagi. (Isaia 35:1, 2, 7) Maʻeu la le atamai, pe a faaaogā tatau le taimi o loo faatalitali ai ina “ia alualu lo [tatou] faamalosi i le galuega a le Alii ma le le aunoa”! (1 Korinito 15:58) Ia faaauau pea ona ave i fale meaʻai faaleagaga. Ia ati aʻe se faiā sili ona māfana ma Ieova. Ia saʻili atu mo isi o ē o loo uunaʻia foʻi i latou e o latou loto ina ia auauna ia Ieova. Ia faalaeiau i uso talitonu. Ia faaaogā atoatoa so o se taimi o loo faataga mai pea e Ieova mo i tatou. Ona lē taitai ai lea avea le faatalitali ia Ieova ma pogai “e faanoanoa ai le loto.” Na i lo lea, o le a faatumulia ai oe i le olioli!
Pe Mafai Ona E Faamatala?
• Na faapefea ona faaalia e Iesu se uiga faatalitali?
• I ā tulaga e manaʻomia ai e Kerisiano se uiga faatalitali?
• Aiseā e lotomalilie ai Molimau a Ieova e faatalitali atu ia Ieova?
• E mafai faapefea ona avea le faatalitali ia Ieova ma puna o le olioli?
[Fesili mo le Suʻesuʻega]
[Ata i le itulau 12]
Sa onosai Iesu ona o le olioli sa tuu i ona luma
[Ata i le itulau 13]
E tusa pe ua fia tausaga o tatou auauna, e mafai lava ona faatumauina lo tatou olioli
[Ata i le itulau 15]
E faitau miliona tagata ua toe faaleleia o latou olaga ina ua avea o ni Molimau a Ieova