E Avatua e Ieova le Malosi i Lē ua Vaivai

“[E] avatua [e Ieova] le malosi i e ua vaivai; a o e ua leai se malosi, na te faatuputele i ai le malosi.”—ISAIA 40:29.

1. Ia faataʻitaʻi mai le malosi lea o loo iai i mea ua foafoaina e le Atua.

E LĒ muta mai le malosi o Ieova. Ma e maʻeu le mataʻutia o le malosi o loo iai i mea na ia foafoaina! O le atoma itiiti—o se faavae autū o loo fausia ai mea uma—e matuā itiiti lava, lea foʻi ua mafai ai ona iai i se matāua e tasi o le suāvai le selau piliona ma piliona o atoma. * O ola uma o loo i lo tatou kelope e faalagolago atu i le malosi lea e puna mai gaoioiga tau atomika i le lā. Ae o le ā le tele o se malosi mai le lā e manaʻomia ina ia faatumau ai le ola o mea i le lalolagi? E na o sina vaega itiiti lava o le malosi lea o loo faasusulu ma e le lā, o loo maua e le lalolagi. E ui i lea, o le vaega matuā itiiti lava o le malosi o le lā lea e oo mai i le lalolagi e matuā lē mafaatusalia lona sili atu ona tele na i lo le malosi uma ua faaaogā i falegaosimea a le lalolagi.

2. I se uiga moni, o le ā ua fai mai ai le Isaia 40:26 e faatatau i le mana o Ieova?

² Pe tatou te mafaufau i le atoma pe tatou te uaʻi atu foʻi i le vateatea telē, ae ua tatou matuā maofa lava i le mataʻutia o le mana o Ieova. E lētioa lava a ia faapea mai: “Seʻi tetepa ae i luga, ma outou vaai, po o ai ea ua na faia nei mea? Na te taʻitaʻiina mai a latou ʻau ua faitauina; na te valaau ia te i latou uma  i o latou igoa; ona o le tele o lona malosi ma lona mana tele; e leai so latou e le iloa”! (Isaia 40:26) Ioe e ‘tele le mana’ o Ieova, ma o ia o le Puna o le ‘tele o le malosi’ lea sa faaaogā i le foafoaina o le vateatea aoao.

E Manaʻomia se Malosi e Sili Atu na i lo le Malosi e Masani Ai

3, 4. (a) O ā nisi o mea e ono oo mai ai ia i tatou le vaivai? (e) O le ā le fesili e manaʻomia ona talanoaina?

³ O le Atua e lē muta mai lona malosi, peitaʻi o tagata e fai ma vaivai. So o se mea lava tatou te ō atu i ai, tatou te vaaia tagata o loo lē lavavā. Latou te alafaʻi mai ma le lē lavavā, e ō atu i galuega po o aʻoga ma le lē lavavā, e foʻi mai i le fale ma le lē lavavā, ma e oo ifo i le taimi e momoe ai, ua lē na ona lē lavavā ae ua matuā vaivai lava. Ua moomoo nisi maʻimau pe ana mafai ona ō atu i se isi mea ina ia matuā fai lelei ai se mālōlōga o loo latou manaʻomia. O i tatou o auauna a Ieova, e oo foʻi ia i tatou le vaivai, auā o lo tatou olaga tuutoina atu i le Atua e manaʻomia ai le matuā faamalosi. (Mareko 6:30, 31; Luka 13:24; 1 Timoteo 4:8) Ma e iai foʻi isi vala e tele ua alu uma i ai lo tatou malosi.

⁴ E ui lava o i tatou o ni Kerisiano, ae tatou te lē o sao mai ai i faafitauli ia o loo oo i tagata lautele. (Iopu 14:1) O maʻi, o faafitauli tau tupe, ma isi faigatā o loo taatele i le olaga atonu e faapogai ai le lotovaivai, ma oo ai i āuga e faavaivaia ai. E lē gata i na luʻi, ae ua iai foʻi puapuaga ua patino atu ia i latou ua sauāina ona o le amiotonu. (2 Timoteo 3:12; 1 Peteru 3:14) Talu ai omiga i aso taʻitasi mai le lalolagi ma teteega i la tatou galuega talaʻi o le Malo, atonu ua matuā gapelu ai lava nisi o i tatou ma ua oo ai i se lagona o le tau fai ifo o le aasa i le auaunaga ia Ieova. E lē gata i lea, o loo taumafai Satani le Tiapolo e gausia lo tatou faamaoni i le Atua, e ala i lona faaaogā o auala uma na te mafaia. E mafai la faapefea ona tatou maua le malosi faaleagaga e manaʻomia ina ia lē oo atu ai i le faavaivai ma le faamaamulu?

5. Aiseā e manaʻomia ai se isi malosi e sili atu na i lo le malosi faaletagata, mo le faatinoina o le faiva faa-Kerisiano?

⁵ Mo se malosi faaleagaga, e tatau ona tatou faalagolago ia Ieova, o Lē na Foafoaina Mea ua ia te ia le malosi uma. Na taʻua e le aposetolo o Paulo faapea, o le faiva faa-Kerisiano o le a manaʻomia ai se malosi e sili atu na i lo le malosi e masani ai tagata lē lelei atoatoa. Na ia tusi mai e faapea: “Ua ia te i matou lenei oa i ipu omea, ina ia i le Atua le matuā tele o le mana, a e le mai ia te i matou.” (2 Korinito 4:7) O loo faatinoina e Kerisiano faauuina “le galuega o le leleiga” faatasi ai ma le lagolagosua mai a a latou aumea o ē o loo faamoemoe e ola i le lalolagi. (2 Korinito 5:18; Ioane 10:16; Faaaliga 7:9) Talu ai o i tatou o tagata lē lelei atoatoa lea o loo faia le galuega a le Atua a o fesagaʻi ma sauāga, e lē mafai la ona tatou faia i so tatou lava malosi. E fesoasoani Ieova ia i tatou e ala mai i lona agaga paia, ona mafai lea e lo tatou vaivai ona faasilisilia ai lona mana. Ma e maʻeu le faamāfanafanaina o i tatou i le faamautinoaga e faapea “e taofiina ae e Ieova o e amiotonu”!—Salamo 37:17.

‘O Ieova o lo Tatou Malosi Ia’

6. Ua faamautinoa mai faapefea e le Tusi Paia ia i tatou faapea o Ieova o ia o le Puna o lo tatou malosi?

⁶ E ‘tele le mana’ o lo tatou Tamā faalelagi ma e faigofie lava ona ia toe faamalosia i tatou. O le mea moni, ua taʻu mai ia i tatou e faapea: “[E] avatua [e Ieova] le malosi i e ua vaivai; a o e ua leai se malosi, na te faatuputele i ai le malosi. E vaivai ma tigaina tama matutua; o taulelea foi, e pauu lava i latou; a o e faatalitali ia Ieova, e toe faafouina lo latou malosi; latou te sii ae apaau e pei o aeto; latou te femoei, a e le vaivai; latou te savavali, a e le tigaina.” (Isaia 40:29-31) Ona o le faateleina o omiga, atonu e oo ai ia i tatou i nisi taimi se faalogona ua peiseai o se tagata tamoʻe ua matuā vaivai lava, ua foliga mai ua matuā lē mafai lava e ona vae ona toe laa atu i se isi lava mamao. Ae o lea ua toetoe lava oo atu i le tini, o lea e lē tatau ai ona tatou toe faamaamulu. (2 Nofoaiga a Tupu 29:11) O loo fealualuaʻi lo tatou Fili, o le Tiapolo lea, “e pei o se leona tagi,” ma e manaʻo na te taofia i tatou. (1 Peteru 5:8) Seʻi o tatou manatua ‘o Ieova o lo tatou malosi lea ma lo tatou talita,’ ma e anoanoaʻi sauniuniga ua ia faia ‘ina ia avatua ai le malosi i lē ua vaivai.’—Salamo 28:7.

7, 8. O le ā e faamaonia ai sa foaʻi e Ieova le malosi ia Tavita, o Sapakuka, ma Paulo?

⁷ Na avatu e Ieova ia Tavita le malosi sa ia manaʻomia e faaauau ai pea a o fesagaʻi ma toʻatugā mataʻutia. O lea, i lona faatuatua atoatoa ma le mautinoa, na tusi ai Tavita: “O le Atua lava e fai ai i matou ma toa; auā o ia na te solia e ua ita mai ia te i matou.” (Salamo 60:12) Na foaʻi foʻi e Ieova le  malosi ia Sapakuka ina ia mafai ona ia faamāeʻaina lona tofiga o se perofeta. Ua faapea mai le Sapakuka 3:19: “O Ieova le Alii, o loʻu malosi ia, na te faia oʻu vae e pei o vae o aila, o ia foi ou te savali ai i aʻu mea maualuluga.” E lelei foʻi ona mātau le faaaʻoaʻoga a Paulo, o lē na tusi mai: “Ou te mafaia mea uma lava i le faamalosi mai o Keriso [“Ieova,” NW] ia te au.”—Filipi 4:13, LT.

⁸ I le pei o Tavita, Sapakuka, ma Paulo, e tatau ona tatou faaalia le faatuatua atu i le tomai o le Atua lea na te faamalosia ai i tatou, ma lona mana e laveaʻiina i tatou. I le manatuaina faapea o le Alii Pule Silisili Ese o Ieova, o ia lea o le Puna o lo tatou “malosi,” seʻi o tatou talanoaina nei la nisi o auala tatou te mauaina ai le malosi faaleagaga mai le anoanoaʻi o sauniuniga ua faia e le Atua.

O Sauniuniga Faaleagaga e Faamalosia ai i Tatou

9. O le ā le matafaioi ua fai e lomiga faa-Kerisiano i le fafagaina o i tatou?

⁹ O le suʻesuʻeina maelega o le Tusi Paia faatasi ai ma le fesoasoani mai o lomiga faa-Kerisiano e mafai ona toe faamalosia ma faatumauina ai i tatou. Na pese le faisalamo e faapea: “Amuia le tagata . . . e naunau o ia i le tulafono a Ieova; e mafaufau foi o ia i lana tulafono i le ao atoa ma le po. O ia foi e faapei o le laau ua totō i tafatafa ane o vaitafe, e fua mai ona fua i ona lava tau; e le toulu foi ona lau; e manuia foi mea uma na te faia.” (Salamo 1:1-3) E faapei ona tatau ona tatou aai ina ia faatumau ai lo tatou malosi faaletino, e faapena foʻi ona tatou mananaʻo e aai i meaʻai faaleagaga ua saunia e le Atua e ala mai i lana Afioga ma lomiga faa-Kerisiano ina ia faatumau ai lo tatou malosi faaleagaga. E manaʻomia tele ai la ni suʻesuʻega uigā ma le mafaufau loloto.

10. O afea tatou te ono maua ai se taimi e suʻesuʻe ma mafaufau loloto ai?

¹⁰ E matuā tauia lava le mafaufau i ‘mea loloto a le Atua.’ (1 Korinito 2:10, LT) Ae o afea tatou te maua ai se taimi e mafaufau loloto ai? Sa alu atu Isaako, le atalii o Aperaamo “i le fanua i le afiafi e mafaufau ai.” (Kenese 24:63-67) O le faisalamo o Tavita ‘sa mafaufau o ia i le Atua i leoleoga i itu po.’ (Salamo 63:6) Tatou te ono suʻesuʻeina le Afioga a le Atua ma mafaufau loloto i ai i le taeao, i le afiafi, ma i le pō—ioe, i so o se taimi. O na suʻesuʻega ma mafaufauga loloto e taʻitaʻia atu ai i se isi sauniuniga a Ieova mo le faamalosia faaleagaga—le tatalo.

11. Aiseā e tatau ai ona tatou matuā faatāuaina le tatalo e lē aunoa?

¹¹ O le tatalo e lē aunoa i le Atua e fesoasoani e faamalosia atili ai i tatou. O lea, tau ina ia tatou “finafinau i le tatalo.” (Roma 12:12) I nisi taimi, e manaʻomia ona tatou faia se talosaga patino mo le poto ma le malosi lea e manaʻomia ina ia faafetaiaʻia ai se puapuaga. (Iakopo 1:5-8) Seʻi o tatou faafetaia foʻi ma viia le Atua a o tatou mātauina le galueaʻiina o ana fuafuaga pe vaaia le auala o loo ia faamalosia ai i tatou ina ia faaauau pea ona galulue i lana auaunaga. (Filipi 4:6, 7) Pe afai e tumau ona tatou vavalalata atu ia Ieova i le tatalo, o le a lē taitai ona ia tuulafoaʻia i tatou. Na pese Tavita: “Faauta, o le Atua o loʻu lea fesoasoani.”—Salamo 54:4.

12. Aiseā e tatau ai ona tatou ole atu i le Atua mo lona agaga paia?

¹² E foaʻi mai e lo tatou Tamā faalelagi le malosi ma ia toe faamalosia atili i tatou e ala mai lona agaga paia, po o le malosi galue. Na tusi mai Paulo e faapea: “Ou te tootuli . . . i le Tamā . . . ina ia foaiina ia te outou e tusa ma le faulai o lona mamalu, ia faamalosia outou i le mana e lona lava Agaga i le tagata i totonu.” (Efeso 3:14-16, LF) E tatau ona tatou tatalo atu mo le agaga paia, i le talitonu mautinoa o le a foaʻi mai e Ieova ia i tatou. Na taʻua e Iesu le manatu e faapea: Pe afai e ole mai se tamaitiiti mo se iʻa, po o le a avatu ea ia te ia e sona tamā alofa se gata? E mautinoa e leai. O lea la, na ia faapea mai ai: “O outou e [agasala ma atonu e sili atu pe feoloolo foʻi le] leaga, afai ua iloa e outou ona avatu o mea lelei mā a outou fanau, e le sili ea ona foaiina mai e lo outou Tamā o i le lagi le Agaga Paia i e ole atu ai ia te ia?” (Luka 11:11-13) Seʻi o tatou tatalo atu ma lena mautinoa ma ia manatua pea e mafai ona “faamalosia” auauna faamaoni a le Atua i le mana e ala mai i lona agaga.

 O le Faapotopotoga o se Fesoasoani e Faamalosia Ai

13. E tatau faapefea ona tatou manatu i sauniga faa-Kerisiano?

¹³ E foaʻi mai e Ieova le malosi ia i tatou e ala mai sauniga a le faapotopotoga Kerisiano. Na fetalai Iesu: “O le mea ua faapotopoto ai se toalua, po o se toatolu i loʻu igoa, ou te i ai faatasi ma i latou.” (Mataio 18:20) Ina ua faia e Iesu lena folafolaga, o le taimi lena sa ia talanoaina ai mataupu na manaʻomia le uaʻi atu i ai o i latou sa taʻimua i le faapotopotoga. (Mataio 18:15-19) Peitaʻi ane, o ana fetalaiga e faatatau mai foʻi i a tatou sauniga uma lava, o fonotaga, ma tauaofiaga, lea e amata ma faaiʻu i le tatalo e ala atu i lona suafa. (Ioane 14:14) O lona uiga la, o se faaeaga le auai atu i na potopotoga faa-Kerisiano, e tusa lava pe na o sina vaega toʻaitiiti o loo iai pe o loo iai foʻi se faitau afe. O lea, seʻi o tatou faaalia le agaga faafetai mo nei faatasitasiga ua fuafua ina ia faamalosia ai i tatou faaleagaga ma faatupu ai ia i tatou le alofa ma galuega lelei.—Eperu 10:24, 25.

14. O ā aogā tatou te maua mai taumafaiga a toeaina Kerisiano?

¹⁴ E saunia e toeaina Kerisiano fesoasoani ma faalaeiauga faaleagaga. (1 Peteru 5:2, 3) Na fesoasoani atu Paulo ma ia faalaeiauina faapotopotoga sa ia auauna ai, e pei foʻi ona faia e ovasia femalagaaʻi i aso nei. O le mea moni, sa ia faanaunau e fia faatasi ma ona uso talitonu, ina ia mafai ai ona iai se fetufaaʻiga aogā o faalaeiauga. (Galuega 14:19-22; Roma 1:11, 12) Tau ina ia tatou faaalia pea le talisapaia mo a tatou toeaina ma isi ovasia Kerisiano, o ē o loo faia se vaega tele i le faamalosia o i tatou i le itu faaleagaga.

15. Ua faamaonia faapefea le avea o o tatou uso talitonu o se “faamatalaloto”?

¹⁵ O o tatou uso talitonu o loo faia aʻe ai la tatou faapotopotoga e mafai ona avea ma “faamatalaloto.” (Kolose 4:10, 11) Ona o ni ‘uo moni’ e mafai ona latou fesoasoani ia i tatou i taimi o mafatiaga. (Faataoto 17:17) Mo se faataʻitaʻiga, ina ua toe faasaʻoloto mai le toʻa 220 o auauna a le Atua mai nofoaga o faasalaga i Sachsenhausen i lalo o leoleoga a Nasi i le 1945, ona latou savavali lea i se savaliga e 120 maila (200 kilomita) le mamao. Sa latou faimalaga o se vaega, ma sa tūlei e le ʻaumalolosi ni nai tamaʻi taavale toso sa faatiʻetiʻe ai ē na sili ona vaivai. O le ā le iʻuga? I se savaliga i le oti lea na maliliu ai le silia ma le 10,000 o ē na iai i nofoaga o faasalaga, e leai ma se tasi o Molimau a Ieova na maliu ai. O na tala o loo faamatalaina i lomiga a le Olo Matamata e aofia ai le Yearbook of Jehovah’s Witnesses ma le Jehovah’s Witnesses—Proclaimers of God’s Kingdom, e faamaonia ai e foaʻi mai e le Atua le malosi i ona tagata, ina ia latou lē faamaamulu ai.—Kalatia 6:9. *

Ua Faamalosia e Ala i la Tatou Faiva i le Fanua

16. E faapefea i le faia e lē aunoa o se sao i le faiva ona faamalosia ai lo tatou itu faaleagaga?

¹⁶ O le faia e lē aunoa o se sao i le galuega talaʻi o le Malo e faamalosia ai lo tatou itu faaleagaga. O lena galuega e fesoasoani mai ia i tatou ina ia taulaʻi atu ai i le Malo o le Atua ma ia tulimataʻia pea  le ola e faavavau ma ona faamoemoega faamanuiaina. (Iuta 20, 21) O folafolaga a le Tusi Paia o loo tatou fetalanoaaʻi ai ma tagata i la tatou faiva e aumaia ai ia i tatou se faamoemoe ma mafai ai ona tatou matuā maumauaʻi e pei o le perofeta o Mika, o lē na faapea mai: “O i tatou . . . tatou te savavali i le suafa o Ieova lo tatou Atua e faavavau faavavau lava.”—Mika 4:5.

17. O ā ni fautuaga o loo ofoina mai e faatatau i suʻesuʻega faale-Tusi Paia i aiga?

¹⁷ E faamalosia la tatou lava faiā ma Ieova a o tatou faaaogāina atili le Tusi Paia i le aʻoaʻoina o isi. Mo se faaaʻoaʻoga, a o faia suʻesuʻega faale-Tusi Paia i aiga faatasi ai ma le fesoasoani a le tusi o Le Poto e Taʻitaʻia ai i le Ola e Faavavau, o se gaoioiga atamai le faitau ma talanoaina nisi o mau o loo sii mai ai. E aogā lenei mo le tagata suʻesuʻe ma faamalosia ai foʻi lo tatou lava malamalamaga faaleagaga. Pe afai e faafaigatā i le tagata suʻesuʻe ona malamalama i se manatu faale-Tusi Paia po o se tala faatusa, e mafai ona tele atu nisi a oulua suʻesuʻega e fai e talanoaina ai se mataupu e tasi o le tusi o Le Poto. E maʻeu so tatou fiafia pe a sauniuni lelei ma faia se taumafaiga faaopoopo e fesoasoani ai i isi ina ia latou tosina vavalalata mai i le Atua!

18. Ia faataʻitaʻi mai le auala ua faaaogāina ai ma le uigā le tusi o Le Poto.

¹⁸ I tausaga taʻitasi, ua faaaogāina ai ma le uigā le tusi o Le Poto e fesoasoani ai i le faitau afe o tagata ina ia avea o ni auauna tuuina atu a Ieova, ma e aofia ai le toʻatele o i latou sa matuā leai lava so latou iloa i le Tusi Paia i le taimi muamua. Mo se faataʻitaʻiga, a o laʻitiiti lava, sa lagona atu ai e se tamāloa mai Sri Lanka, se Molimau o talanoa e uiga i le Parataiso. I ni tausaga mulimuli ane, sa ia talanoa atu ai i lena fafine Molimau, ma e leʻi umi ae amata loa se la suʻesuʻega ma le tane a le fafine. O le mea moni, o aso uma sa alu ane ai lenei tauleʻaleʻa mo lana suʻesuʻega, ma e leʻi umi lava se taimi ae māeʻa lelei le tusi o Le Poto. Na amata ona ia auai atu i sauniga uma, sa motusia uma ana sootaga mai lana lotu sa iai muamua, ma avea loa o se tagata talaʻi o le Malo. E oo ane i le taimi na papatiso ai, ua ia amataina se suʻesuʻega faale-Tusi Paia ma se isi alii la te masani.

19. A o tatou muaʻi saʻilia le Malo, o le ā e mafai ona tatou mautinoa ai?

¹⁹ O le muaʻi saʻilia o le Malo tatou te maua ai le olioli lea e faamalosia ai. (Mataio 6:33) E ui ina tatou tofo i puapuaga eseese, ae tatou te faaauau pea ona fiafia ma maelega e folafola atu le tala lelei. (Tito 2:14) E toʻatele i tatou ua ausia mea manaʻomia mo le auaunaga faataimi atoa i le avea ma paeonia, ma e iai nisi o loo auauna i le mea o loo tele ai le manaʻomia mo se ʻaufaievagelia. E tusa lava po o auala nei o loo tatou uunaʻia atili ai ma le olioli manaʻoga o le Malo pe o isi foʻi auala, ae tatou te mautinoa o le a lē faagaloina e Ieova la tatou galuega ma le alofa o loo tatou faaalia mo lona suafa.—Eperu 6:10-12.

Ia Faaauau Pea i le Malosi Mai ia Ieova

20. E mafai faapefea ona tatou faaalia atu o loo tatou faalagolago ia Ieova mo le malosi?

²⁰ Seʻi o tatou faaalia atu ma le naunautaʻi ma le lotoatoa e faapea, o loo tatou faamoemoe ia Ieova ma faalagolago ia te ia mo le malosi. E mafai ona tatou faia faapea e ala i le faaavanoa atoatoa atu o i tatou lava mo sauniuniga faaleagaga o loo ia faia e ala mai i le ‘auauna faamaoni.’ (Mataio 24:45) O suʻesuʻega totino ma le suʻesuʻeina faatasi ma le faapotopotoga o le Afioga a le Atua, faatasi ai ma le fesoasoani a lomiga faa-Kerisiano, le tatalo ma le lotoatoa, o fesoasoani faaleagaga a toeaina, o faaaʻoaʻoga matagofie a uso talitonu faamaoni, ma le faia e lē aunoa o se sao i le faiva, o nisi na o sauniuniga e faamalosia ai la tatou faiā ma Ieova ma tatou maua ai le malosi e faaauau ai i lana auaunaga paia.

21. Na faaalia faapefea e aposetolo o Peteru ma Paulo le manaʻoga mo le malosi mai le Atua?

²¹ E ui lava i o tatou tulaga lē atoatoa faaletagata, ae o le a foaʻi mai e Ieova le malosi ia i tatou e faia ai  lona finagalo pe afai tatou te faalagolago ia te ia mo se fesoasoani. I lona malamalama i le manaʻomia o sea fesoasoani, na tusi mai ai le aposetolo o Peteru e faapea: “Afai e auauna se tasi, ia tusa ma le malosi ua foaiina mai e le Atua.” (1 Peteru 4:11) Ma na faaalia e Paulo lona faalagolago atu i le malosi mai le Atua ina ua ia faapea mai: “Ou te fiafia . . . i mea e vaivai ai, o le faaleaga mai, o malaia, o le agatele mai, o le atuatuvale ona o Keriso; auā pe a ou vaivai, ona ou malosi ai lea.” (2 Korinito 12:10) Tau ina ia tatou faaalia atu lena lava talitonuga maumaututū ma aumaia le viiga i le Alii Pule Silisili Ese o Ieova, o ia na te avatua le malosi i lē ua vaivai.—Isaia 12:2.

[Faamatalaga pito i lalo]

O le a Faapefea Ona E Tali?

• Aiseā e manaʻomia ai e tagata o Ieova se malosi e sili atu na i lo le malosi e masani ai?

• O le ā se faamaoniga faale-Tusi Paia e iloa ai e aumaia e le Atua le malosi i ana auauna?

• O ā nisi o sauniuniga faaleagaga ua faia e Ieova ina ia faamalosia ai i tatou?

• E mafai faapefea ona tatou faaalia o loo tatou faalagolago atu i le Atua mo le malosi?

[Fesili mo le Suʻesuʻega]

[Faamatalaga i le itulau 12]

E faamalosia la tatou lava faiā ma Ieova a o tatou faaaogā le Tusi Paia e aʻoaʻoina ai isi