Aiseā E te Auauna ai i le Atua?

I se tasi taimi, na fautuaina ai e se tupu mataʻu i le Atua lona atalii e faapea: “Ia iloa e oe le Atua o lou tamā, ma auauna ia te ia ma le loto atoa, ma le loto fiafia.” (1 Nofoaiga a Tupu 28:9) E manino mai, e finagalo Ieova i ana auauna ina ia auauna atu ia te ia ma le lotofaafetai ma le talisapaia.

ONA o ni Molimau a Ieova, e tatou te ioe ai ma le faamaoni e faapea, ina ua uluaʻi faamalamalamaina mai folafolaga a le Tusi Paia, na matuā faatutumuina o tatou loto i le talisapaia. I aso uma lava, e tatou te aʻoaʻoina ai se mea fou e uiga i fuafuaga a le Atua. O le tele e tatou te aʻoaʻo ai e uiga ia Ieova, o le sili atu foʻi lena ona malosi o lo tatou faanaunauga e auauna atu ia te ia “ma le loto atoa, ma le loto fiafia.”

O le toʻatele o ē ua avea ma Molimau a Ieova, o loo faaauau pea ona auauna ia Ieova ma le matuā fiafia lava i o latou olaga atoa. Ae peitaʻi, o nisi Kerisiano sa amata lelei, ae i le faagasologa o taimi, ua mou atu mai ia i latou māfuaaga malolosi na uunaʻia ai i tatou e auauna i le Atua. Po ua tupu lena mea ia te oe? Afai ua tupu, aua le faavaivai. E mafai lava ona toe maua lou olioli lena ua mou atu. E faapefea?

Mafaufau i Ou Faamanuiaga

Muamua, ia mafaufau loloto i faamanuiaga o loo e maua mai i le Atua i lea aso ma lea aso. Mafaufau e uiga i meaalofa lelei mai ia Ieova: le anoanoaʻi o ana galuega o le foafoaga—o loo faaaogāina e tagata uma e tusa lava po o le ā le tulaga i le lautele po o le tau tamaoaiga—ana sauniuniga masani o meaʻai ma vaiinu, le tulaga o le soifua mālōlōina o loo e olioli ai, lou poto i upu moni o le Tusi Paia, ma o le aupito sili o na mea uma, o le meaalofa lea i lona Alo. O lona maliu ua saunia ai le auala mo oe e auauna ai i le Atua ma se lotofuatiaifo mamā. (Ioane 3:16; Iakopo 1:17) O le tele o lou mafaufau loloto i le lelei o le Atua, o le tele foʻi lena o le faatupuina o lou talisapaia mo ia. O le a uunaʻia ai loa oe e lou loto ina ia auauna ia te ia ma le lotofaafetai mo mea uma ua ia faia. E lē taumatea o le a amata ai ona e toe lagona e pei ona oo i le faisalamo o lē na tusi mai e faapea: “Ieova e, loʻu Atua, e tele lava mea ua e faia, o ou vavega ma ou manatu ia te i matou, e le mafai ona laulauina atu ai ia te oe; . . . a e le mafaitaulia lava.”—Salamo 40:5.

O upu nei na tusia e Tavita, o se tagata sa lē aunoa lona olaga ma ni faalavelave. A o talavou, sa tele se taimi na fesolasolataʻi ai Tavita a o saʻilia o ia e le tupu amioleaga o Saulo ma ana soātau ina ia fasiotia. (1 Samuelu 23:7, 8, 19-23) Sa iai foʻi vaivaiga totino o Tavita lava ia sa manaʻomia ona ia tauivi i ai. Ua ia faailoa mai nei mea uma lava i le Salamo lona 40 e faapea: “Ua siosiomia aʻu i mea leaga e le mafaitaulia; ua maua mai aʻu e aʻu agasala, o lea ou te le mafaia ai ona vaai; ua sili ia ona tele i oʻu lauulu.” (Salamo 40:12) Ioe, sa iai faafitauli o Tavita, ae sa leʻi lofitūina atoatoa ai o ia i na mea. Sa ia tepa taulaʻi atu i auala na faamanuiaina ai o ia e Ieova, e ui i ona faafitauli, ma sa ia iloa o na faamanuiaga sa sili mamao atu na i lo o ona puapuaga.

Afai e te lagona ua lofia oe i faafitauli totino po o faalogona o le lē agavaa, e lelei pe a e nofo ma mafaufau i ou faamanuiaga, e pei ona sa faia e Tavita. E lē taumatea, o le talisapaia o na faamanuiaga sa uunaʻia ai oe e tuuina atu oe lava ia Ieova; o manatu faapena e mafai foʻi ona fesoasoani ia te oe e toe faaolaola ai lou olioli lea na mou atu ma  fesoasoani ia te oe e auauna i le Atua mai se lototalisapaia.

E Mafai ona Fesoasoani Sauniga a le Faapotopotoga

E lē gata i lou mafaufau loloto na o oe lava i le lelei o Ieova, e manaʻomia ona tatou auaufaatasi atu ma uso Kerisiano. Ua avea foʻi o se faalaeiauga le feiloaʻi e lē aunoa ma alii, tamaʻitaʻi, ma tagata talavou o ē alolofa i le Atua ma ē o loo maumauaʻi e auauna ia te ia. O a latou faaaʻoaʻoga e mafai ona uunaʻia ai i tatou e faia le galuega ma le lotoatoa i le auaunaga ia Ieova. O lo tatou iai i le Maota o le Malo e mafai ona faalaeiau ai foʻi i latou.

O le mea moni, pe a tatou foʻi atu i le aiga pe a uma se aso o galuega mamafa po ua faalotovaivaia foʻi i tatou ona o ni faafitauli po o ni vaivaiga, atonu o le a lē faigofie ona mafaufau e auai i le sauniga i le Maota o le Malo. I taimi faapena, e manaʻomia ai ona tatou maumauaʻi ia i tatou lava, i le ‘faatoilaloina o tatou tino,’ e pei o lea faaupuga, ina ia tatou usiusitai i le poloaʻiga ina ia faapotopoto faatasi ma uso Kerisiano.—1 Korinito 9:26, 27; Eperu 10:23-25.

Pe afai e mafai ona faia o lena mea, pe e ao ona tatou faia se faaiʻuga faapea e tatou te lē o alolofa moni ia Ieova? E matuā leai lava. O Kerisiano taʻumatuaina o aso ua mavae o ē sa lē fesiligia lo latou alofa mo le Atua, sa latou manaʻomia ona faia ni taumafaiga malosi lava ina ia faia le finagalo o le Atua. (Luka 13:24) O le aposetolo o Paulo, o se Kerisiano sa faapena. Sa ia faamatalaina mai ma le saʻoloto ona faalogona i le auala lenei: “Ua ou iloa e leai se mea lelei ua nofo i totonu ia te au, o loʻu tino lea; auā ua ia te au le loto atu, a ou te lei iloa ona fai o le mea lelei; auā ou te le faia o le mea lelei ou te loto i ai, a o le mea leaga ou te le loto i ai, o le mea lea ou te faia.” (Roma 7:18, 19) Ma na ia taʻu atu i tagata Korinito e faapea: “Auā afai ou te folafola le tala lelei, e le se mea lea ou te mitamita ai, auā ua leai saʻu faitalia i lea mea. . . . Auā afai ou te faia lenei mea ma le loto, ua ia te au le taui; peitaʻi ane, a ou le faia ma le loto, ua tuuina mai ia te au e fai ma auauna tausi mea.”—1 Korinito 9:16, 17.

E pei lava o le toʻatele o i tatou, sa iai faanaunauga agasala o Paulo na faalavelave ane i ona faanaunauga e faia le mea saʻo. Ae peitaʻi na ia tauivi malosi faasaga i na faanaunauga, ma i le tele o taimi, sa taulau manuia ai o ia. O le mea moni, sa leʻi faataunuuina e Paulo lenei mea i sona lava malosi. Na ia tusi mai e faapea: “Ou te mafaia mea uma lava ona o ia ua faamalosi mai ia te au.” (Filipi 4:13) O Ieova o lē na tuuina atu le malosi ia Paulo, o le a ia faamalosia foʻi oe e faia le mea saʻo pe a e ole atu ia te ia mo lana fesoasoani. (Filipi 4:6, 7) O lea ia “faamalolosi ona finau mo le faatuatua,” ma o le a faamanuia oe e Ieova.—Iuta 3.

E te lē tauina na o oe lenei taua. I faapotopotoga a Molimau a Ieova, o loo i ai toeaina Kerisiano taʻumatuaina, o ē o loo maumauaʻi foʻi i latou lava e “finau mo le faatuatua,” ma nofosauni e fesoasoani atu ia te oe. Afai e te talanoa atu i se toeaina mo se fesoasoani, o le a ia taumafai e talanoa “faamāfanafana” atu ia te oe. (1 Tesalonia 5:14) O lona sini o le a ia taumafai e gaoioi “e pei o se lafitaga i le matagi, ma se mea e malu ai i le afā.”—Isaia 32:2.

“O le Atua o le alofa lava ia,” ma e finagalo o ia mo ana auauna ia auauna atu ia te ia ona o le alofa. (1 Ioane 4:8) Afai e manaʻomia ona toe faaolaola lou alofa mo le Atua, ia faia laasaga talafeagai e faia ai faapea, e pei ona otooto mai i luga. O le a faafiafiaina oe ona sa e faia faapea.