Ia Fesoasoani i Isi Ina ia Savavali e Tusa ma Ieova

“O i maua foi ma te lei mapu . . . lava i le tatalo mo outou, . . . ma te aioi atu foi ina ia . . . outou savavali e tusa ma le Alii, ina ia fiafia mai o ia ia te outou i mea uma, ma ia outou fua mai galuega lelei uma lava.”—KOLOSE 1:9, 10.

1, 2. O le ā patino lava e mafai ona avea ma puna o le olioli ma le faamalieina?

“MA TE nonofo i se taavale toso i se faatoʻaga. O le ma ola i se olaga faafaigofie, ua tele ai se taimi ma te maua e faaoo atu ai i tagata le tala lelei. Ua matuā faamanuiaina i maʻua i le faaeaga o le fesoasoani i tagata e toʻatele ina ia tuuina atu o latou ola ia Ieova.”—Se ulugalii, o ni faifeʻau faataimi atoa i Aferika i Saute.

² Pe e te lē ioe ea o le fesoasoani atu i isi e aumaia ai le olioli? Ua lē aunoa ona taumafai nisi e fesoasoani atu i ē mamaʻi, o ē lē tagolima, po o ē ua tuua toʻatasi—ma faamalieina ai i le faia faapea. Ua mautinoa e Kerisiano moni o lo latou tufaina atu i isi o le poto e uiga ia Ieova le Atua ma Iesu Keriso e faataulauina ai se fesoasoani sili e mafai ona latou ofoina atu. Ua na o lenei le auala e mafai ona uunaʻia ai isi ina ia latou talia le togiola a Iesu, ati aʻe se faiā lelei ma le Atua, ma taʻitaʻia atu ai i le ola e faavavau.—Galuega 3:19-21; 13:48.

3. O le ā le ituaiga o fesoasoani e lelei ona tatou uaʻi atu i ai?

³ Peitaʻi, e faapefea le fesoasoani atu i ē ua leva ona auauna i le Atua, o ē o loo mulimuli atu i ‘Le Ala’? (Galuega 19:9, LF ) E mautinoa lava le tele o lou naunau atu ia i latou e pei ona masani ai, ae atonu e te lē o silafia se isi auala e mafai ona tele atu ai nisi mea e te mafai ona fai pe faalautele atu ai lau fesoasoani faifai pea. Pe atonu o lou tulaga e ono foliga mai ai e faatapulaa mai ni mea e te ono fesoasoani atu ai ia i latou, ma faatapulaa ai foʻi le faamalieina e mafai ona e maua. (Galuega 20:35) E mafai ona tatou aʻoaʻoina e faatatau i na vala uma e lua mai le tusi o Kolose.

4. (a) I lalo o ā tulaga na tusi atu ai Paulo i Kerisiano i Kolose? (e) Na faapefea ona aofia ai Epafara?

⁴ Ina ua tusi atu le aposetolo o Paulo i Kerisiano i Kolose, sa iai o ia i Roma i lena taimi, o loo saisaitia i lona lava fale, ae sa mafai pea ona asiasi atu tagata ia te ia. Atonu o lena ua e silafia, na faaaogā lelei e Paulo lona saʻolotoga faatapulaa lea sa maua e talaʻi atu ai e uiga i le Malo o le Atua. (Galuega 28:16-31) Sa mafai e isi uso Kerisiano ona asiasi atu ia Paulo, atonu sa iai foʻi nisi na saisaitia faatasi ma ia i nisi taimi. (Kolose 1:7, 8; 4:10) O se tasi o i latou na, o le faievagelia maelega o Epafara mai le aai o Kolose i Ferukia, i le laufanua laugatasi maualuga i le itu i sasaʻe o Efeso i Asia Itiiti (ua taʻua i aso nei o Take). Sa taulamua Epafara i le faavaeina o se faapotopotoga i Kolose, ma sa ia galue mamafa mo faapotopotoga i aai tuaoi o Laotikaia ma Iarapoli. (Kolose 4:12, 13) Aiseā na malaga atu ai Epafara e feiloaʻi ia Paulo i Roma, ma o le ā se lesona e mafai ona tatou aʻoaʻoina i le tali mai i ai a Paulo?

Fesoasoani Aogā mo Kerisiano i Kolose

5. Aiseā na tusia ai e Paulo lana tusi lea sa fai atu i uso i Kolose?

⁵ Ina ia mafai ona fesootaʻi ma Paulo e tusa ai o tulaga sa iai le faapotopotoga i Kolose, na alu atu ai Epafara i se malaga faigatā tele i Roma. Sa fai atu sana lipoti i le faatuatua, le alofa, ma taumafaiga faaevagelia a na Kerisiano. (Kolose 1:4-8) Peitaʻi, atonu foʻi sa ia faailoa atu lona popolega e uiga i taaʻiga lē lelei sa lamatia ai le tulaga faaleagaga o uso i Kolose. Na tali mai i ai Paulo e ala i se tusi faagaeeina lea na tetee mai ai i nisi o manatu faapea sa faasalalau e aʻoaʻo pepelo. Sa taulaʻi patino atu o ia i le matafaioi autū e tatau ona faatinoina e Iesu Keriso. * Pe na faatapulaa ea lana fesoasoani i le faamamafaina o upu moni autū o le Tusi Paia? O ā nisi mea sa mafai ona ia fesoasoani atu ai i uso i Kolose, ma o ā lesona e mafai ona tatou aʻoaʻoina e faatatau i le fesoasoani atu i isi?

6. O le ā sa faamamafa atu e Paulo i lana tusi i uso i Kolose?

 ⁶ I le amatamataga o lana tusi, na faamalamalama mai ai e Paulo se ituaiga o fesoasoani tatou te ono lē amanaʻia. O le auala lena sa aumaia ai sana fesoasoani uigā mai se mea mamao, a o mamao ese atu Paulo ma Epafara mai Kolose. Na taʻutino mai e Paulo faapea: “Ma te faafetai atu i le Atua, o le Tamā o lo tatou Alii o Iesu Keriso i a ma talosaga e le aunoa mo outou.” Ioe, o tatalo nei na patino mo Kerisiano i Kolose. Na faapea mai atili Paulo: “O le mea lea o i maua foi ma te lei mapu ai lava i le tatalo mo outou, talu le aso na ma faalogologo ai, ma te aioi atu foi ina ia atoatoa ona outou iloa lelei o lona finagalo i le poto uma atoa ma le mafaufau faaleagaga.”—Kolose 1:3, 9, LF.

7, 8. O ā mataupu e masani ona faaaofia i a tatou tatalo totino ma tatalo a le faapotopotoga?

⁷ Ua tatou iloa o Ieova o le “faafofoga tatalo,” e mafai ai la ona tatou faatuatuaina lona nofosauni e faafofoga mai i a tatou tatalo ua ofo atu e ōgatusa ma lona finagalo. (Salamo 65:2; 86:6; Faataoto 15:8, 29; 1 Ioane 5:14) Ae pe a oo ina tatou tatalo mo isi, e faapeʻī a tatou tatalo na?

⁸ Atonu e masani ona tatou mafaufau ma tatalo e faatatau i ‘lo tatou au uso o i le lalolagi.’ (1 Peteru 5:9) Pe tatou te ono faalatalata atu foʻi ia Ieova e tusa ai o Kerisiano ma isi o loo i se vaipanoa ua aafia i se mala faalenatura po o se isi lava tulaga pagatia. Ina ua faalogo soo o le uluaʻi senituri sa nonofo i isi vaipanoa i le oge na aafia ai Iutaia, atonu sa latou faia le anoanoaʻi o ni tatalo mo o latou uso a o latou leʻi ofoina atu ni tupe mo fesoasoani laveaʻi. (Galuega 11:27-30) I o tatou aso, e masani lava o sauniga faa-Kerisiano e faia ai tatalo e faatatau i le ʻauuso aoao pe faatatau i se vaega tele o uso, o iinā e manaʻomia ona malamalama ai le toʻatele i ia tatalo ma mafai ai ona latou faapea mai “amene.”—1 Korinito 14:16.

Ia Faamaʻoti Tatalo

9, 10. (a) O ā faaaʻoaʻoga e faaalia ai le fetaui ona tatalo mo ni tagata patino taʻitoʻatasi? (e) Na faapefea ona avea Paulo ma taulaʻiga o se tatalo patino?

⁹ Peitaʻi, ua saunia mai e le Tusi Paia mo i tatou faaaʻoaʻoga o tatalo mo isi lea sa sili atu ona maʻoti, ma patino i ni tagata taʻitoʻatasi. Seʻi toe mafaufau i le manatu o Iesu lea e taʻua i le Luka 22:31, 32. Sa iai faatasi o ia ma aposetolo faamaoni e toʻa 11. Sa manaʻomia e i latou uma lava le lagolagosua a le Atua i taimi faigatā sa lumanaʻi ane, ma na tatalo ai Iesu mo i latou. (Ioane 17:9-14) Peitaʻi, na faapatino lava e Iesu ia Peteru, ma faia ai se olega faapitoa mo lena soo e toʻatasi. O isi faaaʻoaʻoga: Na tatalo Elisaia ina ia fesoasoani mai le Atua i se tamāloa patino, o lana auauna. (2 Tupu 6:15-17) Na tatalo le aposetolo o Ioane ina ia faaauau ona malosi Kaio i le itu faaletino ma le faaleagaga foʻi. (3 Ioane 1, 2) Ae o isi tatalo sa taulaʻi atu i ni vaega patino.—Iopu 42:7, 8; Luka 6:28; Galuega 7:60; 1 Timoteo 2:1, 2.

¹⁰ Ua faamatilatila mai e tusi a Paulo le mataupu i tatalo e sili ona patino. Sa ia ʻaiʻoi atu ina ia faia ni tatalo ia patino atu mo ia, faapea foʻi ni tatalo mo ia faatasi ma ana aumea. Ua faitauina faapenei le Kolose 4:2, 3, (LF): “Ia outou finafinau i le tatalo, ia mataala i lea mea ma le faafetai. Ina tatalo ia mo i matou foi, ina ia faaavanoa mai e le Atua se faitotoa o le upu mo i matou, e tautala atu ai i le mea lilo e uiga ia Keriso, ona o lea foi ua noanoatia ai aʻu.” Seʻi tagaʻi foʻi i isi nei faaaʻoaʻoga: Roma 15:30; 1 Tesalonia 5:25; 2 Tesalonia 3:1; Eperu 13:18.

11. Mo ai sa tatalo ai Epafara a o iai o ia i Roma?

¹¹ O le tulaga foʻi lena sa iai le aumea a Paulo i Roma. “O loo alofa atu ia te outou o Epafara, o lo outou lava o ia, . . . o loo finafinau e le aunoa i tatalo mo outou.” (Kolose 4:12) O le upu ua faaaogā mo le “finafinau” e mafai ona taʻu mai ai le uiga o le “tauivi,” e pei ona faia e se tagata taalo i taaloga anamua. Pe sa tatalo faatauanau atu ea Epafara i le tau lava o uso talitonu i le lalolagi aoao pe i uso tapuaʻi moni foʻi i vaega uma o Asia Itiiti? Na faaalia mai e Paulo faapea sa tatalo faapitoa Epafara mo i latou i Kolose. Sa iloa e Epafara le tulaga sa latou iai. Tatou te lē iloa uma o latou igoa, e tatou te lē iloa foʻi po o ā faafitauli sa latou fesagaʻia, ae seʻi faapea la o nisi nei o tulaga sa ono iai. Pe atonu sa tauivi le talavou o Lino ma aafiaga a filosofia sa taatele i na taimi, ae atonu o Rufo sa ia manaʻomia se malosi e tetee  atu ai i le faatosina mai o mea sa ia faia i taimi ua teʻa a o ola i le faiga o mea faa-Iutaia. Ona o Peseti sa lē talitonu lana tane, pe na ia manaʻomia ea la le onosai ma le atamai e tausi aʻe ai lana fanau i ala o le Alii, e faapena foʻi Asugerito, o lē na mafatia i se maʻi ogaoga e iʻu ai i le oti, pe sa ia manaʻomia ea ni faamāfanafanaga faaopoopo? Ioe, na iloa lelei e Epafara i latou sa iai i lana faapotopotoga, ma sa ia tatalo faatauanau ai e uiga ia i latou auā sa la tau fai mananaʻo uma ma Paulo ina ia mafai e na tagata faamaoni ona latou savavali e tusa o ala o Ieova.

12. Atonu e faapefea ona tatou faapatino atili i a tatou lava tatalo totino?

¹² Po o e mātau maia le faaaʻoaʻoga mo i tatou—se auala e mafai ona tatou fesoasoani atu ai i isi? E pei ona mātauina, e masani ona faalauaʻitele atu tatalo i luma o le lautele i taimi o sauniga faa-Kerisiano, e fua i tagata eseese o loo iai i le aofia. Peitaʻi e mafai ona matuā patino a tatou lava tatalo totino po o tatalo a o tatou aiga. E ui atonu e iai ni taimi tatou te ole atu ai i le Atua na te taʻitaʻia ma faamanuia mai i ovasia femalagaai uma po o leoleo mamoe faaleagaga, ae pe lē mafai ea ona tatou faapatino atu foʻi i nisi taimi? Mo se faataʻitaʻiga, aiseā e te lē taʻu patino ai i lau tatalo le igoa o se ovasia matagaluega o loo asiasia la outou faapotopotoga po o lē o loo faia la outou Suʻesuʻega Tautusi a le Faapotopotoga? O loo faaalia i le Filipi 2:25-28 ma le 1 Timoteo 5:23, le patino o le mafaufau mamafa o Paulo i le soifua mālōlōina o Timoteo ma Epaferoti. Pe mafai ea foʻi ona tatou faaatagia atu sea naunau i ē o mamaʻi o loo tatou iloa e ala i le taʻua o o latou suafa?

13. O ā tulaga e ono avea o ni mataupu talafeagai tatou te faaaofia i a tatou tatalo totino?

¹³ O le mea saʻo lava ia, e ao ona tatou ʻalofia le isuisu fua i mataupu totino a isi, peitaʻi ua fetaui mo a tatou tatalo ona faaalia atu ai se naunau moni ia i latou tatou te iloa ma alolofa i ai. (1 Timoteo 5:13; 1 Peteru 4:15) Atonu ua teʻa se uso mai sana galuega, ma e lē mafai ona tatou avatua ia te ia se isi galuega. Peitaʻi, i a tatou tatalo totino e mafai ona tatou taʻua ai lona suafa ma taʻua patino ai lona faafitauli. (Salamo 37:25; Faataoto 10:3) Po o tatou iloa ea se tuafafine nofofua o lē ua faasolo ina matua ae leʻi faia lava sana tane ma se fanau talu ai lona maumauaʻi ina ia faaipoipo atu “tau lava i le ua i le Alii”? (1 Korinito 7:39) I au lava tatalo totino, aiseā e te lē ole atu ai ia Ieova ina ia faamanuia mai i si na tuafafine ma fesoasoani ia te ia e faaauau pea ona faamaoni i lana auaunaga? O se isi faaaʻoaʻoga, atonu ua avatu e ni toeaina se toʻalua se fautuaga i se uso na faia se measesē. Aiseā e lē taufai taʻua ai e i laʻua uma le igoa o lena uso i a la tatalo totino mai lea taimi i lea taimi?

14. E faapefea ona fesootaʻi tatalo patino i le fesoasoani atu i isi?

¹⁴ O loo anoanoaʻi le mau avanoa mo oe ina ia faaaofia i au tatalo totino tagata taʻitoʻatasi e te iloa o loo latou manaʻomia le lagolagosua a Ieova, lana faamaisega, le atamai, ma le agaga paia, po o so o se tasi o ona uiga e fua mai ai. E te ono lagona le faatapulaa mai o ni mea faitino po o ni fesoasoani tuusaʻo e mafai ona e saunia, ona o le mamao po o isi lava tulaga. Ae ia aua lava neʻi galo ona e tatalo mo ou uso ma tuafāfine. E te iloa o loo latou mananaʻo e savavali e tusa ma Ieova, peitaʻi atonu o loo latou manaʻomia moni lava se fesoasoani e faia ai lena mea e faavavau. O se ki i lau fesoasoani atu, o au tatalo ia.—Salamo 18:2; 20:1, 2; 34:15; 46:1; 121:1-3.

Ia Galulue e Faamalosiau i Isi

15. Aiseā e tatau ai ona tatou naunau i le vaega faaiʻu o le Kolose?

¹⁵ O le mea moni, o tatalo faatauanau, ma faapatino, ua na o lea le auala e te fesoasoani atu ai i isi, aemaise lava i latou e vavalalata mai ma pele ia te  oe. O loo faamanino mai lena mea i le tusi o Kolose. E toʻatele tagata popoto faapitoa ua latou manatu faapea, ina ua uma ona taʻu mai e Paulo le taʻiala faaleaʻoaʻoga ma fautuaga aogā, ona ia toe faaopoopo mai lea na o ni faamālō po o ni alofaʻaga totino. (Kolose 4:7-18) I se faaeseesega, ua uma ona tatou iloa o lenei vaega faaiʻu o le tusi o loo iai fautuaga e sili ona aogā, ma e tele foʻi isi mea tatou te aʻoaʻoina mai lenei vaega.

16, 17. O le ā e mafai ona tatou fai atu ai e faatatau i uso o loo taʻua i le Kolose 4:10, 11?

¹⁶ Na tusi mai Paulo e faapea: “O loo alofa atu ia te outou o Aritako, o le ua ma faatasi ma aʻu i le fale puipui, atoa ma Mareko, o le aiga ia o Panapa, (na poloaiina outou ia te ia, a alu atu o ia ia te outou, ia outou talia o ia;) o loo alofa atu foi Iesu, o le ua igoa ia Iuso, o i le au peritomeina i latou; na o i latou lava na galulue faatasi ma aʻu i le malo o le Atua, na fai foi i latou ma faamatalaloto mai ia te au.”—Kolose 4:10, 11, LT.

¹⁷ O iinā na faailoa ai e Paulo nisi uso o ē sa tatau ona mātauina faapitoa. Na ia taʻua faapea sa aofia i latou nei i ē peritomeina, e mai tupuaga faa-Iutaia. Sa toʻatele tagata Iutaia peritomeina i Roma, ma e iai nisi na liliu e avea ma Kerisiano. Peitaʻi, o i latou na sa taʻua e Paulo sa latou fesoasoani ane ia te ia. E foliga mai, sa latou leʻi faatalatū e auaumea atu i Kerisiano e tupuga mai Nuu Ese, ma atonu ua latou matuā fiafia e auaufaatasi ma Paulo i le talaʻi atu i Nuu Ese.—Roma 11:13; Kalatia 1:16; 2:11-14.

18. Na faapefea ona faamālō atu Paulo i nisi o ē na iai faatasi ma ia?

¹⁸ Mātau foʻi le faamatalaga a Paulo: “Na fai foi i latou ma faamatalaloto mai ia te au.” Sa ia faaaogā se upu Eleni lea e na o le faatasi lava ona aliali mai iinei i le Tusi Paia. E toʻatele tagata faaliliu latou te faaaogā i ai le upu “faamāfanafanaloto.” Peitaʻi, e iai se isi upu Eleni (pa·ra·ka·le’o) e sili atu ona faaaogā soo i ai le upu “faamāfanafana.” O le upu la lena sa faaaogā e Paulo i isi taimi i lenei lava tusi,  ae lē i le Kolose 4:11.—Mataio 5:4; Galuega 4:36; 9:31; 2 Korinito 1:4; Kolose 2:2; 4:8.

19, 20. (a) O le ā le uiga o le faaupuga lea na faatatau atu e Paulo i uso o ē na fesoasoani ane ia te ia i Roma? (e) I ā auala atonu na fesoasoani ai na uso ia Paulo?

¹⁹ O i latou o ē na taʻua e Paulo o latou igoa atonu sa tele nisi mea na latou faia na i lo le tau ina faamāfanafana atu i a latou upu. O le faaupuga Eleni ua faaaogā mo le “faamatalaloto” i le Kolose 4:11 sa iai nisi taimi na faaaogā ai i mau masani mo se vailaau e faateʻa ai se mafatiaga. Ua faitauina faapenei le New Life Version: “Maʻeu se avea o i latou ma fesoasoani ia te aʻu!” E faaaogā e le Today’s English Version le fuaitau: “Ua avea i latou o se fesoasoani sili ia te aʻu.” O le ā se mea atonu na faia e na uso Kerisiano sa nonofo latalata atu ia Paulo e fesoasoani ai ia te ia?

²⁰ Sa mafai e Paulo ona ia talia ni tagata e asiasi atu ia te ia, ae sa tele mea sa lē mafai ona ia faia, e pei o le faatauina mai o mea autū sa ia manaʻomia—meaʻai ma lavalava mo le tau mālūlū. O le a faapefea ona ia maua ni tusi tāʻai mo ana suʻesuʻega pe faatau mai ni mea e faaaogā i ana tusitusiga? (2 Timoteo 4:13) Faamata ea la e te lē o iloa ai le fesoasoani atu a na uso ia Paulo mo ona manaʻoga, le faia o na mea autū e pei o faatauga ma le faia o isi feʻau mo ia? Atonu sa ia manaʻo e asia ma faalaeiau atu i se faapotopotoga patino. Ona o lea sa saisaitia, na lē mafai ai ona ia faia faapea, o lona uiga la, atonu sa faataunuu e na uso asiasiga a Paulo, na latou feaveaʻia feʻau, ma toe momoli mai ia te ia ni lipoti. Maʻeu se faamatalaloto!

21, 22. (a) Aiseā e tatau ai ona tatou naunau i upu o i le Kolose 4:11? (e) O ā nisi auala e mafai ona tatou faatatauina i ai le faaaʻoaʻoga a i latou na iai faatasi ma Paulo?

²¹ O le mea na tusia e Paulo e faatatau i le avea “ma faamatalaloto” ua faamalamalama mai ai le auala e mafai ona tatou fesoasoani atu ai i isi. Atonu o loo latou savavali e tusa ma Ieova i ana tapulaa o amioga tatau, o loo auai i sauniga faa-Kerisiano, ma o loo auai i le galuega talaʻi. Ona o lena tulaga, ua tatau ai ia i latou a tatou upu o le talisapaia. Ae pe mafai ea, ona tatou faia nisi mea e sili atu, ina ia avea ai i tatou “ma faamatalaloto” e pei ona iai na uso ia Paulo?

²² Pe afai e te silafia se tuafafine o lē sa ia tausisia ma le atamai le fautuaga o i le 1 Korinito 7:37 ae ua  lē o iai nei sona aiga e vavalalata atu ia te ia, faamata e mafai ona e faaaofia o ia i nisi o gaoioiga a lou aiga, pe atonu o le valaaulia o ia tou te faiʻaiga faatasi pe auai mai i sina faatasitasiga laʻitiiti a ni uō po o ni tauaiga? Ae ā pe a valaaulia o ia tou te faimalaga faatasi ma le tou aiga i se tauaofiaga pe i se faiga mālōlōga? Pe fesili atu foʻi ia te ia pe fia sau lua te ō faatasi pe a avanoa e fai sau faatau. O fesoasoani foʻi faapena e mafai ona tatou ofoina atu i ni tuafāfine po o uso ua maliliu a latou paaga, pe atonu o i latou ua lē o toe mafai nei ona aveina se taavale. E mafai ona e iloa le tauia o le faalogologo atu i a latou tala o mea na tutupu ia i latou po o le fesili atu mo ni o latou manatu i ni mea masani e pei o le filifilia o se fualaau ʻaina lelei po o lavalava mo le fanau. (Levitiko 19:32; Faataoto 16:31) O se āuga masani e ono faateleina ai lou māfana atu ia i latou. Ona latou lagona ai lea o le saʻoloto e talosaga mai ia te oe mo sau fesoasoani pe a latou manaʻomia le aumai o se fualaau mai le fale talavai, po o nisi mea faapena. Atonu sa faamatalaloto atu uso o ē na iai faatasi ma Paulo i Roma, i se tulaga aogā e pei foʻi ona e mafai ona faia. I lena taimi ma i le taimi nei foʻi, e avea ai ma faamanuiaga faaopoopo le iai o sootaga o le alofa ua faamalosia, ma ua faamausalīina atili ai la tatou filifiliga ina ia auauna autasi atu ma le faamaoni ia Ieova.

23. O le a lelei mo i tatou taʻitoʻatasi ona faaalu se taimi e fai ai le ā?

²³ E mafai e i tatou taʻitoʻatasi ona toe tomanatu i tulaga e pei ona taʻua i lenei mataupu. Ua na o ni faaaʻoaʻoga, peitaʻi ua avea o ni toe faamanatu mai ia i tatou o tulaga moni e mafai ai ona avea atili i tatou “ma faamatalaloto” i o tatou uso ma tuafāfine. O le manatu e lē faapea ia tatou faataʻitaʻi atu i uiga o tagata o loo faia ni galuega agaalofa. Sa lē o le sini lena o uso ia o loo taʻua i le Kolose 4:10, 11. Sa avea i latou o ni ē “galulue faatasi . . . i le malo o le Atua.” O āuga faamatalaloto e fesootaʻi tuusaʻo atu lava i lena mea. Talosia e faapena foʻi le tulaga o tatou iai.

24. O le ā le māfuaaga autū tatou te tatalo ai mo isi ma saʻili e faamatalaloto atu i ai?

²⁴ Tatou te taʻua igoa o isi i a tatou tatalo totino ma faia ni taumafaiga ia faamatalaloto ai ia i latou ona o lenei māfuaaga: Tatou te talitonu o loo mananaʻo o tatou uso ma tuafāfine ia “savavali e tusa ma [Ieova], ina ia fiafia mai o ia . . . i mea uma.” (Kolose 1:10) O lena mea moni e fesootaʻi atu i se isi mea lea na taʻua e Paulo ina ua ia tusi e faatatau i tatalo a Epafara e uiga i uso i Kolose, ina ia latou ‘tutumau atoatoa ma le mautinoa.’ (Kolose 4:12, NW ) E mafai faapefea ona tatou ausia totino lena mea? Seʻi o tatou vaai.

[Faamatalaga pito i lalo]

Pe na E Mātauina?

• E ono mafai faapefea ona tatou fesoasoani atili atu e ala i a tatou tatalo totino?

• I le ā le uiga na avea ai nisi Kerisiano “ma faamatalaloto” ia Paulo?

• O ā ituaiga tulaga e mafai ona avea ai i tatou “ma faamatalaloto”?

• O le ā le sini e māfua ai ona tatou tatalo mo o tatou uso ma tuafāfine, ma saʻili e faamatalaloto ia i latou?

[Fesili mo le Suʻesuʻega]

[Faamatalaga i le itulau 18]

Pe mafai ona tou faaaofia ma se isi Kerisiano i tafaoga a le tou aiga?

[Faamatalaga i Ata]

Courtesy of Green Chimney’s Farm