Mauaina o le Saogalemu i se Lalolagi ua Tumu i Lamatiaga

E MAFAI ona mataʻutia le savalivali i se laufanua o loo tatao ai ni maina. Ae pe lē fesoasoani ea le iai ia te oe o se faafanua ua faailoa atu ai nofoaga o loo iai maina? E lē gata i lea, seʻi faapea ua uma ona toleniina oe i le auala e te mātaulia gofie ai ituaiga eseese o maina. E manino lava, o se poto faapena o le a telē se faaitiitia ai o le lamatiaga o le faamanuʻalia o oe po o le oti foʻi.

E mafai ona faatusaina le Tusi Paia i lena faafanua faatasi ai ma le toleniina i le auala e mātaulia ai maina. Ua iai i le Tusi Paia le atamai e matuā silisili lava pe a oo mai i le tulaga o le ʻalofiaina o lamatiaga ma le taulimaina o faafitauli o loo tutupu aʻe i le olaga.

Mātau foʻi le folafolaga faalaeiau lenei o loo maua i le Faataoto 2:10, 11: “A oo le poto [atamai] i lou loto, ma ua mālie ia te oe le atamai; e faafeao le mafaufau ia te oe; e leoleo ia te oe le faautauta.” O le atamai ma le faautauta o loo taʻua iinei e lē tupu mai se tagata ae tupu mai le Atua. “A o lē faalogo mai [i le atamai faale-Atua], e nofo o ia ma le fifilemu; e filemu o ia, e le fefe i se mea leaga.” (Faataoto 1:33) Seʻi o tatou vaai pe mafai faapefea e le Tusi Paia ona faateleina lo tatou saogalemu ma fesoasoani mai ia i tatou e ʻalofia le tele o faafitauli.

ʻAlofiaina o Faalavelave Mataʻutia

O fuainumera faamaumauina na faasalalauina talu ai nei e le Faalapotopotoga o le Soifua Mālōlōina a le Lalolagi (WHO) ua faaalia ai o le aofaʻiga o tagata ua maliliu i le lalolagi aoao i tausaga taʻitasi ona o faalavelave tau taavale e tusa ma le 1,171,000. E toetoe lava 40 miliona isi ua manunuʻa, ma le silia laʻitiiti i le 8 miliona ua pagatia i ni tulaga ua lē toe atoatoa ai le malosi o le tino mo se taimi faaumiumi.

E ui e lē mafai ona iai se matuā saogalemu atoatoa a o malaga i se taavale, peitaʻi e mafai ona faaumiumi lo tatou saogalemu totino pe a tatou usitaia tulafono tau taavale. I le faasino atu i faipule faalemalo, o ē ua faavaeina ma faamalosia tulafono tau taavale, ua faapea mai ai le Tusi Paia: “Ia usiusitai tagata uma i faipule silisili.” (Roma 13:1) O tagata avetaavale e utagiaina lenei fautuaga latou te faaitiitia le lamatiaga o le tupu o se faalavelave, lea e masani ona oo ai i iʻuga sili ona mataʻutia.

O le isi uunaʻiga mo le aveina saogalemu o taavale, o le faaaloalo lea i le ola. Ua faapea mai le Tusi Paia e uiga ia Ieova le Atua: “O loo ia te oe le puna o le ola.” (Salamo 36:9) O le ola la o se meaalofa mai le Atua. O lona uiga, e leai sa tatou aiā e aveesea ai lena meaalofa mai so o se tasi pe faaalia foʻi le lē faaaloalo mo le ola, e aofia ai foʻi ma o tatou lava ola.—Kenese 9:5, 6.

E masani lava, o le faaaloalo mo le ola faaletagata e aofia ai le faamautinoa o loo saogalemu a tatou taavale ma o tatou fale i se tulaga talafeagai e mafai ai. I Isaraelu anamua, sa avea le saogalemu  ma se itu na sili ona faamuamua i vala uma o le olaga. Mo se faaaʻoaʻoga, pe a fausia se fale, sa faatonuina e le Tulafono a le Atua faapea o le taualuga o le fale—o se nofoaga sa masani ona faifaimea ai le aiga—e tatau ona puipui i se pā. “Ia e fai se puipui e sio ai i luga o lou fale, neʻi e faamaligiina le toto talu lou fale, pe afai e paū ai se tasi.” (Teuteronome 22:8) Pe afai na paʻū se tasi ona sa leʻi faatinoina lenei tulafono mo le saogalemu, sa tuuaʻia e le Atua le tagata e ana le fale. E mautinoa lava, o le faatatauina o le mataupu silisili alofa sa aumaia i lenei tulafono o le a faaitiitia ai faalavelave faafuaseʻi i le nofoaga o galuega pe oo lava foʻi i taimi o faafiafiaga.

Tetee Atu i Mea Mataʻutia ua Puleaina Ai

I se lipoti a le WHO, ua sili atu nei ma le piliona tagata ulaula i le lalolagi, ma e tusa ma le fā miliona tagata e maliliu i le tausaga ona o le tapaa. Ua faatalitalia le oso aʻe o lenei aofaʻiga i le tusa ma le 10 miliona i le isi 20 i le 30 tausaga o sosoo mai. E faitau miliona isi tagata ulaula, faapea foʻi tagata o ē faaaogāina fualaau faasāina e “faafiafia ai,” o le a latou faaleagaina lo latou soifua mālōlōina ma le tulaga lelei o le olaga ona ua pulea e na vailaau.

E ui ina lē taʻu patino mai e le Afioga a le Atua le faaaogāina o le tapaa ma fualaau faasāina, peitaʻi o ona mataupu silisili e mafai ona puipuia ai i tatou mai nei masaniga. Mo se faataʻitaʻiga, ua fautua mai le 2 Korinito 7:1: “Ia tatou faamamā ia te i tatou i mea uma e leaga ai le tino atoa ma le agaga.” E mautinoa lava, o le tapaa ma fualaau faasāina e faaleaga, pe faatamaʻia ai, le tino i le tele o vailaau leaga o loo iai. E lē gata i lea, e finagalo le Atua ina ia “paia” o tatou tino, o lona uiga ia lē ponā ma ia mamā. (Roma 12:1) Pe e te lē ioe ea o le faatatauina o nei mataupu silisili o le a faaitiitia ai se lamatiaga tele i le olaga o se tasi?

Manumalo Mai Masaniga e Lamatia Ai

E toʻatele tagata ua matuā leai lava so latou paleni i le ʻai ma le inu. O āuga o le ʻai tele e mafai ona aofia ai le maʻi suka, le kanesa, ma le maʻifatu. O le faaaogāsesē o le ʻava malosi e aumaia ai isi faafitauli e pei o le pulea e le ʻava, le maʻi ate, o aiga malepelepe, ma faalavelave tau taavale. Ae a tuu mai foʻi i le isi itu, o le soona faaitiitia ma le lē talafeagai o le ʻai e mafai foʻi ona oo atu ai i nisi lamatiaga o le ola, e pei o le lē toe fiafia e ʻai lelei ma oo ai ina paee iviivia le tino.

E ui e lē o se tusi faafomaʻi le Tusi Paia, ae o loo aumaia ai fautuaga tuusaʻo i le manaʻoga mo le fuafua tatau o le ʻai ma le inu. “Ia e faalogo mai, loʻu atalii e, ma ia e poto; ma e taʻitaʻi tonu lou loto i le ala. Aua neʻi fai oe ma so latou o e inu tele i uaina; ma e ua aai tetele i manu; auā o lē inu tele ma ʻai tele e faamativaina o ia.” (Faataoto 23:19-21) Peitaʻi, ua faapea mai le Tusi Paia o le ʻai ma le inu e tatau ona faafiafiaina ai. “Ia taitasi le tagata ma ʻai, ma inu, ma fiafia i mea lelei i ana galuega uma; o le mea foaiina mai lea e le Atua.”—Failauga 3:13.

E fautuaina foʻi e le Tusi Paia le iai o se vaaiga paleni i le faamalosiina o le tino, i le faamautinoa mai faapea, “e itiiti le aoga o le faamasani i la le tino.” Ae na toe faaopoopo mai: “O le amio Atua e aoga lea i mea uma lava, o loo i ai le mea ua folafolaina mai i la le olaga nei atoa ma lē atali.” (1 Timoteo 4:8, LT) E te ono fesili mai, ‘E faapefea ona aogā le amio Atua i le taimi lenei?’ E tele lava auala. E lē gata e faaopoopo mai ai se tulaga faaleagaga e tāua tele i le olaga o se tasi, ae o le amio Atua foʻi e faaolaola atili ai uiga aogā e pei o le alofa, olioli, filemu, ma le pulea totino—o na uiga uma e mafai ai ona maua se vaaiga mautinoa ma se soifua mālōlōina lelei.—Kalatia 5:22, 23.

Āuga Tigā o Amioga Lē Mamā

I aso nei, e faitau miliona tagata ua latou lafoaʻia faasāsāga uma tau i amioga mamā. O le faamaʻi o le AIDS ua avea ma se tasi o āuga. I se lipoti mai le WHO, e silia ma le 16 miliona tagata ua maliliu talu ona amata mai le faamaʻi o le AIDS, ma i le taimi nei, e tusa ma le 34 miliona ua aafia i le HIV, o le vairusi e faapogaia le AIDS. O le toʻatele o tagata ua mafatia i le AIDS na aafia ona o le feusuaʻi solo, e ala mai nila ua pisipisia sa faaaogā e tagata  ua pulea e fualaau faasāina pe ala mai foʻi i ni tuiga toto mai ia i latou ua aafia.

O isi āuga o amioga lē pulea e aofia ai le faamaʻi o totogasā (herpes), le maʻiafi (gonorrhea), atefefete o le ituaiga B ma le C, ma le sifili. E ui sa leʻi faaaogāina i le taimi anamua o le Tusi Paia na igoa faafomaʻi, ae sa iloa e tagata i lena vaitaimi, totoga e āfaina i nisi o faamaʻi pipisi ona o feusuaʻiga sa taatele i lena taimi. Mo se faaaʻoaʻoga, i le Faataoto 7:23 o loo faamatalaina ai le āuga mataʻutia o le faitaaga e faapei o se ‘u e ati i le ate.’ O le faamaʻi o le sifili, e pei foʻi o le atefefete, e masani lava ona aafia ai le ate. E maʻeu lava la le talafeagai ma le alofa o fautuaga a le Tusi Paia mo Kerisiano ina ia latou ‘faamamao mai le toto ma le faitaaga’!—Galuega 15:28, 29.

Le Mailei o le Tuʻinanau i Tupe

I se taumafaiga o le fia vave mauʻoa, e toʻatele tagata latou te faia ni gaoioiga i a latou tupe i se tulaga e telē se lamatiaga o iai. E faanoanoa ai, auā o le uia o na lamatiaga e masani lava ona taʻitaʻia atu i le maʻimau o tupe pe matuā faaleagaina ai lava. Peitaʻi ane, mo le auauna a le Atua, ua faapea mai le Tusi Paia: “E lelei ina faamalosi o ia i galuega a ona lima i mea aoga, ia maua e ia se mea e avatu i ē ua matitiva.” (Efeso 4:28) O le mea moni, e lē o taimi uma lava e mauʻoa ai se tagata e galue mamafa. Peitaʻi, e na te maua le filemu o le mafaufau, lona faamamaluina o ia lava, ma atonu e oo lava foʻi i le mauaina ai o tupe na te foaʻi atu mo se mea ua talafeagai i ai.

Ua lapataʻi mai le Tusi Paia: “O e manao i le fia mauoa, e maua i latou i le faaosoosoga, ma le mailei, ma tuʻinanau e tele e valea ai ma leaga ai, o mea ia e goto ai tagata i le fanoga ma le malaia. Auā  o le manao i tupe, o le pogai lea o mea leaga uma lava; ua mananao tele i ai nisi, . . . ua tuʻia ai ua ati i latou e i latou i puapuaga e tele.” (1 Timoteo 6:9, 10) E lē faafitia le mea moni, o le toʻatele “o e manao i le fia mauoa” ua oo lava ina mauʻoa. Ae i ā iʻuga? Pe lē moni ea e mafatia ai lo latou soifua mālōlōina, o latou aiga, lo latou itu faaleagaga, e oo foʻi ina lē toe lelei ai sa latou moe?—Failauga 5:12.

E iloa lelei e le tagata atamai faapea “e le ola se tasi i le tele o ana mea ua ia te ia.” (Luka 12:15) E manaʻomia tupe ma nisi meatotino i le tele o sosaiete a tagata. Auā i le Tusi Paia foʻi, o loo taʻu mai ai ‘ua fai tupe ma mamalu [“puipuiga,” NW],’ peitaʻi ua faapea mai foʻi “o le aoga lenei o le poto [“atamai,” NW] ua maua, e ola ai e ua i ai.” (Failauga 7:12) I le lē pei o tupe, o le poto saʻo ma le atamai e mafai ona fesoasoani ia i tatou i vala uma lava, aemaise i mataupu o loo aafia ai lo tatou olaga.—Faataoto 4:5-9.

Pe a na o le Atamai e Puipuia i Tatou

O le atamai moni o le a lē pine ona ‘ola ai lea o ē ua i ai’ i se tulaga e lē mafaatusalia—o se puipuiga mai le “puapuaga tele” ua matuā lalata mai lava, pe a faaumatia e le Atua o ē amioleaga. (Mataio 24:21) E tusa o le tala a le Tusi Paia, i lena taimi, o le a lafoaʻi e tagata a latou tupe i magaala e pei o se “mea leaga.” Aiseā? Auā o le a tigā le auala o le a faatoʻā latou iloa ai, e lē mafai e auro ma ario ona faatauina mai mo i latou le ola pe a oo “i le aso o le ita o Ieova.” (Esekielu 7:19) I le isi itu, o “le motu o tagata e toatele,” o ē na latou ‘toloʻaʻi ma le [atamai] oa i le lagi’ e ala i le faamuamuaina o manaʻoga faaleagaga i o latou olaga, o le a latou manuia mai le ʻoa mautinoa sa latou faaputuina ma maua ai le ola e faavavau i se lalolagi parataiso.—Faaaliga 7:9, 14; 21:3, 4; Mataio 6:19, 20.

E mafai faapefea ona tatou maua lenei lumanaʻi saogalemu? Ua tali mai Iesu: “O le uiga lenei o le ola e faavavau, ia latou mauaina pea le poto e uiga ia te oe, le Atua moni e toʻatasi, ma lē ua e auina mai, o Iesu Keriso lea.” (Ioane 17:3, NW) E faitau miliona tagata ua latou maua lenei poto i le Afioga a le Atua, le Tusi Paia. E lē gata ua maua e na tagata se faamoemoe ofoofogia mo le lumanaʻi ae ua latou tofo foʻi i sina vaega o le filemu ma le saogalemu i le taimi nei. Ua pei lava ona taʻua e le faisalamo: “Ou te taoto, ma ou moe filemu; auā o oe Ieova e, na o oe lava, ua ou nofo ai ma le filemu.”—Salamo 4:8.

Pe mafai ea ona e mafaufauina se isi puna o faamatalaga e mafai ona fesoasoani ia te oe e faaitiitia ai lamatiaga i lou olaga ma lou soifua mālōlōina, e pei o le tele lea o loo fesoasoani mai ai le Tusi Paia? E leai se isi tusi o iai se pule e pei o lea e i le Tusi Paia, ma e leai se isi tusi e mafai ona fesoasoani ia te oe ina ia maua ai le saogalemu moni i le lalolagi i aso nei ua tumu i lamatiaga. Aiseā e te lē suʻesuʻeina ai atili?

[Pusa/Ata i le itulau 6]

Soifua Mālōlōina ma le Saogalemu Sili Ona Lelei—Ona o le Fesoasoani a le Tusi Paia

Ina ia sola ese mai tulaga moni ua iai le olaga, na fai ai ma masani a se tasi tamaʻitaʻi talavou e igoa ia Sieni * lona faaaogāina o mariuana, tapaa, cocaine, amphetamines, LSD, ma isi fualaau faasāina. Sa malosi foʻi lana inu i le ʻava malosi. Na taʻua e Sieni faapea o le tulaga foʻi lea sa iai lana tane. Sa matuā faigatā lava ona iloa atu se lumanaʻi mautinoa mo i laʻua. Ona feiloaʻi lea o Sieni i Molimau a Ieova. Sa amata ona ia auai i sauniga faa-Kerisiano ma faitauina Le Olomatamata ma lona soā mekasini, le Ala Mai!, lea na ia tufa atu foʻi i lana tane. Na amata e i laʻua uma ona suʻesuʻeina le Tusi Paia ma Molimau. A o la faatupuina aʻe se agaga talisapaia mo tapulaa maualuluga a Ieova, na la lafoaʻia uma ai fualaau ma vailaau faasāina sa la faaaogā. O le iʻuga? Na tusi mai Sieni i ni tausaga mulimuli ane: “Ua aumaia e lo ma olaga fou ia i maʻua le olioli tele. Ou te matuā faafetai ia Ieova ona o le mana o lana Afioga e faamamāina ai mea, faapea le olaga saʻoloto ma le mālōlōina ua mafai nei ona ma ola ai.”

O le aogā o le avea ma se tagata faigaluega faamaoni ua faataʻitaʻia lelei mai i le tulaga o Kurt, o lē sa aofia i lana galuega le vaavaaia o le tulaga o komepiuta. Ina ua manaʻomia ni masini fou, sa lafo atu e le pule o Kurt ia te ia le matafaioi o le faatau mai o na mea i se tau lelei. Sa suʻe e Kurt se kamupani o loo talafeagai ana tau, ona faia lea o se maliega i le tau. Peitaʻi ane, na sesē ona tusia e le tagata o loo faatauina atu oloa a le kamupani le tau o oloa, ma na matuā paʻū maulalo le tau o mea i le toetoe lava $40,000 Amerika na i lo le tau na la malilie i ai. I le mātauina o le mea sesē, na toe vili atu ai Kurt i le kamupani, ma na taʻu ane e le pule faapea, o lea ua 25 tausaga o faigaluega, ae na te leʻi iloa lava muamua se ituaiga o faamaoni faapea. Na faamalamalama atu e Kurt i ai faapea sa taʻitaʻia lona lotofuatiaifo e le Tusi Paia. O le iʻuga, na talosaga ane le pule mo ni kopi se 300 o se Ala Mai! lea na talanoaina ai le faamaoni i faiga faapisinisi, ina ia mafai ona ia tufa atu i ana aumea faigaluega. Ae mo Kurt, na avea lona faamaoni ma itu na siitia ai lona tulaga i le galuega.

[Faamatalaga pito i lalo]

[Ata i le itulau 7]

“O aʻu o Ieova, o lou Atua, o loo aʻoaʻo ia te oe i mea e aoga.”—ISAIA 48:17