Lipoti a Ē Faalauiloa le Malo

Talileleia e Latvia le Tala Lelei

UA FAAALIA manino i le Tusi Paia e faapea, o le finagalo o le Atua “ia faaolaina o tagata uma lava, ma ia oo ina iloa lelei le upu moni.” (1 Timoteo 2:4) O i latou sa tele tausaga o taofiofia mai le mauaina o le avanoa e faalogo ai i le tala lelei, ua faalogo i le taimi nei! I Latvia, e pei foʻi o isi vaega o le lalolagi, ua tali lelei mai ai tagata e eseese ō latou matutua mai talaaga eseese i le feʻau, e pei ona faaalia i mea na tutupu ia o loo mulimuli mai.

• I Rēzekne, o se aai i le itu i sasaʻe o Latvia, na fesili atu ai se tinā ma lana tama teine talavou i se fafine i le auala mo ni faasinoga. Ina ua uma ona faamatala atu ia i laʻua, na ofo atu ai e le fafine, o se Molimau a Ieova, se valaaulia ia i laʻua ina ia auai i sauniga a Molimau.

Talu ai o le tinā ma lana tama e ese le naunau i lotu, o lea na la filifili ai e ō i le sauniga. A o malaga atu, na la faia ai se maliega e faapea, afai e la te iloa se mea e lē talafeagai iinā, o le a la ō ese vave loa. Ae peitaʻi, ona sa matuā manaia le sauniga, sa leʻi oo ane ai lava ia i laʻua se manatu e ō ese. Na la talia se ofo e suʻesuʻeina le Tusi Paia, ma amata ona auai e lē aunoa i sauniga. I le na o le tolu masina, ae faaalia loa lo la faanaunauga e fia auai i le galuega talaʻi ma aloalo atu mo le papatisoina o i laʻua.

• I se aai i Latvia i sisifo, na feiloaʻi ai se Molimau ma Ana o lē ua 85 tausaga o lona soifuaga, o lē na faaalia le naunau moni ma talia se suʻesuʻega faale-Tusi Paia. Na tetee malosi ia te ia lana tama teine ma isi tagata o le aiga. Ae sa leʻi faatagaina e Ana na teteega po o lona tulaga matua ma le lē lelei o le soifua mālōlōina e taofia o ia mai le faaauauina pea o lana suʻesuʻega faale-Tusi Paia.

I le tasi aso, na taʻu atu ai e Ana i lana tama teine o ia o le a papatiso. Na tali atu le teine: “E te papatiso loa, ona ou aveina lea o oe e tuu i se fale e tuu ai tagata matutua.” Ae peitaʻi, sa leʻi faavaivaia ai Ana i lenei taufaamataʻu ane. Ona o lona tulaga vaivai i le tino, na papatisoina ai o ia i lona lava fale.

O ā uiga faaalia o le tama a Ana i lenei mea? Na suia ona uiga, ma sa ia saunia se taumafataga faapitoa mo lona tinā ina ua uma le papatisoga. Ona ia fesili atu lea i lona tinā, “O lea ua uma nei ona e papatiso, o le ā la se faalogona ua oo ia te oe?” O le ā le tali a Ana? “Ua pei lava o se tagata fou!”

• Ia Tesema 1998, na feiloaʻi ai ni Molimau se toʻalua ma se alii ofisa ua litaea mai le vaegaʻau a le atunuu lea sa avea muamua ma le Soviet Union. Talu ai sa ia talitonu i Lē na Foafoaina Mea, o lea na ia talia ai se suʻesuʻega faale-Tusi Paia, ma mulimuli ane na auai ai ma lana avā. Sa vave lava ona la agaʻigaʻi i luma ma e leʻi pine ae avea ma tagata talaʻi e leʻi papatisoina. I le tau māfanafana na sosoo ai, na papatisoina ai lē na avea muamua ma alii ofisa. O le naunau tele o lenei ulugalii i mea faaleagaga sa avea ma faamalosiau ia i latou uma i le faapotopotoga. E lē gata i lea, na faaalu foʻi lo la taimi i le galuega o le toe faafouina o se fale o se aiga e avea ma se Maota o le Malo manaia.