Ua Lūlūina e se Fai Matatioata se Fatu

O le ā le fesootaʻiga o taumafaiga a se fai matatioata i Lviv, i Ukraine, ma le faavaeina o se faapotopotoga o Molimau a Ieova e tautatala i le gagana Rusia i Haifa, i Isaraelu pe tusa ma le 1,200 maila [2,000 kilomita] le mamao ma ni nai atunuu e vā ai? O le tala lenei ua faaalia ai le tāua o le faamatalaga a le Tusi Paia o loo taʻua i le Failauga 11:6: “O le taeao ia e lulu ai au saito, aua foi le mapu lou lima i le afiafi; auā e te le iloa po o le fea e manuia.”

E AMATA la tatou tala i le 1990 a o nofo Ella, o se tamaʻitaʻi talavou e tupuga mai tagata Siū, i Lviv. Sa sauniuni Ella ma lona aiga e malaga atu ma nonofo mau i Isaraelu. A o toeitiiti lava oo i le aso e malaga ese atu ai, na alu atu ai Ella e vaai se tagata fai matatioata ma o se tasi o Molimau a Ieova. I le taimi lena, sa faasā ai le galuega a Molimau a Ieova i Ukraine. E ui i lea, na tausolomua le fai matatioata i le tufaina atu o ona talitonuga e faavae mai le Tusi Paia ia Ella. Na faateʻia e le tamāloa ia Ella e ala i le faapea atu e iai se  suafa totino o le Atua. O iinā na oso aʻe ai loa le fia iloa atili o Ella, ma na amata ai loa ma se talanoaga faale-Tusi Paia matagofie.

Na matuā fiafia tele Ella i le talanoaga lea na ia talosaga atu ai mo se isi talanoaga i le vaiaso e sosoo ai ma le isi ina ua māeʻa lena. Ua tuputupu aʻe pea lona naunau, ae sa iai le faafitauli. Ua vave mai lava le taimi e malaga atu ai le aiga i Isaraelu. Ae o loo tele pea isi mea e ao ona aʻoaʻoina e Ella! Ina ia faaaogā tatau le taimi o loo totoe, na ia talosaga atu ai mo se suʻesuʻega faale-Tusi Paia e faia i aso uma lava seʻia oo i le taimi e malaga ese atu ai o ia. E ui e leʻi toe faaauauina le suʻesuʻega ina ua ia faatoʻā taunuu atu lava i Isaraelu, ae ua mauaa le fatu o le upu moni i lona loto. I le faaiʻuga o le tausaga, na ia toe suʻesuʻeina ai ma le filigā le Tusi Paia.

Na pā aʻe le taua i le Vaifagaloa o Peresia, ma na osofaʻia Isaraelu e pomu faatonutonu alu mamao a Irake. Na avea lenei ma mataupu e talanoaina pea lava pea e tagata. I se tasi aso i se supamaketi, na faalogo ai Ella o loo talanoa i le gagana Rusia se aiga e leʻi leva ona malaga atu. E ui lava o loo ia suʻesuʻeina pea le Tusi Paia, ae na oo atu Ella i le aiga ma tufa atu ia i latou le folafolaga a le Tusi Paia e uiga i se lalolagi filemu. O le iʻuga, na auai uma atu i le suʻesuʻega faale-Tusi Paia a Ella, le tinā matua o le aiga, o Galina; o lana tama teine o Natasha; o Sasha (po o Ariel) le tama tama a Natasha; ma Ilana le tama teine a Natasha.

O Sasha le uluaʻi sui o le aiga na oo i le tulaga o le papatisoina—e ui i le tele o tofotofoga. E ui o ia o se tamaitiiti atamai, ae na tuliesea o ia mai le aʻoga ona e lē faatagaina o ia e lona lotofuatiaifo faa-Kerisiano e auai i aʻoga mo le vaegaʻau, o se vaega manaʻomia lea o mataupu i le aʻoga. (Isaia 2:2-4) Na oo atu le mataupu e uiga ia Sasha i le Faamasinoga Maualuga a le malo o Isaraelu i Ierusalema, lea e faamalo atu ai ona na faatonuina ai le toe aʻe atu o Sasha ina ia mafai ona faauma lona kuata i le aʻoga. Na salalau atu tala o lena faamasinoga i le atunuu atoa. O le iʻuga, na iloa ai e le toʻatele o tagata Isaraelu ia talitonuga o Molimau a Ieova. *

E sosoo atu i lona faauuga mai le aʻoga maualuga, na ulu atu ai Sasha i le faiva faataimi atoa a Molimau a Ieova. I le taimi nei o loo ia auauna ai o se paeonia faapito ma o se toeaina o le faapotopotoga. Na auai atu lona tuafafine o Ilana faatasi ma ia i le faiva faataimi atoa. O lo la tinā, ma le tinā o lo la tinā, ua avea uma o ni Molimau papatisoina. O le fatu na lūlūina e le fai matatioata sa faaauau pea ona fuaina mai ni fua!

I le taimi lava lea, sa faaauau ai pea ona faia e Ella se agaʻigaʻi i luma faaleagaga ma e leʻi umi ae talaʻi atu loa mai lea fale i lea fale. I le uluaʻi fale na ia afea, na feiloaʻi ai Ella ma Faina, o lē e leʻi leva tele talu ona malaga mai Ukraine. Sa mafatia Faina i le lotomafatia. Na iloa mulimuli ane e Ella e faapea a o toeitiiti lava ia tuʻituʻi atu i le fale o Faina, sa tatalo atu lenei fafine atuatuvale i le Atua e faapea: “Ou te lē iloa po o ai tonu oe, ae afai o e faafofoga mai ia te aʻu, fesoasoani mai.” Sa faia se la talanoaga faagaee loto ma Ella. Na lāgā e Faina le tele o fesili ma sa ia tilofaʻia ma le faaeteete tali na tuuina atu ia te ia. O le iʻuga, na ia talitonu faapea o loo aʻoaʻoina e Molimau a Ieova le upu moni mai le Tusi Paia. Sa ia toe faatulaga ana faasologa mo suʻesuʻega i le iunivesite ina ia telē se taimi na te faaaluina faatasi ma le faapotopotoga ma i le galuega talaʻi. Ia Me i le 1994, na papatisoina ai Faina. Sa ia auai atu i le auaunaga paeonia, ma galue i se galuega faavaitaimi  i le matātā tau komepiuta ina ia lagolagoina ai lana auaunaga.

Ia Novema i le 1994, a o auai pea i le galuega talaʻi, na faafuaseʻi ai lava ona faalogoina e Ella lona matuā vaivai lava. Na alu atu o ia i le falemaʻi ma e ala mai i suʻesuʻega na faaalia ai le piliki o le toto mai lona taufale ona ua papala se vaega. E oo ane i le afiafipō ua paʻū i le 7.2 le fua o le hemoglobin o Ella. Na saunia e se toeaina mai le faapotopotoga a Ella, o le taʻitaʻifono foʻi lea o le Komiti o Fesootaʻiga Faafomaʻi (KFF) i lena vaipanoa ni faamatalaga mo fomaʻi i le tele o faatulagaga faafomaʻi lea e lē manaʻomia ai le faaaogāina o le toto. * Na faamanuiaina le taotoga sa faia e aunoa ma se toto na faaaogāina, ma na toe malosi atoatoa Ella.—Galuega 15:28, 29.

Sa matuā maofa lava le fomaʻi faapitoa i maʻi o tamaʻitaʻi, o Karl, lea sa avea ma fomaʻi a Ella. O Karl o se tagata Siū na fanau i Siamani. Ona ia toe manatua ai lea o ona mātua, o ē na faasaoina mai Fasiotiga Tagata a le ʻau Nasi, sa la masani ma Molimau a Ieova na iai i nofoaga o faasalaga. Na fesiligia e Karl le tele o fesili. E ui lava i le pisi tele i ana galuega faafomaʻi, ae na faaavanoa lava e Karl se taimi mo se suʻesuʻega faale-Tusi Paia e lē aunoa. I le tausaga na sosoo ai, na ia auai atu ai i sauniga faa-Kerisiano i vaiaso taʻitasi.

O le ā le iʻuga o le fatu na lūlūina e le fai matatioata? O lea ua tatou iloa le mea na tupu ia Sasha ma lona aiga. Ua avea Ella ma faifeʻau paeonia faapito. O lana tama teine o Eina, e leʻi leva ona faauu mai le aʻoga maualuga, ua amata nei i lana lava galuega o se paeonia. O loo auauna foʻi Faina o se paeonia faapito. Ae o Karl, le fomaʻi a Ella, ua avea nei o ia ma Molimau papatisoina ma o se auauna o le faiva, o loo ia tufa atu foʻi le malosi e faamālōlōina ai o le upu moni o le Tusi Paia i ana tagata maʻi ma isi.

O si tamaʻi vaega o tagata e tautatala i le gagana Rusia na malaga atu ma sa avea o se vaega o le Faapotopotoga Eperu a Haifa, ua avea nei ma se faapotopotoga Rusia maelega faatasi ai ma le silia i le 120 o tagata talaʻi o le Malo. O se vaega o lenei faatelega, ua iai, ona sa faaaogā e se fai matatioata i Lviv le avanoa e lūlū ai se fatu!

[Faamatalaga pito i lalo]

[Faafanua i le itulau 29]

(Tagaʻi i le lomiga mo le ata atoa)

UKRAINE

ISARAELU

[Faamatalaga i Ata]

Mountain High Maps® Copyright © 1997 Digital Wisdom, Inc.

[Ata i le itulau 30]

Ella ma lana tama teine, o Eina

[Ata i le itulau 31]

Se vaega fiafia o Molimau e tautatala i le gagana Rusia i Haifa. Agavale i le taumatau: Sasha, Ilana, Natasha, Galina, Faina, Ella, Eina, ma Karl