Po o le a Aumaia ea e Lotu le Filemu o le Lalolagi?

E MAI ia Aokuso 28 e oo ia Aokuso 31, 2000, na faatasitasi ai sui e sili atu i le 500 mai i atunuu e 73, i le Aai o Niu Ioka. Sa latou tauaofia faatasi i le maota o Malo Aufaatasi mo “Le Fonotaga o le Filemu o le Lalolagi o Lenei Meleniuma a Taʻitaʻi Faalelotu ma Faaleagaga a le Lalolagi.” O nei taʻitaʻi—o le toʻatele sa laʻeiina ni faufautū, o ofu tatapuvae lanu sasama, o tuiga e fai i fulu o manu, po o ofu talaloa lanu uli—sa fai ma sui o le anoano o faatuatuaga. O nisi o nei lotu sa aofia ai le lotu Iutaia, le Isalama, le Puta, le Sinitō, le Sikh, lotu Tao, le Hinitū, le Bahaʻi, lotu Jainism, lotu Zoroaster, atoa ai ma lotu a Kerisinetoma.

Sa tauaofia le ʻauusufono i le maota o Malo Aufaatasi i uluaʻi aso e lua o le fono e fā aso na fai ai. Peitaʻi, e leʻi faamaopoopoina pe na faatupeina le fono e Malo Aufaatasi ae o isi faalapotopotoga. Ae ui i lea, sa talanoa uma taʻitaʻi o Malo Aufaatasi ma taʻitaʻi lotu i le tāua o le galulue faatasi i le aumaia o se iʻuga i le mativa, le faailogalanu, o faafitauli tau i le siʻosiʻomaga, o taua, atoa ai ma auupega o faatamaʻiaga tetele.

Sa sainia e le ʻauusufono se pepa sa faamatuaina “Taumafaiga mo le Filemu o le Lalolagi Atoa.” A o taʻutino mai e faapea o faiga sauā ma taua “e faia i nisi taimi i le igoa o lotu,” sa faalauiloaina ai e le pepa e faapea o i latou uma ua sainia o le a “galulue soosootauʻau ma Malo Aufaatasi . . . i le saʻilia o le filemu.” Peitaʻi, e leai ni iʻugafono maʻoti na faia e faaalia ai pe o le ā le auala e faataunuuina ai lea fuafuaga.

I le aso lona lua, na faaiʻu ai upu amata a le failautusi aoao o le fono, e suafa ia Bawa Jain, i lona faapea mai, i ni nai tausaga muamua atu sa ia mātauina ai se ata sa i totonu o le maota o Malo Aufaatasi. Sa faaata mai e le ata se tamāloa e umī atu na i lo o le fale o loo iai le ofisa o le Failautusi o Malo Aufaatasi. Sa ia tuʻituʻi mai i le fale, e peiseai o le fale o se faitotoʻa. I lalo ifo o le ata sa iai le faaupuga: “Perenise o le Filemu.” Sa taʻua e le susuga ia Jain e faapea: “Sa matuā aafia loloto lava aʻu i [le ata] i le taimi na ou vaai atu i ai. Sa ou fesili i tagata eseese e faatatau i [lona] uiga. Ou te manatu o le asō ua ou maua ai le tali. O le tauaofia faatasi ai o outou iinei, o taʻitaʻi faaleagaga ma faalelotu o le lalolagi, ua faataʻitaʻia mai ai ia te aʻu e faapea o le perenise [lenei] o le filemu o loo tuʻituʻi mai i le faitotoʻa o Malo Aufaatasi.”

O loo taʻu mai e le Tusi Paia se vaaiga e ese. O loo faaalia ai e faapea, o le Perenise o le Filemu o Iesu Keriso. O le a ia aumaia le filemu i le lalolagi atoa, e lē ala mai i taumafaiga a nei taʻitaʻi faapolotiki po o taʻitaʻi faalelotu o le lalolagi, ae e ala mai i le Malo o le Atua. O le Malo lenei—le pulega faalelagi a le Atua—o le a mafai ona aufaatasia ai tagata usiusitai ma mafai ai ona faia le finagalo o le Atua i le lalolagi.—Isaia 9:6; Mataio 6:9, 10.