Lipoti a Ē Faalauiloa le Malo

Initia—Se “Autasiga e ui i ni Eseesega”

“AUTASIGA e ui i ni eseesega” o se faaupuga masani e faaaogā e faamatala ai gaoioiga ina ia aufaatasia ai tagata i le atunuu o Initia. O le ausia o le autasi i lenei atunuu e tele ai eseesega i aganuu, gagana, tapuaʻiga, tupuaga faaleituaiga, lavalava, ma meaʻai, e lē faigofie. Ae peitaʻi, o loo vaaia lea autasi i le ofisa o Molimau a Ieova i Initia, e ui lava o tagata tauofo e nonofo ma galulue ai iinā e ō mai i le tele o setete ma itumalo, ma e tautatala i gagana eseese.

• Seʻi o tatou feiloaʻi atu ia Rajrani—o se tamaʻitaʻi talavou e sau mai i Punjab, e mamao lava i le itu i mātū i sisifo o Initia. A o iai Rajrani i le aʻoga, na amata e se tasi o lana vasega ona suʻesuʻe le Tusi Paia ma Molimau a Ieova. Na taumafai lenei teine talavou e faaoso le naunau o Rajrani i le Tusi Paia. Talu ai sa itiiti le iloa o lana aumea i le vasega i le faa-Peretania, ma sa leʻi mauaina Le Olomatamata i le gagana Punjabi i lena taimi, sa ia talosaga atu ai loa ia Rajrani mo se fesoasoani i le faaliliuina o mataupu o le mekasini mo ia. O mea na faitauina e Rajrani i Le Olomatamata na amata ai ona iai se aafiaga loloto ia te ia, lea na ui ai lava i le tetee mai o ona mātua, ae sa ia agaʻigaʻi pea i luma ma tuuina atu ai lona ola ia Ieova le Atua. I lana auaunaga i Peteli i Initia i le taimi nei, o loo ia faia ai lena lava mea e tasi na māfua ai ona ia iloa le upu moni. O loo ia faaliliuina lomiga faa-Kerisiano i le gagana Punjabi!

• Seʻi manatu foʻi ia Bijoe, e sau mai i le isi vaega o Initia—i le setete i le itu i saute sisifo o Kerala. Na tuliesea Bijoe mai i le aʻoga maualuga ona sa solitū o ia i sauniga lotonuu. Ina ua māeʻa se faamasinoga faaumiumi sa faia lea na iʻu ai i se manumalo mataʻina mo le tapuaʻiga mamā, na toe foʻi atu ai loa Bijoe i le aʻoga. * Sa oo ina alu atu foʻi o ia i le iunivesite. Ae peitaʻi, o le siʻomaga o amioga lē mamā i le iunivesite na aafia ai lona lotofuatiaifo, o lea na ia faamavae ai i le kuata muamua. I le taimi nei ina ua mavae tausaga e 10 i Peteli, ua ia lagona ai le sili atu o aogā ua ia mauaina i le avea ma se tasi o le aiga Peteli e ui e eseese ae autasi, na i lo o le tulaga e ono oo i ai o ia e ala i le saʻilia o aʻoaʻoga maualuluga.

• O Noma ma Lili ua silia nei ma le taʻi 70 o la tausaga, ma ua maliliu a la tane mo le tele o tausaga. O i laʻua uma ua sili atu i le taʻi 40 tausaga o iai pea i le auaunaga faataimi atoa. Ua tusa ma le 20 tausaga o galue Lili i le lālā o se tagata faaliliu i le gagana Tamil. Ua 13 nei tausaga talu ona sau Noma i Peteli ina ua mavae le maliu o lana tane. E lē gata ina avea i laʻua ma faataʻitaʻiga lelei o le galulue filigā ma le faamaoni, ae ua la fesoasoani foʻi i le autasi i le aiga Peteli atoa. E la te fiafia tele e talimalo i tagata e asiasi ane, ma la olioli i aufaatasiga ma ē e laiti ifo o le aiga, ma tufa atu ia i latou mea na olioli ai i tausaga e tele o o la olaga o ni Kerisiano. E faapea foʻi ona toe valaauliaina i laʻua e ē laiti ifo o le aiga Peteli i o latou potu mo ni faatasiga ma fesoasoani atu ia i laʻua pe a manaʻomia. E moni o ni faataʻitaʻiga lelei tele!

Ina ua foʻia eseesega ia na māfua ai feteenaʻiga ma le lē autasi i le tele o vaipanoa, ua galulue faatasi ai ma le fiafia nei tagata tauofo e auauna atu i isi, i le avea ma sui autasi o le aiga Peteli i Initia.—Salamo 133:1.

[Faamatalaga pito i lalo]

[Faamatalaga i Ata i le itulau 8]

Ata i tua: Mountain High Maps® Copyright © 1997 Digital Wisdom, Inc.