O se Aufaatasiga i le Lalolagi Aoao e Fetausiaʻi

O LE mamao lava e mafai ona oo i ai le vaai, o loo iai lava tagata. O le toʻatele ua matutua, o nisi e lē atoatoa le malosi e lē faigofie ona savavali. O loo iai fafine o loo maua i le maʻitaga atoa ma ulugalii talavou ma fanau iti o loo tausi aʻe. O i latou uma lava o tagata sulufaʻi—o tamāloloa, fafine, ma tamaiti—o ē ua faamalosia e sosola ese mai i o latou aiga ae saʻili se sulufaʻiga i se atunuu tuaoi ona o taua a atunuu lava latou, o faalavelave faalenatura, ia po o isi foʻi mea tutupu. O nisi ua faatele ona faamalosia e ō ese mai i o latou aiga. O le taimi lava e uluaʻi aliali mai ai se faailoga o se vevesi faaleatunuu po o se faalavelave faalenatura, e latou te aofaʻi ai loa ni nai meatotino, aoao mai a latou fanau, ma ō atu loa i se nofoaga e saogalemu ai. Afai ae toe foʻi le tulaga o mea e pei ona sa masani ai, o le toʻatele o tagata sulufaʻi o le a toe foʻi e toe fau o latou fale ma toe amata ona tau ati aʻe.

Ua faitau tausaga o tatala mai pea le avanoa e le Malo o Aferika Tutotonu i tagata sulufaʻi mai le tele o atunuu. Talu ai nei, e faitau afe tagata, e aofia ai ma le toʻatele o Molimau a Ieova, sa tatau ona sosola ese mai le Malo Faatemokalasi o Kogo lea e aafia i taua, ae agaʻi atu mo se saogalemu i le Malo o Aferika Tutotonu.

Sa Fesoasoani Uso i Ē na Manaʻomia se Fesoasoani

Sa manatu Molimau i le Malo o Aferika Tutotonu o se mea fiafia ma o se faaeaga le faamaopoopoina o se fesoasoani alofa mo tagata. Sa mautū mea e api ai uso Kerisiano i le taunuu atu. I le amataga, sa maua potu i aiga o uso, ae a o faateleina le aofaʻi o tagata sulufaʻi, na iʻu ina aliali mai le manaʻomia ona fai o nisi fuafuaga. Sa faaaogā nisi Maota o le Malo e momoe faatasi ai le toʻatele. Sa galulue mamafa Molimau o le vaipanoa lena e toe faapipii i ai isi molī, toe tataʻi isi paipa mo le vai, ma faasimā fola o fale ina ia lelei mo i latou o le a faaaogāina e nonofo ai. Sa galulue faatasi tagata sulufaʻi ma uso o le vaipanoa lava lena e saunia nei nofoaga e tau ina faamautū i ai. Sa fuafuaina se polokalame atoa o sauniga faa-Kerisiano i le gagana Lingala ina ia maua e i latou o le a taunuu mai se sapalai o taumafa faaleagaga e faatumauina ai le ola. O le galulue vavalalata i le vā o Molimau i le vaipanoa lava latou ma a latou malo, ua faaalia ai o loo iai moni se ʻauuso faava-o-atunuu.

O le tele o taimi o aiga nei sa sulufaʻi atu e leʻi taunuu uma faatasi atu i se taimi e tasi. O nisi taimi, o tagata o aiga o ē na oo ina valavala sa  toe faatasi ina ua taunuu i le mea na ō i ai. Sa tausia faalelei i Maota o le Malo taʻitasi ia lisi o ē na taunuu saogalemu atu. Sa fai fuafuaga ina ia saʻilia ai i latou sa leiloloa pea. E taʻitolu taavale e auina atu i aso taʻitasi e le ofisa o le lālā lea na faatonutonuina le galuega a Molimau a Ieova i le atunuu, ina ia fesoasoani i Molimau o ē sa faimalaga mai pea i le ala ma saʻili mo so o se tasi atonu ua leiloa. Sa mātauliaina nei taavale i se faailoilo telē “OLO MATAMATA—Molimau a Ieova.”

Seʻi manatu i le olioli na oo i ai se vaega o ni tamaiti sulufaʻi se toʻafitu o ē na valavala mai i o latou mātua, ina ua latou iloa atu se veni a Molimau a Ieova. Sa latou faataalise atu i le taavale ma faailoa atu o i latou o ni Molimau. Sa aumaia e uso i latou i le veni ma avatu i se Maota o le Malo, lea e mulimuli ane na latou toe faatasi ai ma o latou aiga.

O le ā na mafai ai e nei Kerisiano faamaoni ona feagai ai ma ia tulaga o mea tutupu, e lē na o le faatasi, ae ua faisoo? Ua latou matuā talitonu lava o lea ua ola nei i aso e gata ai e pei ona valoia mai e le Tusi Paia.—2 Timoteo 3:1-5; Faaaliga 6:3-8.

O le mea moni, ua latou iloa ua toe o se aga ona faamutaina lea e Ieova le Atua o taua, le ʻinoʻino, sauāga, ma feteenaʻiga. O le a avea le faafitauli o tagata sulufaʻi ma mea o le taimi ua teʻa. I le taimi nei, i le ōgatasi ma le apoapoaʻiga a le aposetolo o Paulo i le 1 Korinito 12:14-26, e taumafai Molimau a Ieova e fetausiaʻi. E ui lava e vā i vaitafe, o tuaoi, o gagana, ma e nonofo eseese, ae manatu mamafa lava le tasi i le isi. O lea la, e vave tele ona latou gaoioi pe a manaʻomia e se tasi se fesoasoani.—Iakopo 1:22-27.

[Faafanua i le itulau 30]

(Tagaʻi i le lomiga mo le ata atoa)

AFERIKA

Malo o Aferika Tutotonu

Malo Faatemokalasi o Kogo

[Faamatalaga i Ata]

Mountain High Maps® Copyright © 1997 Digital Wisdom, Inc.

[Ata i le itulau 30]

O Maota o le Malo e tolu na avea ma nofoaga e tausi ai tagata sulufaʻi

[Ata i le itulau 31]

Sa vave ona saunia fale e saunia ai taumafa

[Ata i le itulau 31]

Faaopoopoina pea le aofaʻiga o tagata sulufaʻi e taunuu mai

[Ata i le itulau 31]

Faatoʻā fanau mai lava ae ua avea ma tagata sulufaʻi