Ia Olioli Faatasi ma le Atua Fiafia

“Le ʻauuso e, o le toe upu lenei, ia faaauau pea ona outou olioli, . . . ona ia te outou lea o le Atua e ona le alofa ma le filemu.”—2 KORINITO 13:11, NW.

1, 2. (a) Aiseā ua lē maua ai e le toʻatele o tagata se olioli i le olaga? (e) O le ā le olioli, ma e mafai faapefea ona tatou mauaina?

I NEI aso e sili ona mataʻutia, e itiiti lava se māfuaaga o loo iloa e le toʻatele o tagata e latou te olioli ai. Pe a oo mai se mala ia i latou po o se tasi e pele ia i latou, e ono ia i latou faalogona e pei ona sa lagona ai Iopu o aso anamua, o lē na faapea mai: “O le tagata ua fanau mai i le fafine, ua saasaa ona aso, mona ua tumu i le atuatuvale.” (Iopu 14:1) E lē mafai ona ʻalo ese Kerisiano mai i mafatiaga ma popolega o nei “aso faigata,” ma e lē o se mea la e ofo ai pe a iai nisi taimi e lagona ai e auauna a Ieova le faavaivai.—2 Timoteo 3:1.

² Ae peitaʻi, e mafai ona olioli Kerisiano, e tusa lava pe fesagaʻi ma puapuaga. (Galuega 5:40, 41) Ina ia malamalama i le itu e mafai ona faia ai lenei mea, seʻi manatu muamua i le uiga o le upu olioli. Ua faamatalaina le olioli e faapea, “o le faalogona e puna aʻe mai le mauaina po o le faatalitalia o se mea manaia e fiafia ai.” * O lona uiga, pe afai tatou te faaaluina se taimi e manatunatu ai i mea lelei o loo tatou maua, ma mafaufau loloto foʻi i faamanuiaga o loo faatalia maia i tatou i le lalolagi fou a le Atua, ona tatou olioli ai lea.

3. I le ā le uiga e mafai ai ona faapea atu, e tofu uma lava tagata ma ni māfuaaga e olioli ai?

³ E tofu uma lava tagata ma ni faamanuiaga e ao ai ona latou lotofaafetai. Atonu ua faamālōlō le ulu o se aiga mai lana galuega. O le tulaga masani lava, e popole o ia. E manaʻo na te saunia mea mo si ona aiga. Peitaʻi, e mafai ona ia lotofaafetai pe afai o loo ia te ia pea le tino malosi ma lelei lona soifua mālōlōina. Pe afai e toe maua sana galuega, o le a mafai ai ona ia galue malosi. Ae i le isi itu, atonu ua faafuaseʻi ona aafia se tuafafine Kerisiano i se maʻi tugā ua lē o toe atoatoa ai lona malosi. Peitaʻi, atonu na te faafetaia le lagolagosua a ana uō alolofa ma tagata o lona aiga o loo fesoasoani ane ina ia mafai ai ona ia fesagaʻia lona maʻi i se uiga toʻafilemu ma le lototele. O Kerisiano moni uma, e tusa lava po o ā o latou tulaga, ae mafai ona latou olioli i le faaeaga o le iloaina o Ieova, ‘le Atua fiafia,’ ma Iesu Keriso, ‘le Alii fiafia e toatasi.’ (1 Timoteo 1:11; 6:15) Ioe, e matuā fiafia lava Ieova le Atua ma Iesu Keriso. O loo tumau pea lo la olioli e ui i le mea moni e faapea, ua matuā ese lava tulaga o loo iai le lalolagi mai le tulaga sa fuafuaina ai e Ieova i  le amataga. O la laʻua faaaʻoaʻoga e mafai ona tele ni mea e aʻoaʻoina ai i tatou e faatatau i le auala e faatumauina ai lo tatou olioli.

Sa Lē Taitai Ona Mou Atu lo La Olioli

4, 5. (a) Na faapeʻī le tali mai a Ieova ina ua fouvale uluaʻi tagata? (e) I le ā le auala na tausia ai pea e Ieova se uiga mautinoa agaʻi i le fanau a tagata?

⁴ I le faatoʻaga o Etena, sa faamanuiaina ai Atamu ma Eva i le soifua mālōlōina lelei, ma ni mafaufau lelei atoatoa. Sa iai a la galuega aogā e fai ma ni siʻomaga matagofie sa tatau ona faia ai na galuega. Ae o le itu e sili ona lelei, sa ia i laʻua le faaeaga o le talanoa atu e lē aunoa ia Ieova. O le fuafuaga a le Atua, ina ia la maua se lumanaʻi fiafia. Ae peitaʻi, sa leʻi faamalieina o tatou uluaʻi mātua i nei meaalofa lelei uma; sa la gaoia le fua faasāina mai “le laau e iloa ai le lelei ma le leaga.” O lenei gaoioiga lē usiusitai na puna mai ai faanoanoaga uma nei ua oo ia i tatou, o a la fanau, i aso nei.—Kenese 2:15-17; 3:6; Roma 5:12.

⁵ Peitaʻi ane, sa leʻi faatagaina e Ieova le uiga lē lotofaafetai o Atamu ma Eva e aveesea ai lona olioli. Sa ia matuā mautinoa lava, o le a iai nisi o a la fanau o le a mananaʻo e auauna atu ia te ia. Talu ai la lona matuā mautinoa, a o leʻi fanauina mai e Atamu ma Eva la laʻua tama ulumatua, ae na ia faasilasilaina atu lava lana fuafuaga mo le togiolaina o a la fanau usiusitai! (Kenese 1:31; 3:15) I senituri mulimuli ane, sa faataʻitaʻi moni atu ai lava le toʻatele o le fanau a tagata i ala o Atamu ma Eva, peitaʻi sa leʻi avea lena taatele o le lē usiusitai ma itu e teena ai e Ieova le aiga faaletagata. Na i lo o lea, sa taulaʻi atu lana silasila i tane ma fafine o ē sa ‘faafiafiaina lona finagalo,’ i latou sa faia se taumafaiga sili ina ia faafiafia o ia talu ai latou te alolofa ia te ia.—Faataoto 27:11; Eperu 6:10.

6, 7. O ā vala na fesoasoani ia Iesu ina ia tumau ai pea ona olioli?

⁶ Ae faapefea Iesu—na faapefea ona ia faatumauina lona olioli? Talu ai o Iesu o se foafoaga agaga malosi i le lagi, sa ia te ia la avanoa uma e mātauina mai ai gaoioiga o loo faia e tane ma fafine i le lalolagi. Sa iloagofie mai lava o latou tulaga lē lelei atoatoa, peitaʻi sa alofa mai pea Iesu ia i latou. (Faataoto 8:31) Mulimuli ane, ina ua ia afio mai i le lalolagi ma “mau” moni lava ma tagata, sa leʻi suia ai iinā lana silafaga i le fanau a tagata. (Ioane 1:14) O le ā na mafai ai e le Alo lelei atoatoa o le Atua ona tausisia pea lena silafaga mautinoa i le aiga o tagata agasala?

⁷ Muamua lava, sa talafeagai mea na faatalitalia e Iesu mo ia lava faapea foʻi ma isi. Na ia silafia o le a ia lē faaliliuina tagata uma. (Mataio 10:32-39) O lea sa olioli ai o ia e tusa lava pe na o le toʻatasi se tagata e talilelei mai i le feʻau o le Malo. E ui lava i nisi taimi, sa lē lelei ai amioga ma uiga faaalia o ona soo, ae sa silafia e Iesu, na mananaʻo moni lava o latou loto e faia le finagalo o le Atua, ma o le pogai lena o lona alofa ia i latou. (Luka 9:46; 22:24, 28-32, 60-62) E mataʻina lava, i le tatalo atu a Iesu i lona Tamā faalelagi, sa ia aoteleina ai gaoioiga lelei na faia e ona soo e oo atu i lena taimi: “Ua latou tausia foi lau afioga.”—Ioane 17:6.

8. Taʻu mai nisi o auala e mafai ona tatou faataʻitaʻi ai ia Ieova ma Iesu pe a oo mai i le tausisia o lo tatou olioli.

⁸ E mautinoa lava, o le a maua e i tatou uma aogā mai le iloiloina ma le faaeteete o le faaaʻoaʻoga na faataatia e Ieova le Atua ma Keriso Iesu i lenei vala. Pe mafai ea ona tatou matuā faataʻitaʻi atoatoa atu i a Ieova, atonu e ala i le lē soona popolevale pe a lē tulaʻi mai mea i le tulaga sa tatou faamoemoe i ai? Pe mafai ea ona tatou mulimulituʻi atu atili i tulagaaao o Iesu e ala i le tausisia o se manatu mautinoa i o tatou tulaga o iai nei, faapea foʻi ma le talafeagai o mea tatou te faatalitalia ia i tatou lava ma isi? Seʻi o tatou talanoaina pe faapefea i nisi o nei mataupu silisili ona faatatauina i se auala aogā, i se vala e pele i loto o Kerisiano maelega i so o se vaipanoa—le faiva i le fanua.

Ia Tausisia se Vaaiga Mautinoa i le Faiva

9. Na faapefea ona toe faafoʻisia le olioli o Ieremia, ma e mafai faapefea e lana faaaʻoaʻoga ona fesoasoani ia i tatou?

⁹ E finagalo Ieova ina ia tatou olioli i lana auaunaga. E lē tatau ona faalagolago lo tatou olioli i iʻuga o loo tatou maua. (Luka 10:17, 20) E tele tausaga o talaʻi le perofeta o Ieremia i se oganuu sa leʻi fuatele mai. Ina ua ia amanaʻia uiga lē lelei o tagata na faaali ane, o iinā na mou ese ai  loa lona olioli. (Ieremia 20:8) Ae ina ua ia mafaufau loloto i le pogai ua matagofie ai le feʻau sa ia tauaveina, ona toe faafoʻisia ai lea o lona olioli. Na faapea atu Ieremia i a Ieova: “Na maua au afioga, ona ou ʻai ai lea; sa ia te au lau afioga e fai ma mea e olioli ai ma fiafia ai loʻu loto; auā ua taʻua aʻu i lou suafa, Ieova e.” (Ieremia 15:16) Ioe, sa olioli Ieremia i lona faaeaga o le talaʻia o le afioga a le Atua. E mafai foʻi e i tatou.

10. E mafai faapefea ona tatou faatumauina pea lo tatou olioli i le faiva e tusa lava pe lē o fuatele mai i le taimi nei la tatou oganuu?

¹⁰ E tusa lava pe mumusu le toʻatele e talilelei mai i le tala lelei, ae ua ia i tatou le māfuaaga aupito sili e olioli ai a o tatou auai i le faiva i le fanua. Ia manatua, sa matuā mautinoa lava e Ieova o le a iai nisi tagata e mananaʻo e auauna ia te ia. Ia tatou pei o Ieova, e lē taitai ona tatou fiu e faamoemoe faapea, e iai lava nisi o le a iʻu ina latou iloa le finauga o loo faia ma talia ai le feʻau o le Malo. E lē tatau ona galo ia i tatou, e fai ma fesuisuiaʻi tulaga o tagata. E oo lava i se tagata ua matuā faamalieina i mea ua ia maua, e iai lava taimi, pe a faafuaseʻi ona tupu se faalavelave ia te ia pe taia foʻi i se mala, e ono amata ai ona toe mafaufau mamafa i le uiga moni o le olaga. Pe o le a e iai ea iinā e fesoasoani atu pe a oo i sea tagata le tulaga ua ‘manatu mamafa ai i ona manaʻoga faaleagaga’? (Mataio 5:3, NW) Atonu e iai se tasi i la outou oganuu o le a fiafia e faalogologo i le tala lelei i le isi taimi o sosoo mai o le a e asiasi atu ai!

11, 12. O le ā na tupu i se tasi taulaga, ma o le ā se lesona e mafai ona tatou aʻoaʻoina mai ai?

¹¹ E mafai foʻi ona suia i latou o iai i la tatou oganuu. Seʻi manatu i se faaaʻoaʻoga. I se tasi o tamaʻi taulaga, sa nonofo ai ni ulugalii talavou ma a latou fanau, ma sa faifaimea faatasi uma nei aiga. Pe a asiasi atu i ai Molimau a Ieova, e tutusa uma lava le tali e sau mai fale taʻitasi, “Matou te lē fiafia!” Pe afai e iai se tasi na faaalia mai se naunau i le feʻau o le Malo, e vave lava ona gaoioi ona tuaoi e faavaivaia lena tagata mai le toe fesootaʻi atu ma Molimau. E mautinoa lava la, sa avea o se luʻi moni le talaʻi atu iinā. Ae ui lava i lea, sa leʻi faavaivai ai Molimau; sa latou talaʻi atu pea i ai. O le ā le iʻuga?

¹² Mulimuli ane, ua matutua le toʻatele o fanau mai lena taulaga, ua faaipoipo ma amata o latou lava aiga iinā. Talu ai sa iloa e nei fanau matutua le leai o se fiafiaga moni na maua mai le ituaiga o olaga lea sa latou ola aʻe ai, na amata ai loa e nisi o i latou ona saʻili atu mo le upu moni. Sa latou maua ina ua latou talilelei atu i le tala lelei lea na folafolaina e Molimau. O le iʻuga na oo iai, ina ua mavae le tele o tausaga, na amata loa ona tuputupu aʻe lenei faapotopotoga laʻitiiti. Seʻi tagaʻi faalemafaufau i le olioli o tagata talaʻi o le Malo o ē sa leʻi faavaivai! Tau ina ia avea lo tatou maumauaʻi e tufa atu le feʻau mamalu o le Malo, ma itu e aumaia ai foʻi ia i tatou le olioli!

O le a Lagolagoina Oe e Ou Uso Talitonu

13. O ai e mafai ona tatou sulu atu i ai pe a lagona le faavaivai?

¹³ Pe a fetuleni mai omiga pe oo mai se mala ia te oe, o fea e mafai ona e liliu atu i ai mo se faamāfanafanaga? E faitau miliona auauna tuuina atu a Ieova e muamua lava ona latou liliu atu ia Ieova i le tatalo, ona saʻili atu ai lea i o latou uso ma tuafāfine  Kerisiano. A o iai Iesu i le lalolagi, sa matuā tāua ia te ia le lagolagosua ane a ona soo. I le pō a o lumanaʻi lona maliu, sa ia taʻua ai i latou o ē ‘tumau ia te au i oʻu tofotofoga.’ (Luka 22:28) O le mea moni, sa lē lelei atoatoa na soo, peitaʻi sa avea lo latou faamaoni o se faamāfanafanaloto i le Alo o le Atua. E mafai foʻi ona tatou maua faamalosiauga mai o tatou uso tapuaʻi.

14, 15. O le ā na fesoasoani i se tasi ulugalii ina ia onosaia ai le oti o le la tama, ma o le ā e te aʻoaʻoina mai le mea na tupu ia i laʻua?

¹⁴ Na iloa e se ulugalii Kerisiano e igoa ia Mikaele ma Tiana le tāua tele o le lagolagosua a o la uso ma tuafāfine. O si a la tama tama o Ionatana, e 20 ona tausaga, o se tama Kerisiano e ola tiotio ma tele ona faamoemoega sa iai i le lumanaʻi, ae na maua se tuma i lona faiʻai. Sa taumafai malosi fomaʻi e laveaʻi lona ola, peitaʻi na faasolo ina leaga lona tulaga seʻia oo ai i se tasi aso ua faasolo ifo lava ina afiafi, na uma mālie atu ai si ona ola. Sa matuā mafatia faalogona o Mikaele ma Tiana. Na la iloa ua toetoe lava māeʻa le Sauniga o le Auaunaga sa faia i lena afiafi. Peitaʻi, ona o lo la matuā manaʻomia o ni faamāfanafanaga, o lea na la talosaga atu ai i le toeaina sa latou iai faatasi, ina ia latou ō atu i le Maota o le Malo. Na latou taunuu tonu lava i le taimi na logoina ai le faapotopotoga e faatatau i le maliu o Ionatana. Ina ua māeʻa le sauniga, sa faapotopoto ane uso ma tuafāfine i le tamā ma le tinā o loo fetagisi ma latou fusi ia i laʻua ma ofoina atu upu o faamāfanafanaga. E manatua e Tiana e faapea: “Sa matuā mafatia o ma faalogona a o matou taunuu atu i le maota, peitaʻi e maʻeu ni faamāfanafanaga na ma mauaina mai uso—e maʻeu lo latou faamalosiauina o i maʻua! E ui sa lē mafai ona latou aveesea o ma tigā, ae na latou fesoasoani ia i maʻua ina ia mafai ona ma onosaia lea tulaga faigatā tele!”—Roma 1:11, 12; 1 Korinito 12:21-26.

¹⁵ Na avea mafatiaga ma itu ua atili ai ona māfana atu Mikaele ma Tiana i o la uso. Na atili ai foʻi ona māfana le la mafutaga. Ua faapea mai Mikaele: “Ua atili ai ona ou faapelepeleina si aʻu avā pele. I taimi e oo mai ai lagona o le faavaivai, e ma te talanoa ai e faatatau i le upu moni o le Tusi Paia ma le auala o loo tausia ai i maʻua e Ieova.” Ua faaopoopo mai Tiana: “Ua matuā sili atu nei ona tāua ia i maʻua le faamoemoe o le Malo.”

16. Aiseā e tāua ai ona tatou tausolomua e faailoa atu i o tatou uso ni o tatou manaʻoga?

¹⁶ Ioe, e mafai ona avea o tatou uso ma tuafāfine Kerisiano o ni ē e “faamatalaloto” ia i tatou i taimi faigatā o le olaga ma fesoasoani mai ina ia tatou faasaosaoina pea lo tatou olioli. (Kolose 4:11) Ae peitaʻi, e lē mafai ona latou iloa mai o tatou mafaufauga. O lea la, pe a tatou manaʻomia se lagolagosua, e lelei pe a faailoa atu ia i latou. Ona mafai lea ona tatou faaalia atu lo tatou talisapaia moni mo so o se fesoasoani e mafai ona saunia mai e o tatou uso, i le manatu i ai o ni fesoasoani e mai ia Ieova.—Faataoto 12:25; 17:17.

Tagaʻi Atu i Lau Faapotopotoga

17. O ā luʻi e fesagaʻi ma se tinā nofo toʻatasi, ma e ao faapefea ona tatou manatu i tagata e pei o ia?

¹⁷ O le tele o lau tagaʻi atu i ou uso talitonu, o le tele foʻi lena o mea o le a e iloa ina ia e faatāuaina ai i latou ma olioli ai i la latou aufaatasiga. Tagaʻi atu i lau faapotopotoga. O le ā se mea o e vaaia ai? Po o iai ea se matua nofo toʻatasi o loo tauivi i le tausia aʻe o lana fanau i le upu moni? Po o e matuā mātauina ea le faaaʻoaʻoga lelei o loo ia faataatia? Taumafai e faaata i lou mafaufau nisi o faafitauli o loo ia fesagaʻia. Ua taʻua mai e se tinā nofo toʻatasi e igoa ia Sieni nisi o nei faafitauli: lagona tuua toʻatasi, o faatosinaga lē manaʻomia i faiga faaleituaiga e faia mai e tamāloloa latou te faigaluega, le matuā utiuti o le seleni faasoasoa. Peitaʻi, fai mai a ia, o le faafitauli sili lava ona faigatā, e aofia ai le tausia o manaʻoga tau i faalogona o lana fanau, talu ai e eseese uma lava uiga o tamaiti taʻitoʻatasi. Ua taʻua e Sieni se isi faafitauli: “O se matuā luʻi lava lou taumafai e ʻalofia le faanaunauga ina ia fai lau tama tama ma ulu o le aiga talu ai ua leai se tane. E iai laʻu tama teine, ma e faigatā ona ou manatua, ia ou lē soona faamamafaina le avega mo ia e ala i loʻu sasaa uma atu i ai o oʻu faafitauli totino.” E pei o le faitau afe o isi mātua nofo toʻatasi o ē matataʻu i le Atua, o loo faapena foʻi ona faigaluega faasoloatoa Sieni i se galuega totogi ma tausia lona ʻauaiga. Latou te suʻesuʻeina foʻi faatasi le Tusi Paia ma lana fanau, e toleniina i latou i le faiva, ma ave i latou  i sauniga a le faapotopotoga. (Efeso 6:4) Maʻeu se faafiafiaina o le finagalo o Ieova a o ia silasila mai i aso taʻitasi i taumafaiga a si nei aiga ina ia tausisia lo latou faamaoni! Pe lē olioli ai ea o tatou loto i lo tatou iai faatasi ma nisi e faapena? Ioe, e mautinoa lava.

18, 19. Faataʻitaʻi mai le auala e mafai ai ona tatou faalolotoina lo tatou talisapaia o tagata o le faapotopotoga.

¹⁸ Seʻi toe tagaʻi atu i lau faapotopotoga. E ono vaaia ai ni tuafāfine ma ni uso faamaoni, o ē ua maliliu a latou paaga, ae ‘lē taitai misia’ sauniga. (Luka 2:37, faatusatusa i le NW) Pe iai ea ni taimi e oo ai ia i latou lagona o le tuua toʻatasi? O le mea moni lena. E latou te matuā misia lava a latou paaga! Peitaʻi, latou te taumafai lava e faapisi o latou olaga i le auaunaga a Ieova ma naunau totino atu i isi. O o latou uiga mautū, ma le mautinoa, ua atili faateleina ai le olioli o le faapotopotoga! Na faapea mai se tuafafine Kerisiano o lē ua silia i le 30 tausaga o auauna i le faiva faataimi atoa: “O se tasi o oʻu olioli sili, o le vaai atu lea i uso ma tuafāfine matutua o ē na fetaiaʻi ma le tele o puapuaga, o loo auauna pea ma le faamaoni i a Ieova!” Ioe, ua avea lava Kerisiano matutua o loo tatou auaufaatasi, o se faalaeiauga sili i ē talavou.

¹⁹ Ae faapefea tagata fou e leʻi leva tele ona auaufaatasi ma le faapotopotoga? Pe lē faagaeetia ea i tatou a o latou faaalia mai lo latou faatuatua i taimi o sauniga? Seʻi manatu i le agaʻigaʻi i luma ua latou faia talu mai ona latou suʻesuʻeina le Tusi Paia. E lē taumate ua matuā faafiafiaina lava le finagalo o Ieova ia i latou. Po o faapena ea i  tatou? Po o tatou faaalia ea lo tatou fiafia, e ala i le faamālō atu mo a latou taumafaiga?

20. Aiseā e mafai ai ona faapea atu, o tagata uma lava o le faapotopotoga e iai sa latou matafaioi tāua e faatino i totonu o le faapotopotoga?

²⁰ Po o oe o se tasi ua faitoʻalua, nofofua, po o oe o se matua nofo toʻatasi? Po o oe ea o se tama po o se teine, ua leai sou tamā (po o sou tinā), o se tinā po o se tamā ua maliu le paaga? Po o oe ea o se tasi ua tele tausaga o e aufaatasi ma le faapotopotoga pe e leʻi leva ona e aufaatasi atu i ai? Ia e mautinoa ua faalaeiauina i matou uma i lau faaaʻoaʻoga faamaoni. Ma, pe a e auai i le usuina o pese o le Malo, pe a faia sau tali pe faatino se tofiga i le Aʻoga o le Faiva Faatiokarate, o lou sao lena e atili ai ona matou olioli. Ae sili atu ai ona tāua, e olioli ai le finagalo o Ieova.

21. Ua ia i tatou māfuaaga e tele e faia ai le ā, ae o ā fesili ua lāgā ai?

²¹ Ioe, e oo lava i nei taimi o faalavelave, e mafai lava ona tatou olioli i le tapuaʻi atu i lo tatou Atua fiafia. E tele a tatou māfuaaga e tali atu ai i le faalaeiauga a Paulo e faapea: “Ia faaauau pea ona outou olioli, . . . ona ia te outou lea o le Atua e ona le alofa ma le filemu.” (2 Korinito 13:11, NW) Ae faapefea pe a tatou fetaiaʻi ma se mala faalenatura, o sauāga, po o toʻatugā ogaoga o le tamaoaiga? Pe mafai ai ea ona tausisia lo tatou olioli i na tulaga? E fai lava e oe ni au faaiʻuga a o e iloiloina le mataupu o loo sosoo mai.

[Faamatalaga pito i lalo]

Pe Mafai Ona E Tali Mai?

• Ua faapefea ona faamatalaina le olioli?

• E mafai faapefea e le tausisia o se uiga mautinoa ona fesoasoani ia i tatou ina ia tumau ai i le olioli?

• O le ā e mafai ona fesoasoani ia i tatou ina ia iai se vaaiga mautinoa i le oganuu a la tatou faapotopotoga?

• I ā auala e te faatāuaina ai uso ma tuafāfine o i la outou faapotopotoga?

[Fesili mo le Suʻesuʻega]

[Ata i le itulau 10]

E mafai ona suia tagata o i la tatou oganuu

[Ata i le itulau 12]

O ā luʻi o loo fesagaʻi ma i latou o i la outou faapotopotoga?