Ia Olioli i le Poto e Uiga i a Ieova
Ia Olioli i le Poto e Uiga i a Ieova
“E sili ona manuia o e faalogo i le afioga a le Atua, ma tausi i ai.”—LUKA 11:28.
1. O anafea na amata ai ona fesootaʻi mai Ieova i le fanau a tagata?
E ALOFA mai Ieova i tagata ma e matuā naunau o ia mo so latou lelei. Ua lē o se mea la e faateʻia ai, i lona fesootaʻi mai i a i latou. Na amata lenei fesootaʻiga i le faatoʻaga o Etena. O loo taʻua i le Kenese 3:8 e faapea, i se tasi taimi “i le itu aso e agi malie mai ai le matagi,” na “faalogo [ai Atamu ma Eva] i le siufofoga o Ieova le Atua.” E manatu nisi faapea, o lenei faamatalaga e foliga mai ai, o le masani lea a Ieova le fesootaʻi mai i a Atamu i lea taimi, ma atonu e faia faapea i aso taʻitasi. Po o le ā lava le tulaga sa iai, ae ua taʻu manino mai e le Tusi Paia e faapea, sa faaalu e le Atua le taimi e lē gata e tuuina mai ai faatonuga i le uluaʻi tagata, ae ina ia aʻoaʻo ai foʻi o ia i mea sa manaʻomia ona ia iloa, ina ia faatino ai ona tiute tauave.—Kenese 1:28-30.
2. Na faapefea ona vavaeesea e le uluaʻi ulugalii i laʻua lava mai le taʻitaʻiga a Ieova, faatasi ai ma ā iʻuga?
2 Na tuuina e Ieova i a Atamu ma Eva le ola, faapea ma le aiā e la te pulea ai manu ma le lalolagi atoa. Ae tasi lava le mea na faasāina mai ai i laʻua—sa lē tatau ona la aai i le laau e iloa ai le lelei ma le leaga. Ona o taaʻiga a Satani, na lē usiusitai ai Atamu ma Eva i le poloaʻiga a le Atua. (Kenese 2:16, 17; 3:1-6) Sa la filifili e tutoʻatasi ese mai, e filifilia e i laʻua lava le mea e saʻo ma le mea e sesē. I le faia faapea, na la vavaeesea ai ma le valea i laʻua lava mai le taʻitaʻiga a Lē e alofa na Foafoaina i laʻua. E mataʻutia āuga na oo ai i a i laʻua ma a la fanau ia e leʻi fananau mai. Na faasolo ina matutua Atamu ma Eva seʻia oo lava ina feoti e aunoa ma se faamoemoe o le toetū. Na tuufaasolo mai i a la fanau le agasala ma ona āuga, o le oti lea.—Roma 5:12.
3. Aiseā na fesootaʻi mai ai Ieova i a Kaino, ma na faapefea ona tali atu i ai Kaino?
3 E ui lava i le fouvalega lea na tupu i Etena, ae sa fesootaʻi mai pea Ieova i ana foafoaga faaletagata. Sa oo i a Kaino, le atalii ulumatua o Atamu ma Eva, se tulaga mataʻutia o le faatoʻilaloina e le agasala. Na lapataʻia o ia e Ieova e faapea, o loo agaʻi atu o ia i faafitauli ma fautuaina ai o ia e liliu atu e ‘fai le mea lelei.’ Na teena e Kaino lenei fautuaga alofa ae ona fasiotia ai lona uso. (Kenese 4:3-8) O lea, na teena uma ai e uluaʻi tagata e toʻatolu sa iai i le lalolagi le taʻitaʻiga manino na saunia e lē na foaʻiina maia le ola i a i latou, o le Atua o lē e tuuina maia faatonuga i ona tagata ina ia latou manuia ai. (Isaia 48:17) Pagā se tigā atonu sa iai i le finagalo o Ieova ona o lenei mea!
Ua Faaali Mai e Ieova o Ia Lava i Tagata Anamua
4. O le ā sa mautinoa e Ieova e tusa ai o le fanau a Atamu, ma o le ā le feʻau o le faamoemoe na ia folafolaina mai, e tusa ai o lena fuafuaga?
4 E ui sa i a te ia le aiā uma e taofia ai lona toe fesootaʻi mai i tagata, ae sa leʻi faia faapena e Ieova. Sa ia mautinoa e iai nisi o le fanau a Atamu o le a latou utagia ma le atamai Lana taʻitaʻiga. Mo se faaaʻoaʻoga, ina ua faasilasilaina mai le faasalaga o Atamu ma Eva, na valoia ai e Ieova le oo mai o se “fanau” o le a tetee atu i le Gata, o Satani le Tiapolo. I se taimi mulimuli ane, o le a matuā tuʻimomomoina ai lava le ulu o Satani. (Kenese 3:15) Sa avea lenei valoaga o se feʻau olioli o le faamoemoe i a i latou “o e faalogo i le afioga a le Atua, ma tausi i ai.”—Luka 11:28.
5, 6. O ā auala na fesootaʻi mai ai Ieova i ona tagata a o leʻi oo i le uluaʻi senituri T.A., ma na faapefea ona aogā i a i latou lenei mea?
5 Sa fofogaina mai e Ieova lona finagalo i tamā faatuatua o aso anamua, e pei o Noa, Aperaamo, Isaako, Iakopo ma Iopu. (Kenese 6:13; Esoto 33:1; Iopu 38:1-3) Mulimuli ane, sa ia faatulaga ai e ala mai i a Mose se faasologa o tulafono mo le nuu o Isaraelu. E tele vala na aogā ai le Tulafono faa-Mose i a i latou. E ala i le usitaia o lena tulafono, sa vavae ese ai Isaraelu mai isi uma nuu i le avea ai o i latou ma nuu faapitoa o le Atua. Na faamautinoa atu e le Atua i le fanauga a Isaraelu e faapea pe afai latou te usiusitai i le Tulafono, o le a ia faamanuiaina i latou e lē gata i le faaletino ae faapena foʻi i le faaleagaga, ma avea ai i latou o se malo o ositaulaga, o se nuu paia. Na saunia foʻi e le Tulafono ni tuutuuga mo taumafa tatau ma le tumamā lea e maua ai le soifua mālōlōina lelei. Peitaʻi ane, sa lapataʻi mai foʻi Ieova e faatatau i āuga mataʻutia o le a iʻu i ai pe a lē usiusitai.—Esoto 19:5, 6; Teuteronome 28:1-68.
6 Mulimuli ane, sa faaopoopo atu isi tusi faagaeeina i le kanona o le Tusi Paia. O loo taʻu mai i tala o aso ua mavae feutagaʻiga sa faia e Ieova ma atunuu faapea ma tagata. Ua matagofie ona faamatalaina mai i tusi o fatugasolo ona uiga. Ua valoia mai i tusi o valoaga le faatinoina o le finagalo o Ieova i le lumanaʻi. Sa suʻesuʻeina ma faatatauina ma le faaeteete e tagata faatuatua anamua nei tusitusiga faagaeeina. Na tusi mai se tasi: “O lau afioga o le sulu lea i oʻu vae, ma le malamalama i loʻu ala.” (Salamo 119:105) Sa saunia mai e Ieova aʻoaʻoga ma faamalamalamaga i a i latou o ē na fia faalogologo.
Ua Faasolo Ina Pupula Atili le Malamalama
7. E ui sa faatino e Iesu vavega, ae o le ā na sili ona iloa ai o ia, ma aiseā?
7 E oo mai i le uluaʻi senituri, ua faaopoopo e vaega faalotu a Iutaia uputuu faaletagata i le Tulafono. Sa sesē ona faatatauina le Tulafono, ma na i lo le avea ma puna o le malamalama, ua avea ma avega mamafa ona o na uputuu. (Mataio 23:2-4) Peitaʻi ane, i le 29 T.A., na aliaʻi mai ai Iesu e avea ma Mesia. E lē gata ina aofia ai i lona tofiga le foaʻi mai o lona soifua e sui aʻi le fanau a tagata, ae sa aofia ai foʻi le “molimau i le upu moni.” E ui sa ia faatinoina vavega, ae na sili lava ona iloa o ia o “le aʻoaʻo.” Sa faapei lana aʻoaʻoga o se molī o loo susulu atu i le pogisa faaleagaga lea sa punitia ai mafaufau o tagata. Ua tonu ai la le fetalai mai o Iesu lava ia: “O aʻu nei o le malamalama o le lalolagi.”—Ioane 8:12; 11:28; 18:37.
8. O ā tusi faagaeeina sa tusia i le uluaʻi senituri T.A., ma na faapefea ona maua ai aogā e uluaʻi Kerisiano?
8 Mulimuli ane, na faaopoopo mai ai Evagelia, o ni tala tusitusia e fā o le soifuaga o Iesu, faapea le tusi o Galuega, o se talafaasolopito o le salalau atu o le Faa-Kerisiano ina ua mavae le maliu o Iesu. Sa iai foʻi ma tusi faagaeeina sa tusia e soo o Iesu, faapea le tusi faavaloaga o Faaaliga. Ina ua tuufaatasia nei tusitusiga ma Tusitusiga Eperu, ona atoatoa ai lea o le kanona o le Tusi Paia. O le tuufaatasiga lenei o tusi faagaeeina, ua mafai ai e Kerisiano ona “iloa lelei . . . atoa ma le au paia uma, o le uiga o le lautele, ma le umi, ma le loloto, ma le maualuga” o le upu moni. (Efeso 3:14-18) Sa ono mafai ona latou maua “le finagalo o Keriso.” (1 Korinito 2:16) E ui i lea, sa leʻi malamalama atoatoa na uluaʻi Kerisiano i vala taʻitasi o fuafuaga a Ieova. Na tusi atu le aposetolo o Paulo i ona uso talitonu: “O ona po nei tatou te vaavaai ai faanenefu i le faaata [“uʻamea,” NW ].” (1 Korinito 13:12) O se fāʻata faapena sa na ona tau ataata mai ai o se ata, ae lē o auʻiliʻiliga uma o le ata. Sa leʻi oo mai le malamalamaga atoatoa o le Afioga a le Atua i lena taimi.
9. O le ā le malamalamaga ua tupu a o faagasolo “aso e gata ai”?
9 I aso nei, o loo tatou ola i se vaitaimi ua faaigoa o “aso e gata ai,” o se vaitaimi ua faailogaina i “aso faigata.” (2 Timoteo 3:1) Na valoia mai e le perofeta o Tanielu e faapea, a o faagasolo lena taimi, “[o le a] tupu tele foi le malamalama [“moni,” NW ].” (Tanielu 12:4) O lea, ua fesoasoani mai Ieova, le Fai Fesootaʻiga Sili, i tagata lotofaamaoni ina ia latou malamalama i le uiga o lana Afioga. Ua malamalama nei le vao o tagata e toʻatele e faapea, sa faanofotupuina Keriso Iesu i le lagi, e lē o mafai ona vaaia, i le 1914. Ua latou iloa foʻi, e lē pine ona ia faaiʻuina lea o mea leaga uma ae faafouina le lalolagi e avea o se parataiso i le lalolagi aoao. Ua talaʻia atu nei i le lalolagi aoao lenei vala tāua o le tala lelei o le Malo.—Mataio 24:14.
10. A o faagasolo senituri, ua faapefea ona tali atu tagata i le fautuaga a Ieova?
10 Ioe, i le gasologa o le talafaasolopito ua faailoa mai ai e Ieova lona finagalo ma lana fuafuaga i tagata o le lalolagi. O loo faamatala mai i faamaumauga a le Tusi Paia le toʻatele o ē na faalogo, faatatauina le atamai faale-Atua, ma faamanuiaina ai. O loo taʻu mai ai isi o ē sa tetee i fautuaga alofa a le Atua, ma mulimuli atu i le ala malaia o Atamu ma Eva. Na faataʻitaʻia mai e Iesu lenei tulaga ina ua ia fetalai e faatatau i auala faafaatusa e lua. O le isi auala e taʻitaʻia atu ai i le malaia. O se auala e vatele ma telē le avanoa, o loo ui ai le toʻatele o ē tetee i le Afioga a le Atua. O le isi auala e taʻitaʻia atu ai i le ola e faavavau. E ui ina vaapiapi, ae o loo savavali ai lava se vaega toʻaitiiti o ē o loo taliaina le Tusi Paia o le Afioga lea a le Atua, ma ola e ōgatusa ai.—Mataio 7:13, 14.
Talisapaia o Mea o Loo i a i Tatou
11. O lo tatou iloa ma le talitonu i le Tusi Paia o se faamaoniga o le ā?
11 Po o e iai faatasi ma i latou ua filifilia le ala i le ola? Pe afai o loo e iai, e mautinoa lava o le a e manaʻo ia e tumau ai pea. E mafai faapefea ona e faia faapena? Ia toe manatunatu e lē aunoa faatasi ai ma se agaga talisapaia i faamanuiaga ua oo i ai lou olaga ona o lou iloaina o upu moni o le Tusi Paia. O lou talileleia o le tala lelei o se faamaoniga lava lea o le faamanuiaina o oe e le Atua. Na faailoa mai e Iesu lenei mea ina ua ia tatalo i lona Tamā i upu nei: “Ou te faafetai ia te oe, loʻu Tamā e, le Alii o le lagi ma le lalolagi, ina ua e nanā ia mea i e popoto ma e atamamai, a ua faaalia atu ia mea i tama valevale.” (Mataio 11:25) Sa utagia lelei e tagata faifaiva ma ao lafoga le uiga o aʻoaʻoga a Iesu, ae sa leʻi faapena i taʻitaʻi lotu o ē na maualuluga a latou aʻoaʻoga. Na fetalai atili Iesu: “E le mafai se tasi ona sau ia te au, pe a le tosina mai e le Tamā ua auina mai aʻu.” (Ioane 6:44) Pe afai ua e iloa le Tusi Paia ma ua e talitonu ma usitaia ana aʻoaʻoga, o se faamaoniga lena o le tosina mai o oe e Ieova. O se māfuaaga lea e olioli ai.
12. I ā auala ua aumaia ai e le Tusi Paia se faamalamalamaga?
12 O loo iai i le Afioga a le Atua upu moni e saʻoloto ai ma aumaia ai le malamalama. O i latou e ola e ōgatusa ma le poto o le Tusi Paia ua faasaʻolotoina mai faiga faanuupō, o aʻoaʻoga sesē, ma le leai o se malamalamaga saʻo lea e puleaina ai olaga o le faitau miliona o tagata. Mo se faaaʻoaʻoga, o le iloaina o le upu moni e uiga i le solu ua tatou saʻoloto ai mai i le mataʻu faapea, e mafai e tagata ua feoti ona faaleagaina i tatou pe faapea foʻi, o loo puapuagatia ē pele i a i tatou ua maliliu. (Esekielu 18:4) O le iloaina o le upu moni e uiga i agelu leaga, e fesoasoani mai lea ina ia tatou ʻalofia ai lamatiaga o faiga faaagaga. Ua avea le aʻoaʻoga o le toetū o se faamāfanafanaloto i a i latou ua toesea ni ē e pele i a i latou ona o le oti. (Ioane 11:25) Ua faaalia mai e valoaga a le Tusi Paia i a i tatou le vaitaimi o loo tatou iai i le faagasologa o taimi, ma aumaia ai i a i tatou le mautinoa i folafolaga a le Atua mo le lumanaʻi. Ua faamalosia ai foʻi lo tatou faamoemoe o le ola e faavavau.
13. E faapefea ona aogā i o tatou tino le utagiaina o le Afioga a le Atua?
13 O mataupu silisili faale-Atua o loo iai i le Tusi Paia ua aʻoaʻoina ai i tatou ina ia ola i se auala e aumaia ai aogā i o tatou tino. Mo se faaaʻoaʻoga, ua aʻoaʻoina i tatou e ʻalofia faiga masani e faaleagaina ai o tatou tino, e pei o le faaaogāina o le tapaa ma isi fualaau faasāina. Ua tatou teena le faaaogāina sesē o le ʻava malosi. (2 Korinito 7:1) O le utagiaina o tulafono a le Atua i amioga tatau ua avea lena o se puipuiga mai faamaʻi pipisi ona o feusuaʻiga lē mamā. (1 Korinito 6:18) O le usitaia o fautuaga a le Atua ina ia ʻalofia le manaʻo tele i tupe, ua tatou lē faavevesiina ai le filemu o o tatou mafaufau, e pei ona iai le toʻatele, talu ai le saʻilia o ʻoa. (1 Timoteo 6:10) O ā auala ua aogā ai i lou tino lou faatatauina o le Afioga a le Atua i lou olaga?
14. O le ā le taaʻiga e faia e le agaga paia i o tatou olaga?
14 Pe afai tatou te ola e ōgatusa ma le Afioga a le Atua, ona tatou maua lea o le agaga paia o Ieova. E tatou te atiina aʻe se uiga e pei o uiga o Keriso, lea e faaalia mai i uiga matagofie e pei o le alofa mutimutivale ma le alofa agalelei. (Efeso 4:24, 32) Ua faatupuina foʻi e le agaga o le Atua i a i tatou ona fua—le alofa, olioli, filemu, onosai, agalelei, lotoalofa, faamaoni, agamalu ma le lē gaoia. (Kalatia 5:22, 23) O nei uiga e maua ai faiā fiafia ma le uigā faatasi ma isi, e aofia ai tagata o o tatou aiga. E faamalosia ai i tatou e tatalia ma le lototele tulaga faigatā. Pe e te silafia ea po ua faapefea ona taaʻina e le agaga paia lou olaga mo se tulaga e sili atu ona lelei?
15. A o tatou taumafai ina ia ōgatusa o tatou olaga ma le finagalo o le Atua, ua faapefea ona tatou manuia ai?
15 A o tatou taumafai ina ia ōgatusa o tatou olaga ma le finagalo o le Atua, ua tatou faamalosia ai foʻi la tatou faiā ma Ieova. E atili ai ona faamausalīina lo tatou talitonuga mautinoa e faapea, o loo malamalama ma alofa mai o ia i a i tatou. Ua tatou aʻoaʻoina mai mea tutupu e faapea, e na te lagolagoina i tatou i taimi faigatā. (Salamo 18:18) Ua tatou iloa o loo faafofoga moni mai lava o ia i a tatou tatalo. (Salamo 65:2) Ua oo ina tatou faalagolago atu i lana taʻitaʻiga, i le mautinoa o le a tatou manuia ai. Ma ua i a i tatou le faamoemoe ofoofogia e faapea, i le taimi atofaina a le Atua, o le a ia faafoʻisia ai le lelei atoatoa i ana auauna faamaoni, ma foaʻi i a i latou lana meaalofa o le ola e faavavau. (Roma 6:23) Na tusi mai le soo o Iakopo: “Ia outou faalatalata atu i le Atua, ona faalatalata mai lea o ia ia te outou.” (Iakopo 4:8) Po ua e lagonaina ea le faamalosia o la oulua faiā ma Ieova a o e faalatalata atu i a te ia?
Se ʻOa e Lē Mafaatusalia
16. O ā ni suiga na faia e nisi Kerisiano i le uluaʻi senituri?
16 Na faamanatu atu e Paulo i Kerisiano faauuagagaina o le uluaʻi senituri e faapea, e iai nisi o i latou sa avea muamua o ni ē faitaaga, o ē mulilulua, o ē tauatane, o ē gaoi, o ē matapeʻapeʻa, o ē onā, o ē agatele ma ē faomea. (1 Korinito 6:9-11) O le upu moni o le Tusi Paia na māfua ai ona latou faia ni suiga tetele; sa “taeele [“faamamāina,” NW ]” ai i latou. Seʻi faaata i lou mafaufau se ituaiga o olaga na semanū e te iai, pe ana leai upu moni e faasaʻolotoina ai ia ua e aʻoaʻoina mai le Tusi Paia. E mautinoa lava, o le upu moni o se ʻoa e lē mafaatusalia. Maʻeu lo tatou fiafia ona ua fesootaʻi mai Ieova i a i tatou!
17. Ua faapefea ona fafagaina faaleagaga Molimau a Ieova i sauniga faa-Kerisiano?
17 E lē gata i lea, seʻi mafaufau i le fiafiaga ua tatou maua ona o lo tatou ʻauuso mai lanu ma ituaiga eseese. Ua faasoasoa mai pea e “le auauna faamaoni ma le mafaufau” meaʻai faaleagaga i le taimi tatau, e aofia ai Tusi Paia, mekasini, ma isi lomiga i le anoanoaʻi o gagana eseese. (Mataio 24:45-47) A o faagasolo le tausaga e 2000, na autalu ai e Molimau a Ieova i le tele o atunuu i a latou sauniga i faapotopotoga, manatu tāua mai tusi autū e valu o Tusitusiga Eperu. Sa latou mafaufau loloto ai i soifuaga o tagata e toʻa 40 o loo taʻua i le Tusi Paia, lea e talanoaina i le tusi, Insight on the Scriptures. Sa latou talanoaina le tusa o le tasi vaefā o le tusi o Le Tagata Silisili o Ē Uma na Soifua Mai ma le toetoe lava o le tusi atoa o le Pay Attention to Daniel’s Prophecy! E tolusefulu ono mataupu faaopoopo sa talanoaina mai le mekasini o Le Olomatamata, e ese mai le 52 o mataupu o suʻesuʻega. E lē gata i lea, sa fafagaina tagata o Ieova i lomiga e 12 o La Tatou Faiva o le Malo, faapea lauga lautele i vaiaso taʻitasi sa talanoaina ai mataupu eseese o le Tusi Paia. Maʻeu se tamaoaiga o le poto faaleagaga ua mafai ona tatou maua!
18. I ā auala ua tatou maua ai fesoasoani i totonu o le faapotopotoga Kerisiano?
18 I le lalolagi aoao, e silia ma le 91,000 faapotopotoga o loo sauniaina le lagolagosua ma faalaeiauga e ala mai i sauniga ma le aufaatasiga. O loo tatou mauaina foʻi le lagolagosua a o tatou uso Kerisiano taʻumatuaina o ē o loo naunau e fesoasoani mai i a i tatou i le itu faaleagaga. (Efeso 4:11-13) Ioe, ua matuā faamanuiaina lava i tatou e ala i le mauaina o le poto o le upu moni. E avea ma puna o le olioli le iloaina o Ieova ma auauna i a te ia. Maʻeu le moni o upu a le faisalamo o lē na tusi mai: “Amuia le nuu e fai Ieova mo latou Atua!”—Salamo 144:15.
Pe E te Manatua?
• O ai sa fesootaʻi mai i ai Ieova i aso anamua a o leʻi oo i taimi o uluaʻi Kerisiano?
• Na faapefea ona oo ina susulu atili mai le malamalama faaleagaga i le uluaʻi senituri? i ona pō nei?
• O ā faamanuiaga e maua pe a ola e tusa o le poto e uiga i a Ieova?
• Aiseā e tatou te olioli ai i lo tatou poto e uiga i le Atua?
[Fesili mo le Suʻesuʻega]
[Ata i le itulau 8, 9]
Na faailoa mai e Ieova lona finagalo i a Mose, Noa ma Aperaamo
[Ata i le itulau 9]
I o tatou aso, ua faasusulu mai ai e Ieova le malamalama i lana Afioga
[Ata i le itulau 10]
Seʻi mafaufau i le fiafiaga ua tatou maua ona o lo tatou ʻauuso mai lanu ma ituaiga eseese!