O Aafiaga Tumau

I TAUSAGA taʻitasi, e faapotopoto ai Molimau a Ieova i o latou atunuu i a latou fonotaga ma tauaofiaga faa-Kerisiano. E latou te faia nei mea ina ia olioli ai i faatonuga faaleagaga ma aufaatasiga e ati aʻe ai. Ae o isi vala o a latou faatasiga e mafai foʻi ona oo ai ni aafiaga tumau i ē asiasi ane i ai.

Mo se faaaʻoaʻoga, i a Iulai 1999, na tauaofia ai le faitau afe o Molimau i Mozambique mo aso e tolu e faatamaoaigaina ai faaleagaga, i Tauaofiaga Itumalo o “Afioga Faavaloaga a le Atua.” O le toʻatele o i latou na iai, o le uluaʻi taimi lea ua auai ai i se tauaofiaga. Sa matuā faafiafiaina i latou e lē gata i upu na latou faalogo ai mai le pulelaa ae o mea foʻi na latou vaavaai i ai.

Na faapea mai se faamatalaga na faia i le Maota Fono i Maputo: “Ou te leʻi vaai muamua lava i se nofoaga matagofie faapenei i loʻu olaga atoa! E i ai fasimoli ma faaʻata i fale lē taʻua, ma e matuā manaia le manogi. Sa toʻafilemu foʻi le siʻomaga e aunoa ma se pisa o ni tamaiti o loo tauaʻimisa. E leai ni tautuleiga! Sa ou vaaia ni tagata talavou fiafia o auai i ni talanoaga faalaeiau. Sa matuā aafia foʻi aʻu i le auala na laʻei lelei ai tagata uma. I le isi taimi e toe faia ai faapenei, o le a ou aumaia laʻu fanau ma faatalitonu laʻu tane ina ia matou auai i lenei tauaofiaga.”

Ioe, o le faamaoni, ma le mamā faaletino o Molimau a Ieova, e lē mafai ona lē mātauina. Aiseā e ese ai Molimau mai isi? Auā e latou te tauivi moni lava e faatatauina mea na latou aʻoaʻoina mai le Tusi Paia. Aiseā e lē tauaofia faatasi ai ma i latou i lenei tausaga i a latou tauaofiaga faava-o-atunuu, po o le talaaao atu foʻi i a latou sauniga faalevaiaso i o latou Maota o le Malo ma e tagatagaʻi lava oe i ai?

[Ata i le itulau 32]

ZAMBIA

[Ata i le itulau 32]

KENYA

[Ata i le itulau 32]

MOZAMBIQUE