Fesili Mai le ʻAufaitau

O fea sa iai Tanielu ina o tofotofoina le ʻau Eperu e toʻatolu i luma o se tupua telē lea na faatūina e Nepukanesa i le fanua laugatasi o Turu?

E lē o taʻua i le Tusi Paia le mea sa iai Tanielu, o lea la e leai se tagata i aso nei e mafai ona faamaoniaina le mea sa iai Tanielu i lenā taimi o le tofotofoina o le faamaoni.

Ua manatu nisi e faapea o le tulaga faalemalo o Tanielu po o lona mauaina o ni faaeaga faapitoa mai iā Nepukanesa na maualuga atu ai o ia na i lo Sataraka, Mesako, ma Apeteniko, lea sa lē manaʻomia ai ona alu atu Tanielu i le laugatasi o Turu. Ua faaalia i le Tanielu 2:49 e faapea, e mo se taimi, sa maualuga ai lona tulaga na i lo ana aumea e toʻatolu. Ae e tatou te lē mafai ona faamaoniaina faapea, o lenā tulaga na saʻoloto ai o ia mai le auai atu faatasi ma isi i luma o le tupua.

O le taumafai e faamatalaina le lē auai o Tanielu, na faapea mai ai nisi atonu na alu ese atu o ia i se tiutefai faalemalo pe sa maʻi foʻi na lē mafai ai ona ia auai atu. Peitaʻi, e lē o taʻua lenā mea i le Tusi Paia. Po o le ā lava le mea na tupu, o gaoioiga a Tanielu, e foliga mai sa lē mafai ona tuuina atu i ai ni faitioga, auā ana faapea o le tulaga lenā, e lē taumatea e faaaogā e tagata maualuluga matauʻa o Papelonia e aumaia ai ni moliaga faasaga iā te ia. (Tanielu 3:8) Muamua atu ma ina ua mavae foʻi lenei mea na tupu, na faamaonia ai e Tanielu o ia o sē e tausia le faamaoni, e faamaoni i le Atua po o ā lava tofotofoga na ia fesagaʻia. (Tanielu 1:8; 5:17; 6:4, 10, 11) E ui lava la ina e lē o taʻua i le Tusi Paia le māfuaaga na leʻi iai ai Tanielu i le laugatasi o Turu, ae mafai ona tatou mautinoa sa ia leʻi faagutugutulua i lona faamaoni atu iā Ieova le Atua.—Esekielu 14:14; Eperu 11:33.