Ia Iloa Lou Alualu i Luma
Ia Iloa Lou Alualu i Luma
“Ia e mafaufau i ia mea, ia e faamasani ai; ina ia iloa ai e tagata uma lou alualu i luma.”—1 TIMOTEO 4:15, LF.
1. E mafai faapefea ona e iloa le taimi e pula ai se fualaau ʻaina suamalie ma ua lelei i le taumafa?
SEʻI faaata i lou mafaufau se fualaau ʻaina suamalie e sili ona e fiafia i ai—se apu, se pea, se mago, po o se isi lava fualaau ʻaina. Pe mafai ona e iloa le taimi ua pula ai ma ua lelei i le taumafa? E mautinoa e mafai. O lona manogi, lona lanu, ma lau paʻi atu i ai, o mea uma na e taʻu mai ai iā te oe, ua toe lava o lou tofoina loa o lona susua mai. O le taimi lava e paʻi ai sina fasimea i totonu o lou fofoga, e te ono faia ai ni upu mai se lagona faamalieina. Oka, taʻi susua! Oka, se suamalie! E te matuā lagona le olioli ma le fiafia.
2. E faapefea ona faaalia mai le taʻumatuaina, ma o le ā le aafiaga e oo ai i faiā faaletagata?
2 O lenei gaoioiga faigofie ae matagofie, e iai ni ona faatusatusaga i isi vala o le olaga. Mo se faaaʻoaʻoga, e pei ona iai auala eseese e iloa ai ua pula se fualaau ʻaina suamalie, e faapena foʻi le iai o auala eseese e iloa ai le taʻumatuaina faaleagaga o se tagata. E tatou te mātaulia le taʻumatuaina o se tagata pe a ia faaalia mai uiga e pei o le faautauta, le malamalama, le atamai, ma isi uiga faapena. (Iopu 32:7-9) E mautinoa o se fiafiaga le auaumea ma galulue faatasi ma tagata o ē faaalia maia na uiga i a latou amioga ma gaoioiga.—Faataoto 13:20.
3. O le faamatalaina e Iesu o tagata o ona aso, na faaalia ai le ā e uiga i le taʻumatuaina?
3 Ae i le isi itu, e iai se tagata atonu ua matua i ona tausaga, ae o le auala e tautala ma gaoioi ai, e ono faaalia mai ai le lē taʻumatuaina i lona mafaufau ma i le tulaga faaleagaga. Mo se faaaʻoaʻoga, na fetalai Iesu Keriso e faatatau i le tupulaga faapiʻopiʻo o ona aso, e faapea: “Na sau Ioane, e lei ʻai, e lei inu foi ia; ona latou fai ane ai lea, Ua ia te ia le temoni. Ua sau foi le Atalii o le tagata, ua ʻai o ia ma inu; ona latou fai ane ai lea, Faauta, o le tagata ʻai tele ma le inu uaina.” E ui lava sa matutua na tagata i o latou tausaga, ae na fetalai Iesu, sa latou gaoioi e pei o ni “tamaiti”—sa leʻi taʻumatuaina. Ona ia toe faapea mai lea: “A e taʻuamiotonuina le poto i ana galuega.”—Mataio 11:16-19, LF.
4. O ā auala ua iloa ai le alualu i luma ma le taʻumatuaina?
4 O fetalaiga a Iesu, e mafai ona tatou iloa ai e faapea, o le iai i se tagata o le atamai moni—se faailoga maʻoti o le taʻumatuaina—e iloa lea e ala i galuega na te faatinoina ma iʻuga e maua mai ai. E tusa ai o lenei manatu, seʻi mātau le fautuaga a le aposetolo o Paulo iā Timoteo. Ina ua uma ona faapatino e Paulo mea e tatau ona tulituliloa e Timoteo, ona ia faapea mai lea: “Ia e mafaufau i ia mea, ia e faamasani ai; ina ia iloa ai e tagata uma lou alualu i luma.” (1 Timoteo 4:15, LF ) Ioe, o le alualu i luma o se Kerisiano i le taʻumatuaina e “iloa,” pe faigofie ona mātaulia. O le taʻumatuaina faa-Kerisiano, e pei o se malamalama o loo susulu atu, e lē o se mea e mafai ona faalilo pe nanāina. (Mataio 5:14-16) O lea la, o le a tatou talanoaina auala autū e lua e mafai ona iloa ai le alualu i luma ma le taʻumatuaina: (1) ia faateleina le poto, le malamalama, ma le atamai; (2) ia faaalia mai fua o le agaga.
Ia Loto Gatasi i le Faatuatua ma le Poto
5. E mafai faapefea ona faamatalaina le taʻumatuaina?
5 O le tele o lomifefiloi, e faamatalaina ai le taʻumatuaina e faapea, o le tulaga o le tuputupu aʻe atoatoa, le avea ma foafoaga ua matua atoatoa, ma ua oo i le tulaga faaiʻu po o le tulaga ua fetaui lelei ona iai. E pei ona taʻua i le amataga, e iloa le matua po o le pula o se fualaau ʻaina suamalie, pe a oo ina atoatoa lelei le faataamilosaga masani o lona tuputupu aʻe ma lona foliga mai, lona lanu, lona manogi, ma ua oo foʻi lona tofo i le tulaga e manatu i ai ua fetaui lelei. E tutusa atu ai la le taʻumatuaina, i le tulaga silisili, le atoatoa, e oo lava i le lelei atoatoa.—Isaia 18:5; Mataio 5:45-48; Iakopo 1:4.
6, 7. (a) O le ā e faaalia ai e naunau tele Ieova ina ia alualu i luma ona tagata tapuaʻi uma i le taʻumatuaina faaleagaga? (e) O le ā e fesootaʻi vavalalata atu i ai le taʻumatuaina faaleagaga?
6 E naunau tele Ieova le Atua, i le alualu i luma o ona tagata tapuaʻi uma i le taʻumatuaina faaleagaga. Ona o lea, ua ia faia ai sauniuniga ofoofogia i totonu lava o le faapotopotoga Kerisiano. Na tusi atu le aposetolo o Paulo i Kerisiano i Efeso: “Na ia tuuina mai foi nisi e fai ma aposetolo, o isi foi e fai ma perofeta, o isi foi e folafola le tala lelei, o isi foi e fai ma leoleo atoa ma aʻoaʻo; ina ia faaatoatoaina ai le au paia, latou te fai ai le galuega a auauna, ia atiina ae ai le tino o Keriso; seia tatou oo atu o i tatou uma lava ma le loto gatasi i le faatuatua ma le iloa lelei o le [“poto saʻo e uiga i le,” NW ] Alo o le Atua, ina ia fai ma tagata matua ia oo i le fua o le ua matua, e tatau ma le tumu o Keriso; ina ia le toe tama ninii i tatou o loo felafoaiina e pei o peau, ma feaveaiina i matagi uma lava o matāupu, i le pepelo o tagata, i togafiti leaga ua saunia e faasese ai.”—Efeso 4:11-14, LT.
7 I nei fuaiupu, na faamatala mai ai e Paulo e faapea, o nisi o māfuaaga na aumaia ai e le Atua le tele o nei sauniuniga faaleagaga i le faapotopotoga, ina ia mafai ai e tagata uma ona, ‘oo i le loto gatasi i le faatuatua ma le poto saʻo,’ ia avea ma “tagata matua,” ma ia ‘oo i le fua o le ua matua, e tatau ma Keriso.’ E na o le pau lenā o le auala o le a tatou sao ai mai le pei o ni pepe faaleagaga, o loo felafoaʻiina e manatu ma aʻoaʻoga sesē. Ona tatou iloa ai lea o le sootaga vavalalata i le va o le alualu i luma i le taʻumatuaina faa-Kerisiano ma le mauaina o le “loto gatasi i le faatuatua ma le poto saʻo e uiga i le Alo o le Atua.” E tele ni manatu autū mai le fautuaga a Paulo e lelei ona tatou utagiaina.
8. O le ā e manaʻomia ina ia maua ai le “loto gatasi” i le faatuatua ma le poto saʻo?
8 Muamua, talu ai e tatau ona tausisia se “loto gatasi,” e ao ai i se Kerisiano taʻumatuaina ona autasi ma ia ōgatusa atoatoa ma isi ona uso talitonu, e tusa ai o le faatuatua ma le poto. E na te lē faasilisilia pe maumauaʻi i ni ona lava manatu, pe taofiofimamau i ni manatu patino e tusa ai o se malamalamaga faale-Tusi Paia. Na i lo lea, e faatuatua atoatoa o ia i le upu moni e pei ona faaalia e Ieova le Atua e ala mai i lona Alo, o Iesu Keriso, ma “le auauna faamaoni ma le mafaufau.” E ala i le faaaogāina e lē aunoa o meaʻai faaleagaga ua saunia “i ona itu aso”—e ala mai i lomiga faa-Kerisiano, o sauniga, fonotaga ma tauaofiaga—e mafai ai ona tatou mautinoa lo tatou tausisia o le “loto gatasi” ma isi o tatou uso Kerisiano i le faatuatua ma le poto.—Mataio 24:45.
9. Ia faamatala le uiga o le faaupuga “i le faatuatua” e pei ona faaaogā ai e Paulo i lana tusi atu i Kerisiano i Efeso.
9 Lona lua, o le faaupuga “i le faatuatua,” e lē faasino atu i le talitonuga maumauaʻi lea e faapea mai Kerisiano taʻitoʻatasi ua latou mauaina, ae faasino atu i le atoaga o lo tatou talitonuga, i lona “lautele, ma le umi, ma le loloto, ma le maualuga.” (Efeso 3:18; 4:5; Kolose 1:23; 2:7) O le mea moni, e mafai faapefea e se Kerisiano ona loto gatasi ma isi ona uso talitonu pe afai e na o se vaega o “le faatuatua” e talitonu i ai pe na te taliaina? O lona uiga, e lē tatau ona faamalieina i tatou i le iloaina na o aʻoaʻoga faavae o le Tusi Paia pe tau foʻi ina iai se poto e lē o matuā manino lelei o le upu moni. Na i lo lea, e tatau ona tatou naunau e faaaogā lelei sauniuniga uma a Ieova ua ia faaauala mai i lana faalapotopotoga, ina ia tatou eli loloto ai i lana Afioga. E ao ona tatou tauivi i se tele e mafai ai, ina ia saʻo aʻiaʻi ma atoatoa lo tatou malamalama i le finagalo o le Atua ma ana fuafuaga. E aofia ai i lenei mea le faaalu o se taimi e faitau ma suʻesuʻe ai le Tusi Paia ma lomiga faale-Tusi Paia, ia tatalo i le Atua mo lana fesoasoani ma lana taʻitaʻiga, ia auai e lē aunoa i sauniga faa-Kerisiano, ma ia fai se sao atoatoa i le galuega talaʻi o le Malo ma le saʻilia mai o soo.—Faataoto 2:1-5.
10. O le ā le faauigaina o upu “seia tatou oo atu o i tatou uma” e pei ona faaaogā ai i le Efeso 4:13?
10 Lona tolu, na faatomua mai e Paulo le faamatalaina o le sini vala tolu i upu e faapea, “seia tatou oo atu o i tatou uma.” E tusa ai o le faaupuga “o i tatou uma,” ua aumaia e se tusi o loo faamatalaina mau o le Tusi Paia le uiga e faapea, “e lē o mea uma, e lē taʻitasitasi, e lē faaeseesea, ae e aofia faatasi mea uma.” I se isi faaupuga, e tatau iā i tatou uma lava taʻitoʻatasi ona faia se taumafaiga talafeagai ina ia tulituliloa ai le sini o le taʻumatuaina faa-Kerisiano, faatasi ai ma le ʻauuso atoa uma lava. E faapea se faamatalaga a le Interpreter’s Bible: “O le atoaga o le taulau faaleagaga e lē maua pe a faaesea e se tasi o ia lava, e pei ona lē mafai e se vaega se tasi o le tino ona tuputupu aʻe seʻi vaganā ua faaauau pea ona tuputupu aʻe i se tulaga mālōlōina le tino atoa.” Na faamanatu atu e Paulo i Kerisiano i Efeso, e tatau ona latou tauivi faatasi ma le “au paia uma” ina ia malamalama i le uiga atoa o le faatuatua.—Efeso 3:18a.
11. (a) O le ā e lē o faauiga atu i ai le alualu i luma faaleagaga? (e) O le ā tatou te manaʻomia ina ia alualu ai i luma?
11 Ua manino mai i upu a Paulo e faapea, o le alualu i luma faaleagaga e lē uiga i le tau ina faatumu o o tatou mafaufau i le poto ma ni suʻesuʻega maoaʻe. O le Kerisiano taʻumatuaina e na te lē faaofoina isi i sona atamai maoaʻe. Na i lo lea, ua faapea mai le Tusi Paia: “O le ala o e amiotonu, e tusa ia ma le malamalama o le ao, o loo tupu pea lona malamalama e oo i le tutonu o le la.” (Faataoto 4:18) Ioe, o “le ala,” ae lē o le tagata lea “o loo tupu pea lona malamalama.” Pe afai e faaauau ona faia ni a tatou taumafaiga ina ia ōgatusa atu i le malamalamaga ua sili ona pupula o le Afioga a le Atua, lea o loo foaʻi mai e Ieova i ona tagata, o le a tatou alualu ai i luma faaleagaga. I lenei manatu, ina ia ōgatusa atu o lona uiga ia agaʻigaʻi i luma, ma o se mea lenā e mafai e i tatou uma lava ona fai.—Salamo 97:11; 119:105.
Ia Iloatino Mai “le Fua o le Agaga”
12. Aiseā e tāua ai le iloatino mai o le fua o le agaga i lo tatou sini ina ia alualu i luma faaleagaga?
12 A o tāua “le loto gatasi i le faatuatua ma le poto saʻo,” e faapena foʻi ona tāua mo i tatou le faailoatino mai o le fua o le agaga o le Atua i tafa taʻitasi o lo tatou olaga. Aiseā? Talu ai e pei ona tatou talanoaina, o le taʻumatuaina e lē o se mea e mafai ona faalilo pe natia, ae ua faailogaina e uiga ua manino ona faailoa mai, lea e mafai ona aogā ma atiina aʻe ai. O le mea moni, o lo tatou sini ina ia alualu i luma faaleagaga ua lē na o se taumafaiga ina ia faafoliga atu ni uiga lelei. Na i lo lea, a o tatou tutupu aʻe faaleagaga, o le mulimuli atu i le taʻitaʻiga a le agaga o le Atua, o le a tupu ai se liliuga mataʻina i o tatou uiga ma gaoioiga. Na faapea mai le aposetolo o Paulo: “Ia outou savavali i la le Agaga, ona le faia lea e outou o le tuʻinanau o le tino.”—Kalatia 5:16.
13. O le ā le suiga ua avea ma faamaoniga manino o le alualu i luma?
13 Na sosoo ai ma le siiina mai e Paulo o “galuega a le tino,” lea e anoanoaʻi ma ua “iloa tino.” A o leʻi oo ina malamalama lelei se tagata i mea e finagalo i ai le Atua, ua aafia lona olaga i ala o le lalolagi, ma atonu foʻi ua faatumulia i nisi o mea sa taʻua e Paulo: “o le faitaaga, o le amio leaga, o le matāitu, o le ifo i tupua, o le fai togafiti faataulāitu, o le feitagai, o le femisai, o le losilosi vale, o le lotoa, o le finau vale, o le fevaevaeaiga, o maseiga, o le mataua, o le onaga, o le poula, ma mea faapena.” (Kalatia 5:19-21, LF ) Peitaʻi, a o alualu i luma faaleagaga se tagata, e faasolosolo mālie lava ona ia manumalo mai ai i nei “galuega [lē moomia] a le tino” ae ona taliaina “le fua o le agaga.” O lenei suiga mataʻina i lumamea o se faamaoniga manino e faapea, o loo alualu i luma lenā tagata i le taʻumatuaina faa-Kerisiano.—Kalatia 5:22.
14. Faamatala mai faaupuga e lua o “galuega a le tino” ma “le fua o le agaga.”
14 E tatau ona tatou mātauina faaupuga e lua o “galuega a le tino” ma “le fua o le agaga.” O “galuega” o iʻuga na o mea e faia e se tasi, o le fua o gaoioiga a se tasi. I se isi faaupuga, o mea na lisiina mai e Paulo e faapea o galuega a le tino, o iʻuga na a lē o ni gaoioiga na faia ma le loto i ai e se tasi, pe ona o aafiaga o le tino augavale faaletagata. (Roma 1:24, 28; 7:21-25) I le isi itu, o le faaupuga “le fua o le agaga” e faaalia ai, o uiga o loo lisiina mai, e lē ona o ni taumafaiga i le mea ua taʻua o le lelei o uiga faaletagata, po o uiga totino ua faaleleia, ae o iʻuga o le gaoioiga a le agaga o le Atua i le tagata. E pei lava ona fuaina mai e se laau o ona fua pe a lelei ona tausia, e faapena foʻi ona faaalia mai e se tagata le fua o le agaga pe a lē mataofiofia le faagaoioiga o le agaga paia i lona olaga.—Salamo 1:1-3.
15. Aiseā e tāua ai le uaʻi atu i vala uma o “le fua o le agaga”?
15 O le isi manatu e talanoaina, o le faaaogāina lea e Paulo o le upu “fua” e taaofaʻi ai uiga lelei uma sa ia taʻua. E lē fuaina mai e le agaga le anoanoaʻi o ni fua eseese ina ia faia i ai sa tatou filifiliga i le fua tatou te fiafia i ai. O uiga uma na lisi mai e Paulo—o le alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, ma le pulea totino—e tutusapau lo latou tāua, ma o le tuufaatasia uma o na uiga e mafai ai ona maua le uiga fou faa-Kerisiano. (Efeso 4:24; Kolose 3:10) O lea la, e ui ina tatou iloa o nisi o nei uiga e sili atu ona manino mai i o tatou olaga e tusa ai o o tatou lava uiga totino ma faanaunauga, ae tāua foʻi ona tatou uaʻi atu pea i vala uma na taʻua e Paulo. O le faia faapea, e mafai ai ona tatou faaatagia atoatoa atu uiga e pei o Keriso i o tatou olaga.—1 Peteru 2:12, 21.
16. O le ā lo tatou sini i la tatou saʻiliga o le taʻumatuaina faa-Kerisiano, ma e faapefea ona ausia?
16 O le lesona tāua ua tatou aʻoaʻoina mai le talanoaga a Paulo e faapea, i le saʻiliga mo le taʻumatuaina faa-Kerisiano, ua avea ai ma o tatou sini, e lē na ona maua o le poto sili ma se malamalamaga sili, e lē na o le faatupu aʻe foʻi o ni uiga totino e maoaʻe le mataʻina. E faauiga atu i le lē mataofiofia o le gaoioi o le agaga o le Atua i o tatou olaga. E oo atu ai i le tulaga o le faigofie ona talia e o tatou mafaufauga ma gaoioiga, le taʻitaʻiga a le agaga o le Atua, ma oo ai ina tatou taʻumatuaina faaleagaga. E faapefea ona tatou ausia lenei sini? E ao ona taaʻia o tatou loto ma mafaufau e le agaga o le Atua. E aofia ai i lenei mea lo tatou faamaoni e auai ma faia se sao i sauniga faa-Kerisiano. E tatau foʻi ona lē aunoa lo tatou suʻesuʻeina ma mafaufau loloto i le Afioga a le Atua, ma faataga ona mataupu silisili e taʻitaʻia ai a tatou feutagaʻiga ma isi tagata, faapea faaiʻuga ma filifiliga o loo tatou faia. Ona mautinoa lea, o le a iloatino lo tatou alualu i luma.
Ia Alualu i Luma mo se Viiga o le Atua
17. Ua faapefea i le alualu i luma ona viia ai lo tatou Tamā faalelagi?
17 I le iʻuga, o le iloatino o lo tatou alualu i luma e aumaia ai le viiga ma le mamalu, e lē iā i tatou, ae i lo tatou Tamā faalelagi, o Ieova, o lē ua mafai ai ona tatou taʻumatuaina faaleagaga. I le pō a o leʻi fasiotia Iesu, na fetalai atu ai o ia i lona ʻausoo: “E viia loʻu Tamā i lenei mea, pe a outou fua tele mai; ona fai ai lea outou moʻu soo.” (Ioane 15:8) Na aumaia e le ʻausoo le viiga iā Ieova, e lē gata i fua o le agaga, ae o fua foʻi o le Malo e ala mai i la latou faiva.—Galuega 11:4, 18; 13:48.
18. (a) O le ā le seleselega olioli o loo faia i aso nei? (e) O le ā le luʻi ua tulaʻi mai ona o lenei seleselega?
18 I aso nei, o loo faamanuia ai e Ieova ona tagata a o latou auai i le seleselega faaleagaga i le lalolagi aoao. Mo le tele o tausaga e oo mai i le taimi nei, e tusa ma le 300,000 tagata fou i tausaga taʻitasi ua tuuina atu i latou lava iā Ieova, ma faailogaina lo latou tuuina atu e ala i le papatisoga i le vai. Ua faafiafiaina ai i tatou i lenei mea, ma e mautinoa le faafiafiaina ai foʻi o le finagalo o Ieova. (Faataoto 27:11) Ae peitaʻi, ina ia avea lenei mea o se puna faifai pea o le olioli ma viiga iā Ieova, e manaʻomia ai e na tagata fou uma ona latou ‘savavali ia [Keriso]; ia mauaa ma ia atiina ae ia te ia, ma ia faatumauina i le faatuatua.’ (Kolose 2:6, 7) I lenei tulaga, ua fesagaʻi ai tagata o le Atua ma se luʻi e valalua. I le isi itu, pe afai o oe o se tagata faatoʻā papatiso, po o le a e taliaina ea le luʻi o lou taumafai ‘ina ia iloa e tagata uma lou alualu i luma’? Ae i le isi itu, pe afai ua fai sina leva o e iai i le upu moni, po o le a e taliaina ea le luʻi o lou tauaveina o le tiute tauave o le tausia o le lelei faaleagaga o ē fou? Po o le ā lava le tulaga, ae ua manino mai le manaʻoga ina ia faaoo atu i le taʻumatuaina.—Filipi 3:16; Eperu 6:1.
19. O le ā le faaeaga ma faamanuiaga e mafai ona e maua pe afai e iloatino lou alualu i luma?
19 E ofoofogia faamanuiaga o loo faatalia maia i latou uma o loo galulue mamafa ina ia iloatino lo latou alualu i luma. Seʻi toe manatu i upu faalaeiau a Paulo ina ua mavae lona timaʻia o Timoteo ina ia alualu i luma: “Ia oe lava ia te oe, atoa ma lau e aʻoaʻo atu, ia e tumau pea i ai; auā a ē fai lena mea, e faaolaina ai oe e oe atoa ma e ua faalogologo ia te oe.” (1 Timoteo 4:16) E ala i lou vilivilitaʻi ia iloatino lou alualu i luma, e mafai ai foʻi ona faia sou sao i le faaeaga o le faamamaluina o le suafa o le Atua ma maua ai ana faamanuiaga.
Pe E te Manatua?
• O ā auala e mafai ona iloatino ai le taʻumatuaina faaleagaga?
• O le ā le ituaiga o poto ma le malamalama e atagia mai ai le taʻumatuaina?
• E faapefea i le iloatino mai o “le fua o le agaga” ona faaalia ai le alualu i luma faaleagaga?
• O le ā le luʻi e tatau ona tatou talia a o tatou faaoo atu i le taʻumatuaina?
[Fesili mo le Suʻesuʻega]
[Ata i le itulau 13]
E faigofie ona iloa le pula, po o le taʻumatuaina
[Ata i le itulau 15]
E tatou te alualu i luma faaleagaga e ala i le ōgatusa atu i le upu moni ua faaalia mai
[Ata i le itulau 17]
E fesoasoani le tatalo iā i tatou ina ia faaalia atu ai “le fua o le agaga”