Faia o Lou Talavou ia Taulau Manuia

NA FESILIGIA ni tagata e nonofo i se tasi o atunuu o Europa e filifili se mea e tasi mai i mea nei e tolu: aulelei, mauʻoa, po o le talavou. O le filifiliga sa sili ona maualuga, o le talavou. Ioe, o tagata i so o se ituaiga matutua lava e manatu i tausaga mai le 13 i le 25 o se taimi faapitoa o le olaga. Ma e mananaʻo tagata uma ina ia taulau manuia talavou i le faia o suiga mai le taimi a o laiti seʻia oo atu i le taimi e matutua ai. Ae e faapefea?

Pe e mafai ona fesoasoani le Tusi Paia? E mautinoa lava o le tali i ai o le ioe. Seʻi o tatou iloiloina vala e lua ia e mafai ai e le Tusi Paia ona fesoasoani faapitoa i talavou, lea atonu e sili atu ona fesoasoani i talavou na i lo o se isi lava ituaiga matutua.

Lelei Faiā ma Isi

O le Jugend 2000 o se lipoti i se suʻesuʻega i mea e tele e faatatau i uiga, mea o loo faatāuaina, ma amioga a le silia ma le 5,000 o talavou i Siamani. Ua faaalia e le suʻesuʻega e faapea, pe a oo ina faia e talavou gaoioiga ia e faia i taimi paganoa—e pei o le faalogologo i musika, auai i taaloga, po o le tau lava o le femiomioaʻi solo—o le tele lava o taimi o loo latou faatasitasi ai ma isi tagata. Atonu e sili atu na i lo se isi lava ituaiga o matutua, e mananaʻo tagata talavou e auaufaatasi ma a latou aumea. E talafeagai ai la le faapea, o se tasi o ki mo le taulau manuia i le taimi o le talavou, o le iai lea o se faiā lelei ma isi.

Ae e lē faigofie i taimi uma le iai o se faiā lelei ma isi. O le mea moni, o faiā faaletagata o se itu lea e taʻutino mai e alii talavou ma tamaʻitaʻi talavou e masani lava ona iai faafitauli. O i inei la e mafai ona avea ai le Tusi Paia ma fesoasoani moni lava. O loo iai i le Afioga a le Atua ia taʻiala faavae mo talavou i le atiina aʻe o se faiā e paleni. O le ā o loo fai mai ai le Tusi Paia?

O se tasi o mataupu silisili e sili atu ona tāua i faiā faaletagata, e taʻua o le Tulafono Faaauro: “O mea uma foi tou te loto i ai ia faia e tagata ia te outou, ia faapea lava ona outou faia ia te i latou.” O le feagai ai ma isi i se auala faaaloalo, mamalu, ma le agalelei, e faalaeiauina ai foʻi i latou e feagai ai ma oe i le auala lava lea e tasi. O uiga agalelei e mafai ona faaleleia ai ni tulaga feteenaʻi ma faalogona mafatia. Afai e iloa oe i ou uiga o le magafagafa i isi, e foliga mai la o le a latou amanaʻia faapitoa oe ma fiafia foʻi iā te oe. Pe e te lē o lagonaina ea la le fiafia i le fiafia mai o isi?—Mataio 7:12.

Ua fautuaina oe e le Tusi Paia ia “alofa atu i lē lua te tuaoi, ia pei o oe lava ia te oe.” E manaʻomia ona e alofa iā te oe i se uiga o le manatu lea mo oe lava ma ia iai se tulaga paleni o lou faaaloalogia o oe lava, ia lē tele naʻuā pe soona laʻitiiti tele foʻi. Aiseā e fesoasoani ai lenā tulaga? Ia, afai e lē lelei ou faalogona iā te oe lava, atonu la o loo e soona faitioina isi, lea e ono taofia ai le iai o se faiā lelei ma i latou.  Ae o le faapaleni o lou faatāuaina o oe lava, o le faavae lea e mafai ai ona e atiina aʻe se faigāuō malosi.—Mataio 22:39.

A faia se faigāuō, e manaʻomia ona faamalosia e ala i taumafaiga a tagata uma e toʻalua. O le faaaluina o le taimi e ati aʻe ai se faigāuō e tatau ona e lagonaina ai le fiafia, talu ai “e sili le manuia [“fiafia,” NW] o le na te foai atu, i lo le na te talia mai.” O se tasi o itu o le foaʻi atu, o le faamagalo, lea o loo aofia ai le lē amanaʻia o mea sesē laiti ma le lē faatalitalia o le lelei atoatoa mai isi. Ua taʻu mai iā i tatou e le Tusi Paia e faapea: “Ia iloa e tagata uma lo outou magafagafa.” O le mea moni, “afai e mafaia ia te outou, ia outou nofo lelei ma tagata uma lava.” Ae faapefea pe afai e faasino atu e sau uō iā te oe sou vaivaiga? O le ā lau tali atu? Ia mafaufau i le fautuaga lenei mai le Tusi Paia: “Aua le faataalise ona ita o lou loto,” talu ai “e faamaoni manua mai le uo.” Pe e lē moni ea e iai aafiaga i ou manatu, lau tautala, ma lau amio, mai i au uō? O lea, ua lapataʻi mai ai le Tusi Paia e faapea: “O le feoai ma e amio leaga e leaga ai amio lelei.” I le isi itu, “o lē latou te feoai ma tagata popoto, e poto lava ia.”—Galuega 20:35; Filipi 4:5, NW; Roma 12:17, 18; Failauga 7:9; Faataoto 13:20; 27:6; 1 Korinito 15:33.

Na tautala Marco o se sui o le toʻatele o alii ma tamaʻitaʻi talavou ina ua ia faapea mai: “O mataupu silisili faale-Tusi Paia o se fesoasoani tele lea i le iai o se faiā lelei ma isi. O nisi o tagata ou te iloa, e ola lava i latou mo i latou lava, ma saʻili le auala e mafai ai ona latou mauaina lo latou lava lelei. Ua aʻoaʻoina i tatou e le Tusi Paia e mafaufau, e lē mo na o i tatou, ae mo isi. O le mea o loo oʻu iloa, o le mea sili lenā i le mauaina o ni faiā lelei faaletagata.”

O mea o loo aʻoaʻoina mai le Tusi Paia e tagata talavou e pei o Marco, e fesoasoani lea iā i latou e lē gata i le taimi o le talavou ae faapea foʻi i tausaga i le lumanaʻi. Ae e tusa ai ma le lumanaʻi, ua tatou mauaina le isi auala e mafai ai ona fesoasoani faapitoa le Tusi Paia i tupulaga talavou.

Popolega e Faatatau i le Lumanaʻi

O le toʻatele o talavou o loo tuufesilisili o latou mafaufau. Atonu e sili atu na i lo se isi lava ituaiga o matutua, e mananaʻo talavou e fia iloa mea o loo tutupu ma le māfuaaga ua tutupu ai. Ua sili atu ona faamatalaina e le Tusi Paia na i lo se isi lava tusi, ia māfuaaga mo tulaga ua iai le lalolagi ma ua taʻu mai foʻi iā i tatou mea e ao ona faatalitalia i le lumanaʻi. O le mea lea o loo mananaʻo le tupulaga talavou e fia iloa. Aiseā e tatou te mautinoa ai o le mea lea o loo fia iloa e le tupulaga talavou?

Ioe, e ui lava ina taatele le talitonuga faapea o talavou e ola tau lava o le taimi nei, ae ua faaalia e nisi o suʻesuʻega se manatu e ese teisi. Ua latou faaalia faapea o talavou e masani lava ona latou mātauina lelei mea o loo tutupu i lo latou siʻomaga, ona faia lea o la latou faaiʻuga e faatatau i le auala e ono oo i ai le olaga i le lumanaʻi. O faamaoniga o lenei mea, e toʻa 3 mai le toʻa 4 o alii ma tamaʻitaʻi talavou e mafaufau “soo” po o le mafaufau “i le matuā tele lava o taimi” e faatatau i le lumanaʻi. E ui lava o le tulaga masani o talavou e iai se tulaga mautinoa, ae o le toʻatele o talavou e vaai i le lumanaʻi ma sina popole.

Aiseā e popole ai? O le toʻatele o talavou i aso nei o loo iai faafitauli i le solitulafono, sauā, ma le faaaogāsesēina o fualaau faasāina. E popole talavou e faatatau i le mauaina o ni galuega mautū i se sosaiete ua matuā faatauvā ai lava mo galuega lelei. E latou te lagonaina ia omiga o le taumafai  e mauaina se tulaga lelei i le aʻoga po o le mauaina o se tulaga taulau manuia i le galuega. Na faapea mai ma le faanoanoa se tamaʻitaʻi e 17 tausaga le matua: “Ua tatou ola i se sosaiete ua tuli lava le ʻai o le tagata ia. Ua taumafai tagata uma e fai le mea e manaʻo i ai le tagata lava ia. Ua taumafai lava le tagata e faamaonia le mea e mafai ona ia faia, ma o le mea lenā ou te lē fiafia lava i ai.” Na faapea mai se tasi alii talavou e 22 ona tausaga: “O i latou o taulau manuia i le olaga o loo sologa lelei o latou olaga ma maua le fiafia ma le saogalemu. O i latou e lē o tulaga manuia, ona o ni māfuaaga eseese, ua lē mafai ai ona taulau e pei ona faia ai e a latou aumea, e tumau pea lava i se tulaga maualalo a latou taumafaiga.” Aiseā ua tele ai le uiga tauvā i le olaga? Po o le a tumau ai pea le olaga i lenei auala?

Faamatalaga Talafeagai

Pe a vaai atu ma le atuatuvale po o le popole talavou i le sosaiete o tagata, ua latou ioe—pe iloa pe e lē iloa foʻi—i le Tusi Paia. Ua faaalia e le Afioga a le Atua e faapea o le ‘sosaiete o loo iai nei lea e tuli lava le ʻai o le tagata ia,’ o se faailoga o le taimi. Na tusi le aposetolo o Paulo e faatatau i o tatou aso i se tusi i se alii talavou e suafa iā Timoteo e faapea: “E oo mai . . . aso faigata.” Aiseā e faigatā ai? Talu ai sa tusi atili mai Paulo, o tagata o le a “alolofa i latou ia i latou,  o e mananao i tupe, o e loto vii, o e faamaualuga . . . o e le faafetai, o e amio leaga, . . . o e faasaua.” Pe e lē o se faamatalaga manino ea lenā i le auala o loo amioaʻi ai le toʻatele o tagata i aso nei?—2 Timoteo 3:1-3.

Ua taʻua e le Tusi Paia e faapea o nei aso faigatā o le a tutupu i “ona aso e gata ai,” a o leʻi oo mai suiga tetele i le sosaiete uma faaletagata. O nei suiga o le a aafia ai tagata uma taʻitoʻatasi, e tutusa ai tagata uma o ē matutua ma laiti. O ā ituaiga o suiga? Ua toeitiiti ona suia lea e le pulega o le malo faalelagi ia mataupufai faaletagata, ma o le a olioli tagata o le a i lalo o lenā pulega i “le manuia e tele” i so o se mea. “E fai lava le nuu mo tagata amiotonu, e nonofo ai pea i latou.” O lagona o le popole ma le atuatuvale o le a avea ma mea o taimi ua tuanaʻi.—Salamo 37:11, 29.

E na o le Tusi Paia e aumaia le malamalamaga maufaatuatuaina mo le lumanaʻi. Pe a iloa e se tagata talavou mea o loo faatalitalia i nai tausaga o loo sosoo mai, e mafai ona ia sauniuni mo mea e tutupu mai ma lagonaina le saogalemu ma sili atu ona pulea lelei lona olaga. O nei lagona e faaitiitia ai mafatiaga ma popolega. I lenei la auala o manaʻoga faapitoa mo tupulaga talavou—ina ia malamalama i le sosaiete o tagata ma ia iloa mea o le a aumaia e le lumanaʻi—o loo faamatalaina i le Tusi Paia.

Taulau Manuia i le Talavou

O le ā le faavae mo le fuaina o le taulau manuia o talavou? Po o le maualuga ea o aʻoaʻoga, po o meafaitino, ma le tele o ni uō? O le toʻatele atonu o lo latou manatu lenā. O tausaga mai le 13 seʻia oo i le 25 e tatau ona aumaia ai i tagata taʻitoʻatasi se amataga lelei mo le olaga i taimi o loo mulimuli mai. I nisi o faaupuga, o le taulau manuia i le taimi o le talavou atonu o se faailoaga lea o le tulaga o le a oo i ai i taimi o loo mulimuli mai.

E pei ona tatou vaaia, e mafai ona fesoasoani le Tusi Paia i se tagata talavou ina ia taulau manuia ona tausaga talavou. O le toʻatele o talavou ua latou iloaina lenei mea i o latou lava olaga. Ua latou faitauina le Afioga a le Atua e lē aunoa ma faatatauina mea ua latou aʻoaʻoina. (Tagaʻi i le “Fautuaga Aogā Mai se Auauna Talavou a Ieova,” itulau e 6.) O le mea moni, o le Tusi Paia o se tusi moni lava mo talavou i aso nei ona e mafai ona fesoasoani iā i latou “ina ia atoatoa ona lelei ai . . . ia saunia lava ia i galuega lelei uma lava.”—2 Timoteo 3:16, 17.

[Faamatalaga faaopoopo i le itulau 5]

O se tasi o ki mo le taulau manuia i le taimi o le talavou o le iai lea o se faiā lelei ma isi

[Faamatalaga faaopoopo i le itulau 6]

Atonu e sili atu na i lo se isi lava ituaiga o matutua ua iai, e mananaʻo talavou e fia iloa mea o loo tutupu ma le māfuaaga ua tutupu ai

[Pusa i le itulau 6, 7]

Fautuaga Aogā Mai se Auauna Talavou a Ieova

E 19 tausaga le matua o Alesana. Na ola aʻe o ia i se aiga e Molimau a Ieova, ma sa olioli atoatoa o ia i le faatinoina ma le loto atoa o lona faatuatuaga. Ae e lē o le tulaga lenā sa iai i taimi uma. Ua faamatalaina e Alesana e faapea:

“Atonu e faateʻia oe i le iloa e faapea, sa ou auaufaatasi ma Molimau a Ieova o se talavou e leʻi papatisoina mo le silia i le fitu tausaga. I lenā taimi, sa leʻi faia ma le lotoatoa laʻu tapuaʻiga, sa avea ua na o se faasologa e masani ai. Masalo ai ona sa lē iā te aʻu le lototele e tilofaʻia ai ma le faamaoni aʻu lava.”

Ia ona suia lea o uiga o Alesana. Na ia faaauau mai e faapea:

“Na faaauau ona timaʻi mai oʻu mātua ma aʻu uō i le faapotopotoga ina ia ou faitauina le Tusi Paia e lē aunoa, ina ia ou iloa totino ai Ieova. O le iʻuga, sa ou filifili ai loa e fai se taumafaiga. O lea sa ou faaitiitia ai loa loʻu matamata i le televise ae avea le faitauga o le Tusi Paia o se vaega o laʻu faasologa masani i taeao. Mulimuli ane, na amata ai loa ona ou malamalama i le tāua o le Tusi Paia. Ua ou iloa le auala e mafai ai ona fesoasoani mai le Tusi Paia iā te aʻu. Ae—e sili atu ona tāua i mea uma—ua ou malamalama ai e faapea, e finagalo Ieova ina ia ou iloa o ia. O le taimi lava na ou utagia ai na fautuaga, na amata ai loa ona tuputupu aʻe la ma faiā ma ia, ma amata ai ona faaleleia aʻu faauōga i totonu o le faapotopotoga. Maʻeu se suiga ua faia e le Tusi Paia i loʻu olaga! Ou te fautuaina auauna talavou uma a Ieova e faitau le Tusi Paia e lē aunoa.”

E faitau miliona ia talavou i le lalolagi atoa o loo auaufaatasi ma Molimau a Ieova. Po o oe o se tasi o i latou na? Pe e te manaʻo e maua aogā mai le faitauina e lē aunoa o le Tusi Paia? Aiseā e lē mulimuli ai i le faataʻitaʻiga a Alesana? Ia faaitiitia gaoioiga e itiiti lo latou tāua ae avea le faitauina o le Tusi Paia o se vaega o lau faasologa masani. E mautinoa o le a e mauaina ai aogā.