Fesili Mai le ʻAufaitau

O le ā le umi o le vaitaimi na puapuagatia ai Iopu?

Ua manatu nisi tagata e faapea, o puapuaga o Iopu na faaauau mo le tele o tausaga, ae e lē o faasino atu le tusi o Iopu i na mafatiaga mo se taimi umi.

O le vala muamua o puapuaga o Iopu, o le feoti o tagata o lona aiga ma le faatamaʻiaina o ana meafaitino, ia e foliga mai na puupuu lava se taimi na tutupu ai na mea. E tatou te faitau ai e faapea: “Ua oo i le tasi aso, ona aai ai lea ma feinu uaina atalii [o Iopu] ma ona afafine i le fale o lo latou uso ulumatua.” Na mauaina e Iopu ia lipoti, e sosoo lava le tasi ma le isi, e faapea ua toesea ana mea—lana lafu povi, o ana asini, o ana mamoe, o ana kamela, ma auauna na tausia na meaola. E manino mai, na sosoo ai loa ma le iloaina e Iopu ua feoti ona atalii ma ona afafine, ia sa “aai ma feinu uaina i le fale o lo latou uso ulumatua.” E foliga mai o nei mea uma na tutupu i le aso e tasi.—Iopu 1: 13-19.

O le vala na sosoo ai o puapuaga o Iopu lea atonu sa tele atu se taimi na alu ai. Na faalatalata atu Satani iā Ieova ma faapea atu o le a lē taulau Iopu i le tofotofoga o lona faamaoni pe afai e oo totino iā te ia ni mafatiaga—i lona lava tino. Ona taia lea o Iopu i “le maʻi papala leaga, e gata ae i ona alofivae, e gata ifo i lona tumuai.” O le sosolo a lenei faamaʻi i lona tino uma atonu e ono alu ai se taimi. Ae e foliga mai e alu foʻi se taimi mo le tala e uiga i “nei mea leaga uma” e oo atu ai iā i latou na faapea mai o lana ʻaufaamāfanafana, o ē na ō ane iā te ia.—Iopu 2:3-11.

O Elifasa e sau mai i Timanu i le nuu o Etoma, ma o Sofara e sau mai i le vaega i mātū i sisifo o Arapi, o lea la, o o la nuu moni e lē mamao mai le nuu o Iopu o Usa, lea atonu e i le itu i mātū o Arapi. Peitaʻi, o Pilitati o le tagata Sua, ma e malamalama i ai e faapea o ona tagata na nonofo i tafatafa ane o le Eufirate. Afai sa iai Pilitati i lona nuu i lenā taimi, atonu e alu ia ni vaiaso po o ni masina faatoʻā ia faalogo i le tulaga o Iopu ma malaga atu ai loa i Usa. O le mea moni, atonu foʻi sa iai le toʻatolu lea e latalata ane i le mea na iai Iopu ina ua amata ona mafatiaga. Po o le ā lava le tulaga na iai, ae ina ua taunuu ane aumea e toʻatolu a Iopu, ona “nonofo ai lea o i latou ma ia i le eleele i ao e fitu ma po e fitu” e leʻi tautatala.—Iopu 2:12, 13.

Ona oo mai lea i le vala mulimuli o puapuaga o Iopu, ia ua tumu ai le tele o mataupu o le tusi i ona auʻiliʻiliga. Sa iai se faasologa o ni felafolafoaʻiga po o ni saunoaga a i latou sa faapea o le ʻaufaamāfanafana, ma sa tali atu foʻi i ai Iopu. Ina ua māeʻa lenā tulaga, ona tuuina atu lea e Eliu o se aʻoaʻiga, ma na faasaʻo ai loa e Ieova ia Iopu mai le lagi.—Iopu 32:1-6; 38:1; 40:1-6; 42:1.

O lea, o mafatiaga o Iopu ma le taimi na uma ai, na ono tupu i ni nai masina, pe atonu e itiiti ifo na i lo le tausaga. Atonu ua e iloa mai i ni mea na tutupu e faapea, o puapuaga faigatā e foliga mai e tumau ai pea. Peitaʻi, ia aua neʻi o tatou faagaloina e faapea e oo ina muta puapuaga, e pei foʻi ona muta o puapuaga o Iopu. Po o le ā lava le umi e tatou te feagai ai ma puapuaga, seʻi teu i o tatou mafaufau le lagolagosua a Ieova, e pei ona faaalia mai i upu faagaeeina: “Aua o lo matou puapuaga mamasagia ma le vave mavae, e saunia ai mo i matou le mamafa o le mamalu faavavau e matua silisili ese foi.” (2 Korinito 4:17, LF ) Na tusi le aposetolo o Peteru e faapea: “A o le Atua e ona le alofa tunoa uma lava, o le na valaauina i tatou ia iu atu i lona mamalu faavavau o ia Keriso, pe a tigaina outou i nai aso, e faaatoatoaina outou e ia lava, e faatumauina, e faamalosia foi outou.”—1 Peteru 5:10, LF.