Manumalo i le Faamasinoga Maualuga o Mataupu Faavae

NA MATAʻINA le manumalo a Molimau a Ieova i Siamani i le Faamasinoga Maualuga o Mataupu Faavae i Karlsruhe. O lea, na latou faia ai se laasaga tāua e fesootaʻi atu ma le faailoaina o i latou.

Ua sili atu i le 100 tausaga o talaʻi pea ma le maelega Molimau a Ieova i Siamani. Na latou sao mai sauāga ogaoga i le vaitaimi o pulega faatautalatasi a ni pule se toʻalua i le senituri lona 20—o le National Socialists (Pulega Faatautalatasi) ma le Faa-Komunisi. Talu mai le 1990, na saʻili ai Molimau ina ia aloaʻia faaletulafono i latou i le avea o se faalapotopotoga e iai ni aiā faaletulafono. Ina ua uma ni faamasinoga se lua na manuia ai atoa ma le isi tasi na lē manuia, na talosaga atu ai Molimau i le Faamasinoga Maualuga o Mataupu Faavae, lea na faasilasilaina mai le aso o le a lau ai le iʻuga, le aso 19 o Tesema, 2000.

O se Faaiʻuga na Malilie Uma i ai Faamasino mo Molimau a Ieova

O faamasino uma e toʻafitu na faia le faamasinoga, na latou faia se faaiʻuga lelei mo Molimau. Sa toe liuliuina e faamasino le faamasinoga lea na faia i le 1997 e le Federal Administrative Court ma faatonuina lenā fale faamasino ina ia toe iloiloina le talosaga a Molimau.

Na faaaogā ai e le Faamasinoga Maualuga o Mataupu Faavae le avanoa e faia ai se faamatalaga e faatatau i le faavae o le faiā i le va o le malo ma vaega faalotu. I le tulaga faavae, o le tulaga o se lotu “e faamautinoaina, e lē ala i ona talitonuga ae o ana amioga.”

Sa mātauina foʻi e le faamasinoga e faapea, pe a faatinoina e Molimau le “solitū faa-Kerisiano,” e latou te “lē faitioina ia tulafono faatemokalasi,” ma e “lē mananaʻo foʻi e suia le faatemokalasi i se isi ituaiga o pulega.” I lea, o le lē auai i faigāpalota faapolotiki, e lē tatau ona tauina e faapea o se faamaoniga lea e teena ai le talosaga a Molimau ina ia aloaʻia faaletulafono i latou.—Ioane 18:36; Roma 13:1.

Sa faailoa atili mai e le faamasinoga e faapea, o se tagata talitonu—e tusa po o se Molimau po o se tagata o se isi lotu—e iai nisi taimi e na te iloa ai ua iai i se tulaga ua feteenaʻi ai mea e manaʻomia e le malo ma mea e manaʻomia e lana lotu. Afai la e mulimuli le tagata i lona lotofuatiaifo i le “usiusitaʻi i mataupu silisili a lana lotu e sili atu na i lo o le tulafono,” e tatau la ona manatu i ai le malo e faapea o se mea tonu ma ua talafeagai ma le saʻolotoga o tapuaʻiga.—Galuega 5:29.

Sa faatomua mai i nusipepa le faaiʻuga a le faamasinoga. E toetoe lava o nusipepa uma i Siamani na faasalalauina le lipoti o lenei faamasinoga. Sa faasalalauina i faletelevise autū ma faleualesi faasalalau uma ia lipoti ma faatalanoaga o lenei faamasinoga. Sa leʻi iai se taimi muamua atu na faapea ai ona faalauiloa atu i se tulaga lautele le suafa o Ieova i Siamani.

[Faamatalaga i Ata i le itulau 8]

AP Photo/Daniel Maurer