Se Tusi e Lē Naunau i ai le Tele o Talavou

“E FAAPEFEA ona ou iloa lelei po o le Tusi Paia o le Afioga moni lea a le Atua? I le avea ai o se tusi, ou te lē naunau i ai,” o le faamatalaga lenā a se tamaʻitaʻi talavou e igoa iā Beate.

I Siamani, lea o loo nofo ai Beate, o le toʻatele o talavou e iai faalogona na; e latou te manatu e lē tāua tele le faitauina o le Tusi Paia. Na faaalia e se suʻesuʻega talu ai nei i inā e faapea, pe tusa ma le 1 le pasene o talavou e faitauina le Tusi Paia i le matuā tele lava o taimi, e 2 pasene e faitauina soo, e 19 pasene e seāseā lava faitauina, ae e latalata atu i le 80 pasene e matuā lē faitauina lava. O fuainumera faamaumauina atonu e talitutusa i isi atunuu, masalo e faapena foʻi i le mea o loo e alaala ai. E manino la, o le Tusi Paia o se tusi e lē naunau i ai le tele o talavou.

E lētioa la a taatele le lē iloa ona faitauina o le Tusi Paia i tupulaga talavou! I le amataga o le tausaga e 2000 na lipotia mai ai e le nusipepa o le Lausitzer Rundschau se suʻesuʻega na faia lea na faaalia ai ia le toʻatele o tagata na masani ma Tulafono e Sefulu ma faaaogāina na tulafono e fai ma taʻiala i o latou olaga. E tusa ai ma tagata e silia ma le 60 tausaga, e 67 pasene na latou iloaina tulafono ma taʻitaʻia ai i latou; ae mo i latou e i lalo ifo o le 30 tausaga, sa na o le 28 pasene na faia faapea. O le mea moni, o le toʻatele o talavou, e lē masani ma le Afioga a le Atua.

O Nisi e Ese la Latou Vaaiga

I le isi itu, i le lalolagi atoa, o loo iai le faitau miliona o talavou ua latou iloaina o le Afioga a le Atua e matuā tāua tele. E mo se faataʻitaʻiga o Alesana e 19 tausaga lona matua ma e na te faitauina le Tusi Paia i taeao uma a o leʻi alu atu i le galuega. Na ia taʻua e faapea: “Ou te lē iloaina se isi amataga e sili atu ona lelei mo le aso na i lo le faitauina o le Tusi Paia.” Ua fai ma masani a Sandra le faitauina o se vaega o le Tusi Paia i afiafi uma. Ua ia faamatala mai e faapea: “Ua avea le faitauina o le Tusi Paia ma vaega o laʻu faasologa masani.” Ae o Julia, e 13 tausaga lona matua, ua uma ona ia faia se faasologa o le faitauina o le Tusi Paia a itiiti lava e tasi le mataupu o le Tusi Paia a o leʻi moe i le pō. “Ua ou matuā olioli ai lava, ma ou te manaʻo e faaauau pea i lenā masaniga i le lumanaʻi.”

O lē fea vaaiga e saʻo ma atamai? Pe e aogā moni ea le faitauina o le Tusi Paia? Pe e aogā ma tāua mo le tupulaga talavou? O le ā sou manatu i ai?