O le Tiapolo—E Sili Atu na i lo le na o se Talitonuga Faataulāitu

“I le Feagaiga Fou atoa o loo iai se feteenaʻiga tele i le va o le malosi o le Atua ma uiga lelei i le tasi itu, a o mea leaga o loo taʻitaʻia e Satani, i le isi itu. E lē o se manatu o se tusitala se toʻatasi po o le toʻalua, ae o manatu e talitonu uma i ai. . . . Ua manino mai la faamaoniga a le Feagaiga Fou. O Satani o loo iai moni lava ma e matuā leaga foʻi, e tetee pea lava i le Atua ma tagata o le Atua.”—“The New Bible Dictionary.”

AISEĀ, la, i le toʻatele o ē o loo faapea mai o loo faia le Faa-Kerisiano—ma o loo faapea mai o loo talitonu i le Tusi Paia—ona teena le manatu faapea o loo iai moni lava le Tiapolo? Talu ai, o le mea moni, e latou te lē taliaina le Tusi Paia o le Afioga a le Atua. (Ieremia 8:9) O i latou na faapea mai o loo faia le Faa-Kerisiano na faapea mai foʻi o le ʻautusitala o le Tusi Paia, na latou faaatagia maia filosofia a atunuu o loo siʻomia ai i latou ma sa latou leʻi faaoo maia ma le saʻo le upu moni mai le Atua. Mo se  faataʻitaʻiga o se tagata Katoliko e poto i mataupu faalelotu o Hans Küng, na ia tusi e faapea: “O manatu e lē faavaea iā Satani ma ʻau o temoni . . . na amata mai i talafatu faa-Papelonia ma oo mai ai i le uluaʻi faa-Iutaia ma sau ai i inā ma oo mai ai i le Feagaiga Fou.”—On Being a Christian.

Ae o le Tusi Paia e lē na o se upu a tagata; o le Afioga moni faagaeeina a le Atua. O lea la, o se tulaga atamai pe afai e tatou te manatu mamafa i le mea o loo fai mai ai e faatatau i le Tiapolo.—2 Timoteo 3:14-17; 2 Peteru 1:20, 21.

O le ā le Finagalo i ai o Iesu?

Na talitonu Iesu Keriso faapea e iai moni lava le Tiapolo. Sa leʻi tofotofoina Iesu e ni leaga na iai i totonu iā te ia. Na osofaʻia o ia e se peresona moni lava lea na ia taʻua mulimuli ane o “le alii o lenei lalolagi.” (Ioane 14:30; Mataio 4:1-11) Na ia talitonu foʻi e faapea o loo iai isi meafaiola agaga o loo lagolagoina Satani i ana faufauga leaga. Na ia faamālōlōina tagata na ‘uluitinoina e temoni.’ (Mataio 12:22-28) E oo lava i le lomiga a tagata e lē talitonu i le iai o se Atua o le Rationalist Encyclopædia na mātauina ai le tāua o lenei mea ina ua faapea mai: “Sa avea pea lenei tulaga ma mea e tautevateva ai tagata popoto i mataupu faalelotu i le māfuaaga na talia ai e le Iesu o Evagelia le talitonuga i agaga leaga.” Ina ua fetalai Iesu e faatatau i le Tiapolo ma ana temoni, sa ia leʻi na ona toe taʻua o talitonuga faataulāitu na aumaia mai i talafatu mai Papelonia. Na ia silafia e faapea na latou iai moni lava.

E tele mea ua tatou aʻoaʻoina e faatatau i le Tiapolo pe a tatou iloiloina fetalaiga a Iesu i aʻoaʻo faalotu i ona aso e faapea: “O outou nai lo outou tamā le tiapolo, tou te fia faia foi mea e tuʻinanau i ai lo outou tamā. O le fasioti tagata ia talu le amataga, e lei tumau lava ia i le upu moni, auā e le o i totonu lava ia te ia le upu moni; a tautala ia i le tala pepelo, o lana lava lea e tautala aʻi, auā o le pepelo ia, ma le tamā o le pepelo.”—Ioane 8:44, LT.

E tusa ai o lenei taʻu o le Tiapolo, o le uiga o lona igoa o le “taufaaleaga,” o “le pepelo ia, ma le tamā o le pepelo.” O ia o le uluaʻi foafoaga na pepelo e faatatau i le Atua, ma sa ia faia lenā mea i tuā i le faatoʻaga i Etena. Na tulei mai Ieova e faapea o o tatou uluaʻi mātua o le a ‘feoti lava’ pe afai e la te aai mai le laau e iloa ai le lelei ma le leaga. Na ala mai i le gutu o le gata, na taʻua ai e Satani e faapea o na upu e lē moni. (Kenese 2:17; 3:4) Ua talafeagai ai la, ona taʻua o ia o le “gata tuai lea, ua igoa i le tiapolo, i le ma Satani.”—Faaaliga 12:9.

Na pepelo le Tiapolo e faatatau i le laau e iloa ai le lelei ma le leaga. O le faasāsāga o le ʻai mai i lenā laau, na ia finau mai ai, e lē saʻo; o le faaaogāsesēina lea o le pule. Na ia faapea mai o  Atamu ma Eva, e ono “pei o le Atua” i le filifilia mo i laʻua o le mea e lelei ma le mea e leaga. Na faauiga e Satani faapea, o le avea ai o i laʻua ma tagata saʻoloto, e tatau ona la faia la laʻua lava filifiliga maʻoti. (Kenese 3:1-5, faatusatusa i le NW.) O lenei osofaʻia o le saʻo o le auala o loo pule ai le Atua ua lāgā ai ni finauga tāua. O lea ua faataga ai e Ieova se taimi e faaleleia ai nei finauga. O le uiga o lenei mea, o loo faatagaina pea Satani e faaauau ona ola mo se taimi. O lona taimi faatulagaina ua lata tele ina uma. (Faaaliga 12:12) Peitaʻi, o loo faaauau pea ona ia faaesea tagata mai le Atua e ala i pepelo ma le ʻolegiaina o i latou i le faaaogāina o tagata e pei o tusiupu ma Faresaio i aso o Iesu e faalautele atu ai ana aʻoaʻoga.—Mataio 23:13, 15.

Na taʻua foʻi e Iesu faapea o le Tiapolo o “le fasioti tagata ia talu le amataga” ma sa “lei tumau lava ia i le upu moni.” E lē o le uiga o lenei mea faapea na foafoaina e Ieova le Tiapolo o ‘se fasioti tagata.’ Sa leʻi foafoaina o ia e avea ma ituaiga o meaola taufaafefe, e puleaina se nofoaga o loo iai le afi ma faapuapuagatia ai so o se tasi e tetee i le Atua. O “seoli” e pei ona taʻua i le Tusi Paia e lē o se nofoaga mo Satani. O loo faasino atu i le tuugamau o tagata.—Galuega 2:25-27; Faaaliga 20:13, 14.

O le Tiapolo sa iai muamua lava “i le upu moni.” Sa iai le taimi na avea ai o ia ma se vaega o le aiga faalelagi o Ieova o se atalii agaga o le Atua sa lelei atoatoa. Ae e leʻi “tumau lava ia i le upu moni.” Sa sili atu iā te ia ona lava ala ma ana mataupu silisili e faavae i mea pepelo. O lona “amataga,” e lē i le taimi na foafoaina ai o ia o se atalii agelu o le Atua, ae ina ua ia tetee ma le loto i ai faasaga iā Ieova ma pepelo ai iā Atamu ma Eva. Ua pei le Tiapolo o tagata ia sa tetee faasaga iā Ieova i le taimi o Mose. E tatou te faitau i ai e faatatau iā i latou e faapea: “Ua leaga i latou, e le o lana fanau, a o lo latou ila.” (Teuteronome 32:5) O le tulaga foʻi lenā e tasi iā Satani. Na avea o ia ma “fasioti tagata” ina ua ia tetee ma tuuaʻia ai o ia mo le feoti o Atamu ma Eva, ma o le mea moni, o le aiga atoa faaletagata.—Roma 5:12.

Agelu Lē Usiusitai

Na faatasi atu isi agelu i le tetee a Satani. (Luka 11:14, 15) O nei agelu “ua tuua e i latou le mea sa latou nofo ai,” ma liutino i tino faaletagata ina ia mafai ai ona faia feusuaʻiga ma “afafine o tagata” i aso o Noa. (Iuta 6; Kenese 6:1-4; 1 Peteru 3:19, 20) O “lona tolu o vaega o fetu i le lagi,” po o se vaega itiiti o foafoaga agaga, na faia lenei tulaga.—Faaaliga 12:4.

O le tusi e matuā faatumulia i tala faafaatusa o le Faaaliga ua faamatalaina ai le Tiapolo o se “tarako tele e mūmū.” (Faaaliga 12:3) Aiseā? E lē faapea ona e iai moni ni ona foliga taufaafefe, e auleaga. O le mea moni, e tatou te lē iloa tonu, po o le ā le ituaiga o tino o loo iai foafoaga agaga, ae foliga mai o Satani e lē ese mai i isi foafoaga agaga o agelu i le tulaga lenā. Peitaʻi, o le “tarako tele e mūmū” o se faaupuga talafeagai lelei mo Satani i ona uiga feʻai, taufaafefe, malosi tele, ma lona faanaunauga ia faaleagaina.

Ua iai nei Satani ma temoni i se tulaga e matuā taofiofia ai lava. Ua latou lē o toe mafai ona liutino e pei ona sa latou mafai ai i se taimi muamua. E leʻi umi lava talu ona faatūina le Malo o le Atua i aao o Keriso i le 1914, ae lafoina mai loa i latou i lalo i le lalolagi.—Faaaliga 12:7-9.

O le Tiapolo o se Fili e Faigatā Ona Faatoʻilaloina

E ui o le tulaga lenā o loo latou iai, ae o loo tumau pea ona avea le Tiapolo ma fili e faigatā ona faatoʻilaloina. E “fealualuai o ia e pei o se leona tagi, ua saili se tasi e ʻaina e ia.” (1 Peteru 5:8) E lē o ia o ni manatu leaga lē mautinoa o loo iai i o tatou tino lē lelei atoatoa. O le mea moni o loo tatou tauivi i aso uma faasaga i o tatou lava faanaunauga agasala. (Roma 7:18-20) Ae o le tauiviga moni lava e faasaga i “alii o le pouliuli o  lenei lalolagi, atoa ma agaga leaga i mea o i le lagi.”—Efeso 6:12.

O le ā le telē ua oo iai aafiaga a le Tiapolo? “A o le lalolagi uma o loo nofo toilalo i loo leaga,” o le faamatalaga lenā a le aposetolo o Ioane. (1 Ioane 5:19) O le mea moni, e tatou te lē mananaʻo e soona mafaufau mamafa i le Tiapolo po o le faatagaina o le mataʻu i talitonuga faataulāitu e faavaivaia ai i tatou. O lea la, o se tulaga atamai tele le mataala pea i ana taumafaiga e faatauasoina i tatou i le upu moni ma gausia ai lo tatou faamaoni i le Atua.—Iopu 2:3-5; 2 Korinito 4:3, 4.

E lē o taimi uma e faaaogā ai e le Tiapolo ia auala faasaunoa e osofaʻia ai i latou o loo fia faia le finagalo o le Atua. E iai taimi, e avea ai o ia e foliga mai o ‘se agelu o le malamalama.’ Na lapataʻia e le aposetolo o Paulo ia Kerisiano e faatatau i lenei lamatiaga ina ua ia tusi mai: “Ou te fefe, ina neʻi pei ona faaseseina o Eva e le gata i lana togafiti, e faapea ona faaleagaina o outou manatu ina ia le tonu ia Keriso.”—2 Korinito 11:3, 14.

O lea la, e manaʻomia ona ‘tatou faautauta, ia tatou mataala; ia tatou tetee atu ia te ia, o mausali tatou i le faatuatua.’ (1 Peteru 5:8, 9; 2 Korinito 2:11) ʻAlofia le faasesēina gofie o i tatou e Satani e ala i le saʻiliʻili i mea ia e fesootaʻi ma faiga faataulāitu. (Teuteronome 18:10-12) Ia avea ma se tagata suʻesuʻe lelei o le Afioga a le Atua, ma ia manatua sa faasino soo Iesu Keriso i le Afioga a le Atua ina o tofotofoina o ia e le Tiapolo. (Mataio 4:4, 7, 10) Ia tatalo mo le agaga o le Atua. O ona fua e mafai ona fesoasoani iā te oe e ʻalofia ai galuega a le tino, lea o loo faagaeeina ma le uigā e Satani. (Kalatia 5:16-24) E lē gata i lea, ia finafinau i le tatalo iā Ieova pe a e lagonaina le omia i nisi o auala mai le Tiapolo ma ana temoni.—Filipi 4:6, 7.

E lē manaʻomia le mataʻu i le Tiapolo. Ua folafola mai e Ieova le puipuiga moni faasaga i so o se mea e mafai ona faia e Satani. (Salamo 91:1-4; Faataoto 18:10; Iakopo 4:7, 8) “Ia outou loto tetele i le Alii, ma le malosi o lona mana,” na faapea mai ai le aposetolo o Paulo. Ona ‘outou mafaia lea ona tetee atu i togafiti a le tiapolo.’—Efeso 6:10, 11.

[Ata i le itulau 5]

Na silafia e Iesu faapea o le Tiapolo o se peresona moni lava

[Ata i le itulau 6]

“O le lalolagi uma o loo nofo toilalo i loo leaga”

[Faamatalaga i Ata]

NASA photo

[Ata i le itulau 7]

Ia tetee atu i le Tiapolo e ala i le suʻesuʻeina o le Afioga a le Atua ma le tatalo e lē aunoa