E Mafai Ona iā te Oe le Faatuatua Moni

Ina ua 19 tausaga o Sarah Jayne, na ia iloaina ai e faapea, ua maua ona fua fafine i le kanesa (ovarian cancer). Ina ua uma ona faia le taotoga, na ia lagonaina le malosi ma sa ia talitonu ma le mautinoa i lona lumanaʻi. O le mea moni, ona sa matuā mautinoa o ia, o lea ina ua 20 ona tausaga, sa ia faamau ai loa ma amata ona faia fuafuaga mo lana faaipoipoga. Ae i lenā lava tausaga na toe maua ai i le kanesa, ma ia iloaina ai faapea, e na o ni nai vaiaso o loo totoe e ola ai. Na maliu Sarah Jayne iā Iuni 2000, a o toetoe lava atoa lona 21 tausaga.

O LE mea na maofa ai tagata na asiasi ane iā Sarah Jayne i le falemaʻi, o lona faamoemoe mautinoa lea i le lumanaʻi, faatasi ai ma le mauaa o lona faatuatua i le Atua ma lana Afioga, le Tusi Paia. E ui lava i le tulaga mataʻutia na ia fesagaʻia, ae na maumauaʻi pea lona faamoemoe i le toetū—faapea o le a ia toe vaai ai i ana uō uma. (Ioane 5:28, 29) Na ia faapea mai: “O le a ou toe feiloaʻi ma outou uma i le lalolagi fou a le Atua.”

O nisi ua latou faalēaogāina lenā faatuatua i le faapea mai e taufaasesē. Ua fesili mai Ludovic Kennedy e faapea: “O le ā se isi mea ua iai i le talitonuga i le ola pe a mavae le oti na i lo o se talitonuga o tagata e lē mautū o latou manatu, lea e faapea pe a ili mai le pu mulimuli o le a iai keke ma pia, ma meaʻai e sili ona taugatā ma le leo o pu o le a iai foʻi i inā, e faapea i se nofoaga e pei o Etena ua iai laau tauluulu, o le a latou auai ai i taimi fiafia ma i latou na feoti muamua atu iā i latou, ma isi foʻi o le a feoti mulimuli mai iā i latou?” Ona o lenā faamatalaga, e tatau la ona tatou lāgā ai se fesili e faaalia ai lo tatou lē fiafia, O lē fea e sili atu ona talafeagai—o le talitonu faapea “o le olaga lenei e na o le pau lava lea o le olaga, o lea e sili ai la ona fai le mea e sili atu tatou te mafaia,” e pei lava ona fautua mai ai Kennedy,  po o le talitonu i le Atua ma lana folafolaga i le toetū? Na filifilia e Sarah Jayne le manatu mulimuli. Na faapefea ona ia atiina aʻe lea faatuatua?

‘Ia Saili le Atua ma Iloa o Ia’

Ina ia ati aʻe le faatuatua ma le faamoemoe i se tasi, e manaʻomia ona e iloaina o ia ma ia iloa pe faapefea ona ia mafaufau ma gaoioi. O lenei gaoioiga e aofia ai le loto faapea ai ma le mafaufau. E faapena moni lava le atiina aʻe o le faatuatua moni i le Atua. E tatau ona e iloa lelei o ia, ia aʻoaʻoina e tusa o ona uiga ma lona peresona, ina ia iloa ai faamaoniga o lona faamoemoeina ma lona maufaatuatuaina i mea uma ua ia fetalai i ai ma faia.—Salamo 9:10; 145:1-21.

E manatu nisi faapea e lē mafai ona faia lenā mea. Ua latou faapea mai e mamao tele le Atua, e faigatā tele ona malamalama i ai—pe afai e moni o loo soifua o ia. “Afai e moni le Atua e pei ona talitonu i ai Kerisiano e pei o Sarah Jayne,” o le fesili lea a le tagata masalosalo, “aiseā la e lē o faailoa mai ai o ia iā i tatou uma?” Ae po o le Atua ea e matuā mamao tele ma ua lē mafai ai ona saʻili atu iā te ia? I se lauga i le ʻaufaifilosofia ma tagata atamamai i Atenai, na taʻua ai e le aposetolo o Paulo e faapea “o le Atua na faia le lalolagi ma mea uma lava o i ai” ua ia saunia foʻi mea uma lava o loo manaʻomia ina ia ‘saili iā te ia ma iloa o ia.’ O le mea moni, na taʻua e Paulo e faapea: “E le mamao o ia ma i tatou taitoatasi.”—Galuega 17:24-27.

E faapefea la, ona e ‘saili i le Atua ma iloa o ia’? Ua faia e nisi lenei mea i le na ona mātauina lava o le vateatea o loo siʻomiaina ai i latou. I le toʻatele, o le vateatea lava ia ua lava lenā faamaoniga e faatalitonuina ai i latou faapea e tatau ona iai Lē na Foafoaina Mea. * (Salamo 19:1; Isaia 40:26; Galuega 14:16, 17) E latou te talitonu, e pei foʻi o le aposetolo o Paulo, e faapea o “mea e le vaaia [a le Atua] talu ona faia o le lalolagi, e vaaia lava ia i le mafaufau i mea na faia, o lona mana faavavau lava lea ma lona Atua.”—Roma 1:20, LF; Salamo 104:24.

E Tatau Ona Iai Sau Tusi Paia

Ina ia atiina aʻe le faatuatua moni i Lē na Foafoaina Mea, e iai se isi mea e manaʻomia na ia saunia. O le ā lenā mea? O le Tusi Paia—o le Afioga faagaeeina a le Atua, lea e na te faaalia mai ai lona finagalo ma ana fuafuaga. (2 Timoteo 3:16, 17) “Ae faatali,” o le a faapea mai nisi, “e mafai faapefea ona e talitonu i so o se mea o fai mai ai le Tusi Paia pe a e vaai atu i mea leaga o loo faia e tagata o loo faapea mai o loo mulimuli atu i le Tusi Paia?” O le mea moni, ua iai i Kerisinetoma se talafaasolopito mataʻutia o le faagutugutulua, o faiga sauā e aunoa ma le alofa, ma amioga lē mamā. Ae i so o se tagata e mafaufau lelei e mafai ona ia iloaina faapea o Kerisinetoma e na ona ia faafoliga mai o loo mulimuli atu i mataupu silisili o le Tusi Paia.—Mataio 15:8.

Na lapataʻi mai le Tusi Paia lava ia faapea e toʻatele tagata o le a faapea mai o loo latou tapuaʻi i le Atua, peitaʻi o le mea moni, ua “latou faafiti i le Alii na ia faatau mai ia te i latou.” “Ona o i latou,” ua faapea mai ai le aposetolo o Peteru, “e upuleagaina ai le ala o le upu moni.” (2 Peteru 2:1, 2, LF ) Na faapea mai Iesu Keriso o i latou nei o “e fai amio leaga” o le a mātaulia lelei i a latou gaoioiga leaga. (Mataio 7:15-23) O le teena o le Afioga a le Atua ona o le talaaga o Kerisinetoma ua pei o le lafoaʻia o se tusi mai i se uō e maufaatuatuaina ona o le tagata na ia aumaia le tusi e leaga lona talaaga.

A aunoa ma le Afioga a le Atua e lē mafai ona atiina aʻe le faatuatua moni. Pe faaupu faapea, ua na o le Tusi Paia lava ua aumaia ai e Ieova lona lava finagalo i mataupu. Ua ia faaalia tali i fesili o loo tulaʻi mai pea lava pea, e pei o le māfuaaga ua ia faatagaina ai pea puapuaga ma tigā ma le auala o le a ia foʻia ai na tulaga. (Salamo 119:105; Roma 15:4) Na oo ina talitonu Sarah Jayne e faapea o le Tusi Paia o le Afioga faagaeeina a le Atua. (1 Tesalonia 2:13; 2 Peteru 1:19-21) E faapefea? E lē faapea ona sa taʻuina atu e ona mātua iā te ia e talitonu i ai, ae ona sa ia faaaluina se taimi e fefulifulisaʻi ai ma le faamaoni ia faamaoniga e faaalia ai faapea o le Tusi Paia o se faaaliga mataʻina mai le Atua. (Roma 12:2) Mo se faataʻitaʻiga, na ia mātauina le malosi o le aafiaga a le Tusi Paia i olaga o i latou o loo pipiimau atu i mataupu silisili o loo iai. O le fesoasoani a lomiga e pei o The Bible—God’s Word or Man’s?, * na ia iloiloina māeʻaeʻa ai foʻi le anoanoaʻi o faamaoniga i le Tusi Paia e faamaonia ai le faagaeeina e le Atua.

 “E Tupu le Faatuatua i le Faalogo”

Peitaʻi, e lē lava, le na ona iai o le Tusi Paia po o le talitonu faapea e faagaeeina. O “le faatuatua,” ua tusi mai ai le aposetolo o Paulo, “e tupu . . . i le taulogologo [“faalogo,” NW ].” (Roma 10:17) O le faalogo i le Tusi Paia e atiina aʻe ai le faatuatua, ae lē na ona iai o se Tusi Paia. E te “faalogo” i mea o loo fetalai mai ai le Atua e ala i le faitauina ma le suʻesuʻeina o lana Afioga. E oo lava i ē laiti e mafai ona latou faia faapea. Ua faapea mai Paulo, “talu foi ina o e tama itiiti” na aʻoaʻoina Timoteo i “tusi paia” e lona tinā ma le tinā o lona tinā. Pe e te mafaufau ea faapea sa aafia ai se ituaiga o faiga e faatauanauina ma le malosi? E leai! Sa leʻi faatogafitia pe faasesēina Timoteo i so o se tulaga. Sa ‘mautinoa ia te ia’ mea na ia faalogo ma faitau i ai.—2 Timoteo 1:5; 3:14, 15.

O le auala foʻi lea e tasi na mautinoa ai Sarah Jayne. I le pei o tagata Perea i le uluaʻi senituri, na ia “talia le upu [mai ona mātua ma isi na aʻoaʻoina o ia] ma le fiafia tele.” A o laʻitiiti, e lē taumatea sa ia faatuatua i mea na faamatalaina e ona mātua iā te ia. Mulimuli ane, ina ua matua o ia, sa ia leʻi na ona taliaina o mea uma na aʻoaʻoina ai o ia e aunoa ma se malamalama i ai. Sa ia “saili i Tusi i lea aso ma lea aso, pe moni ia mea.”—Galuega 17:11.

E Mafai Ona E Atiina Aʻe le Faatuatua Moni

E mafai foʻi ona e atiina aʻe le faatuatua moni—le faatuatua lea na faamatalaina e le aposetolo o Paulo i lana tusi i Kerisiano Eperu. O lenā faatuatua, na ia taʻua, o “le faalagolago lea i mea ua faamoemoe i ai, o le mautinoa lea o mea e le o vaaia.” (Eperu 11:1) O le iai o se faatuatua faapena, o le a e matuā mautinoa ai o le a faataunuuina ou faamoemoega uma ma mea o loo e faatalitalia, e aofia ai ma le folafolaga a le Atua i le toetū. O le a faatalitonuina oe faapea o na faamoemoega e faavae aʻe i mea moni ua faamautinoaina, ae lē na o le moomoo atu ina ia faataunuuina. O le a e iloa ai faapea na taulau pea lava Ieova i le tausia o ana folafolaga. (Iosua 21:45; 23:14; Isaia 55:10, 11; Eperu 6:18) O le lalolagi fou ua folafolaina mai e le Atua o le a matuā moni iā te oe e pei lava ua oo mai. (2 Peteru 3:13) O le a e vaai manino ai i mata o le faatuatua faapea o Ieova le Atua, ma Iesu Keriso, ma le Malo o le Atua o ni mea moni lava, e lē o ni talitonuga na fatuina.

E lē o tuua na o oe e ati aʻe le faatuatua moni. E lē gata ina saunia lana Afioga ina ia mauaina, ae ua saunia foʻi e Ieova le faapotopotoga Kerisiano i le lalolagi aoao o loo tuutoina atu e fesoasoani i  tagata o loo saʻo o latou loto e atiina aʻe lo latou faatuatua i le Atua. (Ioane 17:20; Roma 10:14, 15) Ia taliaina fesoasoani uma ua saunia e Ieova e ala i lenā faalapotopotoga. (Galuega 8:30, 31) Talu ai o le faatuatua o le fua o le agaga paia o le Atua, o lea ia tatalo e lē aunoa mo lenā agaga e fesoasoani iā te oe e ati aʻe le faatuatua moni.—Kalatia 5:22.

Aua neʻi faavaivai ona o tagata masalosalo o ē faatauemu i so o se tasi o loo faapea mai e faatuatua i le Atua ma lana Afioga. (1 Korinito 1:18-21; 2 Peteru 3:3, 4) O le mea moni, o le faatuatua moni e telē sona aogā i le faamalosia o lau filifiliga faasaga i na osofaʻiga. (Efeso 6:16) Na iloa lelei e Sarah Jayne le moni o lenā mea, ma na ia faalaeiauina ai pea i latou na asiasi ane i le falemaʻi ina ia atiina aʻe lo latou lava faatuatua. “Ia fai le upu moni ma au meatotino,” o ana upu na na fai atu ai. “Ia suʻesuʻe i le Afioga a le Atua. Ia pipiimau atu i le faalapotopotoga a le Atua. Tatalo e lē aunoa. Ia galue malosi i le auaunaga iā Ieova.”—Iakopo 2:17, 26.

I le mātauina o lona faatuatua i le Atua ma le toetū, na faapea mai ai se tasi o ana teine tausimaʻi: “E te talitonu moni lava i lenei mea, a ea.” Ina ua fesiligia po o le ā na avatua iā te ia lenā vaaiga mautinoa e ui i ona puapuaga, na ia tali mai e faapea: “O le iai o le faatuatua iā Ieova. O ia o se uō moni iā te aʻu, ma ou te matuā alofa tele iā te ia.”

[Faamatalaga pito i lalo]

[Ata i le itulau 6]

‘Talu foi ina o tama itiiti’ na aʻoaʻoina Timoteo i “tusi paia” e lona tinā ma le tinā o lona tinā

[Faamatalaga i Ata]

Mai le “Photo-Drama of Creation,” 1914

[Ata i le itulau 6]

Na viia tagata Perea ona o le suʻesuʻeina e lē aunoa o le Tusi Paia

[Ata i le itulau 7]

O le faalogologo ma le usitaia o le Tusi Paia, ae lē na ona iai o se Tusi Paia, e atiina aʻe ai le faatuatua

[Ata i le itulau 7]

“O le a ou toe feiloaʻi ma outou uma i le lalolagi fou a le Atua”