Fesili Mai le ʻAufaitau

Na faapefea ona faailoa atu e le gata i le faatoʻaga o Etena iā Eva le manatu ina ia solia le tulafono a le Atua e faatatau i le laau e iloa ai le lelei ma le leaga?

Ua taʻua i le Kenese 3:1 e faapea: “Ua sili le atamai o le gata i manu uma o le vao na faia e Ieova le Atua. Ua fai mai o ia i le fafine, E moni ea, na fetalai mai le Atua, lua te le aai i laau uma o le faatoaga?” E eseese lava faamatalaga ua faaalia i le auala atonu na talanoa atu ai le gata iā Eva. O le tasi manatu e faapea, na faia e ala i gaoioiga po o taga. Mo se faaaʻoaʻoga, na taʻua e se failotu Egelani o Joseph Benson e faapea: “E foliga mai, atonu sa tele lava ina faia i ni faailoga po o ni mea tai faapena. O le mea moni, ua manatu nisi e faapea, sa mafai e gata i na aso ona mafaufau ma tāutala, . . . ae e leai se faamaoniga o lenā mea.”

Ae peitaʻi, i le faaaogāina e na o ni gaoioiga, e mafai faapefea e le gata ona faailoa atu iā Eva le manatu faapea, o le ʻaina o le fua faasāina o le a avea ai o ia e pei o le Atua, e mafai ona iloa le mea lelei ma le mea leaga? E lē gata i lea, na auai Eva i le talanoaga, lea na ia tali atu ai i le fesili na lāgā e le gata. (Kenese 3:2-5) O le manatu faapea na talanoa atu le gata e ala i na o ni taga po o ni gaoioiga, o le a faia ai se faaiʻuga e faapea, na tali atu Eva e ala i le faaaogāina o taga, ae o lea e fai mai le Tusi Paia na tautala atu o ia.

I le taʻua o lenei mea na tupu, na lapataʻia ai e le aposetolo o Paulo ia uso Kerisiano: “Ou te fefe, ina neʻi pei ona faaseseina o Eva e le gata i lana togafiti, e faapea ona faaleagaina o outou manatu.” O le lamatiaga lea sa tautala i ai Paulo, na sau mai “aposetolo pepelo, o le au faigaluega ʻoleʻole.” O le faamataʻu na ala mai i na “aposetolo silisili” sa lē na o ni gaoioiga ma ni taga. Sa aofia ai a latou tala—a latou upu faaʻoleʻole, na fai mai e faasesē ai isi.—2 Korinito 11:3-5, 13.

E ui lava o tala na faaaogā e faasesē ai Eva i le faatoʻaga i Etena, e leai se mea o faapea mai ai sa iai ni alāleo o le gata. O le mea moni, e na te leʻi manaʻomia na mea. Ina ua tautala atu le agelu a le Atua iā Palaamo e ala i se asini fafine, sa leʻi manaʻomia e le manu se pusa leo lavelave e pei o le pusa leo o le tagata. (Numera 22:26-31) E manino la, ʻina ua gagana mai lenei manu ave avega e lē tautala i le leo o se tagata,’ o le malosi na faia ai lenei gaoioiga, na sau mai le nofoaga o agaga.—2 Peteru 2:16.

O le meafaiola agaga lea sa i tua o le gata lea na tautala atu iā Eva, ua faailoa mai e le Tusi Paia “o le gata tuai lea, ua igoa i le tiapolo, i le ma Satani.” (Faaaliga 12:9) O le leotele lea na faalogoina e Eva ma tali atu i ai, na sau mai i le uunaʻiga a Satani, o lē “ua liua o ia e ia ma agelu o le malamalama.”—2 Korinito 11:14.

[Ata i le itulau 27]

“Ona avea ai lea o oulua e pei o le Atua, o loo iloa le lelei ma le leaga”