Pe o Iai ea se Faamoemoe mo se Faaolataga?

Ua taʻua le senituri lona 20 o se tasi o senituri e sili ona faamaligi toto i le talaaga o le tagata. I le faitau sefulu o tausaga na seʻi faatoʻā mavae atu, na matuā taatele ai soligatulafono, o taua, o feteenaʻiga i le va o ituaiga, le faaaogāsesēina o fualaau, le lē faamaoni, ma faiga sauā. E lē gata i lea, o le tigā ma mafatiaga ua oo i ai ona o maʻi, le soifua matua, ma le oti. O ai sē e lē o moomoo mo se faasaʻolotoina mai le anoanoaʻi o faafitauli ua iai i le lalolagi i aso nei? A o tatou tagaʻi atu i le lumanaʻi, pe o iai ea se faamoemoe mo se faaolataga?

SEʻI manatu i le faaaliga na faailoa ane i le aposetolo o Ioane i le tusa ma le 2,000 tausaga ua mavae. Na ia tusi mai: “Faauta, ua faatasi ma tagata le fale fetafai o le Atua, e mau foi o ia ma i latou; e fai foi i latou mona nuu, e ia te i latou le Atua lava. E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.” (Faaaliga 21:3, 4, LT) Sa faapena foʻi ona folafola mai e le perofeta o Isaia e faapea: “E faaumatia e ia le oti e faavavau; e soloiesea foi e le Alii o Ieova o loimata i mata uma lava; e faateaeseina foi e ia le gao o lona nuu i le lalolagi uma lava; auā ua fetalai mai ai Ieova.”—Isaia 25:8.

Seʻi tau ina faaata i lou mafaufau le mea o le a oo i ai le faataunuuga o folafolaga a le Atua! O le a laveaʻiina pe faasaoina le fanau a tagata, mai faiga faatigā ma faiga sauā, mai pogai o puapuaga ma mafatiaga. Ioe, e oo lava i maʻi, le soifua matua ma le oti o le a tatou lē toe pagatia ai! Ua folafola mai e le Afioga a le Atua, le Tusi Paia, le ola e faavavau i tulaga lelei atoatoa i le lalolagi. (Luka 23:43; Ioane 17:3) Ma e mafai ona maua e tagata uma o ē faanaunau i ai. “O [le] finagalo [o le Atua] ina ia faaolaina o tagata uma lava, ma ia oo ina iloa lelei le upu moni.”—1 Timoteo 2:3, 4.

Peitaʻi, ina ia maua aogā mai folafolaga a le Atua, e tatau ona tatou malamalama i le matafaioi o loo faia e Iesu Keriso i lo tatou faaolataga ma faaalia le faatuatua iā te ia. O Iesu lava ia na fetalai: “Ua faapea lava ona alofa mai o le Atua i le lalolagi, ua ia au mai ai  lona Atalii e toatasi, ina ia le fano se tasi e faatuatua ia te ia, a ia maua e ia le ola faavavau.” (Ioane 3:16) I le faasino atu i le tulaga autū o Iesu Keriso i lenei mataupu, na faapea mai ai le aposetolo o Peteru: “E leai foi se tasi ua i ai le ola; e leai lava se isi igoa i lalo o le lagi ua foaiina mai i tagata, e mafaia ona faaolaina ai o i tatou.” (Galuega 4:12) Na ʻaiʻoi atu le aposetolo o Paulo ma lana aumea o Sila i se tagata sa fia iloa moni lava: “Ina faatuatua ia i le Alii o Iesu Keriso, e faaolaina ai oe atoa ma lou aiga.”—Galuega 16:30, 31.

Ioe, o Iesu Keriso o “le Alii o le ola,” ma e na o ia lava e mafai ona ala mai ai le faaolataga. (Galuega 3:15) Ae e mafai faapefea e se tagata e toʻatasi ona avea ma lenā peresona autū i le faaolaina o i tatou? O le iai o se malamalamaga manino i lana matafaioi i lenei itu e tatau ona faamalosia ai lo tatou faamoemoe mo le faaolataga.

 [Faamatalaga i Ata i le itulau 2]

Itulau 3: Vaalele pomu: USAF photo; tamaiti matelāina: UNITED NATIONS/J. FRAND; se vaatau o loo mū: U.S. Navy photo