Ia Mata‘u iā Ieova ma Anaana i Ana Poloa‘iga
Ia Mataʻu iā Ieova ma Anaana i Ana Poloaʻiga
“Ia e mataʻu i le Atua, ma e anaana i ana poloaiga; auā o mea ia e tatau [“matafaioi,” NW] i tagata uma.”—FAILAUGA 12:13.
1, 2. (a) E mafai faapefea e le mataʻu ona puipuia faaletino ai i tatou? (e) Aiseā e taumafai ai mātua atamamai e totō i mafaufau o a latou fanau se mataʻu lelei?
“E PEI lava ona lamatia le ola i le lototele, e faapena foʻi ona puipuia e le mataʻu,” o le faamatalaga lenā a le alii o Leonardo da Vinci. O le lototele lē mafaufau, e taofia ai se tagata mai lona nofouta i se mea e lamatia ai, ae o le mataʻu e faamanatu atu ai iā te ia ina ia faaeteete. Mo se faataʻitaʻiga, pe a tatou lata atu i le faatausiʻusiʻuga o se tofē ma vaai atu ai i le matuā maualalo o le mea tatou te ono paʻūʻū ifo i ai, o le toʻatele o i tatou e faafuaseʻi lava ona toe solomuli ese. I se tulaga faapena, o le mataʻu lelei e lē gata e atiina aʻe ai se faiā lelei ma le Atua, e pei ona tatou aʻoaʻoina i le mataupu na muamua atu, ae e fesoasoani foʻi e puipuia i tatou mai le āfaina ai.
2 Peitaʻi, o le mataʻu i le tele o lamatiaga i aso nei, e tatau ona aʻoaʻoina. Talu ai e lē o iloa e tamaiti laiti le mataʻutia o le eletise po o feoaʻiga o taavale i le taulaga, e faigofie lava la ona latou aafia i se faalavelave faafuaseʻi matuiā. * O mātua atamamai e taumafai e totō i mafaufau o a latou fanau se mataʻu lelei, ma lapataʻia pea lava pea i latou i lamatiaga o loo siʻomia ai i latou. Ua iloa e mātua faapea o lenei mataʻu e faasaoina ai le ola o a latou fanau.
3. Aiseā ma ua faapefea ona lapataʻia i tatou e Ieova e faatatau i lamatiaga faaleagaga?
3 O loo manatu mamafa mai foʻi faapena Ieova mo lo tatou lelei. Ona o ia o se Tamā alofa, e na te aʻoaʻoina i tatou e ala i lana Afioga ma lana faalapotopotoga ina ia tatou mauaina ai aogā. (Isaia 48:17) O se vaega o lenei polokalame o aʻoaʻoga tauatua o loo aofia ai le lapataʻia “pea lava pea,” (NW) o i tatou e faatatau i mailei faaleagaga ina ia mafai ai ona tatou atiina aʻe se mataʻu lelei i na lamatiaga. (2 Nofoaiga a Tupu 36:15; 2 Peteru 3:1) I le talafaasolopito atoa, e tele mala faaleagaga ma puapuaga sa ono mafai ona ʻalofia pe ‘ana ia i latou lena loto e matatau ai i le Atua, ma tausiusi i ana poloaiga.’ (Teuteronome 5:29) I nei “aso faigata,” e mafai faapefea ona iā i tatou ni loto e matataʻu i le Atua ma ʻalofia ai lamatiaga faaleagaga?—2 Timoteo 3:1.
Liliuese Mai le Leaga
4. (a) O le ā le ʻinoʻino e tatau i Kerisiano ona atiina aʻe? (e) E faapefea lagona o Ieova e faatatau i amioga agasala? (Tagaʻi i le faaopoopoga i le pito i lalo.)
4 Ua faamatalaina e le Tusi Paia faapea “o le mataʻu ia Ieova, o le ʻinoʻino lea i le leaga.” (Faataoto 8:13) Ua faamatalaina e se tusi o loo faamatalaina ai le Tusi Paia lenei ʻinoʻino e faapea “o se uiga taufaalogona agaʻi i tagata ma mea o loo teena, inosia, manatu faatauvaa i ai ma e lē o manaʻo se tasi e iai sana sootaga po o se faiā i ai.” O lea o le mataʻu faale-Atua e aofia ai se lagona lē fiafia po o le ʻinoʻino i mea uma e leaga i le silasila a Ieova. * (Salamo 97:10) E uunaʻia ai i tatou e liliuese mai le leaga, e pei lava ona tatou solomuli ese mai le faatausiʻusiʻuga o se tofē pe a tatou lagonaina le mataʻu. Ua taʻua e le Tusi Paia e faapea: “O le mataʻu foi ia Ieova, ua ʻalo ese ai tagata i le leaga.”—Faataoto 16:6.
5. (a) E mafai faapefea ona tatou faamalosia lo tatou mataʻu faale-Atua ma lo tatou ʻinoʻino mo mea leaga? (e) O le ā o loo tatou aʻoaʻoina mai le talafaasolopito o le nuu o Isaraelu e faatatau i lenei tulaga?
5 E mafai ona tatou faamalosia lenei mataʻu lelei ma le ʻinoʻino i mea leaga, e ala i le iloiloina o āuga leaga e mautinoa e aumaia e le agasala. Ua faamautinoa mai e le Tusi Paia iā i tatou e faapea o le a tatou selesele i mea e tatou te lūlū—pe tatou te lūlū i la le tino po o le lūlū i la le agaga. (Kalatia 6:7, 8) Ona o lenei māfuaaga ua faamatalaina manino mai ai e Ieova iʻuga mautinoa o le lē amanaʻia o ana poloaʻiga ma le lafoaʻia o le tapuaʻiga moni. A leai se puipuiga a le Atua, o le a leai foʻi se auala e puipuia ai le tamaʻi nuu o Isaraelu mai nuu tuaoi sauā ma le malolosi. (Teuteronome 28:15, 45-48) O iʻuga pagatia o le lē usiusitai o Isaraelu ua faamaumauina auʻiliʻili i le Tusi Paia “e fai ma apoapoaiga” ina ia mafai ai ona tatou aʻoaʻoina se lesona ma atiina aʻe le mataʻu faale-Atua.—1 Korinito 10:11.
6. O ā nisi o faataʻitaʻiga faale-Tusi Paia e mafai ona tatou manatunatu i ai i le aʻoaʻoina o le mataʻu faale-Atua? (Tagaʻi i le faaopoopoga i le pito i lalo.)
6 E ese mai i le mea na tupu i le nuu o Isaraelu i sona tulaga o se nuu atoa, ae o loo iai i le Tusi Paia mea moni na tutupu i olaga o tagata taʻitoʻatasi o ē na faatoʻilaloina e le fuā, amioga lē mamā, matapeʻapeʻa, po o le faamaualuga. * O nisi o nei tane na auauna iā Ieova mo le tele o tausaga, ae i sina taimi puupuu lava i o latou olaga, na lē lava ai le malosi o lo latou mataʻu i le Atua, ma latou selesele ai i iʻuga faanoanoa. O le mafaufau loloto i na faataʻitaʻiga faale-Tusi Paia e mafai ona faamalosia ai la tatou filifiliga ina ia aua neʻi faia ni mea sesē faapena. Pagā le faanoanoa o le a iai pe afai e tatou te faatalitali seʻia oo mai ni mala totino a o leʻi aveina i loto fautuaga a le Atua! E ese mai i le talitonuga taatele, o mea e tofo i ai—aemaise pe a soona faamalieina e le tagata ona lava manaʻoga—e leai la se mea lelei e aʻoaʻoina mai ai.—Salamo 19:7.
7. O ai e valaaulia e Ieova i lona fale fetafaʻi faafaatusa?
7 O le isi māfuaaga malosi mo le atiina aʻe o le mataʻu faale-Atua o lo tatou faanaunauga e puipuimalu la tatou faiā ma le Atua. E tatou te matataʻu e faia se mea e lē fiafia mai ai Ieova ona e tatou te faapelepele i lana faauōga. O ai o loo manatu i ai le Atua o se uō, o se tasi o le a ia valaaulia i lona fale fetafaʻi faafaatusa? E na “o le savali ma le amio sao, ma ua fai le amiotonu.” (Salamo 15:1, 2) Pe a tatou faatāuaina lenei faiā tautele ma Lē na Foafoaina i tatou, o le a tatou faaeteete e savavali ma le amio saʻo i lana silafaga.
8. Na faapefea e nisi o tagata Isaraelu i aso o Malaki ona manatu māmā i la latou faauōga ma le Atua?
8 E faanoanoa, ona o nisi o tagata Isaraelu i aso o Malaki na manatu māmā i la latou faauōga ma le Atua. Na i lo le mataʻu ma ava iā Ieova, na latou ofoina atu manu mamaʻi ma manu pipili i luga o lana fata faitaulaga. O le leai o so latou mataʻu faale-Atua na atagia mai i o latou uiga agaʻi i faaipoipoga. Ina ia faaipoipo atu i tamaʻitaʻi e laiti ifo, na latou faateʻa ai i a latou avā na fai a o tauleʻaleʻa mo ni māfuaaga faatauvaa. Na taʻu atu e Malaki iā i latou e faapea e ʻinoʻino Ieova “i le alei” ma o o latou uiga taufaaʻoleʻole ua vavae ese ai i latou mai lo latou Atua. Na faapefea ona tagaʻi ma le finagalo malie le Atua i a latou taulaga pe afai sa ufitia i se tulaga faafaatusa le fatafaitaulaga i loimata—o loimata o le tigā matuitui o a latou avā na lafoaʻiina? O le manino mai o lenā lē faaaloalo mo ana tapulaa na uunaʻia ai Ieova e fesili mai faapea: “O ifea loʻu matautia?”—Malaki 1:6-8; 2:13-16.
9, 10. E mafai faapefea ona tatou faaalia o loo tatou faatāuaina le faauōga a Ieova?
9 I aso nei, ua faapena foʻi ona silafia e Ieova le lotomafatia o le toʻatele o paaga o loo mamā, ma tamaiti ua leai ni faamoemoe ona o le manatu faapito ma amioga lē mamā a tane ma tamā e oo foʻi i avā ma tinā. E mautinoa e matuā faanoanoa ai lava o ia. O se uō a le Atua o le a ia vaai i mea i le auala e pei ona tagaʻi i ai le Atua ma o le a galue mamafa e faamausalīina lana faaipoipoga, ʻalofia mafaufauga faalelalolagi na e taʻufaatauvaaina ai le tāua o le fusi o le faaipoipoga, ma ‘sola ese i le faitaaga.’—1 Korinito 6:18.
10 I faaipoipoga faapea ai ma isi vala o o tatou olaga, o le ʻinoʻino i mea uma e leaga i fofoga o Ieova, faatasi ai ma se talisapaia loloto mo lana faauōga, o le a aumaia ai le finagalo malie o Ieova atoa ai ma lana faamaoniga. Na taʻua ma le maumauaʻi e le aposetolo o Peteru e faapea: “E moni, ua ou iloa e le faailogaina tagata e le Atua; a e peitai o le mataʻu ia te ia i nuu uma lava, ma fai le amiotonu, ua talia i latou e ia.” (Galuega 10:34, 35) Ua iā i tatou le tele o faataʻitaʻiga faale-Tusi Paia ia e faaalia ai le auala na uunaʻia ai e le mataʻu faale-Atua tagata taʻitoʻatasi e faia le mea ua tonu i tulaga eseese e sili ona faigatā.
Le Toʻatolu na Matataʻu i le Atua
11. I lalo o ā tulaga na faalauiloa ai Aperaamo faapea e “mataʻu i le Atua”?
11 O loo iai se tamāloa i le Tusi Paia o lē na faamatalaina e Ieova lava ia o lana uō—o le augātamā o Aperaamo. (Isaia 41:8) Na tofotofoina le mataʻu faale-Atua o Aperaamo ina ua tāpā o ia e le Atua e ofoina atu lona atalii e toʻatasi o Isaako, e fai ma taulaga, o ia lea o le a faataunuuina ai le folafolaga a le Atua e faapea, o le fanau a Aperaamo o le a fai ma nuu tele. (Kenese 12:2, 3; 17:19) Po o le a malo ea le “uo a le Atua” i lenei tofotofoga matuitui? (Iakopo 2:23) O le taimi lava na sii aʻe ai e Aperaamo lana pelu e fasioti ai Isaako, ae faapea mai loa le agelu a Ieova: “Soia le oo lou lima i le tama, aua foi e te fai se mea e tasi ia te ia; auā ua ou iloa nei ua e mataʻu i le Atua, ina ua e le taofia lou atalii, o lou atalii e toatasi, a ua e tuu mai ia te au.”—Kenese 22:10-12.
12. O le ā na uunaʻia ai le mataʻu faale-Atua o Aperaamo, ma e faapefea ona tatou faaalia se uiga talitutusa?
12 E ui lava sa iai nisi taimi muamua atu na faamaonia ai e Aperaamo o ia o se tasi e mataʻu iā Ieova, ae i lenā mea na tupu na ia faaalia ai lona mataʻu faale-Atua i se auala iloga. O lona lotomalie e osi le taulaga iā Isaako sa sili mamao atu na i lo le faaalia o le usiusitai ona o le ava. Na uunaʻia Aperaamo e se faatuatua atoatoa faapea o le a faataunuuina e lona Tamā faalelagi Lana folafolaga e ala i le toe faatūina o Isaako pe a talafeagai ai. E pei ona tusi mai Paulo e faapea, ‘na mautinoa [“atoatoa,” NW ] e Aperaamo e mafai e le Atua ona faia o le mea na folafolaina e ia.’ (Roma 4:16-21) Po ua tatou nofo sauni ea e faia le finagalo o le Atua e tusa lava pe manaʻomia ai ni faataulagaina tetele? Po o iā i tatou le mautinoa atoatoa faapea o lenā usiusitai o le a aumaia ai aogā mo se taimi umi, i le iloa faapea o Ieova “na te tauia mai o e matuā saili ia te ia”? (Eperu 11:6) O le mataʻu moni lenā i le Atua.—Salamo 115:11.
13. Aiseā na mafai ai e Iosefa ona faamatalaina ma le tonu o ia lava o se tagata na “mataʻu i le Atua”?
13 Seʻi o tatou iloiloina se isi faataʻitaʻiga o le mataʻu faale-Atua sa faaalia i gaoioiga—o Iosefa lea. I le avea o se auauna i le aiga o Potifara, sa feagai ai i aso uma lava Iosefa ma omiga e faia ai le mulilua. E foliga mai sa leai se auala e mafai ai ona ia ʻalofia le fetaui pea ma le avā a lona matai, lea na faaauau pea ona ia faia ane ni faatosinaga i amioga lē mamā iā te ia. Mulimuli ane, ina ua ‘tago atu le fafine i le ofu o Iosefa,’ sa ‘sola o ia, ma alu i fafo.’ O le ā na uunaʻia Iosefa e liliuese vave ai mai le leaga? E mautinoa, o le vala autū o le mataʻu lea i le Atua, o le faanaunauga ia ʻalofia le faia o “lenei mea leaga tele ma . . . agasala ai i le Atua.” (Kenese 39:7-12) Na mafai ona faamatalaina ma le tonu e Iosefa o ia lava o se tagata na “mataʻu i le Atua .”—Kenese 42:18.
14. Na faapefea e le alofa o Iosefa ona faaatagia ai le mataʻu moni i le Atua?
14 I tausaga mulimuli ane na oo ina faafesagaʻi ai Iosefa ma ona uso, o ē na faatauina o ia ma le lē alolofa e fai ma pologa. Sa ono faigofie lava ona ia faaaogāina lo latou fememeaʻi mo le fia maua o ni meaʻai o se avanoa lea e taui atu ai i le sesē na latou faia iā te ia. Ae o le faia o ni uiga lē alofa i tagata e lē faaatagia mai ai le mataʻu i le Atua. (Levitiko 25:43) O lea, ina ua lava faamaoniga na vaaia e Iosefa e iloa ai ua suia loto o ona uso, ona ia faamagaloina loa lea o i latou ma le alofa. I le pei o Iosefa, o le a uunaʻia i tatou e lo tatou mataʻu faale-Atua e faatoʻilaloina ai le leaga i le lelei, faapea ai ma le taofia o i tatou mai le paʻūʻū atu i le faaosoosoga.—Kenese 45:1-11; Salamo 130:3, 4; Roma 12:17-21.
15. Aiseā na faafiafiaina ai le finagalo o Ieova i le amio a Iopu?
15 O Iopu o le isi faataʻitaʻiga iloga o se tasi na mataʻu i le Atua. Na fetalai atu Ieova i le Tiapolo: “Ua e mafaufau ea i laʻu auauna o Iopu, auā ua leai se tasi e tusa ma ia i le lalolagi, o le tagata ua sao lana amio ma le amiotonu, o le ua mataʻu i le Atua, ma ʻaloʻalo ese i mea leaga?” (Iopu 1:8) Mo le tele o tausaga, o le sao o le amio a Iopu na faafiafiaina ai le finagalo o lona Tamā faalelagi. Na mataʻu Iopu i le Atua auā na ia iloa lelei o le mea tonu lenā e ao ona fai ma o le auala silisili lea e ola ai. Na alaga Iopu e faapea: “Faauta, o le mataʻu i le Alii [Ieova], o le poto lava lea; o le ʻalo ese i le amio leaga, o le mafaufau lea.” (Iopu 28:28) Ona o ia o se tane faaipoipo, sa lē taulaʻi atu ai ma le lē tatau Iopu i tamaʻitaʻi talavou, sa na ia leʻi taofia foʻi ni faufauga mulilua i lona loto. E ui lava o ia o se tagata mauʻoa, ae na ia teena lona faatuatua atu i ʻoa, ma na ia ʻalofiaina so o se ituaiga o ifoga i tupua.—Iopu 31:1, 9-11, 24-28.
16. (a) I ā auala na faatino ai e Iopu le agalelei? (e) Na faaalia faapefea e Iopu na ia leʻi taofia le lotofaamagalo?
16 Peitaʻi, o le mataʻu i le Atua, o lona uiga o le faia o le mea lelei faapea ai ma le liliuese mai mea leaga. O lea, na faaalia e Iopu le agalelei i ē tauaso, i ē pipili, ma ē matitiva. (Levitiko 19:14; Iopu 29:15, 16) Na malamalama Iopu e faapea “o so o se tasi ua taofia le agalelei i lona lava uso, o le a tuua foʻi e ia le mataʻu i Lē e Ona le Malosi Uma Lava.” (Iopu 6:14, NW) O le taofia o le agalelei e mafai ona aofia ai le taofia o le loto faamagalo po o le teulotoina o se mea o loo ita ai. I le taʻitaʻiga a le Atua, na tatalo ai Iopu mo ana aumea e toʻatolu, ia na faapogaia le tele o faanoanoaga iā te ia. (Iopu 42:7-10) Pe e mafai ona tatou faaalia se uiga talitutusa o le lotofaamagalo agaʻi i so tatou uso talitonu o sē atonu na faatigā iā i tatou i nisi o auala? O se tatalo faamaoni mai le loto mo lē na faatigā mai iā i tatou o le a telē se fesoasoani iā i tatou e foʻia ai lagona ita. O mea lelei na olioli ai Iopu ona o lona mataʻu faale-Atua ua aumaia ai iā i tatou se faaataga o ‘le tele o le agalelei ua teua e Ieova mo e ua matatau ia te ia.’—Salamo 31:19; Iakopo 5:11.
Le Eseesega o le Mataʻu i le Atua ma le Mataʻu i Tagata
17. O le ā e mafai ona faia e le mataʻu i tagata iā i tatou, ae aiseā ua lē o se tofā mamao ai lenā mataʻu?
17 A o uunaʻia i tatou e le mataʻu i le Atua e faia le mea e tonu, ae o le mataʻu i tagata e mafai ona faavaivaia ai lo tatou faatuatua. Ona o lenei la māfuaaga, ina ua faalaeiauina le ʻauaposetolo ina ia avea ma tagata talaʻi maelega o le tala lelei, na fetalai atu ai Iesu iā i latou e faapea: “Aua foi tou te matatau i e fasioti le tino, a e latou te le mafaia ona fasioti le agaga; a e lelei ona outou matatau i le ua mafai ona fano ia te ia le agaga atoa ma le tino i Kēna.” (Mataio 10:28) Na faamatala e Iesu faapea, o le mataʻu i tagata e lē o se tofā mamao, auā e lē mafai e tagata ona faaleagaina o tatou faamoemoe i le ola i le lumanaʻi. E lē gata i lea, e tatou te matataʻu i le Atua ona e tatou te iloa le mataʻutia o lona mana, pe a faatusatusa atu i le faatauvaa o le malosi o loo i atunuu uma. (Isaia 40:15) I le pei o Aperaamo, o loo iā i tatou se mautinoa atoatoa i le mana o Ieova e toe faatutūina mai ai Ana auauna faamaoni. (Faaaliga 2:10) O lea e tatou te faapea atu ai ma le mautinoa: “Afai ua ʻau ma i tatou le Atua, o ai sē faasaga tau mai ia i tatou?”—Roma 8:31.
18. I le ā le auala e tauia ai e Ieova i latou e matataʻu iā te ia?
18 Po o lē e tetee mai iā i tatou o se tagata o le aiga po o se tamaitiiti e sauā i totonu o le aʻoga, ae o le a tatou iloa e faapea “o le mataʻu ia Ieova, o i ai le faatuatuaga malosi.” (Faataoto 14:26) E mafai ona tatou tatalo i le Atua mo le malosi, i le iloa faapea o le a ia faafofoga mai iā i tatou. (Salamo 145:19) E lē taitai ona faagaloina e Ieova i latou e matataʻu iā te ia. Na ia faamautinoa mai e ala i lana perofeta o Malaki, e faapea: “Ona fetautalatalai lea e na matatau ia Ieova; ua liliu mai foi e Ieova ona fofoga, ma ua faafofoga mai; ona tusia lea o le tusi e faamanatu i ona luma, mo e matatau ia Ieova, ma mafaufau i lona suafa.”—Malaki 3:16.
19. O ā ituaiga o mataʻu o le a faamutaina, ae o le ā le ituaiga o le a tumau e faavavau?
19 Ua lata le taimi o le a tapuaʻi atu ai tagata uma o le lalolagi iā Ieova ma o le a mou atu le mataʻu i tagata. (Isaia 11:9) O le a lē toe iai foʻi se mataʻu i le fiaʻai, faamaʻi, solitulafono ma taua. Ae o le a tumau le mataʻu i le Atua seʻia oo i le faavavau, a o faaauau ona faaalia atu iā te ia e ana auauna faamaoni i le lagi ma le lalolagi le faaaloalo tatau, le usiusitai, ma le ava. (Faaaliga 15:4) I le taimi nei, seʻi o tatou aveina i o tatou loto le fautuaga faagaeeina a Solomona: “Aua le losilosi lou loto i e agasala; a ia e mataʻu ia Ieova i le aso atoa; auā afai o i ai le iuga, ona le iuvale lea o lou faamoemoe.”—Faataoto 23:17, 18.
[Faamatalaga pito i lalo]
^ pala. 2 O nisi tagata matutua ua oo ina lē toe matataʻu i lamatiaga pe afai o loo latou galulue e lē aunoa i lalo o tulaga lamatia ona o manaʻoga tau i le galuega. Ina ua fesiligia pe aiseā ua tele ai tagata kamuta ua mutu se tasi o o latou tamatamaʻilima, na tali mai se tufuga e faapea: “Ua latou lē o toe matataʻu i ʻili e alu i le eletise.”
^ pala. 4 E lagona e Ieova lenei ʻinoʻino. Mo se faataʻitaʻiga, ua faamatalaina i le Efeso 4:29 le gagana masoā o “upu leaga.” O le upu Eleni e faaaogā mo le “leaga” e faasino moni atu lava i fualaau ʻaina, o iʻa, po o aano o manu ua namu leaga. O lea faaupuga ua matuā faaata manino mai ai le ʻinoʻino e tatau ona tatou lagonaina e faatatau i upu leaga po o gagana masoā. I se tulaga tutusa, ua masani ona faamatalaina tupua i le Tusi Paia e “inosia.” (Teuteronome 29:17. (NW); Esekielu 6:9) O o tatou uiga masani o le ʻinoʻino i otaota o manu, po o otaotavale, ua fesoasoani iā i tatou e malamalama ai i faalogona o le Atua e faatatau i le ʻinoʻino mo so o se ituaiga ifo i tupua.
^ pala. 6 Mo se faataʻitaʻiga, ia manatu i faamatalaga a le Tusi Paia e faatatau iā Kaino (Kenese 4:3-12); Tavita (2 Samuelu 11:2–12:14); Kiasi (2 Tupu 5:20-27); ma Usia (2 Nofoaiga a Tupu 26:16-21).
Pe E te Manatua?
• E faapefea ona tatou aʻoaʻoina ia ʻinoʻino i mea e leaga?
• Na faapefea ona manatu māmā nisi o tagata Isaraelu i aso o Malaki i le faauōga ma Ieova?
• O le ā tatou te aʻoaʻoina mai iā Aperaamo, Iosefa, ma Iopu e faatatau i le mataʻu i le Atua?
• O lē fea mataʻu o le a tumau, ma aiseā?
[Fesili mo le Suʻesuʻega]
[Ata i le itulau 19]
O mātua atamamai e latou te totōina i mafaufau o a latou fanau se mataʻu lelei
[Ata i le itulau 20]
E pei lava ona liliuese e le mataʻu i tatou mai lamatiaga, e faapena foʻi i le mataʻu faale-Atua ona liliuese ai i tatou mai mea e leaga
[Ata i le itulau 23]
Na tausia pea e Iopu lona mataʻu i le Atua e ui lava ina fesagaʻi ma uō lē moni e toʻatolu
[Faamatalaga i Ata]
Mai le faaliliuga o le Tusi Paia o le Vulgata Latina, 1795