Mātua e—Ia Faamalie Manaʻoga o a Outou Fanau!

E MANAʻOMIA e fanau se taʻitaʻiga ma se aʻoaʻiga alofa, aemaise lava mai o latou mātua. E tusa ai ma lenei tulaga, ua faapea mai ai se faiaʻoga mai Pasili, o Tania Zagury: “O le faanaunauga o tamaiti uma, o le saʻilia lea o fiafiaga. O se mea talafeagai ona faataatitia ni tapulaa. O mātua la e tatau ona faia lenei mea. Pe afai e latou te lē faia, o le a oo la ina lē pulea tamaiti.”

Ae peitaʻi, i le tele o atunuu, o taaʻiga a le sosaiete tuufau ua faamaualugaina ai le saʻolotoga o le tagata lava ia, ua faafaigatā ai ona mulimuli i le fautuaga e pei ona taʻua i luga. O fea la e mafai ona liliu atu i ai mātua mo se fesoasoani? Ua iloa e mātua e matataʻu i le Atua e faapea, o a latou fanau, o “le tofi lea mai ia Ieova.” (Salamo 127:3) I lea, ua latou vaavaai atu ai i le Afioga a le Atua mo taʻiala e tausia ai i latou. Mo se faaaʻoaʻoga, ua faapea mai le Faataoto 13:24: “O le ua tuuna lana sasa, ua ʻinoʻino o ia i lona atalii; a o le ua alofa ia te ia, ua saili le aoaiga mo ia.”

O le faaaogāina e le Tusi Paia o le upu “sasa” e manaʻomia ona malamalama i ai, e lē o faauigaina e na o se faasalaga faaletino; ae ua atagia mai ai le uiga e faapea, ia faia se faasaʻoga, po o le ā lava le auala e faia ai. O le mea moni, i le tulaga masani lava, a le aʻoaʻi i upu e manaʻomia ona avatu ai le aʻoaʻiga tatau e mafai ona faasaʻoina ai ala o se tamaitiiti faalogogatā. Ua faapea mai le Faataoto 29:17: “Ia e aoai i lou atalii, ona e maua ai lea se filemu; e tupu ai le fiafia i lou loto.”

E manaʻomia e tamaiti aʻoaʻiga alofa ina ia aveesea ai uiga e lē o moomia. O sea faasaʻoga maumauaʻi ma le alofa, e faamaonia ai e manatu mamafa le matua i le tamaitiiti. (Faataoto 22:6) O lea, mātua, aua le fiu! O le mulimuli i taʻiala lelei ma le aogā a le Tusi Paia, o le a e faafiafia ai Ieova le Atua ma o le a faaaloalo atu ai foʻi lau fanau iā te oe.