Pe E te Manatua?

Pe na e talisapaia le faitauina o lomiga talu ai nei o Le Olomatamata? Ia seʻi vaai la pe mafai ona e taliina fesili o loo mulimuli mai:

• O le ā le manumalo faaletulafono e aafia ai lotu, na faia ai se vaega a le Faamasinoga Maualuga o Mataupu Faavae i Siamani?

Na toe liuliuina e lenā faamasinoga se faaiʻuga lē saʻo a se isi faamasinoga e faatatau i Molimau a Ieova ma lo latou tulaga aloaʻia o se faalapotopotoga e iai ni aiā faaletulafono. Na taʻua e le faaiʻuga manumalo e faapea, i le tulaga e talafeagai ma le saʻolotoga o tapuaʻiga, e ono ‘usiusitai atu ai se tasi i mataupu silisili a lana lotu’ e sili atu na i lo i poloaʻiga a le faigāmalo.—8/15, itulau e 8.

• O le ā le umi o le vaitaimi na puapuagatia ai Iopu?

E lē o faaalia maia e le tusi o Iopu faapea e tele ni tausaga na puapuagatia ai o ia. O mafatiaga o Iopu ma le taimi na uma ai, na ono tupu i ni nai masina, pe atonu e itiiti ifo na i lo le tausaga.—8/15, itulau e 31.

• Aiseā e mafai ai ona tatou mautinoa, e iai moni le Tiapolo na i lo le na o se talitonuga faanuupō?

Na silafia e Iesu Keriso e iai moni lava le Tiapolo. Sa tofotofoina Iesu e se peresona moni, ae lē o se leaga na iai i totonu iā te ia. (Mataio 4:1-11; Ioane 8:44; 14:30)—9/1, itulau e 5-6.

• Ua taʻua i le Faataoto 10:15 e faapea: “O le oloa o le mauoa, o lona ʻolo malosi lea; a o le mativa o e matitiva, o lo latou malaia lea.” E faapefea ona faamaonia le moni o lenei manatu?

E mafai ona avea le ʻoa ma puipuiga mai nisi tulaga faalētonu e tulaʻi mai i le olaga, e pei lava o se aai ua faamalosia, ona aumaia ai se puipuiga mo i latou o loo nonofo ai. I le isi itu, e mafai ona oo atu i se tulaga leaga le mativa pe a faafuaseʻi ona suia le tulaga o mea.—9/15, itulau e 24.

• O le ā le uiga na amata ai ona ‘valaau tagata i le suafa o Ieova’ i aso o Enosa? (Kenese 4:26)

Na faaaogāina le suafa o le Atua talu mai le amataga o le talafaasolopito o le tagata; o lona uiga, o le valaau lea sa amata a o ola Enosa, e foliga mai e lē o se valaau atu iā Ieova i le faatuatua. Atonu pe sa faaaogā ma le lē migao e tagata le suafa o le Atua e faaigoa ai i latou lava, po o isi tagata o ē sa faaauala atu ai a latou tapuaʻiga, na sa faatagā faafoliga o loo avatu i le Atua.—9/15, itulau e 29.

• O le ā le uiga o le upu “aoaiga” e pei ona faaaogā ai i le Tusi Paia?

E leai ma se faatatauga atu o le upu i se faileagaina po o le faasauā. (Faataoto 4:13; 22:15) O le upu Eleni mo le “aoaiga” e autū lona fesootaʻi atu i faatonuga, aʻoaʻoga, faasaʻoga, ma i nisi taimi, e faasino atu i le faasalaga, ae i se uiga alofa. O le auala tāua e mafai e mātua ona faataʻitaʻi atu ai iā Ieova o le tauivi lea e tatala pea laina o fesootaʻiga ma a latou fanau. (Eperu 12:7-10)—10/1, itulau e 8, 10.

• E faapefea ona faaalia e Kerisiano moni i aso nei faapea, e latou te lagolagoina le pule a le Atua?

I le lagolagoina o le Malo o le Atua, e lē auai Molimau a Ieova i faiga faapolotiki pe faatupuina fouvalega, e oo lava i atunuu o loo faasāina ai Molimau. (Tito 3:1) E latou te faia se sao aogā e pei foʻi o le auala na faia ai e Iesu ma ona uluaʻi soo, ma taumafai e fesoasoani i tagata ina ia latou ola ai e tusa o mea aogā o loo i le Tusi Paia, e pei o le faamaoni, le mamā tauamio, ma uiga lelei agaʻi i galuega.—10/15, itulau e 6.

• O loo faapefea ona tafe vai e maua ai le ola i atumauga o Andes?

O inā o loo faia ai e Molimau a Ieova se taumafaiga e faaoo atu upu moni o le Tusi Paia i tagata, e oo lava i gagana e lua o loo faaaogāina i lea vaipanoa, le gagana Quechua ma le gagana Aymara. O loo asiasi atu Molimau i tagata o loo nonofo i motu o le vaituloto o Titicaca, e aofia ai motu maupuʻepuʻe “opeopea” ia e faia mai i ū o loo ola i totonu o le vaituloto.—10/15, itulau e 8-10.

• O le ā ua foaʻi mai e le Atua e fai mo tatou taʻiala, lea e ono faatusa atu i le faaaogāina o faatonutonuga faakomepiuta i vaalele o loo felaʻuaʻi ai tagata i aso nei?

Ua tuuina e le Atua i tagata se tomai mo le taʻitaʻiga i amioga tatau, se lagona i amioga tatau i totonu o le loto. O lo tatou lotofuatiaifo lea ua tuufaasolo mai. (Roma 2:14, 15)—11/1, itulau e 3-4.

• Aiseā ua matuā tāua ai le maliu o Iesu?

Ina ua agasala le tagata lelei atoatoa o Atamu, sa leiloa ai iā te ia le ola faaletagata mo ia lava, faapea foʻi ma ana fanau. (Roma 5:12) I le avea o se tagata lelei atoatoa, na faataulagaina ai e Iesu lona soifua faaletagata, ma saunia ai le togiola lea ua mafai ai e tagata faatuatua ona maua le ola e faavavau.—11/15, itulau e 5-6.

• O ai tagata Sekutia o loo taʻua i le Kolose 3:11?

O tagata Sekutia o se nuu sa maumausolo i vaipanoa tetele e leai ni laau e ola ai i le konetineta o Asia ma Europa, mai le tusa o le 700 i le 300 T.L.M. O i latou o ni tagata tietie solofanua ma o ni tagata tau mataʻina. Atonu ua faatatauina le Kolose 3:11, e lē i se nuu patino, ae o ni tagata e uiga faanuupō e aupito sili ona leaga.—11/15, itulau e 24-25.

• Aiseā e mafai ai ona tatou faapea atu o le Tulafono Faaauro o se aʻoaʻoga e talafeagai lo tatou uaʻi atu i ai e lē aunoa?

O lenei upu moni faavae mo le taʻitaʻia o amioga sa aʻoaʻoina i aʻoaʻoga a le lotu Iutaia, le lotu Puta, i filosofia faa-Eleni, ma le lotu Confucianism. Peitaʻi ane, o mea na faatonuina mai e Iesu i le Lauga i luga o le Mauga e manaʻomia ai ni gaoioiga mautinoa, ma o loo pāʻia ai olaga o tagata i so o se vaipanoa ma i so o se matua. (Mataio 7:12)—12/1, itulau e 3.