‘O Mai ia te Au . . . o Aʻu Foi e Malolo ai Outou’

O le ‘Talaʻia o le Upu’ e Maua ai le Mālōlōga

O IA o se tagata lelei atoatoa, sa faataunuuina se tofiga tāua. Talu ai sa matuā aogā ana metotia o faatonuga o lea na ʻmatuā taufaiofo ai le motu o tagata i lana aʻoaʻoga.’ (Mataio 7:28) O ia foʻi o se tagata talaʻi sa lē faavaivai. O lona taimi, malosi, ma alāʻoa, sa faaaogā muamua lava mo le talaʻiga o le Malo o le Atua. O le mea moni, sa faimalaga faataamilo Iesu Keriso i lona nuu uma lava i le avea o se tagata talaʻi ma o se faiaʻoga e lē mafaatusalia.—Mataio 9:35.

O le tofiga faanatinati o Iesu, o le talaʻia lea “o le tala lelei o le malo” i ē sa ola ai i lenā vaitaimi ma toleni ona soo i le faia o lenā lava galuega i le lalolagi aoao. (Mataio 4:23; 24:14; 28:19, 20) Po o le a avea ea le mamafa o lo latou tofiga e talaʻi, faapea le tulaga faanatinati ma le matuā telē o lenā galuega ma mea na omia ai ona soo lē lelei atoatoa e leʻi lava ni tomai?

E matuā leai lava! Ina ua uma ona faatonuina ona soo ina ia tatalo atu “i le Alii e ana le saito e seleseleina,” o Ieova le Atua, mo nisi tagata e galulue, ona aauina atu loa lea o i latou e Iesu ina ia aʻoaʻo i tagata. (Mataio 9:38; 10:1) Ona ia faamautinoa atu lea e faapea, o le tiute tauave o le avea ma ona soo—e aofia ai le tofiga e talaʻi—o le a maua ai le mapusaga moni ma le faamāfanafanaga. Na fetalai Iesu: “Ia outou o mai ia te au . . . o aʻu foi e malolo ai outou.”—Mataio 11:28.

Se Puna o le Olioli

Maʻeu se valaaulia ina a māfana, alofa, ma agalelei! Ua faaalia ai i lea lagona le manatu mamafa o Iesu i ona soo. Ua maua e ona soo le mālōlōga i le faataunuuina o la latou tiute tauave e talaʻi “le tala lelei” o le Malo o le Atua. Ua aumaia e lenei mea iā i latou le olioli moni ma le faamalieina.—Ioane 4:36.

I se taimi umi lava a o leʻi afio mai Iesu i le lalolagi, na faamatilatila mai ai i le Tusi Paia e faapea, e tatau ona avea le olioli ma vala autū o le auaunaga paia i le Atua. Na faamaninoina mai lenei mea ina ua pese le faisalamo: “Ia alalaga ia Ieova le lalolagi uma. Ia outou auauna atu ia Ieova ma le fiafia; o mai ia outou i ona luma ma le alaga fiafia.” (Salamo 100:1, 2) I aso nei, ua alalaga fiafia ai tagata o nuu uma iā Ieova, ma o leo o a latou viiga ua pei o le alaga o se ʻautau manumalo. O i latou ua tuutoina atu moni i le Atua, ua ō atu i ona luma “ma le alaga fiafia.” Ma ua talafeagai lelei lenā mea, auā o Ieova “o le Atua fiafia,” o lē e finagalo ina ia maua e ana auauna le fiafia i le faataunuuina o lo latou tuuina atu iā te ia.—1 Timoteo 1:11, NW.

Faifeʻau ua Maua le Mālōlōga

Ua mafai faapefea ona tatou lē vaivai i le galulue mamafa i le faiva i le fanua, ae ua avea moni o se mea e mālōlō ai? Ioe, o le faia o le galuega a Ieova, sa pei o se meataumafa e toe faafouina ai mo Iesu. Na ia fetalai: “O laʻu mea e ʻai, ia ou faia le finagalo o le na auina mai aʻu, ma faaiu lana galuega.”—Ioane 4:34.

E faapena foʻi ona maua le olioli e Kerisiano talaʻi maelega o aso nei a o latou “talaʻi atu le upu.” (2 Timoteo 4:2) Ua taʻua e Connie, o se fafine Kerisiano ua faamatuātagata o lē na te faaalu le sili atu i le 70 itula i le masina i le galuega talaʻi, e faapea: “Pe a uma ona ou auai i le faiva, ou te lagona le lotomalie, fiafia ma le faamalieina, e tusa lava pe ou te vaivai i le faaiʻuga o le aso.”

Ae faapefea pe afai e lē talileleia le feʻau o le Malo? Ua faaauau mai Connie: “E tusa po o le ā le tali e maua mai, ae e leʻi iai lava se taimi na ou faanoanoa ai a o auai atu i le faiva. E lē gata i loʻu iloaina o loo oʻu faia le mea e faafiafia ai Ieova, ae ua ou manatu i ai o se fiafiaga le tautala e uiga i le upu moni auā o loʻu faia faapea, ua tāmau  ai i loʻu loto le faamoemoe ofoofogia mai le Tusi Paia.”

Ua iloa foʻi e isi e faapea, o le fesoasoani atu i tagata e maua le poto saʻo i le Atua, ua uigā ai o latou lava olaga. Ua faapea mai Meloney, o se tamaʻitaʻi talavou o lē e faaaluina e lē aunoa le sili atu i le 50 itula i le masina i le galuega talaʻi: “O le faiva o se mea e mālōlō ai auā ua maua ai se mea e taulaʻi i ai loʻu olaga faapea ma se fuafuaga. Pe a ou auai i le auaunaga, e galoma atu ai faafitauli totino ma omiga i aso faisoo.”

Ua taʻua foʻi e Millicent, o se isi faifeʻau maelega a Molimau a Ieova e faapea: “O le faiva ua matuā uigā ai aso taʻitasi ia ou te faaalu e talanoa atu ai i isi e uiga i le fuafuaga a le Atua mo le fanau a tagata, ma faamatala atu i ai le auala o le a toe faafoʻisia mai ai le Parataiso i le lalolagi. Ua avea lea ma māfuaaga ua moni ai Ieova iā te aʻu i aso uma ma ou maua ai le filemu ma se lotofiafia e lē mafai ona maua i se isi lava mea.”

E Mālōlō ai i Latou e Taliaina

O le mea moni lava, o le faiva faa-Kerisiano e faafouina ai i latou o ē e talaʻia le Malo, ma e faamāfanafanaina ai i latou o ē e taliaina. E ui lava sa aʻoaʻoina se faiaʻoga o se aʻoga e taupousa ma patele i Potukali, ae sa ia lagona e lē o faamalieina e lana lotu ona manaʻoga faaleagaga. E leʻi taliina lava ana fesili faale-Tusi Paia. O le faia e lē aunoa o se suʻesuʻega faale-Tusi Paia ma se tasi o Molimau a Ieova, na faasolosolo ai ona ia maua le malamalamaga faale-Tusi Paia. Sa faafiafiaina le faiaʻoga. Na ia faapea mai: “O Aso Lulu uma lava, ou te faatalitali ai ma le naunau i laʻu suʻesuʻega, ma sa auauaʻi ona taliina aʻu fesili i faamaoniga mai i le Tusi Paia e matuā faatalitonuina ai.” I aso nei, ua avea ai lenei fafine ma auauna tuuina atu a Ieova, ma o loo maua foʻi e isi le mālōlōga mai iā te ia ona o upu moni o le Tusi Paia.

Ua manino mai la e faapea, e lē o lofitūina Molimau a Ieova i le mamafa o lo latou tofiga e talaʻi, po o le matuā telē foʻi o la latou oganuu i le lalolagi. E lē o faavaivai foʻi i latou ona o le lē ano mai o tagata po o teteega. O loo latou matuā filigā i le faataunuuina o lo latou tofiga e talaʻi le Malo. E latou te talanoa ma tagata i le tala lelei i so o se nofoaga e ono maua iai i latou— i se nofoaga e tutū ai loli i le Iunaite Setete (1), i se malae vaalele i Korea (2), i le Andes (3), po o se maketi i Lonetona (4). O loo faaauau pea ona faia ma le fiafia e soo o Iesu i aso nei la latou galuega tauia i le lalolagi atoa. Ma i le faamaoni i lana folafolaga, ua ia avatu le mālōlōga iā i latou ma ua ia faaaogāina i latou e avatu ai le mālōlōga i le toʻatele o isi tagata.—Faaaliga 22:17.