Lipoti a Ē Faalauiloa le Malo

Tuuina Atu e Maturo Faaonapōnei se Molimau i Suetena

O LE upu Eleni mo le “molimau,” o le martyr, lea e sau ai le upu faa-Peretania ua faaliliuina o le “maturo,” o lona uiga, “o sē na te tuuina atu se molimau e ala i lona maliu.” E toʻatele Kerisiano i le uluaʻi senituri na tuuina atu se molimau e faatatau iā Ieova e ala i le maliliu mo o latou talitonuga.

E faapena i le senituri lona 20, e faitau afe Molimau na maliliu ina ua fasiotia e tagata na lagolagoina ma le faamaoni Hitila, talu ai lo latou tausisia o le solitū mai faiga faapolotiki ma le faalotonuu. Ua saunia ai foʻi e nei maturo faaonapōnei se molimau malosi. O le mea lenei na tupu talu ai nei i Suetena.

E fesootaʻi atu ma le faamanatuina o le 50 tausaga talu ona mavae le Taua Lona Lua a le Lalolagi, na amataina ai e le malo o Suetena se faiga tau aʻoaʻoga e aofia ai le atunuu atoa, e faatatau i le Fasiotiga o Tagata (e le ʻAu Nasi). Sa faaigoaina le polokalame o le Talafaasolopito Ola. Na valaaulia Molimau a Ieova ina ia faia ai so latou sao ma faamatala mea na tutupu totino iā i latou.

Na tali atu i ai Molimau e ala i le faaalia o se ata e faaulutalaina, The Forgotten Victims of the Holocaust i le Maota Fono o Molimau a Ieova i Strängnäs. Na auai ai ma Molimau na faasaoina mai i le Fasiotiga o Tagata (e le ʻAu Nasi), e faamatala mea na tutupu iā i latou faatasi ai ma le silia i le 8,400 tagata na asiasi ane na iai foʻi i le uluaʻi aso! I le faaiʻuga o le 1999, na faaalia ai lenei faaaliga i le silia ma le 100 falemataʻaga ma faletusi mo le lautele i Suetena atoa, ma e pe ā ma le 150,000 tagata na matamata ai. O tagata na asiasi ane i ai sa aofia ai ma tagata maualuluga o le malo, sa faia ni a latou faamatalaga lelei e faatatau i mea na latou vaaia.

E leai se isi mea na tupu e fesootaʻi atu ma gaoioiga a Molimau a Ieova i Suetena na faapea le mamao o lona faasalalauina atu i le lautele ma le tele na tali mai ai ma le fiafia. E toʻatele tagata asiasi ane na fesili: “Aiseā na outou lē taʻuina muamua mai ai iā i matou e uiga i mea na oo iā te outou i le Fasiotiga o Tagata (e le ʻAu Nasi)?”

Ina ua uma ona faaalia le ata i lo latou vaipanoa, na lipotia mai ai e se tasi faapotopotoga se 30 pasene o le faatelega i suʻesuʻega faale-Tusi Paia i aiga! Na valaaulia e se tasi Molimau sana uō la te faigaluega ina ia alu atu e matamata i le ata. Na taliaina ma le fiafia e lē la te faigaluega ma sa ia avatu foʻi ma sana uō. Ina ua uma, na faapea atu lana uō na faafaigatā iā te ia ona malamalama pe na faapefea ona iai i tagata lenā faatuatua malosi lea na sili ai iā i latou le faasalaina i le oti na i lo le sainia o se pepa e lafoaʻia ai lo latou talitonuga. Na faapogaia e lenei mea nisi talanoaga atili, ma amataina ai loa ma se suʻesuʻega faale-Tusi Paia ma ia.

E pei lava o a latou aumea i le uluaʻi senituri, na molimau atu ma le lototele nei maturo faamaoni o le senituri lona 20 e faapea, o Ieova o le Atua moni e toʻatasi, o lē ua tatau i ai lo tatou faatuatua lē maluelue ma le faamaoni.—Faaaliga 4:11, LF.

[Faamatalaga i Ata i le itulau 13]

Camp prisoner: Państwowe Muzeum Oświęcim-Brzezinka, courtesy of the USHMM Photo Archives