Fesili Mai le ʻAufaitau

O le ā le uiga o le faaupuga i le Eperu 12:4: “Ua outou le tetee atu e oo i le faasasaaina o outou toto”?

O le faaupuga o le ‘tetee atu e oo lava i le faamasaaina ai o le toto,’ e faauigaina i le oo atu lava i le oti, le faamasaaina moni lava o le toto o loo ola ai se tasi.

Na iloa e le aposetolo o Paulo e faapea ona o lo latou faatuatua, na “onosai ai i le taua tele o tiga” nisi Kerisiano Eperu. (Eperu 10:32, 33) Ina ua taʻua lenā tulaga, e foliga mai ai na faaaogāina e Paulo se faaupuga faafaatusa o le tauiviga i se tauvaga afeleti a Eleni, lea e ono aofia ai tautuuga tamoʻe, piiga, fusuaga, ma le togiina o le uʻamea mafolafola ma le veloina o le tao. E tusa ai ma lenei mea, na ia uunaʻia ai uso Kerisiano i le Eperu 12:1: “Ina tatou tuu ese ia o mea mamafa uma, atoa ma le agasala e faalavelavegofie ai i tatou, ia tatou taufetuli ma le onosai i le ala tanu [“le tuuga,” NW] o i o tatou luma.”

I le Eperu 12:4, atonu na suia ai e Paulo le talanoaina o se vaaiga mai se tautuuga tamoʻe i se fusuaga. (O loo taʻua uma nei fāʻagatāma i le 1 Korinito 9:26.) O tagata fusu i aso anamua, o mea sa fusi ai o latou tapulima ma a latou mea faipelē sa faia i paʻu manu. Atonu o nei fusi sa fafao i ai “ni pulu, uʻamea, po o ni fasi uʻamea, ia na faapogaia ai ni manuʻaga tugā i tagata fusu.” O nei taaloga sauā na faamasaaina ai le toto, ma i nisi taimi na oo ai lava i le oti.

Ae ui i lea, na iai ni faaaʻoaʻoga lelei o auauna faamaoni a le Atua o ni Kerisiano Eperu na pagatia i sauāga ma matuā faileagaina, na oo lava i le oti, na ‘oo lava i le faamasaaina ai o le toto.’ Ia mātau faamatalaga o loo siʻomia ai lea na tataʻi ai e Paulo manatu i mea na oo i auauna faamaoni i aso anamua:

“Na fetogia i latou i maa, na vaevaeesea i ʻili, na tofotofoina, na oti i latou na fasia i le pelu; na feoai solo ma oofu i paʻu mamoe ma paʻu ʻoti; o mativa i latou, ma puapuagatia, ma faasaunoaina.” Ina ua māeʻa lenā, ona faamatilatila mai lea e Paulo o Lē na te Faaatoatoaina lo tatou faatuatua, o Iesu e faapea: “O le na onosai i le satauro, na faatauvaa ia te ia le ma, . . . , ua nofo foi o ia i le itu taumatau o le nofoalii o le Atua.”—Eperu 11:37; 12:2.

Ioe, e toʻatele na ‘tetee atu e oo lava i le faamasaaina ai o le toto,’ o lona uiga, na oo lava i le oti. O lo latou tetee na sili atu na i lo o se tauiviga i totonu faasaga i le agasala o le leai o se faatuatua. Na latou faamaoni e ui i sauāga ogaoga i le tino, na tumau lo latou faamaoni seʻia oo i le oti.

O i latou o ē fou i le faapotopotoga i Ierusalema, atonu na avea i latou ma Kerisiano ina ua fai ifo sauāga mataʻutia i le taimi ua teʻa, sa leʻi fesagaʻia lava e i latou ni tofotofoga ogaoga faapea. (Galuega 7:54-60; 12:1, 2; Eperu 13:7) Peitaʻi, e oo lava i nai tofotofoga iti masani, sa faavaivaia ai lava nisi o i latou mai le faaauau ona faia pea o le tauiviga; na oo ina ‘faavaivai o latou loto ma latou lē lavatia.’ (Eperu 12:3) Na manaʻomia ona latou agaʻigaʻi i luma i le taʻumatuaina. O le a atiina aʻe ai lo latou malosi e onosaia so o se tulaga e tulaʻi mai, tusa lava pe e aofia ai sauāga faaletino e oo lava i le faamasaaina ai o le toto.—Eperu 6:1; 12:7-11.

E toʻatele Kerisiano i aso nei ua latou ‘tetee atu e oo lava i le faamasaaina ai o le toto,’ ua faasalaina i le oti ona latou te lē malolo i lo latou tulaga Faa-Kerisiano. Na i lo le faamataʻuina ai la i upu a Paulo i le Eperu 12:4, e mafai ona tatou malamalama i ai e faapea o loo faailoa mai ai le tele e tatou te filifili ai e tutumau i le tausisia o le faamaoni i le Atua. Mulimuli ane i le tusi lava lea e tasi i tagata Eperu, na tusi ai Paulo: “Ia tatou faafetai ai, tatou te auauna ai i le Atua ma le migao, ma le mataʻu ia fiafia mai ai o ia.”—Eperu 12:28.