O le ā le Tāua o le Upu Moni iā te Oe?
O le ā le Tāua o le Upu Moni iā te Oe?
“E iloa foi e outou le mea moni, e tuu saʻoloto foi outou e le upu moni.”—IOANE 8:32.
1. Na faapefea ona foliga mai e ese le faaaogāina e Pilato o le “upu moni” mai le auala sa faaaogā ai e Iesu?
“PO O le a le upu moni?” Ina ua fesiligia e Pilato lenei fesili, e foliga mai e pau le mea sa naunau atu i ai o ia, o le upu moni i se tulaga e masani ai. I le isi itu, o lea faatoʻā uma lava ona fetalai Iesu e faapea: “O le mea lenei na fanau mai ai aʻu, o le mea foi lenei na ou sau ai i le lalolagi, ina ia ou molimau i le upu moni.” (Ioane 18:37, 38) I le lē pei o Pilato, sa faasino atu Iesu i upu moni autū mai le Atua.
Uiga o le Lalolagi i le Upu Moni
2. O ā fetalaiga a Iesu e faaalia ai le tāua o le upu moni?
2 Na faapea mai Paulo: “E le o i tagata uma le faatuatua.” (2 Tesalonia 3:2) E mafai foʻi ona fai atu faapena i le upu moni. E tusa lava pe tuuina atu se avanoa e iloa ai le upu moni e faavae i le Tusi Paia, ae e toʻatele tagata latou te lē fia amanaʻiaina. Ae peitaʻi, e matuā tāua lava! Na fetalai Iesu: “E iloa foi e outou le mea moni, e tuu saʻoloto foi outou e le upu moni.”—Ioane 8:32.
3. O le ā le lapataʻiga e tusa ai ma aʻoaʻoga taufaasesē e tatau ona tatou utagiaina?
3 Na taʻua e le aposetolo o Paulo e faapea e lē mauaina le upu moni i filosofia ma tū ma aga a tagata. (Kolose 2:8) O le mea moni, o na aʻoaʻoga e taufaasesē. Na lapataʻia e Paulo Kerisiano i Efeso e faapea, afai e latou te tuu atu lo latou faatuatua i filosofia, o tū ma aga a tagata, o le a pei i latou o tama ninii faaleagaga e “felafoaiina e pei o peau, ma feaveaiina i matagi. . . o matāupu, i le pepelo o tagata, i togafiti leaga ua saunia e faasese ai.” (Efeso 4:14) I aso nei, o le “pepelo o tagata” ua faaauilumaina e ala i faamatalaga taufaasesē a i latou e tetee i upu moni mai le Atua. O le upu “faamatalaga taufaasesē” o loo faamatalaina e le New Encyclopædia Britannica o “taumafaiga faifai pea e mimiloina talitonuga, uiga, po o gaoioiga, a isi tagata.” O na faamatalaga taufaasesē e mimilo sesē ai ma le atamai ia upu moni e fai ma mea pepelo ma faaauilumaina ai pepelo e fai ma upu moni. Ina ia mauaina le upu moni e ui i na uunaʻiga faaʻoleʻole, e tatau ona tatou saʻili ma le filigā i le Tusi Paia.
Kerisiano ma le Lalolagi
4. O ai e mafai ona mauaina le upu moni, ma o le ā le matafaioi a i latou ua mauaina?
4 I le faasino atu iā i latou ua avea ma ona soo, na tatalo atu ai Iesu Keriso iā Ieova e faapea: “Ia e faapaiaina i latou i le upu moni; o lau afioga o le upu moni lea.” (Ioane 17:17, LF) O i latou na o le a faapaiaina, po ua tuu esea mo le fuafuaga e auauna iā Ieova ma faalauiloa lona suafa ma le Malo. (Mataio 6:9, 10; 24:14) E ui lava e lē o se meatotino a tagata uma, ae o upu moni a Ieova o loo avea o se meaalofa foaʻi fua mo i latou uma e saʻili atu i ai, po o le ā lava lo latou atunuu, le ituaiga, po o le talaaga faaleaganuu o iai. Na taʻua e le aposetolo o Peteru e faapea: “Ua ou iloa e le faailogaina tagata e le Atua; a e peitai o le mataʻu ia te ia i nuu uma lava, ma fai le amiotonu, ua talia i latou e ia.”—Galuega 10:34,35.
5. Aiseā ua masani ai ona sauāina Kerisiano?
5 Ua tufaina atu e Kerisiano upu moni o le Tusi Paia i isi ae e lē o taliaina i so o se mea. Na lapataʻi Iesu e faapea: “Ona latou tuuina atu ai lea o outou i le puapuaga, ma latou fasiotia outou; e inosia foi outou e nuu uma ona o loʻu igoa.” (Mataio 24:9) I le faamatalaina o lenei fuaiupu, na tusi ai se taʻitaʻi lotu Aialani o John R. Cotter i le 1817 e faapea: “O a latou [Kerisiano] taumafaiga e toe faaleleia olaga o tagata e ala i la latou talaʻiga, e matuā mamao lava mai le lagonaina ai e tagata o le fiafia, ma o le mea moni, ua faapogaia ai le ʻinoʻino o tagata ma faasauā i soo ona o le faalialia o o latou uiga leaga.” O na tagata faasauā e lē “talia le upu moni ma le fiafia i ai, ina ia faaolaina ai i latou.” O le māfuaaga lea, “e auina atu ai e le Atua ia te i latou le galuega e faasese ai, ina ia latou talia le mea pepelo; ina ia faasalaina o i latou uma lava o e le talia le upu moni, a e fiafia i le amio leaga.”—2 Tesalonia 2:10-12.
6. O ā faanaunauga e lē tatau ona atiina aʻe e se Kerisiano?
6 Na timaʻi mai le aposetolo o Ioane i Kerisiano o loo ola i lenei lalolagi leaga: “Aua tou te mananao i le lalolagi, po o mea o i ai i le lalolagi. . . . O mea uma lava o i le lalolagi, o le tuʻinanau o le tino, ma le tuʻinanau o mata, ma le faalialia o lenei olaga, e le mai le Tamā ia, a e mai le lalolagi.” (1 Ioane 2:15, 16) I le taʻua faapea o “mea uma,” na taaofaʻia ai e Ioane mea uma. Ona o lenei la māfuaaga, e lē tatau ai ona tatou atiina aʻe se faanaunauga mo so o se mea o loo ofoina mai e lenei lalolagi lea e mafai ona faaliliu ese ai i tatou mai le upu moni. O le utagiaina o le fautuaga a Ioane o le a aumaia ai se taaʻiga malosi i o tatou olaga. E faapefea?
7. Ua faapefea ona uunaʻia e le poto o le upu moni ē lotofaamaoni?
7 I le tausaga e 2001, na faia ai e Molimau a Ieova i le lalolagi aoao suʻesuʻega faale-Tusi Paia i aiga e silia ma le fā ma le ʻafa miliona, le aʻoaʻoina e lē gata o tagata taʻitoʻatasi ae faapea foʻi ma vaega, i mea e manaʻomia e le Atua mo le mauaina o le ola. O le iʻuga, e 263,431 tagata na papatisoina ai. Ua oo ina tāua le malamalama o le upu moni i nei soo fou, ma ua latou teena aumea leaga ma amioga lē mamā, ma ala e lē faamamaluina ai le Atua, o uiga taatele i lenei lalolagi. Talu ona papatisoina, ua latou faaauau ona latou ola e tusa ai ma tapulaa a Ieova ua faatulaga mo Kerisiano uma lava. (Efeso 5:5) Po o faapenā le tāua o le upu moni iā te oe?
E Tausia i Tatou e Ieova
8. Ua faapefea ona tali mai Ieova i lo tatou tuuina atu, ma aiseā ua talafeagai ai le ‘muai saili o le malo’?
8 E ui lava i lo tatou lē lelei atoatoa, ae e taliaina ma le alofa e Ieova lo tatou tuuina atu, ma ua aapa mai, ma taumafai e taʻitaʻiina atu i tatou iā te ia. O lea ua ia aʻoaʻoina ai i tatou ina ia siitia o tatou sini ma faanaunauga. (Salamo 113:6-8) I le taimi e tasi, ua tuu mai ai iā i tatou e Ieova le avanoa e mauaina ai se faiā totino ma ia, ma ua ia folafola mai e tausia i tatou pe afai e tatou te “muai saili [“pea,” NW] le malo . . . ma lana amiotonu.” (LT) Afai tatou te faia lenei mea ma puipuia i tatou faaleagaga, ua ia folafola mai e faapea: “Ona faaopoopoina atu lea o ia mea uma ia te outou.”—Mataio 6:33.
9. O ai “le auauna faamaoni ma le mafaufau,” ma i le faaaogāina o lenei “auauna,” ua faapefea ona tausia ai i tatou e Ieova?
9 Na filifilia e Iesu Keriso ona aposetolo e toʻa 12 ma faataatia le faavae mo le faapotopotoga o Kerisiano faauuina, lea na taʻua o “le Isaraelu o le Atua.” (Kalatia 6:16; Faaaliga 21:9, 14) Na faamatalaina mulimuli ane o “le ekalesia . . . a le Atua soifua, o le pou tu foi lea ma le lagolago o le upu moni.” (1 Timoteo 3:15) Na taʻua patino e Iesu tagata o lenā faapotopotoga o “le auauna faamaoni ma le mafaufau,” ma o “le auauna e pule, ua faamaoni ma le mafaufau.” O lenā auauna faamaoni ma le mafaufau, na fetalai i ai Iesu e faapea, o le a taatia atu iā i latou le tufatufaina atu i Kerisiano o “mea e ʻai ia te i latou i ona itu aso.” (Mataio 24:3, 45-47; Luka 12:42) A aunoa ma meaʻai, e tatou te matelāina i le fia aai. O le tulaga foʻi lenā e tasi, a lē taumamafa i meaʻai faaleagaga, e oo ina tatou vaivai ma feoti ai faaleagaga. O lea, o le iai o “le auauna faamaoni ma le mafaufau,” o le isi lenā faamaoniga e iloa ai o loo manatu mamafa mai Ieova iā i tatou. Seʻi o tatou matuā talisapaia pea meaʻai tāua faaleagaga ua saunia mo i tatou e ala mai i lenā “auauna.”—Mataio 5:3.
10. Aiseā e tāua ai mo i tatou le auai e lē aunoa i sauniga?
10 O le aveina i fale o meaʻai faaleagaga e aofia ai le suʻesuʻega totino. E aofia ai foʻi le aufaatasi ma isi Kerisiano ma le auai i sauniga a le faapotopotoga. Pe e te manatua meaʻai na e taumafaina i le ono masina, po o le ono vaiaso ua tuanaʻi? Atonu e te lē manatua. E ui i lea, po o le ā lava na e taumafaina, na mauaina ai mea lelei e te manaʻomia mo le tausiaina o oe. Ia, ma atonu foʻi na e taumafaina ni meaʻai talitutusa talu mai lenā taimi. E faapena foʻi i meaʻai faaleagaga o loo aumaia i sauniga faa-Kerisiano. Atonu e tatou te lē o manatuaina vala uma taʻitasi o mea na tatou faalogo i ai i sauniga. E foliga mai foʻi ua masani ona tatou maua mai ai ni faamatalaga e talitutusa. Ae o meaʻai faaleagaga uma lava ia e tāua mo lo tatou mālōlōina lelei. E saunia pea i a tatou sauniga taumafa lelei faaleagaga, ua laulauina i le taimi tatau.
11. O ā o tatou tiute tauave pe a auai i sauniga faa-Kerisiano?
11 O le auai i sauniga faa-Kerisiano ua aumaia ai foʻi iā i tatou se tiute tauave. Ua timaʻia Kerisiano e “fefaamafanafanai,” ia uunaʻia le ʻauuso i le faapotopotoga i le “alofa ma galuega lelei.” O lo tatou sauniuni, le auai, ma le faia o se sao i sauniga uma faa-Kerisiano, e faamalosia ai lo tatou lava faatuatua ma e faalaeiauina ai foʻi isi. (Eperu 10:23-25) I le pei o tamaiti e filifili meaʻai, atonu e manaʻomia ai e nisi faalaeiauga faifai pea ina ia taumafaina ai taumafa lelei faaleagaga. (Efeso 4:13) O se alofa le tuuina atu o lenā faalaeiauga pe a manaʻomia ina ia mafai ai ona tutupu aʻe i latou na e avea ma Kerisiano taʻumatuaina, lea na tusi ai le aposetolo o Paulo e faapea: “O mea aano, mā e matutua ia, o i latou ua masani ona lagona ina ua aʻoaʻosooina e iloa ai le lelei ma le leaga.”—Eperu 5:14.
Tausia o i Tatou Faaleagaga
12. O ai e ana le tiute tauave autū mo lo tatou tutumau i le upu moni? Faamatala.
12 E mafai ona faalaeiau mai a tatou paaga faaipoipo po o o tatou mātua i le ala o le upu moni. I se tulaga tutusa, e mafai foʻi e toeaina i le faapotopotoga ona tausia i tatou o se vaega o le lafu mamoe o loo i lalo o la latou vaavaaiga. (Galuega 20:28) Ae o ai e paʻū i ai le tiute tauave autū, ina ia tatou tūtūmau i o tatou ala ia e faavae aʻe i le upu moni? O le mea moni, o le tiute tauave e fitoitonu iā i tatou lava taʻitoʻatasi. Ua moni lenā i tulaga e masani ai faapea foʻi ma taimi faigatā. Seʻi manatu i le mea na tupu o loo sosoo mai.
13, 14. E pei ona faataʻitaʻia mai i se mea na tupu i se tamaʻi mamoe, e faapefea ona tatou mauaina se fesoasoani faaleagaga ua manaʻomia?
13 I Sikotilani, a o aai ni tamaʻi mamoe i le vao na fafagaina ai, na sē ai loa se tasi o nei mamoe i autafa o se tamaʻi mea maupuʻepuʻe ma taavalevale atu ai i lalo i se papa. Sa leʻi āfaina o ia, ae sa matuā fefe ma lē mafai ona toe aʻe ane i luga. O lea na amata ai ona ia tagi. Na lagonaina atu o ia e lona tinā, ma amata ai foʻi ona tagi o ia seʻia taunuu ane le leoleo mamoe ma laveaʻi le tamaʻi mamoe.
14 Mātau le faasologa o mea na tutupu. Na tagi mai le tamaʻi mamoe mo se fesoasoani, ona faaopoopo atu lea i ai ma le leo o lona tinā i lana tagi, ma na vave ai lava ona gaoioi le leoleo mamoe e laveaʻi le tamaʻi mamoe. Afai e iloa e le tamaʻi mamoe ma lona tinā le lamatiaga ma faavave loa ona tagi mai mo se fesoasoani, pe lē tatau ea ona tatou faia foʻi faapena pe a tatou tautevateva faaleagaga po o le fesagaʻi ma lamatiaga mai le lalolagi a Satani? (Iakopo 5:14, 15; 1 Peteru 5:8) E tatau ona tatou faia faapea, aemaise lava pe afai e leai so tatou poto masani ona e tatou te laiti pe ona e tatou te fou mai foʻi i le upu moni.
O le Mulimuli i le Taʻitaʻiga Mai le Atua e Aumaia ai le Fiafia
15. Na faapeʻī lagona o se tasi o tinā ina ua amata ona ia aufaatasi ma le faapotopotoga Kerisiano?
15 Seʻi manatu i le tāua o le malamalama mai le Tusi Paia ma le filemu o le mafaufau e aumaia iā i latou o loo auauna i le Atua o le upu moni. O se tinā e 70 tausaga le matua o lē na auai atu i le Lotu Egelani i lona olaga atoa na ioe e faia sana suʻesuʻega faale-Tusi Paia ma se tasi o Molimau a Ieova. E leʻi umi ae ona aʻoaʻoina faapea o le suafa o le Atua o Ieova, ma aufaatasi ai i le faapea atu “Amene” i tatalo mo le lautele sa faia mai le loto i le Maota o le Malo i lenā vaipanoa. Na faapea mai o ia ma lona loto ua matuā fiafia: “Na i lo le mafaufau i le Atua faapea e maualuga tele e lē mafai ona faalatalata atu i ai tagata faatauvaa, e foliga mai ua outou vāai iā te ia e pei o se uō pele i lo tatou lotolotoi. O se mea e leʻi tupu muamua lava iā te aʻu.” E foliga mai, o le a lē galo i lenā tagata lotofiafia uluaʻi lagona na oo iā te ia ona o le upu moni. Seʻi o tatou faia foʻi faapena, ia aua lava neʻi galo le tāua o le upu moni iā i tatou ina ua tatou faatoʻā taliaina.
16. (a) O le ā e mafai ona tupu pe a tatou avea le mauaina o tupe ma o tatou sini autū? (e) E mafai faapefea ona tatou mauaina le fiafiaga moni?
16 E toʻatele e talitonu faapea o le a sili atu ona latou fiafia pe a tele ni a latou tupe. Peitaʻi, afai e avea le saʻilia o tupe ma o tatou sini autū i le olaga, e tatou te ono mafatia ai i tigā “e tele o le mafaufau.” (1 Timoteo 6:10, Phillips) Seʻi manatu i le toʻatele o loo faatauina pepa lulu, le faaaluina o tupe i kasino, po o le soona faia o fefaatauaʻiga o tupe i maketi o fefaatauaʻiga, ma moomoo e mauaina ai ni tupe tetele. E matuā toʻaitiiti lava i latou e mauaina tupe e tele o loo latou faamoemoe i ai. Ae e oo lava foʻi iā i latou o loo mauaina tupe e tele, e masani ona latou iloaina faapea o lo latou tamaoaiga na maua faafuaseʻi e lē o aumaia ai se fiafia. Na i lo lenā, o le fiafiaga tumau e sau mai i le faia o le finagalo o Ieova, le galulue faatasi ma le faapotopotoga Kerisiano i lalo o le taʻitaʻiga a le agaga paia o Ieova, ma le fesoasoani a ana agelu. (Salamo 1:1-3; 84:4, 5; 89:15) Pe a tatou faia lenei mea, e ono oo mai ai iā i tatou ni faamanuiaga e leʻi faatalitalia. Po o tāua tele le upu moni iā te oe e aumaia ai na faamanuiaga i lou olaga?
17. O le ā ua faaalia e faatatau i uiga o le aposetolo o Peteru talu ai lona nofo i le fale o Simona le fai paʻu o manu?
17 Seʻi manatu i le mea na tupu i le aposetolo o Peteru. I le tausaga e 36 T.A., sa ia faia ai se malaga faamisionare i le Laugatasi o Sarona. Na ia mālōlō i Lita, lea na ia faamālōlō ai le tagata e maʻi i le supa e igoa iā Ainea ona faaauau atu ai lea i le taulaga o vaa i Iopa. O i inā na ia faatūina ai Toreka. Ua taʻu mai iā i tatou i le Galuega 9:43 e faapea: “Ona nofo ai lea o ia i Iopa e tele aso i le tasi tagata o Simona le igoa, o le fai paʻu o manu.” O lenei faamatalaga puupuu ua faaalia ai uiga lē faailoga tagata o Peteru a o ia auauna atu i tagata o lenā aai. E faapefea? Ua tusi Frederic W. Farrar o se tagata atamai i mataupu faale-Tusi Paia e faapea: “E leai se tagata e maumauaʻi ma faamaoni mo le Tulafono Tuugutu [faa-Mose] e mafai ona faamalosia e nofo i se fale o se fai paʻu o manu. O le feagai i aso taʻitasi ma paʻu o manu ma tino mamate o manu eseese lea e masani ai lenei galuega ma mea o loo faaaogā ai, ua avea ai o se tulaga e lē mamā ma inosia i le vaaiga a i latou uma e maumauaʻi i le tulafono.” Ua taʻua e Farrar faapea, e tusa foʻi pe lē felataʻi le fale o Simona lea e fai ai paʻu o manu ma lona ‘fale e latalata i le sami’, ae sa faia e Simona ‘se galuega sa vaai i ai ma le ʻinoʻino ma o lea sa itiiti ai le faaaloalo iā i latou uma sa faia lenā galuega.”—Galuega10:6.
18, 19. (a) Aiseā na lē mautonu ai Peteru i le faaaliga na ia mauaina? (e) O le ā le faamanuiaga e leʻi faatalitalia na mauaina e Peteru?
18 Na taliaina e Peteru o lē e lē faailoga tagata le agalelei o Simona, ma o i inā na mauaina ai e Peteru se taʻitaʻiga mai le Atua sa ia leʻi faatalitalia. Na ia vaaia se faaaliga lea na faatonuina ai o ia e ʻai i manu e lē mamā e tusa ai ma le tulafono faa-Iutaia. Na teena e Peteru faapea e na te leʻi “ʻai lava se mea e sa, po o se mea e leaga.” Ae na faatolu ona taʻu atu iā te ia faapea: “O mea ua faamamāina e le Atua, aua e te taʻua e sa.” Ua talafeagai ona “masalosalo Peteru i lona lava loto pe se a lea faaaliga ua iloa e ia.”—Galuega 10:5-17; 11:7-10.
19 Sa leʻi iloa e Peteru faapea o le aso na muamua atu i Kaisareia, lea e 30 maila (50 kilomita) le mamao ese, na iloa ai foʻi se faaaliga e se tagata o Nuu Ese e igoa iā Konelio. Na faatonuina e le agelu a Ieova ia Konelio e auina atu ni auauna e saʻili iā Peteru i le fale o Simona le fai paʻu o manu. Na aauina atu e Konelio ana auauna i le fale o Simona, ma na latou ō ane ai faatasi ma Peteru i Kaisareia. O i inā na ia talaʻi atu ai iā Konelio ma lona ʻauaiga ma uō. O le iʻuga, na avea i latou ma uluaʻi tagata lē peritomeina o Nuu Ese na talitonu ma mauaina le agaga paia e avea ai ma suli o le Malo. E ui lava sa leʻi peritomeina tane na iai, ae o i latou uma lava na faalogo i upu a Peteru na papatisoina i latou. Na tatala ai i inā le avanoa mo tagata o nuu ese, ia na vāai i ai e lē mamā i le vaaiga a tagata Iutaia, e avea ai ma vaega o le faapotopotoga Kerisiano. (Galuega 10:1-48; 11:18) Maʻeu se avanoa faapitoa na mauaina e Peteru—o le māfuaaga ona na tāua iā te ia le upu moni ma taʻitaʻiina ai o ia e utagia le taʻitaʻiga mai iā Ieova ma gaoioi ai ma le faatuatua!
20. O le ā le fesoasoani a le Atua ua tuuina mai iā i tatou pe a faamuamua le upu moni i o tatou olaga?
20 Na timaʻi Paulo e faapea: “Ia tautalatala faamaoni, ia tutupu i tatou ia te ia i mea uma i le alofa, o le ulu lava ia, o ia foi o Keriso.” (Efeso 4:15, NW) Ioe, o le a aumaia e le upu moni iā i tatou le fiafiaga e lē mafaatusalia i le taimi nei, pe a tatou faamuamuaina i o tatou olaga ma faatagaina Ieova e ala i lona agaga paia, e taʻitaʻiina o tatou laasaga. Ia teu foʻi i mafaufau le lagolagosua a agelu paia i la tatou galuega faaevagelia. (Faaaliga 14:6, 7; 22:6) Maʻeu se faamamaluina o i tatou i lo tatou mauaina o lea lagolagosua i le galuega ua faatonuina i tatou e Ieova e fai! O le tausia o le faamaoni o le a taʻitaʻiina ai i tatou e vivii iā Ieova, o le Atua o le upu moni, e oo lava i le faavavau. Pe e iai ea se mea e sili atu ona tāua na i lo lenā?—Ioane 17:3.
O le ā ua Tatou Aʻoaʻoina
• Aiseā ua lē toʻatele ai tagata e taliaina le upu moni?
• E faapefea ona vaai Kerisiano i mea a le lalolagi a Satani?
• O ā o tatou uiga e tatau ona iai e tusa o sauniga, ma aiseā?
• O le a le tiute tauave o loo iā i tatou mo le tausiaina o i tatou faaleagaga?
[Fesili mo le Suʻesuʻega]
[Faafanua/Ata i le itulau 18]
(Tagaʻi i le lomiga mo le ata atoa)
SAMI TELE
Kaisareia
LAUGATASI O SARONA
Iopa
Lita
Ierusalema
[Ata]
Na mulimuli Peteru i le taʻitaʻiga a le Atua ma selesele ai i faamanuiaga e leʻi faatalitalia
[Faamatalaga i Ata]
Faafanua: Mountain High Maps® Copyright © 1997 Digital Wisdom, Inc.
[Ata i le itulau 13]
Na molimau Iesu i le upu moni
[Ata i le itulau 15]
I le pei o meaʻai faaletino, e tāua foʻi meaʻai faaleagaga mo lo tatou mālōlōina faaleagaga