O le Papatisoga o Clovis—1,500 Tausaga o le Lotu Katoliko i Falani

“I LE suafa o le Pope, pa,” o upu na sa iai i se feau na tusia e iai faatasi ma se pomu i totonu o se falesā i Falani, lea na tuu e asiasi atu i ai Pope Ioane-Paulo II iā Setema i le 1996. O se faaaʻoaʻoga matuiā lenā o teteega na iloga ai lana asiasiga lona lima i le motu autū o Falani. E ui i lenā, ae sa auai atu i ai le toetoe lava 200,000 tagata i le aai o Falani o Reims i lenā tausaga ina ia faamanatuina faatasi ma le pope le 1,500 tausaga o le faaliliuina o Clovis, le tupu o se vaega o tagata Siamani, i le Lotu Katoliko. O ai lenei tupu e ana le papatisoga ua taʻua o le papatisoga o Falani? Ae aiseā na avea ai le faamanatuina o lea tulaga ma mea na tutupu ai ni feteenaʻiga?

Le Emepaea na Fai Ifo

Na soifua mai Clovis, le atalii o Childeric I, le tupu o tagata Salian Frank, i le 466 T.A. I le sosoo ai ma le faatoʻilaloina o i latou e tagata Roma i le 358 T.A., na faatagaina ai lenei ituaiga o tagata Siamani e nofoia le vaega ua taʻua nei o Peleseuma faatasi ai ma se feagaiga e latou te leoleoina tuaoi ma auina atu ni fitafita mo le ʻautau a Roma. O na fesootaʻiga vavalalata ma tagata Falani ma Roma mulimuli ane, na iʻu ina taaʻina mālie ai olaga o tagata Siamani i faiga faa-Roma. O Childeric I sa lagolagoina tagata Roma, i le tau faasaga lea i osofaʻiga a isi ituaiga o tagata Siamani, e pei o tagata Visigoth ma Saxon. O lea na talileleia ai o ia e tagata Falani ma Roma.

O le itumalo o Roma e taʻua o Gaul e sau mai le vaitafe o le Rhine, i le itu i mātū, e oo atu i Pyrenees, i le itu i saute. Peitaʻi, na leai sē na pulea lenā ogāeleele ina ua mavae le maliu o le taʻitaʻiʻau o Roma o Aetius i le 454 T.A. E lē gata i lea, o le paʻū o Romulus Augustulus, le emeperoa mulimuli o Roma, i le 476 T.A. ma ua lē toe iai foʻi le pulega a le Emepaea o Roma i lona itu i sisifo, na oo ai ina tulaga faalētonu vaega faapolotiki o le malo. O le iʻuga, na pei ai Gaul o se ogafanua e lē o nofoia o loo faatalitali i se tasi o ia ituaiga o loo nofoia ona laufanua e pulea o ia. Sa lē o se mea na faateʻia ai le amata ona taumafai o Clovis e faalautele atu tuaoi o lona malo ina ua soloaʻi ane ina ua mavae lona tamā. I le 486 T.A., na ia faatoʻilaloina ai lē na fai ma sui mulimuli o Roma i Gaul i se taua e latalata ane i le aai o Soissons. O lona manumalo na mafai ai ona ia pulea uma ogaeleele e i le va o le vaitafe o Somme, i le itu i mātū, ma le vaitafe o Loire, i le ogatotonu ma le itu i sisifo o Gaul.

O le Tagata o le a Avea ma Tupu

I le lē pei o isi ituaiga o Siamani, na tumau pea le tulaga faapaupau o tagata Frank. Peitaʻi, na avea le faaipoipo atu o Clovis iā Clotilda o  se purinisese mai i Burgundy, o se taaʻiga malosi i lona olaga. Na taumafai ai ma le filigā Clotilda, o se Katoliko maumauaʻi, e faaliliu lana tane. E tusa ai ma le talafaasolopito faamaumauina na tusia e Gregory mai i Tours o le senituri lona ono T.A., na folafola ai e Clovis lona tuua o talitonuga faapaupau pe afai o le a tuuina atu e le Atua o Clotilda le manumalo iā te ia, a o tau faasaga i le ituaiga o Alemanni i Tolbiac (Zülpich, Siamani), i le 496 T.A. E ui na toetoe lava a faiaʻina le ʻautau a Clovis, ae na fasiotia lava le tupu o Alemanni ma na malolo lana vaegāʻau. O le manatu o Clovis, o le Atua o Clotilda lea na tuuina atu iā te ia le manumalo. E tusa ai ma talitonuga masani, na papatisoina Clovis e le “Sagato” Remigius i le malumalu o Reims, iā Tesema 25, 496 T.A. Peitaʻi, e talitonu nisi faapea e foliga mai o se aso mulimuli ane na papatisoina ai, i le 498/499 T.A.

Na lē taulau taumafaiga a Clovis e fāoa le malo o Burgundy i saute i sasaʻe. Ae na taulau ana taumafaiga faasaga i tagata Visigoth ina ua ia faatoʻilaloina i latou i le 507 T.A. i Vouillé, e latalata i Poitiers, lea na ia puleaina ai le tele o le malo o Gaul i saute i sisifo. I le amanaʻiaina o lona manumalo, na faaeaina ai Clovis e fai ma konesula e le emeperoa o le Emepaea o Roma i Sasaʻe, o Anastasius. O lea na maua ai e ia se tulaga e maualuga aʻe i lo o isi uma tupu o le itu i sisifo, ma o lana pulega sa faamaonia faaletulafono i manatu o tagata Falani ma Roma.

I lona puleaina o ogaeleele o tagata Frank ia sa nonofo i laufanua e tuaoi ma le vaitafe o le Rhine, na faia ai e Clovis ia Pale ma ona laumua. I tausaga faaiʻuiʻu o lona soifua na ia faamalosia ai lona malo e ala i lona tuuina atu i ai o tulafono tusitusia o le Lex Salica, ma taloina ai se fono a le lotu i Orléans ina ia faamaʻotiina faiā a le Lotu ma le Malo. E oo ane i le taimi na maliu ai, pe ā o Novema 27, 511 T.A., na o ia lava sa avea ma taʻitaʻi o le tolu vaefā o Gaul.

Ua taʻua e le New Encyclopædia Britannica le faaliliuina o Clovis i le faatuatuaga Katoliko “o se tai liliu i le talafaasolopito o Europa i sisifo.” Aiseā na matuā tāua ai lava le faaliulotuina o lenei tupu faapaupau? O le mea moni lava na filifili Clovis e liliu i le lotu Katoliko ina ia tetee atu ai i le talitonuga faa-Ariu.

O le Finauga i le Talitonuga Faa-Ariu

I le pe ā ma le 320 T.A., na amata ai ona faasalalauina e Ariu, o se patele i Alexandria, i Aikupito, ni manatu e ese mai e tusa ai o le Tolutasi. Na teena e Ariu le tutusa o le Alo ma le Tamā. E lē mafai ona avea le Alo ma Atua pe tutusa ma le Tamā, ona e iai le amataga o le Alo. (Kolose 1:15) Ae o le agaga paia, na talitonu  Ariu o se peresona ma e maualalo ifo i lo le Tamā ma le Alo. O lenei talitonuga na taaʻina ai le toʻatele, na oo ina faatupuina aʻe ai ni feteenaʻiga malolosi i le lotu. I le 325 T.A., i le Fono i Nicea, na faaaunuʻua ai Ariu ma faalēaogāina ai ona talitonuga. *

Peitaʻi, sa leʻi faaiʻuina ai i inā le finauga. Sa faaauau pea lenei fefaloaʻiga i talitonuga pe ā ma le 60 tausaga, faatasi ai ma emeperoa sa soloaʻi ane e tau fai eseese uma lava itu sa latou ʻau i ai. Mulimuli ane, i le 392 T.A., na fai ai loa e le Emeperoa o Theodosius I le faa-Katoliko ma lana aʻoaʻoga o le Tolutasi o le lotu a le Malo o le Emepaea o Roma. I taimi lenā na faaliliuina ai e Ulfilas, o se epikopo Siamani tagata Goth i le talitonuga faa-Ariu. Na vave lava ona taliaina le “Faa-Kerisiano e isi ituaiga o Siamani.” *

E oo ane i le taimi o Clovis, na oo ai le Lotu Katoliko i Gaul i se tulaga faalētonu. Sa taumafai ai lava tagata Visigoth na liliu i talitonuga faa-Ariu e tineia le lotu Katoliko e ala i le teena o le toe faia o ni sui o epikopo ua maliliu. E lē gata i lea, na lutia le lotu i fevaevaeaʻiga a ni pope se toʻalua, ma o patele o loo i ia itu e feteenaʻi o loo fefasiotiaʻi ai lava i latou i Roma. E faaopoopo atu i lenei fenuminumiaʻi, na tusia ai e nisi tusitala Katoliko se manatu e faapea o le tausaga e 500 T.A. o le a faailogaina ai le iʻuga o le lalolagi. O lea la, na vaai i le faaliliuina o lenei toa Siamani i le faa-Katoliko o se mea lelei na tupu, na faaataata mai ai “le meleniuma fou o tagata paia.”

Ae o ā faanaunauga na iā Clovis? E ui atonu sa iai ni uunaʻiga faalelotu iā te ia, ae e mautinoa sa ia mafaufau foʻi i ni sini faapolotiki. E ala i le filifili e liliu atu i le faa-Katoliko, na talileleia ai Clovis e tagata Katoliko o Gaul ma Roma ma sa lagolagoina o ia e le pulega maualuga a le lotu. Na mautinoa ai lava le aogā o lenā tulaga iā te ia pe a faatusa i ē na faatautavā ane iā te ia e tusa ai ma tulaga faapolotiki. Na taʻua e le New Encyclopædia Britannica e faapea, “o lona faatoʻilaloina o Gaul na avea o se taua o le faasaʻolotoina mai le nofo pologa i tagata Ariu lē talitonu.”

O le ā Tonu le Ituaiga Tagata e Iai Clovis?

A o leʻi oo i le taimi o le faamanatuina o lona faaliliuina lea na faia i le 1996, na fai se faamatalaga a le akiepikopō o Reims, o Gérard Defois, e faatatau iā Clovis e faapea “o ia o se faailoga o se liulotu e lē gata ina lelei ona fuafuaina ae sa faatautaia foʻi ma le poto.” Peitaʻi, na faapea mai le tusitala Falani o Ernest Lavisse: “O le faaliliuina  o Clovis sa leʻi suia ai ona uiga; sa leʻi pāʻia foʻi lona loto i uiga agaalofa ma le filemu o le Evagelia.” Na faalauiloa mai e le isi tusitala: “Sa ia ole atu iā Keriso na i lo o Odin [o se atua o tagata Norse] mo se fesoasoani, ae sa leʻi suia ai o ia. Sa faapei lava Clovis o uiga o Konesetatino ina ua mavae lona liliu atu i le faa-Kerisiano, na amata ai ona ia gaoioi i se fuafuaga e faamaopoopo lana pulega e ala i le fasiotia faasolosolo o ē sa tetee i lana pulega. Na ia fasiotia “ona tauaiga uma tusa lava pe e matuā mamao lava se faiā.”

Ina ua mavae le maliu o Clovis, na amata ona faaofi mai ai ni tala fatu e sii aʻe ai lona tulaga mai le avea o se fitafita sauā i le avea ma tagata paia. Na manatu i le tala a Gregory o Tour, lea na tusia toetoe lava atoa le senituri mulimuli ane ai, e faapea o se taumafaiga ina ia faavasega faatasi Clovis ma Konesetatino, o le emeperoa muamua lea o Roma na taliaina le “Faa-Kerisiano.” E ala foʻi i le faapea mai na papatisoina Clovis ina ua 30 ona tausaga, na faafoliga mai ai na taumafai Gregory e faatusatusa atu Clovis iā Keriso.—Luka 3:23.

Na faaauau ona faasalalau atu na manatu e le epikopo i Reims, o Hincmar, i le senituri lona iva. I le taimi a o tauvā ekalesia eseese mo tagata femalagaaʻi mo mea faalelotu ina ia faimalaga atu i o latou malumalu, na ia tusia ai le talaaga o le olaga o le epikopo na muamua atu iā te ia, o “Sagato” Remigius, e foliga mai o lona faanaunauga ina ia taʻutaʻua lana lotu ma faateleina ai le tamaoaiga. I lana tala, na taʻua ai le aumaia e se lupe paʻepaʻe o se tamaʻi fagu o loo iai se suauu e faauuina ai Clovis i lona papatisoga—e manino sa faasino atu i le faauuina o Iesu i le agaga paia. (Mataio 3:16) O lea, na faataatia ai e Hincmar se sootaga i le va o Clovis, o Reims, ma le pulega ma taliaina ai le manatu e faapea o Clovis, o ia o lē ua faauuina a le Alii. *

Se Faamanatuga na Faia ai ni Fefaloaʻiga

Na faapea mai le peresitene muamua o Falani o Charles de Gaulle: “I loʻu manatu, o le talafaasolopito o Falani na amata mai iā Clovis i le filifilia ai o se tupu o Falani e tagata Frank o Siamani, lea na latou faalauiloaina ai Falani.” Peitaʻi, sa lē o le auala lenā na manatu i ai tagata uma. Sa iai se fefaloaʻiga e tusa ai o le faamanatuina o le 1,500 tausaga o le papatisoga o Clovis. I le avea o se atunuu na maʻoti le faaeseeseina ai o le Lotu ma le Malo talu mai le 1905, e toʻatele na faitioina ai le auai atu o le Malo i se faamanatuga faalelotu. Ina ua faasilasila i le fono a le aai o Reims ni fuafuaga ina ia fausiaina se pulelaa mo le asiasiga a le pope, na faalēaogāina e nisi tagata i le tāpā o se faaiʻuga mai le faamasinoga e faapea ua solia le tulafono faavae. Na manatu isi e faapea sa taumafai le lotu e faaofi mai ana tapulaa ma lana pule faalemalo i Falani. O isi mea na atili lavelave ai le faamanatuga, o le faaaogāina lea o Clovis e fai ma ata o le National Front ma nisi vaega mapolotu o Katoliko.

Na faitioina e nisi le faamanatuga i se vaaiga faaletalafaasolopito. Na latou faapea mai o le papatisoga o Clovis, sa leʻi liliuina ai Falani i le Katoliko, ona o lenei lotu ua loa ona mauaa i tagata Falani ma Roma. Na latou faapea mai foʻi, sa leʻi faailogaina e lona papatisoga le tulaʻi mai o Falani o se malo. I a latou iloiloga, o le avea o Falani ma malo e foliga mai sa faataunuuina ina ua vaeluaina le malo o Charlemagne i le 843 T.A., lea na fai ai Charles le Bald ma tupu muamua o Falani, ae lē o Clovis.

 1,500 Tausaga o le Lotu Katoliko

O faapefea mai i aso nei le tulaga o le lotu Katoliko i Falani talu le silia ma le 1,500 tausaga o avea ma “afafine ulumatua a le Lotu”? Seʻia oo atu i le 1938, o Falani na aupito sili ona toʻatele ai tagata Katoliko ua papatisoina. Ae i aso nei, ua tulaga ono ma ua sili atu ai atunuu e pei o Filipaina ma le Iunaite Setete. Ae mai le 45 miliona o tagata lotu Katoliko i Falani, e na o le 6 miliona e auai atu e lē aunoa i Misasa. O se suʻesuʻega lata mai i tagata Katoliko i Falani ua faaalia ai le 65 pasene “e lē amanaʻiaina aʻoaʻoga a le Lotu e faatatau i mataupu faaleituaiga,” ma o le 5 pasene o i latou, ua manatu e “leai se tāua” o Iesu. O na manatu lē lelei na uunaʻia ai le pope e fesiligia tagata Falani a o iai i lana asiasiga i le 1980: “Falani e, o le ā se mea o outou faia e tusa ma la outou tautoga o le papatisoga?”

[Faamatalaga pito i lalo]

[Faafanua i le itulau 27]

(Tagaʻi i le lomiga mo le ata atoa)

O TAGATA SAXON

Vaitafe o Rhine

Vaitafe o Somme

Soissons

Reims

Pale

GAUL

Vaitafe o Loire

Vouillé

Poitiers

PYRENEES

O TAGATA VISIGOTH

Roma

[Ata i le itulau 26]

O le faaataga o le papatisoga o Clovis i se manusikulipi o le senituri lona 14

[Faamatalaga i Ata]

© Cliché Bibliothèque nationale de France, Paris

[Ata i le itulau 28]

Ata na vaneina o le papatisoga o Clovis (lē o loo i le ogatotonu) i fafo o le Malumalu o Reims, i Falani

[Ata i le itulau 29]

O le asiasiga a Pope Ioane Paulo II i Falani e faamanatuina le papatisoga o Clovis lea na faatupuina ai ni fefaloaʻiga