“Ua Atili ai Ona Matou Alolofa”

I LE Aso Faraile, iā Mati 31 o le 2000, na pa aʻe ai le Mauga o Usu i Hokkaido, i Iapani, ina ua mavae le 23 tausaga e aunoa ma se mea na tupu ai. E faitau afe tagata na nofoia le aai na sosola ese mai le vaipanoa sa lamatia. E toʻatele tagata na lē toe iai ni o latou fale ma a latou galuega, ae o le itu e faafetaia, ona e aunoa ma se tasi o i latou na maliu ai. Sa aofia ai i tagata na sosola ese, le toʻa 46 o Molimau a Ieova, peitaʻi sa leʻi tuulafoaʻia i latou.

O le aso lava na pa ai le mauga, na fesoasoani ai se faifeʻau Kerisiano femalagaaʻi o loo auauna i lenā vaipanoa, e fai ni fuafuaga mo galuega laveaʻi. E leʻi pine ae taunuu ane fesoasoani laveaʻi mai faapotopotoga tau lalata ane. Sa vave ona faatulaga se komiti mo galuega laveaʻi, e ala mai i le vaavaaiga a le lālā a Iapani, ma na solo ane meaalofa tautupe mo lenei fuafuaga, mai i Molimau a Ieova i itu eseese uma o Iapani. Ina ia lagolagoina pea galuega faaleagaga, sa aauina atu ai ni faifeʻau faataimi atoa a Molimau a Ieova, i faapotopotoga sa sili ona āfaina, ma sa faifai pea ona asiasi atu le ovasia o le matagaluega i lenā vaipanoa, ina ia avatu se fesoasoani i le itu tau i faalogona ma le faaleagaga.

Sa faaauau ona faia e Molimau i lenā vaipanoa na aafia a latou sauniga faa-Kerisiano i le taimi o mafatiaga, e ala i le faaaogāina o fale o aiga o i se nofoaga sa saogalemu. Ina ua maua le faatagaga e mafai ai ona toe foʻi atu i le vaipanoa lea sa tū ai le Maota o le Malo, ona toe foʻi atu lea o uso ma latou maua i ai se fale ua sipasipa solo, ua taʻetaʻei, ma ua faaleagaina. Sa lē mamao ese mai le Maota o le Malo le mea na iai le mauga mū fou lea na sasao aʻe, ma sa mafiafia pea le alu aʻe o le asu. Sa taumanatu Molimau, ‘Pe atamai ona toe fai ai pea sauniga i lenei nofoaga? Faamata e mafai ona toe faaleleia le Maota o le Malo?’

Ona faia lea o le faaiʻuga ina ia fausia se maota fou o le Malo i se nofoaga e latalata ane, ae sili atu ona saogalemu. Sa fesoasoani ane le Komiti o Faugāfale. O seleni na faameaalofa ane e Molimau mai vaega eseese o le atunuu, sa faaaogāina mo lenei galuega. Na vave ona maua se fanua, ma ona o le fesoasoani a le faitau selau o le ʻautauofo, na mafai ai ona faamāeʻaina se maota fou o le Malo i se taimi puupuu lava. I le Aso Sa, Iulai 23, 2000, na faia ai le uluaʻi sauniga i lenei maota fou o le Malo sa fausia, ma e toʻa 75 tagata na auai atu i ai. E toʻatele i latou o le aofia na maligi o latou loimata ona o le olioli. Ina ua faapaiaina le Maota o le Malo iā Oketopa o lenā lava tausaga, o le ootia tele o le loto o se tasi o toeaina o lo latou faapotopotoga na ala ai ona faapea mai: “Na avea le mauga mū ma pogai o faigatā ma mafatiaga. Peitaʻi, o lenei maota ua toe liua ai lo matou matataʻu i le olioli. Ua atili ai ona matou alolofa iā Ieova ma o matou uso pele Kerisiano!”

[Faamatalaga i Ata i le itulau 19]

Le pa aʻe o le Mauga o Usu: AP Photo/Koji Sasahara